149
1 ไมจ เปอะ ลืลาว พะจาว.
ไมจ เปอะ เชีย ละ พะจาว นึง รซอม เชีย โคระ. ไมจ เปอะ ลืลาว อื ลลาึง ก โพรม โม ปุย ไน อื.
2 เกือฮ โม อิซราเอน ญันดี่ นึง พะจาว ป ซัง แตะ เกิต เซ. เกือฮ ปุย เมือง ซีโยน มวน รพาวม นึง กซัต ยุฮ แตะ.
3 เกือฮ ฟอนลัม ไม่ ลืลาว แตะ มอยฮ พะจาว. เกือฮ เชีย ไม่ เลน แตะ รัมมะนา ไม่ พิน โด่วง กู ละ ทไว อื ละ พะจาว.
4 พะจาว เยอ มวน รพาวม นึง ปุย ไน แตะ. เกือฮ โรฮ โม ป ปึกๆ ออนๆ ปุน เป โม ป ตอซู ไม่ แตะ.
5 เกือฮ โม ปุย ซื ปุย ไซ มวน โมฮ รโอฮ รออง นึง เอีจ เป แตะ. เกือฮ โรฮ เชีย นึง ซัต เบี รฆวง ไอจ แตะ ไม่ รพาวม ไมจ มวน แตะ โรฮ.
6 เกือฮ มวยญ อื นาวก นึง รซอม ลืลาว พะจาว, ไม่ ไปญ อื วิจ ลไล ลอม ไม่,
7 ละ ซ โรก อื เวน ละ ปุย โฮวน เมือง โฮวน ปซา, ไม่ เกือฮ อื ปุย โฮวน ปะเทต เซ ลอก ตุต แตะ.
8 เกือฮ ปุน โจก โม กซัต ยุฮ อื นึง โม่ะเฮลีจ, ไม่ โจก อื โม จาวไน ยุฮ อื นึง โม่ะ ไร.
9 เกือฮ โม เซ ลอก ตุต ยุฮ พะจาว ตัม ป เอีจ ไซฮ ปุย อาึง. มัฮ ตอก เซ ตอก โฮลฮ โม ปุย ไน พะจาว เซ โญตซัก แตะ.
ไมจ เปอะ ลืลาว พะจาว.