11
โม ป อาวต นึง เวียง เยรูซาเลม
1 โม ป มัฮ ฮัวนา ปุย นึง อื ลอต อาวต นึง เวียง เยรูซาเลม เซ. โนก ฮา เซ โม ลัปซด่อน โจก เบ่อ นึง อื. ไน ปุย กาว ปุน ซ เกือฮ อื อาวต นึง เวียง เยรูซาเลม ป มัฮ เมือง ซัมคัน เซ ติ ปุน, เตอึม เญือะ ป ปุก เบ่อ อาวต เซ, ปุย ตา ซไตม ปุน นึง อื เซ แปน ลั่ง อาวต นึง ย่วง ก ไฮญ.
2 โนก ฮา เซ โม ป ซมัก โฮว อาวต นึง เวียง เยรูซาเลม เซ ปุย ลื โรฮ อื ฆาื อื.
3 ไก โม อิซราเอน ง่อน ป อาวต อื นึง ย่วง โกะ แตะ ไอฮ. เอีจ มัฮ โม ซตุ, โม เลวี, โม ป ยุฮ กัน นึง วิฮัน, ไม่ โม จัตเจือ กวนไจ ซาโลมอน ง่อน.
เคียง เฮี โฮว มัฮ มอยฮ โม ฮัวนา นึง เมือง ยูด่า, ป โฮว อาวต นึง เวียง เยรูซาเลม เซ.
4 ปุย ไน เจอ ยูด่า นึง อื มัฮ
อาทายา กวน อุตซียา, ปุก มัฮ กวนโซะ เซคาริยา. โม จัตเจือ ไพรม อื มัฮ อามาริยา, เชฟาทิยา, ไม่ มาฮะลาเลน, ป มัฮ จัตเจือ โม เปเรต นึง อื.
5 โนก ฮา เซ มัฮ มาอาเซอา กวน บ่ารุก, ปุก มัฮ กวนโซะ โคนโฮเซ. โม จัตเจือ ไพรม อื มัฮ ฮาซายา, อาด่ายา, โยยาริป, ไม่ เซคาริยา. โม เซ มัฮ จัตเจือ เชลา นึง อื.
6 จัตเจือ โม เปเรต ป อาวต นึง เวียง เยรูซาเลม เตือง โอยจ อื ไก ปาวน รอย ไม่ ลแฆลฮ โรฮ ซเตะ ปุย. มัฮ ตื โม ป เกง ป เลือ นึง กัน รุป แตะ.
7 ปุย ไน เจอ เบ่นยามิน นึง อื มัฮ
ซันลู กวน เมชูลัม, ปุก มัฮ กวนโซะ โยเอต. โม จัตเจือ ไพรม อื มัฮ เปด่ายา, โคลายา, มาอาเซอา, อิทีเอน ไม่ เยชายา.
8 โนก ฮา เซ มัฮ แม กัปไบ่ ไม่ ซันไล ป มัฮ คระ เฌือต ซันลู เซ. จัตเจือ โม เบ่นยามิน เซ เตือง โอยจ อื ไก ซไตม รอย ไม่ ง่า โรฮ ซเตะ ปุย.
9 โยเอน กวน ซิครี มัฮ ฮัวนา โม เบ่นยามิน เซ, ยูด่า กวน ฮัตเซนูอา มัฮ ป เรอึม อื.
10 ป มัฮ โม ซตุ นึง อื มัฮ
เยด่ายา กวน โยยาริป ไม่ ยาคิน.
11 มัฮ แม เซไรยา กวน ฮินคียา, ปุก มัฮ กวนโซะ เมชูลัม. โม จัตเจือ ไพรม อื มัฮ ซาโด่ก, เมราโยต, ไม่ อาฮิทุป ป มัฮ ฮัวนา ซตุ.
12 ปุย ไน ซฆลาวม เซ โม ป ยุฮ กัน นึง วิฮัน นึง อื ไก ซเตะ รอย ไม่ ง่า โรฮ ลอา ปุย.
