28
กัน ซาวป ปุย ปลัฮเตะ ซติ พันญา แตะ
1 “ป มัฮ บ่อ แฮ กาวง ปุย มาื เอีจ ไก เนอึม, ป มัฮ นา ก โล ปุย ไคร เอีจ ไก โรฮ ตอก เซ.
2 ป มัฮ แฮ ไร เซ ปุย ตุย อื เน่อึม นึง โตะ เตะ. ป มัฮ ไร ซครัก นึง อื ปุย ตุย โล อื เน่อึม นึง ซโมะ.
3 ปัง มัฮ นา ก โด่ะ ปอ เฟียก ตัน เอิน อื, ปุย โฮว เลียก ลั่ง นึง อื ละ ซ ซาวป แตะ แฮ ไมจ ลลาึง ซโมะ ป อาวต ก เฟียก อื เซ.
4 ปุย โม เซ กาวง โตะ เตะ เลียก โด่ะ ฮอยจ ละ โปน อื นา ก อาวต ปุย. โม ป กาวง โตะ เตะ เซ อาวต โน่ง เอิน ฆาื อื ฮา ปุย ไฮญ. โม เซ ตาึก โลง ติ แตะ นา ก โด่ะ อื ละ ซ ซาวป แตะ กาวง แฮ เซ.
5 นึง ปลัฮเตะ เฮี มัฮ เนอึม นา ก โฮลฮ ปุย ป โซม ป ปอน แตะ นึง. นึง ฆรึม เตะ ติ ปลัฮ เซ, ก โด่ะ อื ปังเมอ รไม่ รม่าึก โอเอีฮ นึง ตอก โอเอีฮ ล่อยญ นึง ฮะ งอ แตะ โฮ.
6 ลลาึง ซโมะ นา โม เซ มัฮ นา ก ไก แกว มฮานิน นึง, ลลาึง เตะ รกาื นึง อื มัฮ โรฮ นา ก ไก โนง ไคร นึง โรฮ.
7 “คระ โฮว ปุย นา เซ เยอ ไก โตว กลัง ฮอยจ นึง อื ติ ชวง. มัฮ โรฮ นา ก โอ เฆลียง เกียฮ ฮอยจ ชวน นึง ไง่ แตะ โรฮ.
8 ป มัฮ โกะพริ กอ โฮว โตว ฮอยจ นา เซ ติ ชวง. ป มัฮ ซิงโต ซวก ปุ โรฮ กอ โฮว พา นา เซ โรฮ.
9 “ปุย โม เซ กาวง ซโมะ ตึก นึง กอ แตะ. ยุฮ โรฮ ไลจ ไม่ บลาวง เซ ฮอยจ นึง เน่อึม อื ก โด่ะ อื.
10 โม เซ จาว ซโมะ เซ เลียก แปน ฮอง แปน ฮอง อื. ฟวยจ เซ โฮลฮ เนอึม ยุ โอเอีฮ ระ งวยฮ นึง อื โครยญ เจือ.
11 โม เซ กาวง โตะ เตะ เลียก โด่ะ ปอ โทง เอิน อื ละ รอาวม เอิน, เอีจ มัฮ รอาวม เซ ป ปัต โอก แปน โกลง เงอ. โอเอีฮ ป อาวต นา ก ไฆลป อื เซ ซ ตุย เปลีฮ เกือฮ ปุย ยุ อื.
ไลลวง กัมกึต วิไซ ไมจ
12 “ป มัฮ กัมกึต วิไซ ไมจ เซ ปังเมอ โอ ไก ป ยุง เน่อึม ก ฮอยจ อื, ปุย ซ เกียฮ ซาวป ยุ อื ก เมอ? ป มัฮ เน่อึม ป ยุ ป ยุง ปุย เซ ไก นา เมอ?
13 ปุย ปลัฮเตะ ยุง โตว นา ก ไก กัมกึต วิไซ ไมจ, ปัง ซาวป อื เลี่ป ปลัฮเตะ นา ก อาวต ปุย, ยุ โตว อื ลั่ง.
14 รอาวม ปลาึฮ อัฮ เฮี, ‘กัมกึต วิไซ เซ ไก โตว นึง อาึ,’ อัฮ เซ. ปลัฮ รอาวม อัฮ โรฮ อื ตอก เฮี, ‘นึง อาึ ปุ โรฮ อาวต,’ อัฮ เซ.
