9
ด่าวิต ไม่ เมฟีโบ่เชต
ฟวยจ เซ ด่าวิต ไฮมญ ปุย ตอก เฮี, “อัม ไก ลั่ง ง่อน จัตเจือ เญือะ ซาอุน เนอ? ดัฮ ไก อาึ ฆวต เปลีฮ รพาวม เลียก พาวม แตะ ละ, นึง โตก แตะ ละ โยนาทัน,” อัฮ เซ.
ไก ติ ปุย ป มัฮ กวนไจ เญือะ ซาอุน. มอยฮ อื มัฮ ซีบ่า. ปุย กอก อื เกือฮ ฮอยจ เคะ ด่าวิต ฆาื อื. เญือม เอีจ ฮอยจ อื ด่าวิต อัฮ เฮี ละ อื, “ปะ อัม มัฮ เปอะ ซีบ่า?” อัฮ เซ ละ อื. “มัฮ ฮะ,” อัฮ เซ ซีบ่า เซ.
กซัต เซ ไฮมญ อื, “อัม ไก ลั่ง ง่อน จัตเจือ เญือะ ซาอุน เนอ? ดัฮ ไก อาึ ฆวต ยุฮ ป ไมจ ละ ตัม ป เอีจ ซันญา แตะ อาึง ซองนา พะจาว,” อัฮ เซ ละ อื. ซีบ่า อัฮ เฮี, “ไก ลั่ง ติ ปุย. มัฮ กวน โยนาทัน. มัฮ ปุย คาโด่ เตือง ลอา ก บลัฮ แตะ,” อัฮ เซ. “ปุย เซ อาวต ก เมอ?” อัฮ เซ ด่าวิต เตอ. “อาวต นึง เญือะ มาคี ป มัฮ กวน อัมมีเอน. มัฮ ย่วง โลเด่บ่า,” อัฮ เซ ซีบ่า เซ. ด่าวิต เกือฮ ปุย โฮว ฆาื อื ฮอยจ ย่วง โลเด่บ่า เซ. โฮว กอก อื เน่อึม นึง เญือะ มาคี เซ.
เญือม เซ เมฟีโบ่เชต ป มัฮ กวน โยนาทัน เซ ฮอยจ เนอึม. มัฮ กวนโซะ ซาอุน. เมฟีโบ่เชต เซ นุ่ม ไว ด่าวิต ปอ จิ ไกญ แตะ เตะ. ด่าวิต อัฮ เฮี, “เมฟีโบ่เชต,” อัฮ เซ ละ อื. “เมอ อัฮ เปอะ เนิ อี?” อัฮ เซ เมฟีโบ่เชต เซ. ด่าวิต อัฮ เฮี, “ทัน โตว ฮลัต นึง อาึ. อาึ โตก ละ โยนาทัน ป มัฮ เปือะ เปอะ. ฆวต ยุฮ ป ไมจ ละ ปะ ฆาื อื. อาึ ซ เกือฮ นาตี ยุฮ ซาอุน ป มัฮ ตะ เปอะ ละ เปอะ เตือง โอยจ อื. ซ เกือฮ ปะ โซม ลอป นึง เญือะ เญะ ไม่ อื,” อัฮ เซ ละ อื. เมฟีโบ่เชต เซ นุ่ม แม ไว อื, “อาึ มัฮ ปุย โอ ไมจ, มัฮ เยือ ตอก เซาะ ยุม โฮ. เลียก พาวม บุย เปอะ นึง อาึ เมอ? โปง โตว อาึ,” อัฮ เซ ละ อื.
เญือม เซ ด่าวิต กอก แม ซีบ่า ป มัฮ กวนไจ ยุฮ ซาอุน เซ เอีญ เคะ แตะ. อัฮ เฮี ละ อื, “โอเอีฮ ยุฮ เญือะ ซาอุน อาึ เอีจ มอป ละ เมฟีโบ่เชต ป มัฮ กวนโซะ ปอเลียง ไพรม เปอะ โครยญ เจือ. 10 ซ เกือฮ ปะ ไม่ กวน เปอะ ไม่ กวนไจ เปอะ ยุฮ ชิจ ยุฮ รปึม ละ อื. ไมจ เปอะ ตาว ป โซม ป ปอน โฮลฮ เปอะ ละ กวนโซะ ปอเลียง ไพรม เปอะ เฮี เดอึม ซ โฮลฮ ป โซม ป ปอน แตะ นึง อื. เมฟีโบ่เชต เซ ซ โฮลฮ โซม ลอป นึง เญือะ เญะ นึง อื,” อัฮ เซ ด่าวิต เตอ. ซีบ่า เซ ไก กวน รเมะ กาว โรฮ พอน ปุย. ไก กวนไจ ง่า ปุย. 11 ซีบ่า เซ อัฮ เฮี ละ ด่าวิต, “อาึ ป มัฮ กวนไจ ยุฮ เปอะ ซ ยุฮ โอเอีฮ โครยญ เจือ ตัม ป ดวน เปอะ อาึ ยุฮ,” อัฮ เซ. เคียง เซ เมฟีโบ่เชต โซม ดิ ไม่ ด่าวิต นึง เญือะ กซัต ตอก กวน กซัต โฮ.
12 เมฟีโบ่เชต ไก กวน รเมะ แตวะ ติ. มอยฮ อื มัฮ มีคา. กวน ซีบ่า ไม่ กวนไจ อื ลอต รซอฮ ละ เมฟีโบ่เชต เซ เตือง โอยจ อื. 13 เมฟีโบ่เชต ลอต อาวต นึง เวียง เยรูซาเลม. มัฮ ปุย คาโด่ เตือง ลอา ก บลัฮ ชวง แตะ. โฮลฮ โซม ลอป เญือะ กซัต ด่าวิต ฆาื อื.