52
รซอม เชีย ยุฮ ด่าวิต ฮอยจ ละ ฮัวนา โม ป เชีย, ป โกว อื เญือม ฮอยจ โด่เอก ปุย เมือง เอโด่ม เคะ ซาอุน ไม่ อัฮ อื เฮี, “ด่าวิต เอีจ ฮอยจ นึง เญือะ อาฮิเมเลก.”
1 ปะ ป มัฮ ปุย ระ ไกญ ติญ มอยฮ แฮ, เมอยุ อวต เปอะ ติ แตะ นึง กัน ฆอก กัน เบร เยอ? อัม มัฮ โอ เปอะ ยุง, รพาวม ฮรัก ยุฮ พะจาว เยอ มัฮ ป ไก ลอป โอ เญาะ ไก ลอยจ.
2 ปะ ง่อต เปอะ ตอก ซ ยุฮ แตะ ไลจ ไม่ ปุย, ดัก เปอะ ลอม ตอก มีต คุต โฮ, ซาวป แนฮ จุ ปุย ไลจ.
3 ปะ ฮรัก เปอะ กัน ฆอก ฮา กัน ไมจ. มวน คีอู ละ เปอะ ฮา อัฮ ป เนอึม.
4 มัฮ ลปุง ป ไลจ ยุฮ ปุย ป มวน ละ ปะ อา. ปะ มัฮ เนอึม เปอะ ปุย ไล โกะ ไล เอียง.
5 พะจาว ปังเมอ ซ เมือะ ปะ โอก ฮา พากัง ยุฮ เปอะ, ไม่ ซ ตอยจ อื ปะ ตอก ตอยจ ปุย ไรป โฮ, เกือฮ ปะ ไลจโลม ปอ ไฆร ลอป เอิน เปอะ ฮา เมือง ป ไอม.
6 โม ปุย ซื ปุย ไซ เยอ ซ ยุ ปะ, ซ ฮลัต ฆาื อื. เญือม เซ ซ ญวยฮ ปะ ไม่ อัฮ อื ละ เปอะ ตอก เฮี,
7 “แก แลน เมอะ ปุย โอ ญอม เกือฮ พะจาว แปน ตัว เปิง แตะ เซ. เอีจ มัฮ อาึง อื รพาวม แตะ นึง คาวคอง โฮวน ยุฮ แตะ, ซาวป ยุฮ กัน ฆอก กัน เบร นึง แกต อื ติ แตะ ซ โฮลฮ เปิง คาวคอง ยุฮ แตะ เซ.”
8 อาึ อื ปังเมอ มัฮ เยอะ ตอก โคะ กาวก เกลอึม ฮละ ป อาวต นึง เญือะ ยุฮ พะจาว โฮ. อาึ อาึง ลอป รพาวม แตะ นึง รพาวม ฮรัก ตอน ฮมัน ยุฮ พะจาว โอ เญาะ ไก ลอยจ.
9 โอ พะจาว, อาึ ซ ญันดี่ ลอป ไม่ ปะ เบือ กัน ระ ไล ป เอีจ ยุฮ เปอะ เซ. อาึ ซ ครอฮ ไลลวง มัฮ ปะ ป ตึก นึง ไมจ แตะ ซองนา ปุย ไน เปอะ เตือง โอยจ อื.