13
เวลา ลั่ก ก ลอยจ อื
(มท. 24:1-51; ลก. 21:5-36)
1 ลไล โอก พะเยซู ฮา วิฮัน เซ ป มัฮ ลุกซิก อื ตา ติ ปุย เยอ, อัฮ เฮี, “ปอคู, ตึต แตะ, แก แลน เญือะ คึ ยุฮ ปุย นึง ซโมะ ระ เซ เมอะ,” อัฮ เซ ละ อื.
2 พะเยซู อัฮ เฮี ละ ลุกซิก แตะ เซ, “ปะ เอีจ ยุ เปอะ วิฮัน คึนัก เฮี, โม่ เปอะ ยุ? ซโมะ อาวต ราว ปุ แตะ เฮี ซ เญื่อฮ โอยจ. เญือะ ซ ไก โตว ติ เนอึม ป ซ อาวต ลั่ง อื เบือง แตะ,” อัฮ เซ ละ อื.
3 เญือม งาวม พะเยซู นึง ไกญ บลาวง กาวก รเตือป วิฮัน เซ เปโตร ไม่ ยาโคโบ่ ไม่ โยฮัน ไม่ อันดรู ฮอยจ ไฮมญ โน่ง พะเยซู ตอก เฮี,
4 “ปัว ปะ รโฮงะ ละ แตะ ป อัฮ เปอะ เนาะ โฮ, ซ เกิต เญือม เมอ? เญือม เอีจ ซ เกิต อื มัฮ เมอ ป ซกิ ซัมคัน นึง อื ละ เอะ เอ?” อัฮ เซ ละ อื.
5 พะเยซู โลยฮ อื ละ อื, “ไมจ เนอึม เปอะ แฮน ติ แตะ. ปุ เกือฮ ปุย ปุน จุ เปอะ ไฆร ฮา ลปุง เนอึม.
6 เฆียง เฮี เยอ ซ ไก โฮวน ป ซ ฮอยจ โกว มอยฮ อาึ อื, ซ อัฮ เฮี, ‘ปุย อัฮ เปอะ เซ เอีจ มัฮ อาึ เฮี,’ ซ อัฮ เซ. ซ จุ ปุย ไฆร ฮา ลปุง เนอึม ฆาื อื โฮวน ปุย.
7 ปัง ฮมอง เปอะ เซียง รุป ปุย ปุ แตะ ก ซดิ อื, ปัง ฮมอง เปอะ คราว อื เน่อึม ก ซไง อื, ปุ เกือฮ ติ เปอะ โตวฮ ฆราึง ฆาื. โอเอีฮ ไล เซ จัมเปน อื ไก. ลั่ก ก ลอยจ โอเอีฮ ปังเมอ โอ ดิ ฮอยจ.
8 ปุย ปะเทต เฮี ซ ตอซู ปุย ปะเทต เซิต. ปุย เมือง เฮี ซ ตอซู ปุย เมือง เซิต. ซ เกิต ดุงเดียง เตะ นึง ไม่ ไปลญ อาวป เออึป กิฮ นึง โฮวน โดฮ. โอเอีฮ ไล เซ ตอก เญือม อาวม โรง ปรโปวน โซะ ซ เติง เคิ รอาวม แตะ โฮ.
9 “ไมจ เปอะ โซะโกะ ฮรักซา เนอึม นึง แตะ. ปุย ซ โฮมวต โรวก โม เปะ ฮอยจ นึง ซัน. ซ เฟียต ซ ปุฮ โม เปะ โตะ โฮงซุต. ซ โฮลฮ เปอะ ชุง ลั่กกา โม จาวเมือง ไม่ กซัต ฆาื ทื เปอะ อาึ, ละ ซ โฮลฮ เปอะ รโฮงะ ไลลวง พะจาว ละ โม เซ.
10 กา เกิต โอเอีฮ ตอก เซ ไมจ อื ไก ป โฮว ครอฮ ไลลวง กัน ระ ไล ยุฮ พะจาว ละ ปุย โครยญ เจือ ปุย.
