20
โยนาทัน เรอึม ด่าวิต
1 ฟวยจ เซ ด่าวิต ตอ แม เน่อึม นาโยต โบ ย่วง รามา เซ. โฮว ฮอยจ เคะ โยนาทัน, อัฮ เฮี ละ อื, “มัฮ เมอ ป โคะ ยุฮ อาึ อื? มัฮ กัน พิต ตอก เมอ ป ยุฮ อาึ ละ เปือะ ปะ อา? เกียฮ ซาวป ลอป โน่ง ยุฮ ยุม ไม่ อาึ เมอ?” อัฮ เซ.
2 โยนาทัน โลยฮ อื, “ไลลวง ป อัฮ เปอะ เซ มัฮ โตว ป เนอึม ยุ่ง. ไก โตว ไล ละ อื ซ ยุฮ เปือะ เกอะ ยุม ไม่ ปะ อา. เมาะ ป ยุฮ ป อัฮ เปือะ เกอะ ปัง มัฮ กัน ระ ไล กัน แตวะ ไล, เปือะ เกอะ เกือฮ อาึ ยุง อื โครยญ เจือ, เม่าะ โตว อื ฮา เยอะ ติ เจือ เนอึม. แจง โอ อื ซ ยุฮ ตอก เซ,” อัฮ เซ.
3 ด่าวิต ปังเมอ อัฮ อื ตอก เฮี, “เปือะ ปะ อา เอีจ ยุง อื ฮรัก ปะ อาึ อื. ตึน ซ มัฮ โอ อื รโฮงะ ป ซ ยุฮ แตะ ละ เปอะ, นึง ฮลัต อื ปะ ไลจ รพาวม ฆาื. แจง ไอม พะจาว ตอก ออฮ, ไม่ แจง โรฮ ไอม ปะ ตอก ออฮ, อาึ แจง โรฮ ซดิ ไม่ ซ ยุม แตะ ตอก เซ โรฮ. มัฮ ป เตะ ป แนต ปุย รโปยฮ ลั่ง เมาะ ติ รเดือง โน่ง,” อัฮ เซ.
4 โยนาทัน อัฮ เฮี ละ ด่าวิต, “ปะ ฆวต เกือฮ เปอะ อาึ เรอึม แตะ ตอก เมอ? รโฮงะ เนิ, อาึ ซ เรอึม ปะ ตอก เซ,” อัฮ เซ ละ อื.
5 ด่าวิต โลยฮ อื ละ อื, “ซง่าวป มัฮ ซเงะ ฮาวก เคิ ติ ซาวม. ซ ไก กัน เลียง ปุย ปุ แตะ นึง. อาึ มัฮ โรฮ ปุย ลัง ฮอยจ โซม ดิ ไม่ กซัต นึง กัน เลียง เซ โรฮ. ปัง มัฮ ตอก เซ ปัว ปะ เกือฮ อาึ โฮว เม่าะ ติ แตะ นึง ชิจ เซ ฮอยจ ละ ลอยจ กัน เลียง ปุย ซเงะ ลอวย นึง อื เซ เมือ กปู อื.
6 ดัฮ เปือะ เปอะ ยุ โอ อาึ ฮอยจ นึง กัน เลียง เซ โฮ, ปัว ปะ อัฮ ละ อื ตอก เฮี, ‘ด่าวิต เซ เอีจ ปัว เอีญ นึง ย่วง เบ่ตเลเฮม ป มัฮ ย่วง โกะ แตะ เซ, ละ ซ เอีญ ทไว อื โอเอีฮ ละ พะจาว ตัม ป กอ ยุฮ โม เอียกปุ คระ เฌือต แตะ โครยญ เนอึม.’
7 ดัฮ กซัต เซ อัฮ ตอก เฮี, ‘ไมจ,’ ดัฮ อัฮ เซ อาึ ตึน ซ ซไบ่ โรฮ รพาวม นึง. ดัฮ เปอะ ยุ รอก พาวม อื โฮ, ปะ ปังเมอ ไมจ เปอะ เกือฮ ติ แตะ ยุง มัฮ อื ฆวต ยุฮ อื ไลจ ไม่ อาึ.
8 เคียง มัฮ อื ตอก เซ, ปัว เปอะ ยุฮ ละ อาึ ตัม ป ปัว อาึ นึง เปอะ เฮี เบือ รพาวม ฮรัก เปอะ, นึง เอีจ ซันญา ซโตฮ เปอะ ไม่ อาึ ซองนา พะจาว. ดัฮ อาึ ไก พิต ยุฮ ละ เปอะ, ปัง ยุฮ เอิน เปอะ ยุม ไม่ เยอะ แปน, อัม ทา เญาะ เกือฮ เปือะ เปอะ ยุฮ ยุม ไม่ เยอะ?” อัฮ เซ.
