โยป
พะทัม โยป มัฮ ไลลวง ปุย ไมจ ไล ป ลอก ป โตะ ป ตอง โครยญ เจือ. กวน อื ยุม โอยจ, คาวคอง ยุฮ อื ไฆร โอยจ ฮา อื. โนก ฮา เซ อาวม แม ป โซะ นึง เนะซอัง แตะ ป ฆอก ลัมเลือ เอิน. ป ไซฮ พะทัม โยป เฮี โกว ลปุง กลอน ละ ซ รโฮงะ แตะ ป อัฮ ป มวยญ โยป ไม่ ปุโฮมว อื ลอวย ปุย ฆาื ป โซะ ป ไซญ ลอก โยป เซ. ป อัฮ ปุย โม เซ ละ ปุ แตะ ไก ลอวย รอป, ปังเมอ มัฮ ไล ติ ป อัฮ อื เซ. ลั่ก ก ลอยจ อื พะจาว เปลีฮ ไอฮ ติ แตะ ละ โยป. กา เซ ปุย โม เซ อู ลอป ไลลวง พะจาว ละ ปุ แตะ ปังเมอ โอ คาวไจ ไลลวง อื ซโตฮ. ลั่ก ก ลอยจ อื มัฮ พะจาว ไอฮ ป เกือฮ อื ยุง.
ปุโฮมว โยป แกต ติ แตะ ยุง ควน ฆาื ป โซะ อาวม โยป เซ. โม เซ แกต พะจาว เกือฮ ลอป ป ไมจ ละ ปุย ไมจ, เกือฮ โรฮ ป ฆอก เกิต ละ ปุย ฆอก ปุย เบร. โม เซ แกต โยป มัฮ ปุย ฆอก ฆาื ลอก อื ป โซะ เซ. โยป ปังเมอ อัฮ กัม คิต โม เซ มัฮ ป เยือ ลอน. อัฮ ติ แตะ โอ โซมกวน ไม่ ลอก แตะ ป โซะ ลัมเลือ เซ, นึง ซาวป ลอป แตะ ยุฮ กัน ซื กัน ไซ. โยป เกียฮ คาวไจ โตว ตอก ญอม พะจาว เกือฮ แตะ ลอก ป โซะ ลัมเลือ ตอก เซ. ลอต ตะ พะจาว ละ ซ เกือฮ พะจาว ฟู มวยญ ไม่ แตะ. โยป โปวฮ โตว รพาวม เจือ แตะ, ปังเมอ ฆวต เกือฮ พะจาว เปลีฮ มัฮ แตะ ปุย เนอึม รพาวม.
พะจาว โลยฮ โตว อื โครยญ เจือ ป ไฮมญ โยป นึง แตะ, ปังเมอ เปลีฮ ไลลวง ระ อัมนัต แตะ ละ โยป ไม่ ไลลวง กัมกึต วิไซ ไมจ แตะ. โยป ยุง เกือฮ ติ แตะ ตุเตียม ฆาื อื. ยุง เนอึม มัฮ พะจาว ป ระ ป เกียฮ ยุฮ โอเอีฮ โครยญ เจือ. โยป เฌาะ รพาวม แตะ ฮา กัน อัฮ แตะ ป เกิน ละ พะจาว.
ลั่ก ก ลอยจ อื พะทัม โยป เกือฮ เอะ ยุง ตอก เกือฮ แม พะจาว ป ไมจ ละ โยป. เกือฮ อื โฮวน โอเอีฮ ยุฮ ฮา ไพรม แตะ. เกือฮ แม อื โฮลฮ กวน แตะ กาว ปุย แม. พะจาว เติ ปุโฮมว โยป นึง โอ อื คาวไจ กัน โซะ อาวม โยป เซ. แปน มัฮ โยป ป ยุง เนอึม ไลลวง พะจาว โฮวน ฮา ปุโฮมว อื เซ.
