นังซื รโปะ ปาวโล ละ คริตซจัก เมือง เทซะโลนิกา (ปัป ติ)
ฟวยจ อาวต ปาวโล นึง เวียง ฟีลิปปี เญือม โฮว ครอฮ อื ไลลวง พะจาว โฮน ลอา นึง อื, ฮอยจ โรฮ นึง เมือง เทซะโลนิกา. ไก โฮวน ปุย ป ฆวต ยุง ไลลวง พะเยซู นึง เมือง เทซะโลนิกา เซ. โม ยิว ป โอ ฆวต เจือ พะเยซู นา เซ วัว ป ยุฮ ปาวโล รพาวม อื. ซาวป ตอก ซ ยุฮ แตะ ป โซะ ละ ปาวโล ฆาื อื. เญือม โฮวน ป โคมเฮง อื ตอก เซ, ปาวโล จัมเปน ตอ ฮา เมือง เทซะโลนิกา ฆาื อื, ฮอยจ เมือง เบ่โรยา. กังเคะ เอ เญือม เอีจ ลอต ปาวโล ฮอยจ นึง เวียง เอเทน เนอ, ปาวโล ดวน ทิโมที โฮว เคะ โม ป อาวต นึง เมือง เทซะโลนิกา เซ, นึง ไฌม เนอึม ไฌม แนม แตะ โม เซ. ทิโมที เซ โฮว เนอึม. ฮอยจ แม เคะ ปาวโล เญือม อาวต อื นึง เวียง โคริน, อู ไลลวง ตอก มัฮ ตอก มอยฮ โม ป เจือ นึง เมือง เทซะโลนิกา ละ อื.
เญือม ฮมอง ปาวโล ไลลวง โม ป เจือ เซ, ปาวโล ไซฮ เอิน นังซื เฮี, รโปะ อื ละ คริตซจัก นึง เมือง เทซะโลนิกา. ปาวโล ฆวต เกาะ โลม รพาวม อื นึง โฮวน ป โคมเฮง อื. ปาวโล อาวม รพาวม ญันดี่ แตะ นึง พะจาว นึง ฮมอง แตะ ตอก อาวต โม ป เจือ นึง เมือง เทซะโลนิกา เซ ไม่ รพาวม เจือ, ไม่ รพาวม ฮรัก, ไม่ ซโอว แนฮ รพาวม อื ไม่ พะเยซู จาว. เญือม ไซฮ อื นังซื เฮี, ปาวโล อู รพาวม ญันดี่ แตะ ละ คริตซจัก เทซะโลนิกา เซ, อู โรฮ ไลลวง โกะ แตะ เญือม อาวต ดิ แตะ ไม่ อื, อู ตอก แปน แตะ ปิม แตะ ละ อื นึง กัน ยุฮ แตะ เตือง โอยจ อื. ฟวยจ เซ ปาวโล ไซฮ ไลลวง ปันฮา ป เอีจ เกิต ลลาึง อื. โม เซ ตุก รพาวม นึง ไลลวง โม ปุย ไน พะจาว, ป เอีจ ยุม กา ฮอยจ แม พะเยซู นึง ปลัฮเตะ. ฮลัต โม เซ โอ ซ โฮลฮ ป ไมจ เญือม ฮอยจ แม อื. ไก โรฮ ป ซองไซ นึง เวลา ซ ฮอยจ แม พะเยซู นึง ง่อน. ปาวโล รโฮงะ ไลลวง เซ ละ อื. ซตอก โรฮ อื เกือฮ อาวต แนฮ ไม่ รพาวม เจือ แตะ, ไม่ เกือฮ อื ยุฮ ลอป กัน ไมจ ลไล รกวน อื ยุ ฮอยจ แม พะเยซู เซ.
1
1 อาึ มัฮ ปาวโล. อาวต ดิ ไม่ ซีลา ไม่ ทิโมที. เอะ รโปะ นังซื ละ คริตซจัก เมือง เทซะโลนิกา. โม เปะ มัฮ เปอะ ปุย ไน พะจาว ป มัฮ เปือะ เอะ ไม่ ไน พะโองจาว ป มัฮ พะเยซูคริต โรฮ. ปัว กุนมุ่น ไม่ ไมจ เปละ ลโลวง พาวม อาวต ลอป ไม่ โม เปะ.
