6
กัน มอป ทไว วิฮัน
(1 กซต. 8:12-66)
1 ฟวยจ เซ กซัต ซาโลมอน ไววอน ตอก เฮี, “โอ พะจาว, ปะ เอีจ อัฮ เปอะ ติ แตะ ซ อาวต นึง ชุต รวู กุ กอน เฮี.
2 อาึ เอีจ ยุฮ วิฮัน คึนัก เฮี ละ ซ เกือฮ แตะ แปน ก อาวต ลอป ปะ นึง โอ เญาะ ไก ลอยจ,” อัฮ เซ.
3 ลไล ชุง ลั่ง โม อิซราเอน ป ฮอยจ โพรม เซ นา เซ เยอ, กซัต ซาโลมอน ลเตือฮ ติ แตะ, ลั่กกา ลั่ก โม เซ, ปิฮ โรฮ มุ่น ละ อื.
4 ฟวยจ เซ กซัต ซาโลมอน อัฮ เฮี, “ปัว ลืลาว เยโฮวา ป มัฮ พะจาว ยุฮ โม อิซราเอน, ป ยุฮ เนอึม โอเอีฮ ตัม ป เอีจ ซันญา แตะ อาึง ละ ด่าวิต ป มัฮ เปือะ เกอะ เซ.
5 เอีจ อัฮ โรฮ อื ตอก เฮี, ‘เน่อึม เญือม นัม โรง อาึ ปุย ไน แตะ โอก ฮา เมือง อียิป โฮ, อาึ ดิ เลือก โตว เมือง ออฮ เมือง เอีฮ ลลาึง โม อิซราเอน ละ ซ เกือฮ ปุย ยุฮ วิฮัน ละ อาวต มอยฮ แฮะ ติ โดฮ เนอึม. อาึ ดิ เลือก โตว โรฮ ปุย ออฮ ปุย เอีฮ ละ ซ เกือฮ เยอะ แปน กซัต ละ โม อิซราเอน ป มัฮ ปุย ไน แตะ เฮี ติ ปุย เนอึม.
6 ปเลี่ย เฮี อาึ อื ปังเมอ เลือก เยรูซาเลม ละ ซ เกือฮ มอยฮ แตะ อาวต นึง นา เซ, เลือก แม โรฮ ด่าวิต ละ ซ เกือฮ แตะ ตัตเตียง โม อิซราเอน ป มัฮ ปุย ไน แตะ เฮี,’ เอีจ อัฮ อื ตอก เซ.
7 “ด่าวิต เปือะ เกอะ เซ เอีจ ไก รพาวม ฆวต ยุฮ วิฮัน นึง ซ เกือฮ อื แปน ก อาวต มอยฮ เยโฮวา พะจาว ยุฮ โม อิซราเอน.
8 พะจาว ปังเมอ อัฮ อื ละ เปือะ เกอะ เซ ตอก เฮี, ‘ไลลวง ฆวต ยุฮ เปอะ วิฮัน เกือฮ แปน ก อาวต มอยฮ อาึ เซ, เอีจ มัฮ เนอึม ป ปุก นึง เอีจ ไก เนอึม รพาวม ฆวต ยุฮ เปอะ.
9 ปัง มัฮ ตอก เซ, มัฮ โตว ปะ ป ซ โฮลฮ ยุฮ วิฮัน เซ เยอ, ซ มัฮ กวน รเมะ โกะ เปอะ ไอฮ ป ซ แปน ป ยุฮ วิฮัน ละ อาึ อื,’ เอีจ อัฮ เซ พะจาว เยอ.
10 “ปเลี่ย เฮี พะจาว เอีจ ยุฮ เนอึม อื ตัม ป เอีจ ซันญา แตะ อาึง, เอีจ เกือฮ เนอึม อาึ โฮลฮ แปน กซัต ตัตเตียง โม อิซราเอน ฆรอ ด่าวิต ป มัฮ เปือะ เกอะ เซ. ตอก เนอึม เอีจ ซันญา พะจาว อาึง, อาึ เอีจ โฮลฮ เนอึม ยุฮ วิฮัน ละ เกือฮ แตะ แปน ก อาวต มอยฮ เยโฮวา พะจาว ยุฮ โม อิซราเอน เซ โรฮ.