โนก ฮา เซ ติ ซฆลาวม อื มัฮ โม อาด่ายา กวน เยโรฮัม, ปุก มัฮ กวนโซะ เปไลยา. โม จัตเจือ ไพรม อื มัฮ อัมซี, เซคาริยา, ปาชเฮอ, ไม่ มันคิยา.
13 ปุย ไน ซฆลาวม เซ ไก ลอา รอย ไม่ รปาวน โรฮ ลอา ปุย ป มัฮ ฮัวนา ครอปครัว นึง อื.
ติ ซฆลาวม อื แม มัฮ โม อามัตไช กวน อาซาเรน, ปุก มัฮ กวนโซะ อักไซ. ป มัฮ จัตเจือ ไพรม อื มัฮ เมชินเลโมต ไม่ อิมเมอ.
14 ปุย ไน ซฆลาวม เซ ป มัฮ ตฮัน เกง เลือ นึง อื ไก ติ รอย ไม่ ง่า โรฮ ซเตะ ปุย. ป มัฮ ฮัวนา ยุฮ อื มัฮ ซัปดี่เอน กวน ฮักเกโด่ลิม.
15 ป มัฮ เจอ เลวี นึง อื มัฮ
เชไมอา กวน ฮัตชุป, ปุก มัฮ กวนโซะ อัตรีคัม. โม จัตเจือ ไพรม อื มัฮ ฮาชาบิ่ยา ไม่ บุ่นนี.
16 โนก ฮา เซ ชัปเบ่ไท ไม่ โยซาบั่ต ป มัฮ ฮัวนา ยุฮ โม เลวี เซ, มัฮ ป ควป คุม กัน ยุฮ ปุย นึง ก พริ วิฮัน ยุฮ พะจาว เซ.
17 มัตทานิยา กวน มีคา, ปุก มัฮ กวนโซะ ซัปดี่. ป มัฮ จัตเจือ ไพรม อื มัฮ อาซัป, มัฮ ฮัวนา ปุย นึง กัน เชีย ไม่ ไววอน ญันดี่ ไม่ พะจาว. บั่กบู่คียา มัฮ ป เรอึม มัตทานิยา เซ. อัปด่า กวน ชัมมุวา, ปุก มัฮ กวนโซะ กาลัน, จัตเจือ ไพรม อื มัฮ เยดู่ทุน, มัฮ โรฮ ป เรอึม อื.
18 โม เลวี ป อาวต นึง เยรูซาเลม ป มัฮ เวียง ซัมคัน เซ เตือง โอยจ อื ไก ลอา รอย ไม่ รเตะ โรฮ ปาวน ปุย.
19 โม ป มอง ญัม นึง โตะ รเวือะ วิฮัน เนอ มัฮ
อักคุป, ทันโมน, ไม่ โม เอียกปุ อื. ปุย โม เซ เตือง โอยจ อื ไก ติ รอย ไม่ อาลแฆลฮ โรฮ ลอา ปุย.
20 โม อิซราเอน โนก ฮา ปุย โม เซ, เตือง โม ซตุ ไม่ โม เลวี นึง อื เซ, อาวต นึง ย่วง อาวต โกะ แตะ, ป มัฮ นาตี มอป ปุย ละ อื นึง เมือง ยูด่า เซ โครยญ โฆะ แตะ.
21 โม ป ยุฮ กัน นึง วิฮัน เซ ปังเมอ อาวต นึง นาตี โอเฟน, มัฮ โรฮ ไน เคต เวียง เยรูซาเลม เซ ติ โดฮ. ซีฮะ ไม่ กิตปา มัฮ ป ควป คุม โม ป ยุฮ กัน นึง วิฮัน เซ.