15 ปัง ซาวป รวี กัมกึต วิไซ ไมจ เซ นึง ไคร ปุ ลั่ง ซ โฮลฮ, ปัง แฆ มาื ละ เมาะ ออฮ เมาะ เอีฮ ปุ ลั่ง ซ เกียฮ แปน ลั่ง.
16 ปัง ริ รตู ไม่ ไคร ซโน ตึก นึง ไมจ แตะ เกียฮ แปน โตว. ปัง มัฮ แกว โกเมน ไม่ แกว มฮานิน ป ตึก นึง ไมจ แตะ เซ, ปุ ลั่ง ซ แปน ลั่ง.
17 ปัง ซ แพป ไม่ ไคร ไมจ ไม่ แกว รฮอง ซ บริญ โตว ไม่ อื เฟือฮ. ปัง ซ รตู ไม่ เครอึง ไคร ซโน ป เอีจ ฟวยจ โล ปุย, ปุ ลั่ง ซ โฮลฮ นึง อื.
18 ปัง ซ อู แม ลอก ซโมะ ซัมคัน ไม่ แกว วิเซต ละ ซ แพป แตะ ไม่ อื, เกียฮ แปน โตว ลั่ง. กัมกึต วิไซ ไมจ เซ มัฮ เนอึม ป ระ งวยฮ ฮา แกว ตอม ฮอย.
19 ปัง มัฮ แกว ซเงี นึง เมือง เอทิโอเปีย เซ, ซ เกียฮ แพป โตว ลั่ง ไม่ กัมกึต วิไซ ไมจ เซ เฟือฮ เอิน. ปัง ตี งวยฮ อื เมาะ ไคร ตึก นึง ซโน แตะ ปุ ลั่ง ซ บริญ ไม่ อื.
20 “ดัฮ มัฮ ตอก เซ, กัมกึต วิไซ ไมจ เซ มัฮ ฮอยจ อื เน่อึม ก เมอ? ป มัฮ เน่อึม ป ยุ ป ยุง ปุย เซ มัฮ ไก อื นา เมอ?
21 มัฮ โอเอีฮ ป เม่าะ ติ แตะ ฮา ไง่ เมาะ ป ไก จีวิต เตือง โอยจ อื. ปัง มัฮ ไง่ ไซม ป โปว นึง กัง ฮาว ปุ โรฮ ซ เกียฮ ยุ อื โรฮ.
22 โม ป อาวต เมือง ป ยุม เซ มัฮ เมาะ ฮมอง อื ไลลวง อื เญี่ยะๆ โน่ง.
23 “มัฮ พะจาว โน่ง ป ยุง คระ ป ฮอยจ ละ กัมกึต วิไซ ไมจ เซ, ยุง โรฮ นา ก อาวต อื โรฮ.
24 พะจาว มัฮ เนอึม ป เกียฮ ยุ โอเอีฮ เลี่ป ปลัฮเตะ, มัฮ โรฮ ป เกียฮ ชวน โอเอีฮ ติ ฆรึม มะลอง โรฮ.
25 เอีจ มัฮ พะจาว ป เกียฮ ตัตซิน เมาะ เรียง เมาะ ชุม โฮว กาื เยอ, มัฮ โรฮ ป เอีจ ซมอย เมาะ โฮวน เมาะ รมัฮ รอาวม ป ไก นึง ปลัฮ รอาวม โรฮ.
26 เอีจ มัฮ พะจาว ป เกือฮ พริ เฮละ นา ก ลัง เฮละ อื, มัฮ โรฮ ป เกียฮ ยุฮ คระ ละ โฮว ปลุกปลัก ไม่ เนอึม บริ โรฮ.
27 เญือม เซ พะจาว เอีจ ยุ ที ป มัฮ กัมกึต วิไซ ไมจ เซ. พะจาว ซาวป โรฮ กวต แลน เมาะ ไมจ อื, ฟวยจ เซ รโฮงะ อื ละ ปุย เกือฮ โรฮ ปุย ยุง ป มัฮ อื.
28 พะจาว อัฮ เฮี ละ ปุย ปลัฮเตะ, ‘ง่อต เมอะ, ปุย ดัฮ ฆวต ไอฮ กัมกึต วิไซ ไมจ แตะ, ไมจ อื ฮลัต นึง พะจาว ไม่ นัปทื เนอึม แตะ. ดัฮ ฆวต เกือฮ ติ แตะ คาวไจ โอเอีฮ, ไมจ อื ละ โปวฮ ป ฆอก ป เบร,’ อัฮ เซ.”