29
เฮเซคียา กซัต เมือง ยูด่า
(2 กซต. 18:1-3)
1 เญือม แปน โรง เฮเซคียา กซัต ละ โม ยูด่า เซ, อาญุ อื ไก ง่า โรฮ พอน เนอึม. ตัตเตียง ปุย นึง เวียง เยรูซาเลม ง่า ซไตม เนอึม. มะ อื มัฮ อาบี่ยา ป มัฮ กวน เซคาริยา.
2 เฮเซคียา เซ ยุฮ ป ปุก รพาวม พะจาว ตอก ยุฮ ด่าวิต ป มัฮ จัตเจือ ไพรม อื โฮ.
เฮเซคียา เฌาะ เพรียง วิฮัน ยุฮ พะจาว
3 เนอึม โฮลฮ โรง เฮเซคียา แปน กซัต มัฮ เอิน เคิ เมือ โรง นึง อื. เฮเซคียา เซ โฮว โปฮ แม รเวือะ วิฮัน ยุฮ พะจาว, ไม่ เฌาะ เพรียง แม อื รเวือะ โม เซ เกือฮ ไมจ.
4 กอก โรฮ โม ซตุ ไม่ โม เลวี, เกือฮ อื ฮอยจ โพรม เคะ แตะ นึง ควง วิฮัน เซ ลวง ลั่ก โอก ซเงะ นึง อื.
5 เญือม เซ อัฮ เฮี ละ อื, “โม เปะ โม เลวี เตือง โอยจ เปอะ, ง่อต ป อัฮ อาึ เฮี. ไมจ เปอะ เกือฮ ติ แตะ แปน ปุย ซง่ะ ไล. ไมจ โรฮ เปอะ เกือฮ วิฮัน ยุฮ เยโฮวา พะจาว ยุฮ จัตเจือ ไพรม เปอะ แปน ป ซง่ะ ไล โรฮ. เมาะ โอเอีฮ ป โอ ซง่ะ ไล โตะ กไน วิฮัน เซ, ไมจ เปอะ ตุย โอก ฮา วิฮัน เซ.
6 โม จัตเจือ ไพรม เอะ เซ เญาะ เนอึม โตว รพาวม ละ เยโฮวา พะจาว ยุฮ เอะ. เอีจ ยุฮ เนอึม ป ฆอก ป เบร ละ อื. เอีจ ละ โปวฮ เนอึม พะจาว, เอีจ พัต นา แตะ ฮา วิฮัน ยุฮ อื, ไม่ เอีจ ลั่กเคะ โรฮ แตะ ลั่ก อื โรฮ.
7 เอีจ ซอง เนอึม รเวือะ วิฮัน เซ, ออม นึง วิฮัน เนอ เอีจ เกือฮ อื ญึ่ต, ป ซออย ฮงาื ไม่ คอง ทไว ไฮญ เญอ, ปุ โรฮ เญาะ ตอง ทไว อื นึง วิฮัน ยุฮ พะจาว ทื โม อิซราเอน เซ เฟือฮ เอิน.
8 มัฮ ฆาื เซ ป เปลีฮ พะจาว รพาวม ฮาวก แตะ ละ เมือง ยูด่า ไม่ เวียง เยรูซาเลม ฆาื อื. กัน ยุฮ พะจาว ตอก เซ เอีจ แปน เนอึม ควน ฮลัต เตีจ โตวฮ ฆราึง ปุย นึง. แปน แม โรฮ ป โฮลฮ ปุย โฮว โบ โล่ ญวยฮ ตอก เอีจ โฮลฮ เปอะ ยุ นึง ไง่, ฮมอง นึง ฮยวก แตะ เซ.
9 มัฮ ฆาื โอเอีฮ ตอก เซ ป ยุม โม มะเปือะ เอะ ฆาื อื นึง กัน รุป เปอ. โม ปรโปวน เญือะ อะ ไม่ กวน รเมะ กวน รโปวน เนอะ, เอีจ โฮลฮ โฮว แปน ครา ปุย ฆาื อื โรฮ.
10 ปเลี่ย เฮี อาึ เอีจ โปวต รพาวม แตะ ละ ซ ซันญา ดิ แตะ โอเอีฮ ไม่ เยโฮวา พะจาว ยุฮ โม อิซราเอน, เดอึม พะจาว โอ เญือะ ซ เปลีฮ รพาวม ฮาวก แตะ ละ โม เอะ ฆาื อื.
