15
เตปด่า พะจาว อาแลฮ
1 อาึ ยุ แม ป ซัมคัน นึง มะลอง ติ เจือ แม, มัฮ ป ระ เนอึม ไล, ปอ เงอึต ปุย นึง, ไก เตปด่า อาแลฮ, มัฮ ป กุม เม่ะมั่ก โซะ ลอน อาแลฮ เจือ. รพาวม ฮาวก ยุฮ พะจาว ซ ลอยจ นึง เม่ะมั่ก อาแลฮ เจือ เซ.
2 อาึ ยุ แม โอเอีฮ ป ตอก ปลัฮ รอาวม. ซงอม ตอก แกว รฮอง รไม่ ไม่ งอ โฮ. โม ป เป โกะพริ เซ ไม่ ฮุป อื ไม่ โอ อื ญอม ไอฮ เลก มอยฮ อื, ชุง โบ ปลัฮ รอาวม ป ตอก แกว รฮอง เซ, ไปญ พิน เกือฮ พะจาว ละ แตะ.
3 โม เซ เชีย นึง รซอม เชีย ยุฮ ไอ โมเซ ป มัฮ กวนไจ ยุฮ พะจาว เซ, ไม่ รซอม เชีย ยุฮ กวน แกะ เซ. อัฮ เฮี,
“โอ พะโองจาว, ป มัฮ พะจาว ป ตึก นึง ระ อัมนัต แตะ, กัน ยุฮ เปอะ มัฮ ป ระ เนอึม ไล ปอ เงอึต ปุย นึง. โอ พะโองจาว, ปะ มัฮ เปอะ กซัต ตัตเตียง ปุย โครยญ เมือง โครยญ ปะเทต. ป ยุฮ ป อัฮ เปอะ โครยญ เจือ มัฮ ป ซื ป ไซ ไม่ ป เนอึม ป แนม.
4 โอ พะโองจาว, มัฮ ปุย ป โอ ซ ฮลัต นึง ปะ อา? มัฮ ปุย ป โอ ซ ลืลาว มอยฮ ปะ อา? มัฮ ปะ โน่ง ป มัฮ ปุย ซง่ะ ซงอม. ปุย โครยญ เจือ ปุย ซ ฮอยจ นุ่ม ไว ปะ นึง ยุ ที ปุย เตือง โอยจ อื กัน ซื กัน ไซ ยุฮ เปอะ,” อัฮ เซ.
5 ฟวยจ เซ อาึ ยุ โบฮ รเวือะ วิฮัน ป มัฮ พากัง ยุฮ พะจาว นึง เมือง มะลอง. พากัง เซ มัฮ นา ก ลัปลอง พะจาว ลปุง ซันญา แตะ อาึง ละ ปุย.
6 เตปด่า อาแลฮ, ป กุม เม่ะมั่ก โซะ ลอน อาแลฮ เจือ เซ, โอก เน่อึม โตะ วิฮัน เซ. จาวป เครอึง พา ปิญ รฮอยจ. ไอฮ โรฮ โม่ะฮุต ไคร นึง ญวย แตะ.
7 ปุย ตัง เจือ ปาวน ปุย เซ ติ ปุย อื, ตุย ซโลวง ไคร อาแลฮ ป นาวก นึง รพาวม ฮาวก ยุฮ พะจาว ไอม ลอป โอ เญาะ ไก ลอยจ เซ. เกือฮ อื ละ เตปด่า อาแลฮ เซ.
8 วิฮัน เซ นาวก นึง ม่าึต งอ เบือ อัมนัต ไม่ รัง ซเปีย คึนัก ยุฮ พะจาว. ไก โตว ป ปุน เลียก โตะ วิฮัน เซ กา เฆียง ฟวยจ โอยจ อาวม ปุย เม่ะมั่ก อาแลฮ เจือ ป ไปญ เตปด่า อาแลฮ เซ.