7
1 เอลีชา โลยฮ อื ตอก เฮี, “ปัว เปอะ ง่อต ลปุง พะจาว. พะจาว อัฮ เฮี, ซง่าวป เมาะ เวลา ปเลี่ย นึง โตะ รเวือะ เมือง ซามาเรีย เฮี ญอต แปง ติ แป เยอ ปุย ซ โชะ อื ติ เชเคน โน่ง. เฮงาะ บ่าเล ติ ทัง แตวะ ซ มัฮ แม ติ เชเคน โน่ง,” อัฮ เซ.
2 ไก ฮัวนา ตฮัน ป ซดิ ไม่ กซัต ติ ปุย อัฮ เฮี ละ เอลีชา เซ, “เกียฮ แปน โตว ตอก เซ. ปัง โทก โซ แม พะจาว เฮงาะ รโกะ เน่อึม มะลอง ป อัฮ ปะ เซ แจง โอ อื ซ เกียฮ แปน เนอ,” อัฮ เซ ละ อื. เอลีชา เซ โลยฮ อื ตอก เฮี, “ปะ ซ โฮลฮ เปอะ ยุ นึง ไง่ โกะ แตะ ไอฮ, ปังเมอ โอ เปอะ ซ โฮลฮ โซม,” อัฮ เซ ละ อื.
3 เญือม เซ ไก ปุย ลาวต ปาวน ปุย, อาวต ดิ นึง ก พริ โตะ รเวือะ เลียก ปุย โตะ เวียง. อัฮ เฮี ละ ปุ แตะ, “เอะ อาวต แนฮ นา เฮี ฮอยจ ละ ยุม แตะ ละ เมอ?
4 ปัง เลียก อาวต โตะ เมือง มัฮ ยุม นึง ไปลญ แตะ. ปัง อาวต เตอะ นา เฮี มัฮ โรฮ ยุม โรฮ. ไมจ เอะ โฮว ฮา ฮอยจ นึง ไคะ อาวต โม ซีเรีย เซ. ดัฮ โม เซ ยุฮ ยุม ไม่ โม เอะ โฮ ตึน มัฮ ไอฮ ยุม ติ เซ. ดัฮ ลเวือง เอะ ไอม โฮ เอะ เกียฮ ไอม โรฮ เบือ อื โรฮ,” อัฮ เซ ละ ปุ แตะ.
5 โม เซ เยอ โกฮ โฮว เนอึม ไม่ ปุ แตะ ฮอยจ นึง ไคะ อาวต โม ซีเรีย เซ เญือม เอีจ ปู พริ. เญือม เอีจ ฮอยจ อื นึง ไคะ อาวต โม ซีเรีย เซ เญือะ ยุ โตว ปุย อาวต นา เซ ติ ปุย เนอึม.
6 มัฮ ฆาื เอีจ เกือฮ พะจาว โม ตฮัน ซีเรีย เซ ฮมอง เซียง ฮอยจ รุป ปุย โม โกะ แตะ เซ. ฮมอง เซียง เลาะ รุป เซิก, เซียง โฮว บรอง, เซียง โฮว โม ตฮัน โฮวน. โม ตฮัน ซีเรีย เซ อัฮ เฮี ละ ปุ แตะ ฆาื อื, “ง่อต แลน เมอะ, กซัต เมือง อิซราเอน เอีจ จัง โม กซัต ยุฮ โม ฮิตไท ไม่ กซัต ยุฮ โม อียิป ฮอยจ รุป ไม่ โม เอะ,” อัฮ เซ ละ ปุ แตะ.
7 โม ตฮัน ซีเรีย โกฮ ตอ เนอึม ฆาื อื ปู เซ. ละ เยือ เอิน พากัง อาวต แตะ ไม่ บรอง ไม่ บรัง นึง ตอ แตะ ไอม เตือง โอยจ แตะ.
