4
รซอม เชีย ยุฮ ด่าวิต ฮอยจ ละ ฮัวนา โม ป เชีย ป โกว พิน ระ พิน แตวะ
1 โอ พะจาว, เญือม ไววอน ละ เปอะ ปัว ปะ โพต โอเอีฮ เนิ ตัม ป ปัว เยอะ. เญือม ไกป นิป โอเอีฮ ฮี ปัว เปอะ เรอึม อาึ เกือฮ โปน ฮา อื. ปัว เปอะ เลียก พาวม นึง แตะ ไม่ ง่อต เปอะ รซอม ไววอน อาึ เฮี, เดอึม อาึ ซ ที มัฮ ปุย ซืไซ ฆาื.
2 โม เปะ ป ระ ป คาว นึง ปลัฮเตะ เฮี, ซ เพียก แฮม ลั่ง เปอะ อาึ เลี่ญ เมาะ เมอ แล? ซ ฮรัก แนฮ ลั่ง เปอะ ป โอ ไก ป มัฮ ไม่ ซาวป แนฮ ลั่ง เปอะ ป โอ เนอึม เลี่ญ เมาะ เมอ แล?
3 ไมจ เปอะ ไตม มัฮ พะจาว ป เลือก อาึง ปุย ซืไซ ละ โกะ แตะ ไอฮ. เญือม ไววอน อาึ ละ อื, พะจาว ซ ง่อต อื เนิ.
4 ดัฮ เปอะ รอก พาวม โฮ ปุ เกือฮ ติ เปอะ ลอต ยุฮ มั่ป ฆาื รพาวม รอก เปอะ เซ. ฮา เซ ไมจ เปอะ อาวต โฆย ไม่ ง่อต ที เปอะ ไลลวง เซ โตะ รพาวม แตะ ฮอยจ นึง ซัต เบี รฆวง ไอจ เปอะ.
5 ไมจ เปอะ ทไว โอเอีฮ ละ พะจาว ตัม ปุก อื ไล แตะ. ไมจ โรฮ เปอะ อาึง รพาวม แตะ นึง.
6 ไก โฮวน ป ไววอน ปัว นึง พะจาว ตอก เฮี, “โอ พะจาว, ปัว เปอะ เกือฮ เอะ โฮลฮ ป ไมจ ป ญุ่ก. ปัว เปอะ เลียก พาวม นึง เอะ ไม่ เปลีฮ เปอะ นา ซเปีย แตะ เซ ละ เอะ,” อัฮ เซ ละ พะจาว โม เซ เยอ.
7 อาึ ปังเมอ อัฮ เฮี ละ พะจาว, ปะ เอีจ โพต เปอะ รพาวม ไมจ มวน เนิ. มัฮ เซ ป ไมจ เนิ ฮา เฮงาะ รโกะ โฮวน รอาวม อะงุน บื ป โฮลฮ ปุย โม เซ เยอ.
8 โอ พะจาว, เญือม ไอจ เจอะ อาึ โฮลฮ เนอึม ไอจ ไมจ ไอจ มวน. มัฮ ปะ โน่ง ป เกือฮ อาึ อาวต เฮน อาวต ฮลอง ไม่ เกือฮ เปอะ อาึ โปน ฮา โอเอีฮ ป คัม ป ตุง เงอะ โครยญ เจือ.