25
ตอก รฆุ อื โม นักโด่นตรี
1 กซัต ด่าวิต ไม่ โม ฮัวนา ตฮัน ยุฮ อื เลือก อาึง โม เลวี ง่อน ละ ซ แปน อื ป นัม กัน ลืลาว พะจาว. โม ป เลือก อื เซ มัฮ จัตเจือ อาซัป, จัตเจือ เฮมัน, ไม่ จัตเจือ เยดู่ทุน. โม เซ มัฮ โรฮ โม ป ซึป ลปุง พะจาว, เกียฮ เตียต โรฮ พิน ระ พิน แตวะ, ดิฮ แม โรฮ อื ไม่ ชา. เฮี มัฮ มอยฮ โม ป ยุฮ กัน เกว ไม่ กัน นัม กัน ลืลาว พะจาว เซ.
2 กวน อาซัป นึง อื มัฮ ซักเกอ, โยเซป, เนทานิยา, ไม่ อาชาเรลา. ฮัวนา ปุย โม เซ เอีจ มัฮ อาซัป เปือะ โม โกะ อื เซ ไอฮ. ปุย โม เซ เอีจ มัฮ โม ป ซึป ลปุง พะจาว ตัม ดวน กซัต แตะ.
3 กวน เยดู่ทุน นึง อื ไก แลฮ ปุย. มัฮ เกด่าลิยา, เซรี, เยชายา, ชิเมอี, ฮาชาบิ่ยา ไม่ มัตทีทิยา. ป มัฮ ฮัวนา ปุย แลฮ เซ เอีจ มัฮ เปือะ โม โกะ อื ไอฮ, มัฮ ป ซึป ลปุง พะจาว ไม่ โกว แตะ เซียง พิน ละ เชีย ลืลาว แตะ พะจาว ไม่ ทไว แตะ รซอม ญันดี่ แตะ.
4 กวน เฮมัน ไก กาว โรฮ ปาวน ปุย. มัฮ บุ่กคิยา, มัตทานิยา, อุตซีเอน, เชบู่เอน, เยรีโมต, ฮานานิยา, ฮานานี, เอลียาทา, กิตดั่นที, โรมัมที-เอเซอ, โยตเบ่คาชา, มันโลที, โฮที ไม่ มาฮะซีโอต.
5 พะจาว เอีจ เกือฮ เฮมัน ป มัฮ ป ซึป ลปุง แตะ เซ โฮลฮ กวน รเมะ แตะ กาว โรฮ ปาวน ปุย. กวน รโปวน อื ไก ลอวย ปุย. มัฮ เกือฮ อื ละ อื ตอก เซ ตอก เอีจ ซันญา แตะ อาึง ละ ซ แปน อื โญตซัก ละ เฮมัน เซ ไอฮ.
6 กวน รเมะ เฮมัน เตือง โอยจ อื เซ แปน ป เตียต พิน ดิฮ ชา ละ ซ แปน อื ควน รโพ กัน ลืลาว ปุย พะจาว นึง วิฮัน เซ. ป มัฮ ฮัวนา ยุฮ อื มัฮ เปือะ อื ไอฮ. อาซัป, เยดู่ทุน ไม่ เฮมัน เซ แปน ป ยุฮ กัน ตัม รซอม ดวน กซัต แตะ.
7 ปุย โม เซ ไม่ โม เอียกปุ อื มัฮ ตื ปุย เกง ละ เลน แตะ โด่นตรี ละ ลืลาว แตะ พะจาว เตือง โอยจ อื, นึง เอีจ ฟวยจ เพอึก อื ติ แตะ. ไก ไม่ ปุ แตะ 288 ปุย.
8 โม เซ เยอ โจก เบ่อ นึง เวน กัน ลัง ยุฮ แตะ โครยญ โฆะ แตะ เตือง ป ระ ป แตวะ, เตือง โม คู ไม่ โม ป เฮียน เซ, เกือฮ อื ตอก ปุ แตะ ตื.
9-31 ปุย 288 เซ รฆุ แม อื เลีฮ แปน ง่า โรฮ ปาวน มู. ติ ติ มู เซ เกือฮ อื ไก กาว โรฮ ลอา ปุย ตัม ซฆลาวม โม โกะ อื ไอฮ. ปุย ไน ซฆลาวม ติ ติ เซ ไก แม โรฮ ฮัวนา ยุฮ โม โกะ ไอฮ ติ มู ติ ปุย ตอก เฮี. ฮัวนา มู ติ นึง อื มัฮ โยเซป ป มัฮ จัตเจือ อาซัป เซ. ฮัวนา มู ลอา มัฮ เกด่าลิยา. มู ลอวย มัฮ ซักเกอ. มู ปาวน มัฮ เซรี. มู พอน มัฮ เนทานิยา. มู แลฮ มัฮ บุ่กคิยา. มู อาแลฮ มัฮ อาชาเรลา. มู ซเตะ มัฮ เยชายา. มู ซไตม มัฮ มัตทานิยา. มู กาว มัฮ ชิเมอี. มู กาว โรฮ ติ มัฮ อุตซีเอน. มู กาว ลอา มัฮ ฮาชาบิ่ยา. มู กาว ลอวย มัฮ เชบู่เอน. มู กาว โรฮ ปาวน มัฮ มัตทีทิยา. มู กาว โรฮ พอน มัฮ เยรีโมต. มู กาว โรฮ แลฮ มัฮ ฮานานิยา. มู กาว อาแลฮ มัฮ โยตเบ่คาชา. มู กาว ซเตะ มัฮ ฮานานี. มู กาว ซไตม มัฮ มันโลที. มู ง่า มัฮ เอลียาทา. มู ง่า โรฮ ติ มัฮ โฮที. มู ง่า ลอา มัฮ กิตดั่นที. มู ง่า ลอวย มัฮ มาฮะซีโอต. มู ง่า โรฮ ปาวน มัฮ โรมัมที-เอเซอ.