11 อาึ เอีจ โฮลฮ เนอึม อาึง ฮิต ลปุง ซันญา ยุฮ พะจาว เซ นึง วิฮัน เซ. โตะ กไน ฮิต เซ เอีจ ไก ซโมะ ป ไก รซอม ซันญา ยุฮ พะจาว นึง ไม่ โม อิซราเอน,” อัฮ เซ กซัต ซาโลมอน เนอ.
รซอม ไววอน กซัต ซาโลมอน
12 ฟวยจ เซ กซัต ซาโลมอน โกฮ ชุง ลั่กกา คัน ทไว เซ ซองนา โม อิซราเอน เซ เตือง โอยจ อื, ยวก เตะ แตะ เตือง ลอา ก บลัฮ อื.
13 กา เซ ซาโลมอน เอีจ ยุฮ ฮัน นึง ไร ซเงี, โบลวง อื บั่กบ่วน ควง วิฮัน เซ. ลวง ลั่ง ฮัน เซ ไม่ ลวง เวือฮ อื มัฮ พอน รเนฮ ตอก ปุ แตะ. ลวง ฮลาวง อื ไก ลอวย รเนฮ. ซาโลมอน เนอ อาวต ราว ฮัน เซ. ชุง นึง มะ ฆราวง แตะ ซองนา โม อิซราเอน เซ, ไววอน ยวก เตะ แตะ เตือง ลอา ก บลัฮ อื.
14 อัฮ เฮี, “โอ เยโฮวา, พะจาว ยุฮ โม อิซราเอน, ไก โตว พะจาว ไฮญ ติ เนอึม ป ตอก ปะ อา, ป อาวต นึง มะลอง ญุ่ก, ป อาวต นึง ปลัฮเตะ ญุ่ก, ติ ปุย ปุ ไก. ปะ เอีจ ปุน โซะโกะ ฮรักซา เนอึม เปอะ นึง ลปุง ซันญา แตะ อาึง, ไม่ เอีจ เปลีฮ เปอะ รพาวม ฮรัก ตอน ฮมัน ยุฮ แตะ ฮอยจ ละ โม กวนไจ ยุฮ เปอะ ป เนอึง ป อัฮ เปอะ ไม่ รพาวม เนอึม แตะ เฮี.
15 “ปะ เอีจ ยุฮ เนอึม เปอะ ตัม ป เอีจ ซันญา แตะ อาึง ละ ด่าวิต กวนไจ ยุฮ เปอะ ป มัฮ เปือะ อาึ เซ โครยญ เจือ. ป ซันญา เปอะ อาึง เซ, เอีจ ฟวยจ เนอึม ไน ซเงะ เนาะ เฮี เบือ อัมนัต ระ ยุฮ เปอะ.
16 “โอ เยโฮวา พะจาว ยุฮ โม อิซราเอน, ปัว แม ปะ ยุฮ ตัม ป เอีจ ซันญา เปอะ ละ ด่าวิต ป มัฮ เปือะ เกอะ ติ เจือ แม, นึง เอีจ ซันญา เปอะ อาึง ละ อื ตอก เฮี, ‘ดัฮ กวน เฌือต ปะ ปุน แฮน ติ แตะ ฮา ป โอ ไมจ, ไม่ โฮว อื นึง คระ ยุฮ อาึ ตอก เอีจ ยุฮ ปะ อื โฮ, อาึ ซ เกือฮ ลอป จัตเจือ เปอะ แปน กซัต ยุฮ โม อิซราเอน,’ อัฮ เปอะ ตอก เซ.
17 โอ พะจาว ยุฮ โม อิซราเอน, เคียง มัฮ อื ตอก เซ เยอ, อาึ ปัว เปอะ เกือฮ เนอึม แปน ตัม ป เอีจ ซันญา เปอะ อาึง ละ ด่าวิต เปือะ เกอะ, ป มัฮ กวนไจ ยุฮ เปอะ เซ.
18 “โอ พะจาว, ปะ อัม ซ เกียฮ อาวต เนอึม เปอะ ลลาึง ปุย นึง ปลัฮเตะ เฮี? ปลัฮ มะลอง ป ระ ป ฮลาวง เงอ, เกียฮ กุป โตว ลั่ง อาวต ปะ. เคียง มัฮ อื ตอก เซ, วิฮัน ยุฮ อาึ ละ เปอะ เฮี โฮว ละ โอ แตะ ซ เกียฮ กุป ปะ.