9 โยนาทัน อัฮ แม เฮี ละ อื, “ปุ แกต มัฮ ตอก เซ เฟือฮ เอิน โอะ. มัฮ ยุง อาึ ซ ยุฮ เปือะ เกอะ ไลจ ไม่ เปอะ ตอก เซ, อาึ แจง โอ ซ เม่าะ ฮา เปอะ เฟือฮ เอิน,” อัฮ เซ.
10 ด่าวิต ไฮมญ แม อื ตอก เฮี, “ดัฮ เปือะ เปอะ รอก เนอึม พาวม นึง อาึ, มัฮ ปุย ป ซ รโฮงะ เนิ อี?” อัฮ เซ.
11 โยนาทัน โลยฮ อื, “โฮว, โฮว ดิ ฮอยจ นึง ชิจ เซ,” อัฮ เซ. ปุย ลอา เซ โฮว ดิ เนอึม นึง ชิจ เซ.
12 โยนาทัน อัฮ เฮี ละ ด่าวิต, “ปัว เยโฮวา พะจาว ทื โม อิซราเอน แปน พีญัน อื ละ แตะ. ดัฮ โอ มัฮ ซง่าวป มัฮ ซะติ เมาะ เวลา ปเลี่ย เฮี, ดัฮ อาึ เอีจ ไฮมญ เปือะ เกอะ, ดัฮ ง่อต ป ไมจ ละ ปะ โฮ, อาึ ซ เกือฮ ปุย โฮว รโฮงะ ละ เปอะ.
13 ดัฮ เปือะ เกอะ ง่อต ตอก ซ ยุฮ แตะ ไลจ ไม่ เปอะ, ตัม โอ อาึ รโฮงะ ละ เปอะ, ไม่ โอ เยอะ เกือฮ ปะ ตอ โปน อื โฮ, ปัว พะจาว เกือฮ อาึ ลอก ตุต แตะ ฆาื อื โฮฮ ฮา เซ แม. ปัว พะจาว อาวต ไม่ ปะ ตอก อาวต อื ไม่ เปือะ เกอะ โรฮ.
14 ดัฮ อาึ ไก ลั่ง จีวิต โฮ, ปัว ปะ เปลีฮ รพาวม ฮรัก ตอน ฮมัน ป ฮอยจ เน่อึม นึง พะจาว เซ ละ อาึ, เดอึม อาึ โอ ซ ยุม ฆาื.
15 เญือม เอีจ เรอึม พะจาว ยุฮ ไลจ ไม่ โม ป เกละยุ เปอะ เกือฮ ไฆร โอยจ เจอ, ปัว เปอะ เกือฮ รพาวม ฮรัก ตอน ฮมัน ยุฮ เปอะ ไก ลอป ละ เญือะ เญะ, ฮอยจ ละ โม จัตเจือ เยอะ โอ เญาะ ไก ลอยจ.
16 ปัว เกือฮ ลปุง ซันญา เอะ ไม่ ปุ แตะ เฮี แปน ป ตอน ป ฮมัน. ดัฮ ไก ป พิต ป ซันญา แตะ เซ, ปัว พะจาว เกือฮ ปุย เซ ลอก ตุต แตะ ฆาื อื,” อัฮ เซ.
17 โยนาทัน เกือฮ แม ด่าวิต ซันญา ซโตฮ อื ติ โฮน แม ซ ฮรัก เนอึม แตะ โยนาทัน เซ, นึง ฮรัก เนอึม โยนาทัน เซ ด่าวิต ตอก ฮรัก อื โกะ แตะ ไอฮ โรฮ.
18 ฟวยจ เซ โยนาทัน อัฮ แม อื ละ ด่าวิต ตอก เฮี, “ซง่าวป มัฮ ซเงะ เลียง ปุย ปุ แตะ นึง มัฮ อื ซเงะ ฮาวก เคิ ติ ซาวม. ปุย ตึน ซ เงอึต ฆาื โอ แตะ ยุ ฮอยจ ปะ นึง กัน เลียง เซ.
19 เญือม เอีจ อาวต เปอะ ฮอยจ ละ ซเงะ ลอวย นึง อื เซ, ปะ ไมจ เปอะ ซไจ เลีฮ ฮอยจ นา ก เม่าะ เปอะ ติ แตะ เซ. ไน ซเงะ เซ ปะ ไมจ เปอะ เม่าะ ติ แตะ เดีย ซโมะ เอเซน.
20 อาึ ซ โปยญ ตี ทนู ยุฮ แตะ ลอวย โฆง, ซ เกือฮ ดุฮ โบ ก อาวต ปะ เซ, เคียต เกือฮ ติ แตะ ตอก ป โปยญ ปาว โฮ.