1
ซาตัน ลอง รพาวม โยป
1 ไก ปรเมะ ป อาวต นึง เมือง อูต ติ ปุย. มอยฮ อื มัฮ โยป. มัฮ ปุย นัปทื พะจาว ไม่ รพาวม เนอึม แตะ, ไม่ มัฮ อื ปุย ไมจ ไล โครยญ เจือ. แฮน แนฮ ติ แตะ ฮา ป ฆอก ป เบร.
2 ปุย เซ ไก กวน รเมะ อาแลฮ, ไก กวน รโปวน ลอวย.
3 ไก แกะ ยุฮ อาแลฮ เปือน ไม่ อุต ลอวย เปือน ไม่ โมวก พอน รอย กู ไม่ บรัง รโปวน พอน รอย. กวนไจ อื โฮวน เนอึม. มัฮ ปุย กอย ฮา ปุย นึง ลวง ลั่ก โอก ซเงะ เตือง โอยจ อื.
4 กวน รเมะ โยป เซ กอ ลล่อยฮ เลียง ปุ แตะ นึง เญือะ แตะ ไอฮ ติ ปุย ติ โฮน. กอก โรฮ รนัน แตะ เตือง ลอวย อื เซ ฮอยจ โซม ดิ ไม่ แตะ.
5 โครยญ ปวยฮ พริ ฟวยจ กิน เลียง อื ไม่ ปุ แตะ ตอก เซ, โยป กอ งาวป โกฮ มอก ตอง ทไว ซัตซิง รโตง โม กวน แตะ เซ โครยญ โฆะ อื, ละ ซ เกือฮ อื ซง่ะ ไล ซองนา พะจาว. มัฮ ยุฮ อื ตอก เซ นึง ฮลัต อื กวน แตะ ยุฮ ป พิต โตะ รพาวม แตะ. มัฮ ฮลัต อื โคะ พามัต พะจาว. โยป ยุฮ ลอป อื ตอก เซ.
6 ไก ติ ซเงะ เญือม ฮอยจ รโจะ โม เตปดุ่ต เตปด่า ซองนา พะจาว. ซาตัน ฮอยจ โรฮ ไม่ อื.
7 พะจาว ไฮมญ ซาตัน ตอก เฮี, “ฮอยจ เปอะ เน่อึม ก เมอ?” อัฮ เซ ละ อื. ซาตัน โลยฮ อื ตอก เฮี, “ฮอยจ เน่อึม โฮว โฌ แตะ นึง ปลัฮเตะ โครยญ ลวง,” อัฮ เซ.
8 พะจาว อัฮ เฮี ละ อื, “อัม ยุ เปอะ โยป ป มัฮ กวนไจ อาึ อื? ปุย ติ ปลัฮเตะ ไก โตว ป ตอก โยป เซ. มัฮ เนอึม ปุย ไมจ ไล โครยญ เจือ. นัปทื เนอึม อาึ ไม่ รพาวม เนอึม แตะ. แฮน เนอึม ติ แตะ ฮา ป ฆอก ป เบร,” อัฮ เซ ละ ซาตัน พะจาว เยอ.
9 ซาตัน โลยฮ อื ตอก เฮี, “นัปทื อื แอฮ, เตอ โพต ปะ ป ไมจ ละ เซ. มัฮ โอ ปะ โพต ป ไมจ ละ, แจง โอ อื ซ นัปทื ปะ อา.
10 ปะ เอีจ เฆีญ เปอะ เญือะ โยป เซ ฮา ป โอ ไมจ ฮอยจ ละ คอง เลียง คอง ดู่ อื โครยญ เจือ. เอีจ เกือฮ เปอะ กัน ยุฮ อื จเลิน ลอป. คอง เลียง อื นาวก เอิน ยุฮ ปลัฮเตะ.
11 มัฮ ตุย ปะ โอเอีฮ ยุฮ อื ฮา อื โครยญ เจือ, ตึน ซ ซะ เอิน ปะ ซองนา เปอะ,” อัฮ เซ.