11 เญือม โฮมวต ปุย โรวก โม เปะ ฮอยจ ละ ซัน, ปุ เกือฮ ติ เปอะ ตุก รพาวม นึง ป ซ อัฮ ซ มวยญ แตะ. เญือม เติง เวลา อื, เกือฮ พะจาว เปอะ อัฮ ตอก ออฮ ไมจ เปอะ อัฮ ตอก เซ. ป ซ อัฮ เปอะ เซ มัฮ โตว โม เปะ ไอฮ ป อัฮ ฮา. มัฮ ลปุ พะจาว.
12 “เญือม เซ, เอียก ซ รโจฮ ปุ แตะ ฮอยจ ละ ยุม อื. เปือะ ซ รโจฮ กวน แตะ. กวน ซ ฟอง มะเปือะ แตะ ฮอยจ ละ ยุม อื.
13 ปุย เตือง โอยจ อื ซ เกละยุ โม เปะ ฆาื ทื เปอะ อาึ. ปุย ปุน อาวต ไม่ รพาวม เจือ แตะ ฮอยจ ลอยจ อื พะจาว ซ เรอึม ปุย เซ.
ไลลวง เม่ะมั่ก ป ซ เกิต ละ ปุย
14 “โม ป ลาว พะทัม ไมจ อื เกือฮ ไล เฮี คาว ไจ แตะ. โม เปะ ซ ยุ เปอะ อาึง ปุย โอเอีฮ ป รแอม ลัมเลือ ละ พะจาว นา ก โอ อื ลัมเปิง อาวต. เญือม ยุ เปอะ โอเอีฮ ตอก เซ ไมจ ปุย อาวต จังวัต ยูเดี่ย ตอ ฮอยจ นึง บลาวง.
15 ป อาวต นึง ดั่ตฟะ ปุ เญือะ เกือฮ เลียก ตุย โอเอีฮ อาวต โตะ เญือะ.
16 ป อาวต นึง ชิจ นึง ม่า ปุ เญือะ เกือฮ แม ตุย เครอึง จาวป แตะ.
17 เญือม เซ เยอ ซ ญัก เนอึม ละ โม ป โรวก ไม่ โม ป ปุ ลั่ง กวน.
18 ไมจ เปอะ ไววอน ปัว โอ เกือฮ โอเอีฮ ตอก เซ เกิต ละ แตะ เมือ โฆยญ.
19 เญือม เซ ซ เกิต เม่ะมั่ก โซะ ลอน นึง, โซะ ฮา โซะ โอเอีฮ ไฮญ โครยญ เจือ. เน่อึม เญือม ยุฮ โรง พะจาว ปลัฮเตะ ฮอยจ ปเลี่ย ไก โตว ป โซะ ตอก เซ. ลั่กกา อื ปุ โรฮ ซ ไก.
20 พะจาว เอีจ เกือฮ เวลา เซ เงี่ยง นึง โตก แตะ ละ โม ป เลือก แตะ อาึง เซ. มัฮ โอ อื เกือฮ เงี่ยง ตอก เซ ไก โตว ป ซ ไอม นึง อื ติ ตื เนอึม.
21 เญือม เซ ดัฮ ไก ป ซ อัฮ ละ เปอะ ตอก เฮี, ‘เตะ, พะคริต อาวต นา เซ,’ ดัฮ อัฮ เซ ละ เปอะ ปุ เจือ. ปัง อัฮ แม เฮี ละ เปอะ, ‘ไก นา เซิต,’ ปุ โรฮ เจือ.
22 ซ ไก โม ป อัฮ ติ แตะ มัฮ พะคริต นึง, ไม่ โม ป โคะ ติ แตะ มัฮ ป ซึป ลปุง พะจาว นึง โฮวน ปุย. โม เซ ซ ปุน ยุฮ ป ซัมคัน ปอ เงอึต ปุย นึง. มัฮ ฆวต จุ อื โม ป เลือก พะจาว อาึง เซ เกือฮ ไฆร ฮา ลปุง เนอึม ดัฮ ปุน อื โฮ.