11 โม เปะ ป มัฮ กวน เนอะ, ปุ เญือะ ซลัฮ นึง กัน ลัง ยุฮ เปอะ. พะจาว เอีจ มัฮ เลือก อื โม เปะ เกือฮ ชุง ซองนา แตะ ละ ซ รซอฮ เปอะ ละ อื, ไม่ นัม โรฮ เปอะ ปุย ไฮญ นึง กัน ลืลาว พะจาว. มัฮ โรฮ เกือฮ อื โม เปะ แปน ป ตอง ทไว ป ซออย ฮงาื ละ แตะ โรฮ,” อัฮ เซ ละ อื.
12-14 เญือม เซ โม เลวี ป อาวต นา เซ เยอ มัฮ โม เฮี, เน่อึม นึง ซฆลาวม โคฮัต, มัฮ มาฮัต กวน อามาไซ, ไม่ โยเอน กวน อาซาริยา. เน่อึม นึง ซฆลาวม เมรารี มัฮ คีต กวน อัปดี่, ไม่ อาซาริยา กวน เยฮาเลเลน. เน่อึม นึง ซฆลาวม เกอโชน มัฮ โยอา กวน ซิมมา, ไม่ เอเด่น กวน โยอา. เน่อึม นึง ซฆลาวม เอลีซาฟัน มัฮ ชิมรี ไม่ เยอูเอน. เน่อึม นึง ซฆลาวม อาซัป มัฮ เซคาริยา ไม่ มัตทานิยา. เน่อึม นึง ซฆลาวม เฮมาน มัฮ เยฮูเอน ไม่ ชิเมอี. เน่อึม นึง ซฆลาวม เยดู่ทุน มัฮ เชไมอา ไม่ อุตซีเอน. โม เซ ไก ตื รพาวม ฆวต ยุฮ กัน.
15 ปุย โม เซ ซาวป รโจะ โม เลวี ไฮญ เซ. ฟวยจ เซ เกือฮ แม โรฮ ติ แตะ แปน ปุย ซง่ะ ไล ละ พะจาว. ยุฮ เนอึม อื ตัม รซอม ดวน กซัต แตะ, เกือฮ เนอึม โรฮ วิฮัน ยุฮ พะจาว เซ แปน ป ซง่ะ ไล ตัม ป อัฮ โกตไม ยุฮ พะจาว เซ.
16 โม ซตุ เซ เลียก แม ฮอยจ โตะ ฮอง กไน วิฮัน ยุฮ พะจาว ละ เกือฮ อื วิฮัน เซ แปน ป ซง่ะ ไล. เมาะ ป โอ ซง่ะ ไล ป อาวต โตะ กไน วิฮัน เซ, ตุย โรวก อื ฮอยจ นึง ควง วิฮัน เซ. โม เลวี เซ ยวก แม โฮว โปวฮ อื นึง โกลง คิตโรน.
17 ซเงะ เพรียง โรง อื วิฮัน ยุฮ พะจาว ละ เกือฮ อื แปน ป ซง่ะ ไล เซ, ปุก เอิน เคิ ติ ซเงะ ติ นึง อื. เญือม เอีจ ฮอยจ อื ซเงะ ซเตะ นึง อื, กัน เพรียง อื วิฮัน เซ เอีจ ฟวยจ ฮอยจ ละ คระ เลียก ปุย ฮอยจ ละ วิฮัน เซ. ฟวยจ เซ แม ซเตะ ซเงะ, ปุก เคิ ติ ซเงะ กาว โรฮ แลฮ นึง อื, กัน เพรียง อื วิฮัน เซ ฟวยจ เนอึม ยุฮ อื เตือง โอยจ อื.
18 ฟวยจ เซ โม เลวี เซ เลียก รโฮงะ อื ละ กซัต เฮเซคียา ตอก เฮี, “โม เอะ เอ เอีจ ฟวยจ เพรียง เงอะ วิฮัน ยุฮ พะจาว เซ, ไม่ เกือฮ เยอะ แปน ป ซง่ะ ไล เยอ, เตือง คัน ตอง ปุย ทไว ซัตซิง นึง, ไม่ เครอึง ป โกว ปุย ละ คัน เซ, ฮอยจ ละ โตะ อาวต คโนมปัง ซัมคัน ทไว ปุย, ไม่ เครอึง ป โกว ปุย ละ โตะ เซ.
