6
เซคาริยา โฮลฮ ยุ บลอง เลาะ รุป เซิก ปาวน กัน
1 ติ โฮน อื แม อาึ ยุ บลอง แม โอเอีฮ. ป ยุ อาึ เซ มัฮ เลาะ รุป เซิก ปาวน กัน, โอก เน่อึม ซน่ะ บลาวง ลอา. บลาวง ลอา เซ มัฮ ไร ซเงี.
2 เลาะ รุป เซิก กัน ติ นึง อื บั่ว บรอง ซครัก. กัน ลอา อื บั่ว บรอง ลอง.
3 กัน ลอวย อื บั่ว บรอง ปิญ. กัน ปาวน อื บั่ว บรอง ซี ปาื พรุยฮ.
4 เญือม เซ อาึ ไฮมญ เตปด่า ป อู ไม่ แตะ เซ ตอก เฮี, “จาวไน, โอเอีฮ โม เฮี มัฮ ตอก เมอ ควัมไม อื?” อาึ อัฮ เซ ละ.
5 เตปด่า เซ โลยฮ อื เนิ ตอก เฮี, “โอเอีฮ โม เฮี มัฮ กาื เมือง มะลอง เตือง ปาวน อื. โอก เน่อึม เลียก แตะ เคะ พะจาว ป มัฮ กุม ปลัฮเตะ เตือง โอยจ อื.
6 เลาะ รุป เซิก ป บั่ว บรอง ลอง อื เซ กัมลัง โฮว ฮอยจ นึง ปะเทต ป อาวต ลวง ลั่กล่าวง. บรอง ปิญ นึง อื กัมลัง โฮว ฮอยจ นึง ปะเทต ลวง ลั่ก เลียก ซเงะ. บรอง ซี ปาื พรุยฮ นึง อื เซ กัมลัง โฮว ฮอยจ นึง ปะเทต ป อาวต ลวง ลั่กเซฮ,” อัฮ เซ.
7 เญือม เอีจ โอก อื บรอง โม เซ กอยจ ราวม รพาวม ละ ซ โฮว กวต แตะ ปลัฮเตะ เฮี. เตปด่า เซ อัฮ เฮี ละ อื, “โฮว เมิฮ, โฮว กวต แลน ปลัฮเตะ เอ,” อัฮ เซ ละ อื. บรอง โม เซ โฮว กวต เนอึม อื ฆาื อื.
8 เตปด่า เซ อัฮ เฮี ละ อาึ, “บรอง ป โฮว ฮอยจ นึง ปะเทต ป อาวต ลวง ลั่กล่าวง เซ, มัฮ ป เกือฮ รพาวม ฮาวก ยุฮ พะจาว ไฆร ฮา เมือง ลวง ลั่กล่าวง เซ,” อัฮ เซ.
พะจาว ดวน ปุย จาวป วอม คึ ละ โยชูวา
9 ติ โฮน อื ลปุง พะจาว ฮอยจ ละ อาึ, อัฮ เฮี เนิ.
10-11 “ป มัฮ ไคร มาื ป ทไว เฮนได่, โทบี่ยา ไม่ เยด่ายา ป เอีญ เน่อึม แปน แตะ ครา เมือง บ่าบี่โลน เซ, ไมจ เปอะ โฮว ตาว นึง เญือะ โยซิยา ป มัฮ กวน เซฟันยา เซ. ไมจ เปอะ โกว ไคร ไม่ มาื เซ ละ ยุฮ เปอะ วอม คึ นึง ติ. ฟวยจ เซ จาวป นึง ไกญ ฮัวนา ซตุ โยชูวา ป มัฮ กวน เยโฮซาดั่ก เซ.
12 ฟวยจ เซ ไมจ เปอะ อัฮ เฮี ละ, ‘พะจาว กุม ตฮัน มะลอง อัฮ เฮี, ปรเมะ เฮี เยอ มอยฮ อื ซ อัฮ ปุย ฆอย โคะ ละ. ซ จเลิน ยุฮ แตะ นึง นา ก อาวต แตะ, ไม่ ซ ยุฮ อื วิฮัน ยุฮ พะจาว.
13 เอีจ มัฮ เอิน ปุย เฮี ป ซ ยุฮ วิฮัน ยุฮ พะจาว เยอ. ซ โฮลฮ เนอึม โญตซัก แตะ ตอก กซัต โฮ. ซ แปน ป ตัตเตียง โม ปุย ไน แตะ. ซ ไก ซตุ ป ชุง โบ ก งาวม คึ ยุฮ อื. ซ ซิงซา ดิ กัน ยุฮ แตะ ไม่ อาวต เฮน อาวต ฮลอง อื ไม่ ปุ แตะ,’ ไมจ เปอะ อัฮ เซ ละ.
14 วอม เซ ซ ลอต ปุย อาึง นึง วิฮัน ยุฮ พะจาว, ละ ซ เกือฮ อื แปน ควน โตก ปุย ละ เฮนได่, โทบี่ยา, เยด่ายา ไม่ โยซิยา ป มัฮ กวน เซฟันยา เซ,” อัฮ เซ พะจาว.
15 โม ป อาวต ก ซไง อื ซ ฮอยจ ละ ซ เรอึม แตะ ยุฮ โคระ วิฮัน เซ. เญือม เอีจ ฟวยจ ยุฮ ปุย วิฮัน ยุฮ พะจาว เซ, เญือม เซ โม เปะ ซ ยุง ที เปอะ มัฮ อื พะจาว กุม ตฮัน มะลอง ป ดวน อาึ ฮอยจ เคะ เปอะ. ดัฮ โม เปะ ซ ญอม เนอึง ป อัฮ เยโฮวา ป มัฮ พะจาว ยุฮ เปอะ ละ เปอะ โครยญ เจือ โฮ, ซ แปน เนอึม ละ เปอะ ตอก เอีจ อัฮ ฮะ เซ.