29
รซอม เชีย ยุฮ ด่าวิต
1 โม เปะ ป มัฮ โม เตปด่า เตือง โอยจ เปอะ, ไมจ เปอะ ลืลาว พะจาว. ลืลาว โญตซัก อื ไม่ อัมนัต ระ ไล ยุฮ อื.
2 ไมจ เปอะ ทไว โญตซัก ละ พะจาว เกือฮ โปง ไม่ มอยฮ อื. ไมจ เปอะ นุ่ม ไว พะจาว นึง มัฮ อื ป ตึก นึง ซง่ะ ซงอม แตะ.
3 ปุย ฮมอง เซียง พะจาว นึง ปลัฮ รอาวม. เซียง อื เซ ระ ซนัน ตอก เนอึม บริ โฮ, เซียง อื เซ ลอยฮ เอิน เลี่ป ราว ปลัฮ รอาวม เซ.
4 เซียง พะจาว ระ เนอึม อัมนัต, เซียง พะจาว มัฮ ป ตึก นึง คึนัก แตะ.
5 เซียง พะจาว โบวก ยุฮ โคะ โซน ซีด่า นึง บลาวง เลบ่านอน. ปัง มัฮ โคะ โซน ตึก นึง ระ แตะ โบวก ตื ยุฮ อื.
6 พะจาว เกือฮ บลาวง เลบ่านอน ดุงเดียง เรียง ตอก เอิน กวน โมวก เญือม เตน อื โฮ. บลาวง เฮอโมน ดุงเดียง โรฮ ตอก เอิน โรฮ กวน มวย เจิง โฮ.
7 เซียง พะจาว เกือฮ โรฮ ปลุกปลัก ฮอยจ พราวป นึง ปลัฮเตะ.
8 เซียง พะจาว เซ รยุ่ ยุฮ ลาึน เวือฮ, เกือฮ โรฮ ลาึน คาเด่ต ดุงเดียง โรฮ.
9 เซียง พะจาว เกียฮ ดุงเดียง ยุฮ โคะ ระ โคะ ฮลาวง, โคะ นึง เพระด่าวก ราื โอยจ เอิน ฮละ ฆาื อื. โม ป อาวต นึง วิฮัน ยุฮ อื อัฮ ตื เฮี, “ลืลาว พะจาว เยอ เออ,” อัฮ เซ.
10 มัฮ พะจาว ป ตัตเตียง ปลัฮ รอาวม ป ตึก นึง โด่ะ แตะ เซ, นึง มัฮ อื กซัต ป ตัตเตียง ลอป โอเอีฮ โอ เญาะ ไก ลอยจ.
11 มัฮ พะจาว ป เกือฮ เรียง แด่น ละ โม ปุย ไน แตะ, ไม่ ปิฮ อื กุนมุ่น ละ, เกือฮ อื โฮลฮ อาวต เฮน อาวต ฮลอง.