23 โม เปะ ไมจ เปอะ โซะโกะ ฮรักซา นึง แตะ. อาึ เอีจ อัฮ อาึง ละ เปอะ โครยญ เจือ เน่อึม กา เฆียง เกิต อื.
กวน ปุย ปลัฮเตะ ซ ฮอยจ แม
24 “เญือม เอีจ ลอยจ เม่ะมั่ก เซ ซเงะ ซ เฟียก. เคิ ปุ เญือะ ซ รัง.
25 ซโมยญ ซ ดุฮ ฮา มะลอง. โอเอีฮ ป ไก อัมนัต นึง กังฮาว ซ รกุฮ รเตียง. เญือะ ซ อาวต โตว เบือง แตะ.
26 เญือม เซ ปุย ซ ยุ ฮอยจ กวน ปุย ปลัฮเตะ นึง ชุต รวู ไม่ อัมนัต โญตซัก คึนัก ยุฮ แตะ.
27 เญือม เซ ซ ดวน โม เตปด่า ยุฮ แตะ เกือฮ อื ตุย รโจะ ปุย เลือก แตะ เตือง โอยจ อื, เตือง ปาวน ลวง อื เซ, ฮอยจ ลอยจ เตะ เตือ มะลอง.
28 ไมจ เปอะ เกือฮ ติ แตะ ยุง ไลลวง เฮี, ซ แพป ละ เปอะ ไม่ โคะ เม. เญือม จัว กัก ชุก ฮละ อื เอีจ ยุง เปอะ ซดิ ซ เฮละ อื.
29 ตอก โรฮ เซ, เญือม ยุ เปอะ เกิต โอเอีฮ ตอก เซ โม เปะ เอีจ ยุง โรฮ เปอะ มัฮ อื ซดิ ซ ฮอยจ พะคริต เตอ.
30 อาึ อัฮ ละ โม เปะ ตัม เนอึม อื, ปุย เจน เฮี ซ ยุม โอยจ โตว กา เกิต โอเอีฮ ตอก เซ เตือง โอยจ อื.
31 ปลัฮเตะ ไม่ มะลอง ซ ไฆร. ป อัฮ ป มวยญ อาึ ปังเมอ โอ เกียฮ ไฆร เฟือฮ เอิน.
32 “ซเงะ เซ เวลา เซ ไก โตว ป ยุง. เตปด่า ป อาวต นึง เมือง มะลอง ไม่ กวน พะจาว ปุ โรฮ ยุง อื. ยุง เปือะ อื โน่ง.
33 ไมจ เปอะ เครอึง รไจจ นึง ไม่ เพรียง แนฮ เปอะ ติ แตะ, นึง โอ โม เปะ ยุง เญือม ซ ฮอยจ ซเงะ เซ.
34 แพป ละ เปอะ ไม่ กุม เญือะ ติ. ซ โอก โฮว ฮา เญือะ แตะ คระ ซไง. กา โฮว อื ซตอก อาึง กัน ละ กวนไจ ยุฮ แตะ ติ ปุย ติ เจือ, ติ ปุย ติ เจือ. ดวน ปุย มอง โตะ รเวือะ เซ มอง เญือะ ยุฮ แตะ.
35 มัฮ เซ ป ไมจ โม เปะ เครอึง รไจจ นึง ฆาื อื, นึง โอ เปอะ ยุง เญือม ซ ฮอยจ กุม เญือะ เซ. อัม ซ ฮอยจ เมือ รเปือ ปู? อัม ซ ฮอยจ ง่อน ซาวม? อัม ซ ฮอยจ เมือ รเอาะ แอ? อัม ซ ฮอยจ เมือ โอก ซเงะ? ยุง เปอะ โตว.
36 ดัฮ เปอะ โอ เครอึง รไจจ นึง, ตึน ซ ฮอยจ พราวป ลไล ไอจ เปอะ.
37 ป อัฮ ฮะ ละ โม เปะ เฮี, อาึ อัฮ โรฮ ละ ปุย เตือง โอยจ อื. ไมจ เปอะ เครอึง รไจจ นึง,” อัฮ เซ.