3
1 เคะ ไอจ เจอ โครยญ ซาวม อาึ รโมะ ยุ ป ฮรัก แตะ เซ. อาึ รโมะ ยุ ซาวป แตะ ยุ ปุย เซ, ปังเมอ โอ แนฮ ยุ. อาึ กอก เกอะ ปังเมอ โอ โลยฮ อื เนิ.
2 อาึ โกฮ ไร โตะ เมือง, โฮว ตัม ตะ โบรก ลอยจ ยุฮ กอง ระ กอง แตวะ. อาึ ซาวป แนฮ ป ฮรัก แตะ เซ. ปัง ซาวป ตอก เซ อาึ ยุ โตว ลั่ง ติ ชวง.
3 โม ป มอง ญัม ป โฌ ตัม ตะ โบรก รโตฮ ยุ อาึ. อาึ ไฮมญ เญอะ ตอก เฮี, “โม เปะ อัม ยุ เปอะ ป ฮรัก อาึ เซ?” อาึ อัฮ เซ ละ.
4 เมาะ เอีจ โปน โม เซ เยอ, อาึ ยุ เอิน ป ฮรัก แตะ เซ. อาึ โอม เอิน เนอะ, ญอม โตว พลวย ฮอยจ ละ โฮลฮ เยอะ ตาว ฮอยจ เญือะ มะ เกอะ, ฮอยจ นึง ฮอง ไอจ มะ เกอะ ป เกือฮ อาึ เกิต ไก เซ.
5 โอ โม ปรโปวน เวียง เยรูซาเลม, ปัว เปอะ ซันญา อาึง ละ อาึ เบือ จัก ปอยฮ ป อาวต นึง กังเด่น นึง โอ เปอะ ซ ซุกซัก นึง กัน เปลีฮ เอะ รพาวม ฮรัก แตะ ละ ปุ แตะ.
คัก ลอวย ปรเมะ ฮอยจ ไม่ ปุโฮมว แตะ
ป อัฮ ปรโปวน -
6 มัฮ เมอ เซ ป ฮอยจ เน่อึม นึง ลาึน เวือฮ เซ ป ตอก ม่าึต งอ ฮาวก ซื เอิน ตอก ด่อง เซ แล? มัฮ ป ซออย ฮงาื เอิน ตอก โมตญอป ไม่ กัมยัน, ตอก โรฮ ลออยฮ ซออย ฮงาื โชะ โม ปอกา โฮ.
7 ป ฮอยจ เซ มัฮ เอิน ซาโลมอน กลอม ปุย ปุ ฮอยจ นึง ควน งาวม อื เซ. ตฮัน เกง เมือง อิซราเอน ลแฆลฮ ปุย แปน ป มอง เฆีญ ฆรัง รัง ดู อื.
8 ตฮัน เซ มัฮ ป เลียน ละ ไปญ แตะ วิจ โครยญ โฆะ อื. มัฮ ตฮัน โกย รุป แตะ. ปุม ตื วิจ ยุฮ แตะ, เพรียง ติ แตะ ละ ซ ปุน ตอซู รซาวม แตะ ปุย โครยญ โฆะ แตะ.
9 กซัต ซาโลมอน เซ ยุฮ เบือง งาวม แตะ ละ โกะ แตะ นึง โคะ ตึก นึง ไมจ แตะ ละ ซ เกือฮ อื ปุย กลอม แตะ นึง อื.
10 ชวง ควน งาวม อื เซ มัฮ มาื, โกะ อื มัฮ ไคร. เบ่าะ อื มัฮ ป ยุฮ ปุย นึง พา ซี ซูวัน. เดีญ กไน ควน งาวม อื เซ มัฮ โม ปรโปวน เวียง เยรูซาเลม ป ปดั่ป ปด่า เยอ, นึง เปลีฮ อื รพาวม ฮรัก แตะ ละ อื.
11 เออ, โม ปรโปวน เมือง ซีโยน, เอีญ แลน กซัต ซาโลมอน เซ เมอะ. เอีจ จาวป วอม ไคร ป จาวป มะ โกะ อื ละ อื ซเงะ เญือะ อื โฮ. เอีจ มัฮ ซเงะ โฮลฮ อื รพาวม ไมจ มวน แตะ กุม ปอ.