4
ซเงะ ซัมคัน ยุฮ พะจาว
พะจาว ป กุม ตฮัน มะลอง อัฮ เฮี, “ซเงะ เซ ซ ฮอยจ เนอึม. เญือม เซ โม ป เกียฮ ฮุน ไม่ โม ป ยุฮ ป ฆอก ป เบร ซ ฮะ ตอก เบระ ตอก โงว เฮงาะ โฮ. ซ ฮะ ล่อยญ เอิน ฮอยจ ละ แรฮ แตะ เตือง โอยจ อื. ละ โม เปะ ป นัปทื เนอึม อาึ อื, อัมนัต อาึ ซ โอก ละ เปอะ ตอก เญือม โอก ซเงะ โฮ. ซ มัฮ ควน เปลีฮ อื กัน ซืไซ ยุฮ แตะ ละ เปอะ. ซ ซอต ซเปีย ละ เปอะ ตอก ซเปีย ซเงะ โฮ, ละ ซ เกือฮ อื ป โซะ ป คระ นึง เปอะ ไฮ ตื. โม เปะ ซ เตน เปอะ ปุ โฮว ไม่ ไมจ มวน รพาวม แตะ ตอก กวน โมวก พลวย ปุย โอก ฮา คอก โฮ. ซเงะ เญือม เปลีฮ อาึ กัน รเตีฮ ระ ไล ยุฮ แตะ เซ, โม เปะ ซ โฮลฮ เปอะ เป ปุย ฆอก ปุย เบร. โม เซ ซ แปน เอิน ตอก จะ ตอก รกาื อาวต ฆรึม ชวง เปอะ โฮ,” อัฮ เซ พะจาว ป กุม ตฮัน มะลอง.
“ไมจ เปอะ ไตม โกตไม เกือฮ ไอ โมเซ ป มัฮ กวนไจ ยุฮ อาึ เซ ละ เปอะ. มัฮ ลปุง ซตอก อาึ อาึง ไม่ โกตไม ยุฮ ฮุ ป เกือฮ อาึ ละ อื นึง บลาวง ซีไน ละ โม อิซราเอน เตือง โอยจ อื.
“ซเงะ ระ ยุฮ พะจาว มัฮ ซเงะ ซัมคัน ปอ ฮลัต ปุย นึง. กา ซ ฮอยจ ซเงะ เซ อาึ ซ เกือฮ เอลียา ป ซึป ลปุง แตะ ฮอยจ ละ เปอะ. เอลียา เซ ซ เกือฮ รพาวม เปือะ ไม่ กวน ปุก ปอ ปุ แตะ. มัฮ โอ อื มัฮ ตอก เซ อาึ ซ จัมเปน ฮอยจ เกือฮ เมือง อาวต เปอะ เซ ลอก ป โอยจ นึง โซะ แตะ,” อัฮ เซ พะจาว.