นังซื รโปะ ปุย ละ โม ป เจือ ไน โม ฮีบรู
นังซื รโปะ ปุย ละ โม ป เจือ พะเยซู ลลาึง โม ฮีบรู เฮี, ไก โตว ป ยุง ป ไซฮ แฮ. ลลาึง โม ฮีบรู เฮี เอีจ ไก ง่อน ป ซองไซ รพาวม ไม่ ฆวต แม ทื แม แตะ ซาซนา ยิว ตอก ไพรม แตะ. ป ไซฮ พะทัม เฮี ซาวป ตอก ซ นุน แตะ รพาวม อื เกือฮ อาวต ตอน อาวต ฮมัน. เพอึก ปุย เกือฮ ยุง มัฮ พะเยซู เซ ควน เปลีฮ พะจาว ลปุง เนอึม นึง, มัฮ ป ระ ฮา โอเอีฮ ไฮญ โครยญ เจือ. ป ไซฮ พะทัม เฮี ไก ลอวย เจือ ป เนน อื.
(1) พะเยซู มัฮ กวน พะจาว ป ไอม ลอป. เอีจ ยุง เนอึง แตะ ป อัฮ พะจาว โครยญ เจือ เบือ โอต อื ป โซะ ปอ ยุม แตะ. มัฮ เนอึม ป ระ ฮา โม ป ซึป ลปุง พะจาว ไม่ โม เตปด่า, ไม่ ระ โรฮ อื ฮา ไอ โมเซ ป นัปทื โม ยิว เซ.
(2) พะจาว เอีจ รโฮงะ ไลลวง มัฮ พะเยซู ซตุ ระ ป ระ ไล ฮา โม ซตุ เจน พะทัม ไพรม เตือง โอยจ อื.
(3) เอีจ มัฮ เบือ พะเยซู ป โฮลฮ โม ป เจือ โปน ฮา มั่ป, โปน โรฮ ฮา รพาวม ฮลัต เตีจ แตะ, ไม่ ลั่ก ยุม แตะ. พะเยซู เกือฮ เนอึม ปุย โปน ฮา ป โอ ไมจ โครยญ เจือ นึง มัฮ อื ซตุ ระ. ไลลวง กัน ยุฮ ซตุ นึง พะทัม ไพรม ป เกว ไม่ กัน ทไว อื โอเอีฮ ตัม โกตไม เซ, มัฮ ตอก ปุโรม โอเอีฮ ป เนอึม ป ไก นึง พะเยซู. ปเลี่ย เฮี โม ป เจือ พะเยซู เญือะ โฮลฮ โตว โกว ปซี ปซา ไพรม เซ.
ป ไซฮ พะทัม ฮีบรู เฮี เญือม เกือฮ อื ปุย โตก ละ โม ปุย ไพรม ป อาวต ไม่ รพาวม เจือ แตะ ตอก ป อู อื นึง โบ่ต 11 เซ, มัฮ โรฮ ฆวต เกือฮ อื ป ลาว นังซื เฮี อาวต ตอน ฮมัน ฮอยจ ซลอยจ ซเลียง. ฆวต เกือฮ อื แก แนฮ พะเยซู ไม่ โอต อื ป โซะ โครยญ เจือ ป ซ เกิต ละ แตะ. (โบ่ต 12) ลั่ก ก ลอยจ อื ป ไซฮ พะทัม เฮี ซตอก รเง่อึม ปุย เกือฮ อาวต ไม่ จีวิต ซง่ะ ซงอม แตะ, ไม่ เกือฮ อื ลืลาว พะจาว ไม่ รโฮงะ อื รพาวม เจือ แตะ ละ ปุย.
1
ลปุง พะจาว ฮอยจ ละ ปุย เบือ กวน อื
1 เจน ไพรม โฆะ โอ พะจาว เกือฮ โม ป ซึป ลปุง แตะ อัฮ โอเอีฮ ละ จัตเจือ ไพรม เอะ ตัง แตะ. อัฮ อื ละ อื โฮวน เจือ โฮวน ยั่ง โฮวน โฮน.
2 ซไม ลั่ก ก ลอยจ อื เฮี ปังเมอ เกือฮ กวน แตะ อัฮ อื ละ เอะ ตัง โกะ แตะ. พะจาว เอีจ เกือฮ กวน แตะ เซ ยุฮ ปลัฮเตะ ไม่ ปลัฮ มะลอง ไม่ โอเอีฮ นึง อื โครยญ เจือ. พะจาว เอีจ เลือก กวน แตะ เซ ละ ซ เกือฮ อื แปน ป กุม โอเอีฮ เตือง โอยจ อื.