22 ป มอง ควป คุม กัน ยุฮ โม เลวี นึง เวียง เยรูซาเลม เซ มัฮ อุตซี กวน บ่านี, ปุก มัฮ กวนโซะ ฮาชาบิ่ยา. โม จัตเจือ ไพรม อื มัฮ มัตทานิยา ไม่ มีคา. มัฮ ปุย ไน ซฆลาวม อาซัป. ซฆลาวม อาซัป เซ มัฮ โรฮ ป มอง ควป คุม กัน เชีย ปุย นึง วิฮัน เซ.
23 มัฮ ฆาื เอีจ ไก ลปุง ซตอก กซัต อาึง ละ ซฆลาวม โม เซ. โครยญ ซเง่ะ เอีจ ไก ป ลัง เชีย นึง ตัม เวน ลัง อาวต อื โครยญ โฆะ อื.
24 เปทาฮิยา กวน เมเชซาเบ่น มัฮ ปุย ไน ซฆลาวม เซรา เจอ ยูด่า, มัฮ ตัว แทน โม อิซราเอน นึง เญือะ กซัต ป อาวต นึง เมือง เปอเซีย เซ.
โม ป อาวต นึง ก พริ เวียง เยรูซาเลม
25 ไก โฮวน ปุย ป อาวต นึง ย่วง แตวะๆ ป ไก โบ ชิจ ม่า ยุฮ โม โกะ อื ไอฮ. โม ยูด่า ง่อน อื อาวต นึง ย่วง คีริยัต อารบ่า, นึง ดี่โบ่น ไม่ นึง เยคัปเซเอน, ไม่ นึง ย่วง แตวะๆ ป อาวต รวิต รเวียง ย่วง ระ โม เซ.
26 โม เซ อาวต โรฮ นึง ย่วง เยชูอา, โมลาด่า, ไม่ เบ่ตเปเลต.
27 อาวต โรฮ นึง ฮาซันชูอัน, นึง เบ่เออเชบ่า, ไม่ นึง ย่วง แตวะๆ ป ไก รวิต ย่วง เซ.
28 อาวต โรฮ นึง ย่วง ซิกลัก, นึง เมโคนา, ไม่ นึง ย่วง แตวะๆ ป ไก รวิต ย่วง เซ.
29 อาวต โรฮ นึง ย่วง เอนริมโมน, ย่วง โซรา, ย่วง ยามุต,
30 ย่วง ซาโนอา, ย่วง อะดุ่นลัม, ไม่ ย่วง แตวะๆ ป ไก รวิต ย่วง โม เซ. อาวต โรฮ นึง เมือง ลาคิต ไม่ นึง ชิจ ม่า ป ไก ซดิ ไม่ เมือง เซ, ไม่ ย่วง อาเซคา ไม่ ย่วง แตวะๆ ป ไก รวิต ย่วง เซ. โม ยูด่า เซ ลอต แปน อาวต แปน ไล แตะ เน่อึม นึง ย่วง เบ่เออเชบ่า ลวง ลั่กเซฮ ฮอยจ นึง โตะ โลก ฮินโนม ลวง ลั่กล่าวง.
31 โม เบ่นยามิน อาวต เน่อึม นึง ย่วง เกบ่า ลวง ลั่กเซฮ ฮอยจ ละ ย่วง มิกมัต, ย่วง ไอ, ย่วง เบ่ตเอน, ไม่ ย่วง แตวะๆ ป ไก รวิต ย่วง ระ โม เซ.
32 ฮอยจ โรฮ ละ ย่วง อานาโทต, ย่วง โนป, ไม่ ย่วง อานานิยา.
33 ฮอยจ โรฮ นึง ย่วง ฮาโซ, ย่วง รามา, ย่วง กิตทาอิม,
34 ย่วง ฮาดิ่ต, ย่วง เซโบ่อิม, ย่วง เนบั่นลัต,
35 ย่วง โลต, ไม่ ย่วง โอโน ป ไก โตะ โลก ยุฮ โม ชัง.
36 โม เลวี ง่อน อื ป อาวต อื นึง เมือง ยูด่า ไพรม อื เซ, ปุย เกือฮ อื เลียก อาวต ไม่ โม เจอ เบ่นยามิน.