61
รซอม เชีย ยุฮ ด่าวิต ฮอยจ ละ ฮัวนา โม ป เชีย ป โกว พิน ระ พิน แตวะ
โอ พะจาว, ปัว เปอะ ง่อต เซียง กอก อาึ ปัว นึง เปอะ ไม่ ง่อต เปอะ รซอม ไววอน อาึ เฮี. อาึ กอก ปัว นึง ปะ เน่อึม ก ซไง อื ฮา เญือะ ฮา ย่วง แตะ. เญือม อาวต อาึ ไม่ ชุม โกะ ลปิ พาวม แตะ, ปัว ปะ ตาว อาึ ฮอยจ นึง ซโมะ เปิง รอัง เดีย เยอะ.
ปะ มัฮ เปอะ ตัว เปิง อาึ, มัฮ เปอะ ตอก ปอม ตอน ฮมัน ป เฆีญ อาึ เกือฮ โปน ฮา โม ป ตอซู ไม่ เยอะ. ปัว เปอะ เกือฮ อาึ อาวต ลอป นึง พากัง ยุฮ เปอะ โอ เญาะ ไก ลอยจ. เกือฮ อาึ เลียก เปิง ฆรึม โพรยจ เปอะ ละ ซ โปน เนอะ ฮา ป โอ ไมจ. โอ พะจาว, ปะ เอีจ ฮมอง เปอะ รซอม ซันญา อาึ อาึง ละ เปอะ. โอเอีฮ ป มัฮ รโตง โม ป นัปทื เนอึม ปะ เซ, ปะ เอีจ เกือฮ เนอึม เปอะ ละ อาึ.
ปัว เปอะ ซึป ตอ อาญุ ละ กซัต เกือฮ ลั่ง ไอม ไพรม กอย, เกือฮ ซเงะ เคิ เนอึม ยุฮ อื ลั่ง เลี่ญ โฮวน เจน ปุย. เกือฮ โฮลฮ แปน ลอป กซัต ตัตเตียง ปุย ซองนา พะจาว โอ เญาะ ไก ลอยจ. เกือฮ รพาวม ฮรัก ตอน ฮมัน ไม่ รพาวม ซืไซ ยุฮ เปอะ แปน ป มอง เฆาะ เกาะ โลม อื.
เญือม เซ อาึ ซ เชีย ลืลาว ลอป มอยฮ เปอะ, ไม่ ซ ทไว แตะ โอเอีฮ ละ เปอะ โครยญ ซเง่ะ, ตัม ป เอีจ ซันญา แตะ อาึง ละ เปอะ เซ.