21 เญือม เซ อาึ ซ ดวน กวนดุ รเมะ ติ ปุย, อัฮ ละ อื ตอก เฮี, ‘โฮว ซาวป แลน ตี ทนู ยุฮ อาึ เนิ.’ ดัฮ อาึ อัฮ ละ อื, ‘ตึต แตะ, ตี ทนู ดุฮ ลวง เฆียง ลั่กเอีฮ อื, โฮว ตุย เนิ.’ ดัฮ อัฮ เซ ละ โฮ, ปะ เอีจ โปน เปอะ ป ซ เกิต ละ แตะ เซ, โอก เอีญ เปอะ แปน. แจง ไอม พะจาว ตอก ออฮ แจง โอ ป โซะ ซ เกิต ละ เปอะ.
22 ดัฮ อาึ อัฮ ละ ปุย เซ ตอก เฮี, ‘ตึต แตะ, ตี ทนู ดุฮ ลั่กกา เปอะ เซิต,’ ดัฮ อัฮ เซ ละ โฮ, ปะ ไมจ เปอะ โอก โฮว, เอีจ มัฮ เกือฮ พะจาว เปอะ โฮว.
23 ไลลวง ป ซันญา เอะ ไม่ ปุ แตะ เฮี, เอีจ มัฮ พะจาว ป แปน พีญัน ซน่ะ อาึ ไม่ ปะ เฮี โอ เญาะ ไก ลอยจ,” อัฮ เซ.
24 ฟวยจ เซ ด่าวิต โฮว เม่าะ เนอึม ติ แตะ นึง ชิจ, ฮอยจ ละ ซเงะ เลียง ปุย ปุ แตะ. เญือม ฮาวก เคิ ติ ซาวม, กซัต ซาอุน โฮว โซม เนอึม นึง กัน เลียง เซ.
25 งาวม นึง ก กอ งาวม ไพรม แตะ นึง โบ เดีญ. โยนาทัน โกฮ ชุง เกือฮ อัปเนอ งาวม เฆียง ก งาวม ซาอุน เซ. เบือง ก กอ งาวม ด่าวิต เซ, ปังเมอ โบฮ เยือ ลั่ง.
26 ปัง มัฮ ตอก เซ ซาอุน ดิ อัฮ โตว โอเอีฮ ฆาื อื นึง แกต อื มัฮ ไก ตอก มัฮ ด่าวิต ติ เจือ, “ตึน ซ มัฮ รแอม ไล อื,” อัฮ เซ โตะ รพาวม แตะ.
27 ปวยฮ พริ เซ, ปุก ซเงะ ลอา นึง กัน เลียง เซ, เบือง กอ งาวม ด่าวิต โบฮ ลั่ง. ซาอุน อัฮ เฮี ละ โยนาทัน ป มัฮ กวน แตะ เซ, “ด่าวิต เมอยุ โอ อื ฮอยจ นา เฮี เน่อึม โฆะเนิ่ ฮอยจ ละ เนาะ เฮี?” อัฮ เซ.
28 โยนาทัน โลยฮ อื, “ด่าวิต เซ เอีจ ปัว เอีญ ฮอยจ นึง ย่วง แตะ นึง เบ่ตเลเฮม.
29 ปัว อื นึง อาึ ตอก เฮี, ‘ปัว เปอะ เกือฮ อาึ เอีญ นึง เบ่ตเลเฮม. โม เอียกปุ คระ เฌือต เตอะ ไก โรฮ กัน ทไว โอเอีฮ ละ พะจาว นา เซ. เอียกระ เกอะ เอีจ ซตอก อาึ เอีญ ฆาื อื. ดัฮ เปอะ มัฮ เนอึม ปุ โฮมว ฮรัก อาึ โฮ, ปัว เปอะ เกือฮ อาึ เอีญ เคะ โม เอียกปุ แตะ นา เซ,’ อัฮ เซ. มัฮ เซ ป โอ เปอะ ยุ ฮอยจ โซม อื นา เฮี ฆาื อื,” อัฮ เซ โยนาทัน เนอ.
30 เญือม เซ ซาอุน ฮาวก รพาวม เนอึม ฮาวก รพาวม แนม ฆาื อื ละ โยนาทัน เซ. อัฮ เฮี ละ อื, “ปะ มัฮ เนอึม เปอะ กวน โอ ลุก, กวน กุก เนะ, อาึ เอีจ ที เนิ ฆวต พาวม ดิ เปอะ ไม่ ด่าวิต เตอ, มัฮ ป ซ โชะ นา โกะ เปอะ ไอฮ, ไม่ มัฮ อื ป โชะ นา มะ เปอะ โรฮ.