8 เญือม เอีจ ฮอยจ โม ป ลาวต เซ เฆียง ไคะ อาวต โม ตฮัน เซ, เลียก เอิน ฮอยจ โตะ กไน พากัง อาวต อื เซ ติ. โซม ญุ ดิ ไม่ ปุ แตะ. ซาวป ซเคระ ไคร มาื ยุฮ โม เซ ไม่ เครอึง เซอึก อื โฮว เม่าะ อื. ฟวยจ เซ เอีญ แม ฮอยจ โตะ พากัง ยุฮ โม เซ ติ แม. ตุย แม โรฮ เครอึง เซอึก อาวต กไน อื. ฟวยจ เซ โฮว เม่าะ แม โรฮ อื.
9 ฟวยจ เซ โม ป ลาวต เซ อัฮ เฮี ละ ปุ แตะ, “ป ยุฮ เอะ เฮี มัฮ โตว ป ปุก เฟือฮ. เนาะ เฮี มัฮ ซเงะ ยุ เอะ ป ไมจ ป มวน. ดัฮ เอะ อาวต โฆย ไม่ มอง แตะ ฮอยจ ละ ปวยฮ พริ โฮ, เอะ ซ ลอก ตุต แตะ ฆาื อื. เคียง มัฮ อื ตอก เซ, ไมจ เอะ เอีญ รโฮงะ, ไมจ เกือฮ โม ป อาวต นึง เญือะ ยุฮ กซัต เซ ฮมอง ปเลี่ย เฮี เอิน,” อัฮ เซ ละ ปุ แตะ.
10 โม เซ เอีญ รโฮงะ เนอึม อื ละ ป มอง ญัม นึง โตะ รเวือะ เมือง เซ ตอก เฮี, “เอะ เอีจ โฮว ฮอยจ นึง ไคะ อาวต โม ซีเรีย เซ ปังเมอ โอ เญือะ ยุ เญือะ ฮมอง ปุย นึง ติ เนอึม. บรอง ยุฮ อื ไม่ บรัง ไม่ เตน อาวต อื ไก ตื ลั่ง นา เซ ตื,” อัฮ เซ ละ อื.
11 เญือม เซ ป มอง ญัม เซ รโอง กอก อัฮ อื ละ โม ป อาวต โตะ กไน เวียง เซ. ปุย ซึป ตอ แม อื ละ ปุ แตะ ฮอยจ นึง เญือะ อาวต กซัต แม.
12 กซัต เซ โกฮ เน่อึม ไอจ แตะ ฆาื อื เมือ ก ซาวม อื. อัฮ เฮี ละ ป มัฮ กวนไจ แตะ, “ซ อัฮ อาึ ละ เปอะ, โม ตฮัน ยุฮ โม ซีเรีย เฮี มัฮ ไก แพน ยุฮ อื ติ เจือ ละ ซ รุป แตะ ไม่ เอะ. ยุง ชุมเช เอะ นึง ไปลญ เออึป เปอะ. โม เซ ตึน ซ มัฮ โฮว เม่าะ อื ติ แตะ โตะ เพระด่าวก ไม่ อัฮ อื ตอก เฮี, ‘ดัฮ โม เซ เอีจ โอก ฮา เมือง อาวต แตะ โฮ, เอะ ซ โฮมวต ไอม เอิน เนอะ. ฟวยจ เซ ซ เลียก ยึต เอิน เมือง อื,’ ตึน ซ มัฮ อัฮ อื เซ.”
13 ป มัฮ กวนไจ ยุฮ อื ติ ปุย อัฮ เฮี ละ อื, “ปัง มัฮ ตอก ออฮ ตอก เอีฮ, เมือง เฮี เอีจ มัฮ แนฮ นัม ไลจ ติ เซ. เกือฮ เอะ ตาว ปุย เกือฮ โฮว ไม่ บรอง ป โฮฮ ลั่ง อื เซ เมาะ พอน ตัว, เกือฮ โฮว แลน แลน อื, เตอึม ตอก มัฮ ตอก มอยฮ อื. ดัฮ ยุม โฮ ตึน ยุม ไอฮ ตอก โม อิซราเอน ป เอีจ ยุม เซ,” อัฮ เซ กวนไจ กซัต เซ.
