Etala Geregerena Paul Fala Ioli Fakwalaimoki 'I Korint Gi
Talasi Paul 'e la ala olula lalana lia, 'e dao ka io 'i Efesus sulia keme talasi dodoko, ma ka gerea nali geregerena fala ioli fakwalaimoki 'i Korint gi. 'I laola na geregerena, Paul 'e falalau gera 'alia iona rada failia ioli iko 'ali gera fitoo gi. (Iko 'ali gia too ala geregerena fo 'i talasi 'e.) Buri 'ala ioli 'i Korint gi gera idumia geregerena fo, gera ka too ala nali soilidina gera oga geraka soilidia ala Paul. Gera soilidia 'uri 'e, “'Uri'e ma, 'e 'oka mola 'ala fala araina 'o ma iko? 'Uri'e ma, 'e 'oka mola 'ala fala ioli fakwalaimoki gi, 'ali gera fana mola 'ada failia kwaima gera gi lia gera 'ania fana gera foasi 'alia fala lului 'are gi li? 'Uri'e ma gia foasi 'utaa talasi gia logo? Ma kwatena 'utaa lo ala Aloe 'are Abu 'e 'oka faga fala soilidinala God fai?” Ioli fakwalaimoki 'i Korint gi gera geregere fala Paul fala soilidinala sulia me 'are fo gi.
Na olu wale ratadaulu Stafanas, ma Fotunatus, ma Akaikus, daulu la mae faasia 'i Korint failia geregerena fo 'i so'ela Paul. Ma daulu ka faronoa lou Paul 'alia nali 'are ta'a rasua 'e fuli 'i safitala ioli fakwalaimoki gi 'i Korint. Nali ioli fakwalaimoki 'i Korint, gera alafaitalili 'i safitada kwailiu, ma gera ka sae ralada sulia ioli 'e fasiuabuda ma ka falalauda 'alia 'are God gi li (3:1-23). Nali ioli gera oga gera ka la sulia Paul, ma nali ai gera oga 'ali gera la sulia Apolos 'o ma sulia nali wale mamata lou. 'Urifo ma na wale lou ka tau ta'a failia teite raberabe lia, ma ioli etaeta ala logonae ioli God gi li iko 'ali gera taua mola ta 'are ala falafala ta'a 'urifo. Ma na me 'are lou, nali ioli fakwalaimoki gera sakea lou nali ioli fakwalaimoki ala kwai lokomalata na 'i maala wale iko 'ali gera fitoo gi fala faradanada.
Paul ka gerea lou na geregerena fala ioli fakwalaimoki 'i Korint gi. Ma geregerena fo gia ka soia 'alia 1 Korint. 'I laola gula buka 1-6, Paul 'e geregere sulia 'are ta'a 'e ronoda gera fuli 'i safitala ioli fakwalaimoki 'i Korint gi. 'I laola gula buka 7-16, 'e olisia soilidina ioli Korint gi gera soilidi mae 'i laola geregerena gera fala li.
Me 'are 'ilitoa 'i laola buka 'e li gi li:
Ta'ana ala ketana 'i matanala ioli 'i laola siosi gi li (1:1—4:21)
Ta'ana ala tau ta'ana li (5:1-13)
Ta'ana ala alafaitalilinali (6:1-8)
Ta'ana ala kwaiogalina ta'a li (6:9-20)
Paul 'e olisia faisoilidina sulia ara araina li (7:1-40)
Paul 'e olisia faisoilidina sulia lului 'are gi li (8:1—11:1)
Paul 'e olisia faisoilidina sulia foa ruruna li (11:2—14:40)
Paul 'e olisia faisoilidina sulia tatae na ala rabe fa'alu li (15:1-58)
Sae ailafena Paul gi (16:1-24)
1
Geregerena 'e, 'e la mae faasi 'i lau Paul failia walefae gia Sosetenes. God 'e fili lau 'alia kwaiogalina lia 'ali 'i lau na wale li lifurono Jesus Christ.
Mera geregere ko famiu ioli 'e 'amu fakwalaimoki ala Jesus, ma 'amu ka io 'i laola falua 'i Korint gi. God 'e fili 'amiu, ma ka faabu 'amiu ioli lia gi, sulia 'adona 'amiu failia Jesus Christ. God 'e fili 'amiu failia ioli ala falua gi sui lia 'e gera foasia Jesus Christ, lia Aofia gera, failia Aofia gia lou.
Lau foa 'ali God Mama gia failia Aofia Jesus Christ kae kwai'ofe amiu ma kae kwatea aroarona famiu.
Gia too ala 'oilakina gi 'i osiala Christ.
Lau batafea God suli atoa gi 'i osiamiu, sulia kwai'ofena 'e fatailia famiu 'alia Jesus Christ. God 'e kwatea 'are 'oka afula gi famiu, sulia 'amu io raratai failia Jesus Christ. 'Urifo 'amu sai 'oka ala 'are afula gi sulia Jesus Christ, ma 'amu ka fatalo 'oka lou sulia. 'Are 'oka 'e gi 'e kwateda famiu, 'e fatailia famiu lia 'e fafaronona 'e 'ami farono 'amiu 'alia sulia Christ 'e kwalaimoki. Ma sulia 'e 'urifo, 'amu sakea lo 'are 'oka gi sui faasia God, ala talasi 'amu faimaasi fala fe atoa Aofia gia Jesus Christ kae oli lou mae ai. 'I lia kae fananata 'amiu la la ka dao ala atoa fafu'isi, 'ali ikoso ta 'are ta'a 'ali io amiu ala fe atoa fo kae oli mae ai. Gia fitoo ala God kae tau 'urifo famiu, sulia 'e fili gia 'ali gia io kwaima failia Jesus Christ Wela lia ma Aofia gia.