12 พะจาว อัฮ เฮี, “ดัฮ มัฮ ตอก เซ, โอเอีฮ ยุฮ อื เซ อาึ เกือฮ อาวต ฆรึม อัมนัต ปะ. ตัว โยป ปังเมอ โอ เปอะ ไมจ ลอก เฟือฮ เอิน,” อัฮ เซ ละ อื. เญือม เซ ซาตัน โอก โฮว ฮา พะจาว.
13 ไก ติ ซเงะ เญือม เลียง กวน โยป ปุ แตะ นึง เญือะ เอียกระ แตะ.
14 เญือม เซ ไก ป ฮอยจ รโฮงะ ละ โยป ตอก เฮี, “ลไล ไท เอะ ชิจ นึง โมวก ยุฮ เปอะ, บรัง ยุฮ เปอะ เปือม โรฮ ไรป ซดิ ไม่ นา เซ.
15 ฮอยจ พราวป โม เซบ่า ติ มู, ลู ตุย โรวก อื เตือง โอยจ อื. ยุฮ โรฮ ยุม ไม่ โม กวนไจ เปอะ. มัฮ ลั่ง อาึ โน่ง ป ไอม ละ ซ เกียฮ เอีญ รโฮงะ แตะ ละ เปอะ,” อัฮ เซ.
16 ลไล โอ ปุย เซ ดิ เตือน ลอยจ ลปุง เงอ ฮอยจ แม กวนไจ ติ ปุย. อัฮ เฮี, “โม แกะ ยุฮ เปอะ โตยฮ ตะ. ฮะ โอยจ เตือง แกะ เตือง โม กวนไจ เปอะ. มัฮ ลั่ง อาึ โน่ง ป ไอม ละ ซ เกียฮ เอีญ รโฮงะ แตะ ละ เปอะ,” อัฮ เซ.
17 ลไล โอ ปุย เซ ดิ เตือน ลอยจ ลปุง เงอ ฮอยจ แม กวนไจ ติ ปุย แม. อัฮ เฮี, “ฮอยจ คะมุย โม เคนเดี่ย ลอวย มู. ลู ตุย โรวก อุต ยุฮ เปอะ เตือง โอยจ อื. ยุฮ โรฮ ยุม ไม่ โม กวนไจ เปอะ. มัฮ ลั่ง อาึ โน่ง ป ไอม ละ ซ เกียฮ เอีญ รโฮงะ แตะ ละ เปอะ,” อัฮ เซ.
18 ลไล โอ ปุย เซ ดิ เตือน ลอยจ ลปุง เงอ ฮอยจ แม กวนไจ ติ ปุย แม. อัฮ เฮี, “โม กวน เปอะ กัมลัง เลียง ปุ แตะ นึง เญือะ เอียกระ แตะ.
19 ฮอยจ ง่อม กาื ระ ละ เน่อึม นึง ลาึน เวือฮ เซ. ลเลอึม เอิน เญือะ อื เซ. ปุย นึง อื ยุม โอยจ เอิน. มัฮ ลั่ง อาึ โน่ง ป ไอม ละ ซ เกียฮ เอีญ รโฮงะ แตะ ละ เปอะ,” อัฮ เซ.
20 เญือม เซ โยป โกฮ แจฮ เอิน ไอฮ ลปิ แตะ ฆาื ตุก รพาวม แตะ. กู ไกญ แตะ ไม่ อื. ไอจ รเคอึป ลังเตะ, ไววอน ละ พะจาว.
21 อัฮ เฮี, “เญือม เกิต เตอะ เกิต ไม่ โกะ ปลาว แตะ. ดัฮ โอก ฮา ปลัฮเตะ โฮ ซ โอก โรฮ ไม่ โกะ ปลาว แตะ โรฮ. พะจาว เอีจ เกือฮ โอเอีฮ เนิ โครยญ เจือ. เอีจ ตุย แม โรฮ อื ฮา เยอะ โครยญ เจือ. ไมจ ปุย ลืลาว มอยฮ พะจาว,” อัฮ เซ.
22 ปัง เกิต ป โซะ ละ ตอก เซ, โยป ยุฮ โตว ป พิต ฆาื อื, เติ โตว พะจาว นึง อื ติ เจือ เนอึม.