19 ปัง มัฮ ตอก เซ, โอ เยโฮวา ป มัฮ พะจาว ยุฮ ฮุ, ปัว ปะ ง่อต รซอม ไววอน ไม่ รซอม ปัว อาึ ป มัฮ กวนไจ ยุฮ เปอะ เฮี นึง เปอะ.
20 ปัว ปะ แปน ป แลน แก วิฮัน เฮี เตือง ซเง่ะ รซาวม, นึง เอีจ ซันญา โรฮ เปอะ ซ เกือฮ เปอะ มอยฮ แตะ อาวต นา เฮี, ปัว โรฮ เปอะ ง่อต รซอม ไววอน อาึ ป มัฮ กวนไจ ยุฮ เปอะ เญือม ไววอน เนอะ ไม่ นา เยอะ ลั่ก วิฮัน เฮี.
21 ปัว เนอึม ปะ ง่อต ป ปัว อาึ ป มัฮ กวนไจ ยุฮ เปอะ เฮี, ไม่ รซอม ปัว โม อิซราเอน ปุย ไน เปอะ เซ เญือม ไววอน อื นา ลั่ก วิฮัน เฮี. ปัว เนอึม ปะ ง่อต ฮมอง ป ปัว เอะ นึง เปอะ เน่อึม นึง ก อาวต เปอะ เมือง มะลอง, ละ ซ โอ เปอะ ทื โซะ โระ โกลยจ พิต โฌาะ ยุฮ โม เอะ.
22 “ป โฮลฮ ปุย่วง อื ฟึนฟอง นึง ยุฮ อื ป พิต เตอ, ไม่ โฮลฮ อื โฮว ซันญา ซาบั่น ติ แตะ ลั่กกา คัน ทไว ยุฮ เปอะ นึง วิฮัน เฮี โฮ,
23 ปัว เนอึม ปะ ป อาวต เมือง มะลอง ง่อต ป อัฮ อื. ปัว ปะ รเตีฮ โอเอีฮ ละ โม กวนไจ ยุฮ เปอะ ตอก ปุก อื. ละ โม ป ยุฮ เนอึม ป พิต ป โฌวะ, ปัว ปะ เกือฮ เนอึม ตุต ฮอยจ ละ ปุย เซ นึง อื. ละ โม ป ยุฮ ป ปุก ป ลอก ไม่ ป ซื ป ไซ, ปัว โรฮ ปะ เกือฮ ละ อื ตัม ป ซื ป ไซ ยุฮ อื โรฮ.
24 “เญือม ไป โม อิซราเอน ป มัฮ ปุย ไน เปอะ นึง ป ฮอยจ ตอซู ไม่ แตะ ฆาื ยุฮ แตะ ป พิต ละ ปะ, ฟวยจ เซ ดัฮ เอีญ แม เคะ ปะ ไม่ นัปทื เนอึม แตะ มอยฮ ปะ, ไม่ ปัว เนอึม โรวะ แตะ เบือ มอยฮ ปะ นึง วิฮัน เฮี โฮ,
25 ปัว โรฮ ปะ ป มัฮ พะจาว ป อาวต เมือง มะลอง ง่อต รซอม ปัว อื, ไม่ ยวก โรฮ เปอะ พิต โฌวะ ยุฮ โม อิซราเอน ปุย ไน เปอะ เซ. ปัว โรฮ ปะ นัม โม เซ เกือฮ โฮลฮ เอีญ แม ฮอยจ นึง เมือง เอีจ เกือฮ ปะ ละ จัตเจือ ไพรม อื เฮี โรฮ.