14 กซัต เซ เกือฮ เนอึม ปุย โฮว อาื แลน โม ตฮัน ยุฮ โม ซีเรีย เซ. อัฮ เฮี ละ อื, “โฮว แก แลน เมอะ,” อัฮ เซ ละ อื. โม เซ โฮว เนอึม ไม่ บรอง ไม่ เลาะ รุป เซิก ลอา กัน.
15 โฮว อาื อื ฮอยจ โกลง จอแด่น. ไน ติ เจน คระ โฮว อื เซ, โม เซ ยุ เฮีย ไฮ เครอึง เซอึก ไม่ เคืองไมะ เคืองมื ป โปวฮ โม ตฮัน ซีเรีย เซ นึง พราวป ลอน ตอ แตะ. ฟวยจ เซ โม ป โฮว เซ เอีญ รโฮงะ อื ละ กซัต.
16 ฟวยจ เซ โม ลัปซด่อน เวียง ซามาเรีย เซ โกฮ ตอ โฮว ฮอยจ นึง ไคะ อาวต โม ตฮัน ซีเรีย เซ. ตุย คาวคอง นึง อื. เญือม เซ ญอต แปง เงอ โชะ เนอึม อื ละ ปุ แตะ ติ แป ติ เชเคน โน่ง. เฮงาะ บ่าเล ติ ทัง แตวะ โชะ เนอึม อื ติ เชเคน โน่ง, ตอก เนอึม เอีจ อัฮ พะจาว อาึง.
17 เญือม เซ เยอ กซัต เซ แตง ตัง โรฮ ไน ตฮัน ป ซดิ ลอป ไม่ แตะ เซ เกือฮ อื แปน ป มอง โตะ รเวือะ. โม ลัปซด่อน เนอ โจฮ บึน เอิน ปุ โฮว ป มอง โตะ รเวือะ เซ ปอ ยุม เอิน อื. โอเอีฮ ไล เซ, เกิต เนอึม ตอก เอีจ อัฮ ป ซึป ลปุง พะจาว อาึง ละ อื ซเงะ เญือม เลีฮ กซัต ฮอยจ เคะ เอลีชา โฮ.
18 ตอก เนอึม โรฮ เอีจ อัฮ เอลีชา อื ละ กซัต เซ เญือม อัฮ อื ตอก เฮี โฮ, “ซง่าวป เมาะ เวลา ปเลี่ย เฮี นึง โตะ รเวือะ เมือง ซามาเรีย เยอ ญอต แปง ติ แป เยอ ปุย ซ โชะ อื ติ เชเคน โน่ง. เฮงาะ บ่าเล ติ ทัง แตวะ ซ มัฮ แม ติ เชเคน โน่ง,” ตอก อัฮ อื เซ โฮ.
19 เญือม อัฮ เอลีชา อื ตอก เซ ป มัฮ ฮัวนา ตฮัน ยุฮ กซัต ติ ปุย เอีจ โลยฮ อื ละ เอลีชา ตอก เฮี, “เกียฮ แปน โตว ตอก เซ. ปัง โทก โซ แม พะจาว เฮงาะ รโกะ เน่อึม มะลอง, ป อัฮ ปะ เซ แจง โอ อื เกียฮ แปน เนอ.” ฟวยจ เซ ป ซึป ลปุง พะจาว เซ ตึน เอีจ โลยฮ อื ละ อื ตอก เฮี, “ปะ ซ โฮลฮ เปอะ ยุ นึง ไง่ แตะ ปังเมอ โอ เปอะ ซ โฮลฮ โซม,” เอีจ อัฮ เซ ละ อื.
20 โอเอีฮ ไล เซ เยอ เอีจ เกิต เนอึม ละ อื ตอก อัฮ อื ซ เกิต เซ นึง โฮลฮ เนอึม โม ลัปซด่อน เซ บึน ปุ โฮว ปุย เซ นึง โตะ รเวือะ เมือง เซ. ปุย เซ ยุม เนอึม ตอก เซ ฆาื อื.