ไลลวง รพาวม เจือ เนอึม
2 เอะ ญันดี่ ลอป ไม่ พะจาว เบือ โม เปะ โครยญ โฆะ เปอะ. เญือม ไววอน เนอะ ไววอน ลอป เพือ โม เปะ.
3 เญือม ไววอน เนอะ ละ พะจาว ป มัฮ เปือะ เอะ, โตก ลอป ละ กัน ยุฮ โม เปะ เบือ รพาวม เจือ เปอะ, ไม่ ตอก รซอฮ เนอึม รซอฮ แนม เปอะ เบือ รพาวม ฮรัก แตะ, ไม่ ตอก ปุน ไอฮ เปอะ รพาวม ลั่ง แตะ เบือ ซโอว รพาวม เปอะ ไม่ พะโองจาว ป มัฮ พะเยซูคริต ทื เอะ เซ.
4 เอียกปุ, เอะ เอีจ ยุง เงอะ ฮรัก พะจาว โม เปะ ไม่ เลือก อื โม เปะ เอ.
5 ไลลวง กัน ระ ไล ยุฮ พะจาว ป รโฮงะ เอะ ละ เปอะ, มัฮ โตว ลปุง ปลาว ปุย. มัฮ รโฮงะ ละ เปอะ ไม่ อัมนัต ไม่ ลปุ พะจาว. มัฮ ป เนอึม ป แนม ป แจง ป แน โครยญ เจือ. โม เปะ เอีจ ยุง เปอะ ไลลวง ป ยุฮ ป อัฮ เอะ ติ เจน อาวต เตอะ ลลาึง เปอะ. เอะ เอีจ ยุฮ ฮุ ตอก เซ ละ ซ ไก ป มัฮ อื ละ โม เปะ.
6 โม เปะ เอีจ เฮียน เนอึม เปอะ ไล ยุฮ เอะ ไม่ เฮียน โรฮ เปอะ พะโองจาว โรฮ. ปัง โฮลฮ เปอะ โอต ป โซะ ป ไซญ ฆาื ลปุง รโฮงะ เอะ ละ เปอะ, เอีจ ปุน รัป เปอะ ลปุง เซ ไม่ รพาวม ไมจ มวน ป เกือฮ ลปุ พะจาว ละ เปอะ.
7 โม เปะ เอีจ ปุน แปน เปอะ ปิม แตะ ละ โม ป เจือ นึง จังวัต มาซิโด่เนีย ไม่ จังวัต อะคายา เตือง โอยจ อื.
8 ลปุง พะโองจาว เอีจ พรุ เฮือ เน่อึม นึง โม เปะ, มัฮ โตว ฮอยจ นึง จังวัต มาซิโด่เนีย ไม่ จังวัต อะคายา โน่ง. ไลลวง ตอก เจือ โม เปะ พะจาว เซ เอีจ พรุ เฮือ โครยญ โดฮ. เอะ เญือะ จัมเปน โตว อัฮ โอเอีฮ ฆาื อื.
9 ปุย โม เซ เอีจ รโฮงะ ไอฮ อื ไลลวง รโนฮ รชึง โม เปะ เอะ, ไม่ ไลลวง เอีจ ละ โม เปะ ไว แตะ ฮุป นึง เอีญ เปอะ เคะ พะจาว. มัฮ รโฮงะ อื ไลลวง รซอฮ โม เปะ ละ พะจาว เนอึม ป ไอม ลอป เซ,
10 ไม่ ไลลวง รกวน โม เปะ กวน อื ป ซ ฮอยจ เน่อึม เมือง มะลอง เซ. พะจาว เอีจ เกือฮ อื โกฮ ไอม แม เน่อึม ลั่ก ยุม แตะ. เอีจ มัฮ พะเยซู เซ ป ซ เกือฮ เอะ โปน ฮา รพาวม ฮาวก ยุฮ พะจาว ป ซ เปลีฮ อื ละ ปุย เฆียง เฮี.