19 เมาะ โอเอีฮ ป ไก นึง วิฮัน ยุฮ พะจาว ป เอีจ โปวฮ เตีย เฮีย ไฮ เยือ กซัต อาฮัต นึง โอ อื เนอึม รพาวม ละ พะจาว เซ, โม เอะ เอีจ เฌาะ เพรียง แม เยอะ เกือฮ แม โรฮ แปน ป ซง่ะ ไล โรฮ. ปเลี่ย เฮี เอีจ อาวต นึง ลั่กกา คัน ทไว ยุฮ พะจาว เซ เตือง โอยจ อื,” อัฮ เซ ละ อื.
20 ปวยฮ พริ เซ กซัต เฮเซคียา โกฮ เมือ กซะ งาวป ลั่ง อื. กอก โม ป ระ ป คาว นึง เวียง เซ ฮอยจ โพรม ไม่ แตะ, ลอต เอิน ฮาวก ดิ ไม่ อื นึง วิฮัน ยุฮ พะจาว เซ.
21 โรวก โมวก โปก ไม่ แตะ อาแลฮ ตัว, แกะ โปก อาแลฮ ตัว, กวน แกะ แม อาแลฮ ตัว, มัฮ แม โรฮ ปิ โปก อาแลฮ ตัว. ซัตซิง โม เซ เยอ แปน ควน โตฮ อื โม จัตเจือ กซัต ไม่ โม ยูด่า ฮา มั่ป ยุฮ อื เซ เตือง โอยจ อื. แปน โรฮ ควน เกือฮ อื วิฮัน ยุฮ พะจาว เซ แปน ป ซง่ะ ไล โรฮ. กซัต เฮเซคียา ดวน โรฮ โม ซตุ ป มัฮ จัตเจือ อาโรน เซ ทไว ซัตซิง โม เซ นึง คัน ทไว ยุฮ พะจาว โรฮ.
22 โม ซตุ มอก เนอึม โมวก โปก เซ รกา, ฟวยจ เซ มอก แม แกะ โปก ไม่ กวน แกะ. ฮนัม ซัตซิง โม เซ โครยญ ตัว อื ซพรอต แม อื นึง คัน ทไว เซ.
23 เญือม เอีจ ฟวยจ ยุฮ อื ตอก เซ, ตุย แม โรฮ โม ปิ นึง อื, ตาว อื ฮอยจ ละ กซัต ไม่ โม ป ฮอยจ โพรม เซ, ละ ซ เกือฮ อื ย่อง เตะ แตะ ราว ปิ โม เซ.
24 ฟวยจ เซ โม ซตุ โฮว มอก ปิ เซ. ฮนัม ปิ เซ โทก อื ราว คัน ทไว เซ นึง เกือฮ อื แปน ควน โตฮ โม อิซราเอน ติ แตะ ฮา มั่ป เตือง โอยจ อื. เอีจ มัฮ กซัต ป ดวน ปุย มอก ตอง ทไว ซัตซิง ละ พะจาว เตือง ตัว อื ตอก เซ, ไม่ ทไว โรฮ อื ควน โตฮ โม อิซราเอน ติ แตะ ฮา มั่ป เซ เตือง โอยจ อื.
25 กซัต เฮเซคียา เซ เกือฮ โรฮ โม เลวี แปน ป อาวต รซอฮ นึง วิฮัน ยุฮ พะจาว. เกือฮ อื โกว ชา, พิน ระ, ไม่ พิน แตวะ ป ไก นึง วิฮัน เซ ตัม ดวน กซัต ด่าวิต อื. เอีจ มัฮ รซอม ดวน พะจาว ป ซึป กาต ไม่ นาทัน ป ซึป ลปุง พะจาว โฮ.
26 โม เลวี ชุง ไปญ เคืองโด่นตรี ยุฮ ด่าวิต เซ. โม ซตุ นึง อื ไปญ โตวต ยุฮ แตะ.
27 เญือม เซ เฮเซคียา ดวน ปุย ตอง ทไว ซัตซิง ป ลัง ทไว ปุย นึง ราว คัน เซ. เน่อึม เญือม ตอง โรง อื ป ทไว แตะ เซ, โม ป ไปญ เคืองโด่นตรี เซ เลน โด่นตรี ยุฮ แตะ โครยญ เจือ, ไม่ โม ป เชีย เซ. โม ป ไปญ โตวต ปาึง แม โรฮ โตวต ยุฮ แตะ โรฮ.