26 “เญือม คัต ปะ รอาวม เฮละ ฮา ปลัฮเตะ เฮี นึง เกือฮ เปอะ โม อิซราเอน ลอก ตุต แตะ ฆาื มั่ป พิต ยุฮ อื ละ เปอะ เซ, ดัฮ โม เซ ไววอน ละ ปะ ไม่ นา แตะ ลั่ก วิฮัน เฮี, ไม่ นัปทื เนอึม แตะ มอยฮ ปะ, ไม่ ญอม โรฮ อื ลเตือฮ ติ แตะ ฮา มั่ป ยุฮ แตะ,
27 ปัว ปะ ป อาวต เมือง มะลอง ง่อต ป ปัว อื เซ. ปัว ปะ โอ ทื พิต โฌวะ ยุฮ โม อิซราเอน ป มัฮ ปุย ไน เปอะ, ไม่ มัฮ อื กวนไจ เปอะ. ปัว ปะ เพอึก เกือฮ โฮว นึง คระ ปุก คระ ลอก. ปัว ปะ โพต แม รอาวม เฮละ เกือฮ ฮอยจ นึง ปลัฮเตะ ยุฮ แตะ เฮี, นึง มัฮ อื ปลัฮเตะ ป เกือฮ เปอะ แปน คอง ปุย ไน แตะ.
28 “ดัฮ ปลัฮเตะ เฮี ไก กัน ไปลญ อาวป เออึป กิฮ นึง, พาญัต ฆอก ฮอยจ ละ ปุย ญุ่ก, เกิต ฮา เกิต พาญัต ไม่ ซดู ซฆลา ป ฮอยจ ละ ป ซมา ลโลวง ปุย ญุ่ก, ไม่ ไก แม โรฮ ปุย ฮอยจ แวต เมือง ละ ซ ตอซู แตะ ไม่ ญุ่ก, ปัง เกิต กัน โซะ กัน เม่ะมั่ก ตอก ออฮ ตอก เอีฮ ญุ่ก,
29 ดัฮ ไก ป ออฮ ป เอีฮ ญุ่ก ไน โม อิซราเอน ป มัฮ ปุย ไน เปอะ เซ ป ไววอน ยวก เตะ แตะ ไม่ นา แตะ ลั่ก วิฮัน เฮี, นึง ปัว แตะ โอเอีฮ ฆาื อาวม อื รพาวม ตุก แตะ นึง เม่ะมั่ก ป เกิต ละ แตะ เซ,
30 ปัว ปะ ง่อต ฮมอง ป ปัว อื เซ เน่อึม ก อาวต เปอะ นึง เมือง มะลอง เซ. ปัว ปะ โอ ทื โซะ โระ โกลยจ พิต โฌวะ ยุฮ โม เซ เตือง โอยจ อื. มัฮ ปะ โน่ง ป ยุง ป คิต ป ง่อต ปุย โตะ รพาวม อื. ปัว ปะ ยุฮ ละ อื ตัม โซมกวน อื ตอก เอีจ ยุ เปอะ ป คิต ป ง่อต อื ไม่ กัน ยุฮ อื โครยญ โฆะ อื,
31 ละ ซ เกือฮ โม เซ ยุง ฮลัต นึง ปะ ไม่ เนอึง อื ป อัฮ ปะ โครยญ เวลา, ไน ติ เจน เกือฮ เปอะ โม เซ อาวต นึง ปลัฮเตะ เอีจ มอป เปอะ ละ จัตเจือ ไพรม เมอะ เซ.
32 “เญือม ฮมอง ปุย ตังเมือง ก ซไง อื ไลลวง อัมนัต โญตซัก เปอะ, ไม่ กัน ระ ไล ป ยุฮ เปอะ, ไม่ ฮอยจ ไววอน โรฮ อื นึง วิฮัน เฮี เยอ,
33 ปัว ปะ ง่อต ฮมอง ป ปัว อื เซ เน่อึม ก อาวต เปอะ นึง เมือง มะลอง เซ. ปัว โรฮ ปะ โพต ละ อื ตัม รซอม ปัว อื นึง เปอะ เซ, ละ ซ เกือฮ โรฮ ปุย ติ ปลัฮเตะ เฮี ยุง ป มัฮ ปะ ไม่ นัปทื เนอึม แตะ ปะ, ตอก โรฮ นัปทื โม อิซราเอน ป มัฮ ปุย ไน เปอะ เซ ปะ โรฮ. เญือม เซ ปุย เตือง โอยจ อื ซ ยุง มัฮ วิฮัน ป ยุฮ อาึ เฮี นา ก ลืลาว ปุย มอยฮ เปอะ โรฮ.