31 ไน ติ เจน ไอม ลั่ง ด่าวิต เซ, ปะ ซ ไก โตว ซเงะ ซ โฮลฮ เปอะ แปน กซัต ละ ซ กุม เปอะ เมือง เฮี ติ ชวง. เคียง มัฮ อื ตอก เซ, ไมจ เปอะ เกือฮ ปุย โฮว ซาวป โฮมวต โรวก ฮอยจ ละ อาึ เฮี, นึง เอีจ ไมจ อื ยุม แปฮ,” อัฮ เซ ละ อื.
32 ฟวยจ เซ โยนาทัน โลยฮ อื ละ เปือะ แตะ เซ ตอก เฮี, “มัฮ กัน พิต ตอก เมอ ป ซ โฮลฮ ปุย ยุฮ ยุม ไม่ ด่าวิต เซ ฆาื อื?” อัฮ เซ.
33 เญือม ฮมอง อื โอเอีฮ ตอก เซ, ซาอุน ซอต เอิน เพลียฮ แตะ, ตะ เกือฮ อื ลอก โยนาทัน เซ ปอ ยุม อื เอิน. โยนาทัน ยุง ที อื นึง เซ ฆวต ยุฮ เปือะ แตะ ยุม ไม่ ด่าวิต เตอ.
34 โยนาทัน โกฮ ฆาื อื ฮา โตะ นา ก โซม ปุย เซ ไม่ รพาวม รอก แตะ. ลอต เอิน โอ เญาะ โซม นึง กัน เลียง ซเงะ ลอา เซ. มัฮ โรฮ ฆาื ตุก รพาวม อื นึง เกละ เปือะ แตะ ยุ ด่าวิต เซ ไม่ พลิฮ บึน อื.
35 เมือ กซะ ซเงะ ติ อื แม, โยนาทัน โกฮ โฮว เคะ ด่าวิต นึง นา ก เม่าะ อื นึง ชิจ เซ ตัม ป เอีจ อัฮ แตะ อาึง ละ อื. เกือฮ กวนดุ โฮว ไม่ แตะ ติ ปุย.
36 โยนาทัน อัฮ อื ละ กวนดุ เซ ตอก เฮี, “ตอ โฮว ตุย ตี ทนู ป โปยญ อาึ เซ เนิ เมอะ,” อัฮ เซ. เญือม เอีจ ตอ กวนดุ เซ โฮว เยอ, โยนาทัน โปยญ ทนู ยุฮ แตะ เกือฮ โฮว ลั่กกา กวนดุ เซ.
37 เญือม เอีจ ฮอยจ กวนดุ นา ก ดุฮ ตี ทนู โปยญ อื เซ, โยนาทัน กอก รโอง ละ กวนดุ เซ. อัฮ เฮี ละ อื, “ตี ทนู ดุฮ ลวง ลั่กกา เปอะ เซ.
38 ซไจ โฮว ตุย ตี ทนู เซ, ปุ เญาะ ลโล่ะ ฮา,” อัฮ เซ. กวนดุ เซ โฮว ตุย เนอึม ตี ทนู เซ, เอีญ ไม่ อื ตาว อื ละ โยนาทัน ปอเลียง แตะ เซ.
39 กวนดุ เซ ปังเมอ โอ ยุง ไลลวง อื, มัฮ โยนาทัน ไม่ ด่าวิต โน่ง ป ยุง ไลลวง อื.
40 โยนาทัน เกือฮ เครอึง รุป ยุฮ แตะ เซ ละ กวนดุ เซ. อัฮ เฮี ละ อื, “เอีญ ตาว เครอึง อาึ เฮี ฮอยจ นึง ย่วง,” อัฮ เซ ละ อื.
41 เญือม เอีจ ลอต กวนดุ เซ ด่าวิต โอก เน่อึม ก อาวต แตะ เดีย ซโมะ เซ. นุ่ม ปอ จิ ไกญ แตะ เตะ, ไว โยนาทัน ลอวย เตะ, ฮงาึต ปุ แตะ เตือง ลอา แตะ เซ. เยือม ไม่ อื ละ ปุ แตะ. ด่าวิต เยือม เลี่ญ ฮา โยนาทัน เซ.
42 ฟวยจ เซ โยนาทัน ปิฮ มุ่น ละ ด่าวิต เซ ตอก เฮี, “ปัว พะจาว อาวต ลอป ไม่ ปะ, นึง เอีจ ซันญา ดิ อาึ อื ไม่ ปะ เบือ มอยฮ พะจาว ตอก เฮี, ปัว เกือฮ พะจาว แปน พีญัน ละ อาึ ไม่ ปะ ไม่ ละ โม จัตเจือ เยอะ เตือง ลอา เยอะ, ฮอยจ ละ เฆียง เฮี โอ เญาะ ไก ลอยจ,” อัฮ เซ. ฟวยจ เซ ด่าวิต ลอต โอก โฮว ฮา อื. โยนาทัน เซ โกฮ เอีญ โรฮ นึง ย่วง.