3 กวน อื เซ รฌิญ รัง ซเปีย ยุฮ พะจาว นึง. เอีจ ตอก เอิน พะจาว โครยญ เจือ. มัฮ ป เกือฮ โอเอีฮ ปลัฮเตะ ปลัฮ มะลอง อาวต ตอน อาวต ฮมัน ตัม ไล แตะ โครยญ เจือ, เบือ ลปุง ไก อัมนัต ยุฮ แตะ. เญือม เอีจ ฟวยจ พัก อื มั่ป ยุฮ ปุย, โฮลฮ งาวม ลวง ดอม พะจาว ป ตึก นึง ระ อัมนัต แตะ นึง เมือง มะลอง.
กวน พะจาว ระ ไล ฮา โม เตปด่า
4 กวน พะจาว เซ เอีจ โฮลฮ แปน ป ระ ไล ฮา โม เตปด่า, ตอก โรฮ เซ มอยฮ โฮลฮ อื เซ ระ โรฮ ไล ฮา มอยฮ เตปด่า เซ โรฮ.
5 พะจาว เอีจ อัฮ เฮี ละ กวน แตะ เซ, “ปะ มัฮ เปอะ กวน อาึ. ซเงะ เนาะ เฮี อาึ เอีจ แปน เปือะ เปอะ,” อัฮ เซ ละ อื. พะจาว อัฮ โตว อื ตอก เซ ละ โม เตปด่า ติ ตื เนอึม. อัฮ โตว อื โรฮ ละ เตปด่า ตอก เฮี, “อาึ ซ แปน เปือะ ปุย เซ. ปุย เซ ซ แปน โรฮ กวน อาึ.” อัฮ โตว เซ ละ เตปด่า. ลปุง เซ มัฮ อัฮ อื ละ กวน โกะ แตะ ไอฮ.
6 เญือม เกือฮ พะจาว กวน โรง แตะ ฮอยจ เกิต นึง ปลัฮเตะ, อัฮ โรฮ เฮี, “โม เตปด่า พะจาว เตือง โอยจ อื ไมจ อื นุ่ม ไว ปุย เซ,” อัฮ เซ.
7 มัฮ เฮี ป อัฮ พะจาว นึง ไลลวง เตปด่า ยุฮ แตะ, “พะจาว เกือฮ เตปด่า ยุฮ แตะ แปน ตอก กาื โฮ. เกือฮ โรฮ กวนไจ ยุฮ แตะ ตอก รเออึป งอ,” อัฮ เซ.
8 ไลลวง กวน แตะ พะจาว ปังเมอ อัฮ อื ละ อื ตอก เฮี, “โอ พะจาว, ปะ ซ ตัตเตียง ลอป เปอะ ปุย โอ เญาะ ไก ลอยจ. ปะ ซ ตัตเตียง เปอะ บั่นเมือง ยุฮ แตะ ตัม ซื ตัม ไซ อื.
9 ปะ ฮรัก เปอะ กัน ซื กัน ไซ. เกละ เปอะ ยุ กัน บ่วก กัน โจวง. อาึ ป มัฮ พะจาว ยุฮ เปอะ เอีจ เลือก ปะ ไม่ เกือฮ รพาวม ไมจ มวน ละ เปอะ นึง โฮลฮ เปอะ โญตซัก ระ ฮา โญตซัก โฮลฮ ปุ โฮมว เปอะ,” อัฮ เซ.
10 อัฮ โรฮ เฮี ติ เจือ, “โอ พะจาว, เมือ โรง อื โฆะ โอ ปะ ยุฮ เปอะ ปลัฮเตะ. ปลัฮ มะลอง เอีจ มัฮ โรฮ ป ยุฮ ปะ นึง เตะ โกะ เปอะ ไอฮ.
11 เตะ ไม่ มะลอง เซ ซ ไฆร. ปะ ปังเมอ ซ ไก ลอป เปอะ. โอเอีฮ โม เซ ซ ไพรม ตอก เครอึง จาวป ปุย โฮ.
12 ปะ ซ ตุปเตียป เปอะ ตอก ลปิ โฮ. ซ ลโปลฮ เปอะ ตอก เครอึง เซอึก โฮ. ปะ ปังเมอ ซ ตอก แนฮ เปอะ ไพรม แตะ. เคิ เนอึม ยุฮ เปอะ ไก โตว ลอยจ ไม่,” อัฮ เซ.
13 พะจาว ไก โตว เญือม อัฮ อื ละ เตปด่า ตอก เฮี ติ ชวง, “ไมจ เปอะ งาวม ลวง ดอม อาึ ฮอยจ ละ เกือฮ อาึ ป รุป ไม่ เปอะ อาวต ฆรึม ชวง เปอะ,” อัฮ โตว อื ละ อื ตอก เซ. มัฮ กวน อื โน่ง ป อัฮ อื ละ อื ตอก เซ.
14 ดัฮ มัฮ ตอก เซ โม เตปด่า เซ มัฮ ปุย? มัฮ ลปุ ป รซอฮ ละ พะจาว. มัฮ ป ดวน พะจาว ฮอยจ เรอึม โม ป ซ โปน มั่ป, โม่ มัฮ อื?