34 “เญือม เกือฮ ปะ โม ป มัฮ ปุย ไน แตะ โอก โฮว รุป ไม่ โม ป ฮอยจ ตอซู ไม่ แตะ นึง คระ ออฮ คระ เอีฮ ญุ่ก, ดัฮ โม เซ นา ลั่ก เวียง ป เอีจ เลือก ปะ เฮี ไม่ ลั่ก วิฮัน ยุฮ อาึ ละ ซ ลืลาว ปุย มอยฮ ปะ เฮี, ไม่ ไววอน แตะ ละ เปอะ โฮ,
35 ปัว ปะ ง่อต ฮมอง ป ปัว อื เซ เน่อึม ก อาวต เปอะ เมือง มะลอง เซ. ปัว ปะ เกือฮ โม เซ เป เบือ อื.
36 “เฆียง เฮี โม ป มัฮ ปุย ไน เปอะ ตึน ซ ไก เญือม ยุฮ ป พิต ละ เปอะ นึง โอ อื ไก ติ ปุย เนอึม ป โอ ยุฮ ป พิต ติ ชวง เงอ. เญือม เซ ดัฮ ปะ เปลีฮ รพาวม ฮาวก แตะ ละ นึง เกือฮ เปอะ ไป นึง โม ป ฮอยจ ตอซู ไม่ อื เซ, ไม่ เกือฮ เปอะ ปุย โรวก เกือฮ แปน ครา แตะ นึง เมือง ก ซไง อื ญุ่ก, ก ซดิ อื ญุ่ก,
37 เญือม เซ เยอ, ดัฮ โม เซ ญอม อาวม พิต แตะ เน่อึม นึง เมือง ก โฮลฮ แตะ แปน ครา เซ ไม่ ไววอน โรฮ แตะ ละ ปะ ไม่ ปุน เฌาะ เนอึม อื รพาวม แตะ, ไม่ รโซะ อื ติ แตะ ละ ปะ, ไม่ รโฮงะ อื กัน ฆอก กัน เบร ยุฮ แตะ ละ เปอะ,
38 ดัฮ โม เซ ญอม เฌาะ รพาวม รโม่ยฮ แตะ ไม่ ไววอน อื นา ลั่ก เวียง เลือก ปะ ละ จัตเจือ ไพรม อื เซ, ไม่ นา อื ลั่ก วิฮัน ป ยุฮ อาึ ละ ซ ลืลาว ปุย มอยฮ เปอะ เฮี,
39 ปัว ปะ ง่อต ฮมอง ป ปัว อื เน่อึม ก อาวต เปอะ เมือง มะลอง. ปัว ปะ เลียก พาวม โซะ ไง่ นึง โม เซ. ปัว ปะ โอ ทื โซะ โระ โกลยจ พิต โฌวะ ยุฮ ป มัฮ ปุย ไน เปอะ เซ.
40 โอ พะจาว ยุฮ อาึ, ปัว ปะ แลน แก ลอป วิฮัน เฮี. ปัว โรฮ ปะ ง่อต ฮมอง รซอม ไววอน ปุย ละ เปอะ เน่อึม นึง วิฮัน เฮี.
41 “โอ พะจาว เยโฮวา, ปัว เปอะ โกฮ โฮว ฮอยจ นึง วิฮัน ป มัฮ นา ก อาวต ลอป เปอะ เซ, เตือง ฮิต ซัมคัน ยุฮ เปอะ ป มัฮ ควน เปลีฮ เปอะ อัมนัต ระ ไล ยุฮ แตะ เซ. เกือฮ ลอป โม ซตุ ยุฮ เปอะ โปน ป โอ ไมจ. ปัว โรฮ ปะ เกือฮ โม ป มัฮ ปุย ไน เปอะ โฮลฮ รพาวม ไมจ มวน แตะ เบือ กัน ไมจ ยุฮ เปอะ.
42 โอ พะจาว เยโฮวา, ปัว ปะ โอ ละ โอ โปวฮ อาึ ป มัฮ กซัต เอีจ เลือก เปอะ อาึง เฮี. ปัว ปะ โตก ละ รพาวม ฮรัก ตอน ฮมัน ยุฮ เปอะ ป เอีจ เกือฮ เปอะ ละ ด่าวิต ป มัฮ กวนไจ ยุฮ เปอะ เซ,” อัฮ เซ กซัต ซาโลมอน เนอ.