28 เมาะ โม ป อาวต นา เซ นุ่ม ติ แตะ ไว พะจาว. เชีย ดิ ลืลาว พะจาว ไม่ ปุ แตะ. โม ป เลน โด่นตรี เซ เลน แนฮ อื, ฮอยจ ละ ฟวยจ ตอง อื ทไว โอเอีฮ ละ พะจาว.
29 เญือม เอีจ ฟวยจ กัน ยุฮ อื เซ, กซัต เฮเซคียา ไม่ โม เซ เตือง โอยจ อื ชุง นึง มะ ฆราวง แตะ, นุ่ม ติ แตะ นึง ลืลาว แตะ พะจาว.
30 เญือม เซ กซัต เฮเซคียา ไม่ โม จาวไน เซ เกือฮ โม เลวี เชีย ลืลาว พะจาว ตัม รซอม เชีย ยุฮ กซัต ด่าวิต ไม่ รซอม เชีย ยุฮ อาซัป ป ซึป ลปุง พะจาว เซ. โม เซ เชีย เนอึม ไม่ รพาวม ไมจ มวน แตะ, นุ่ม ติ แตะ ลืลาว พะจาว ไม่ อื.
31 ฟวยจ เซ กซัต เฮเซคียา อัฮ เฮี ละ โม ลัปซด่อน, “ปเลี่ย เฮี โม เปะ เอีจ ซง่ะ ไล เปอะ ละ พะจาว. ไมจ เปอะ เลียก ซดิ, โรวก ทไว ซัตซิง ละ พะจาว,” อัฮ เซ ละ อื. เญือม เซ โม ลัปซด่อน โรวก เนอึม อื ตอก เซ, ทไว โรฮ ควน ญันดี่ ไม่ พะจาว ง่อน. ไก แม ง่อน ป โรวก ซัตซิง ละ ซ ตอง แตะ ทไว เตือง ตัว อื ละ พะจาว นึง รพาวม ฆวต ทไว โกะ อื ไอฮ เซ.
32 ซัตซิง ป โรวก โม ลัปซด่อน ตอง ทไว ละ พะจาว เตือง ตัว อื เซ มัฮ โมวก โปก อาลแฆลฮ ตัว, แกะ โปก ติ รอย ตัว, กวน แกะ แม ลอา รอย ตัว.
33 โนก ฮา เซ, ซัตซิง โรวก อื ทไว ตอก ไฮญ เญอ มัฮ แม โมวก โปก แลฮ รอย ตัว, แกะ ลอวย เปือน ตัว เอิน.
34 เญือม เซ ซตุ ป รซอฮ ละ พะจาว นา เซ ปังเมอ โอ ดิ โฮวน ป เกือฮ ติ แตะ แปน ปุย ซง่ะ ไล นึง อื. กา เฆียง เกือฮ โม ซตุ ติ แตะ แปน ปุย ซง่ะ ไล เตือง โอยจ อื, จัมเปน โม เลวี เรอึม ฮอยจ ละ ฟวยจ กัน เซ. กา เซ โม เลวี เซ เอีจ ที รพาวม นึง เกือฮ อื ติ แตะ แปน ปุย ซง่ะ ไล ฮา โม ซตุ.
35 โนก ฮา ซัตซิง ป ตอง อื ทไว ละ พะจาว เตือง ตัว อื เซ, โม ซตุ เซ ไมจ แม อื ตอง ทไว ลออยฮ ซัตซิง ทไว โม ลัปซด่อน ละ รโจะ อื รพาวม แตะ ไม่ พะจาว โรฮ. ไมจ แม โรฮ อื เรฮ รอาวม อะงุน นึง ซัตซิง ตอง ปุย ทไว ละ พะจาว เตือง ตัว อื เซ โรฮ. มัฮ ตอก เซ ตอก เฌาะ ไก แม โรฮ ตอก รซอฮ ปุย ละ พะจาว นึง วิฮัน เนอ.
36 เญือม เซ กซัต เฮเซคียา ไม่ โม ลัปซด่อน เตือง โอยจ อื ไมจ มวน ดิ รพาวม นึง ยุ อื มัฮ พะจาว ป เรอึม กัน เซ, เกือฮ ไกลจ ฟวยจ โครยญ เจือ.