Ketana 'i safitala logonae ioli fakwalaimoki gi li
10 Alae waasila lau, lau suga 'amiu 'alia nanatana ala Jesus Christ Aofia gia, 'amu ka mano faasia kwalaana fae 'amiu kwailiu 'i safitamiu, 'ali ikoso ta ketana 'i safitamiu. Ma 'e 'oka 'ali malatana 'amiu gi failia kwaiogalina 'amiu gi ka alua teke me 'are. 11 Lau ilia me 'are 'e, sulia nali ioli faasia kwalofa Kloe gera farono lau 'alia 'uria 'amu too ala olisusuna gi fae 'amiu kwailiu 'i safitamiu. 12 Ma nali ioli amiu gera sae 'uri 'e, “'I lau wale li galona Paul.” Ma na ioli ka ilia, “'I lau wale li galona Apolos.” Ma na ioli lou ka ilia, “'I lau wale li galona Peter.” Ma na ioli lou ka ilia, “'I lau wale li galona Jesus Christ.” 13 Me 'are ta'a rasua fo, suli dunala 'amu tolinia Jesus Christ 'alia logona mamata gi. Iko lou 'i lau Paul ba lau mae famiu ala 'ai rara folo! Ma iko 'ali 'amu sisiu abu 'alia ratagu 'ali 'i 'amiu wale li galona lau gi!
14 Lau batafea God, sulia talifilia Krispus ma Gaeas mola lau fasiuabuda. 15 Lia fo, ikoso ta ioli 'ali ilia 'e sisiu abu 'alia ratagu 'ali ma ka rau 'alia wale li galona lau. 16 (Lau fasiuabua lou Stafanas failia lumae ioli lia, ma iko 'ali lau malata tonala ta ioli lou lau fasiuabua.) 17 Sulia Jesus Christ iko 'ali keri lau mae fala fasiuabunala ioli gi. 'E keri lau mae 'ala 'ali lau faatalo 'alia Faronona 'Oka. Ma ikoso 'ali lau sae 'alia liotoo 'i molagali li, tauma tali ioli gera bi fakwalaimoki sulia saena 'oka lau gi mola ma iko lou sulia kwalaimokina ala maenala Jesus Christ ala 'ai rara folo li.
Maenala Jesus 'e fatailia nanatana failia liotoo God
18 Ala talasi nali ioli gera ronoa faronona sulia maenala Jesus Christ ala 'ai rara folo li, gera fia 'uria faronona fo 'are gwaugwau mola 'ala. Ma ioli fo gi, God kae kwatea kwaikwaina fada. Wasua ma 'i gia, ioli 'e God 'e famauri gia gi, gia saiala faronona fo lia lo nanatana God fala famurinala ioli gi li. 19 Sulia God 'e ilia 'i laola Geregerena Abu 'uri 'e,
“Nali ioli 'i lifila gera ilia 'uri gera liotoo ma gera ka too ala lioe wale rada gi.
Wasua ma lakae fatailia lia 'e iko 'ali gera liotoo mola, ma lakae fatailia nai 'are na gera gi kae sui.”
20 Lia fo, gia saiala liotoo ioli Grik gi li, failia liotoo ioli Jiu gi li, failia liotoo ioli alaa 'oka gi li, gera kae dalafa mola 'ada. God 'e fatailia liotoo ioli li 'e kwekwe'ela.
21 God 'e liotoo rasua. Lia fo kwate ma ka 'ato fala ioli gi 'ali ikoso gera saiala God 'alia liotoo gera 'i talada. God 'e oga famurinala ioli gera fakwalaimoki ala faronona 'e 'ami fatalo 'alia, wasua ioli afula gi gera ka ilia faronona fo 'e kwekwe'ela. 22 Ma Jiu gi, gera oga 'ali gera lesia 'are mama'ala gi sui bui gera ka bi fakwalaimoki. Ma ioli 'i Grik gi, gera oga rononala alaana liotoo gi sui bui gera ka bi fakwalaimoki. 23 Wasua ma 'i 'ameulu meulu fatalo 'alia Jesus Christ failia maenala ala 'ai rara folo. Ma Jiu gi gera 'e'ela 'alia faronona fo. Ma ioli Grik gi, gera ilia faronona fo saena kwekwe'ela mola 'ala. 24 Wasua ma fala ioli 'e God 'e filida lo gi, ala Jiu gi, ma ioli mamata faasia Jiu gi li lou, faronona fo sulia Jesus Christ 'e fatailia nanatana God failia liotoo God. 25 Wasua 'ala ioli afula gera ka ilia liotoo God 'are kwekwe'ela mola 'ala, liotoo God 'e tasa liufia liotoo ioli li. Ma wasua ioli afula gera ka ilia nanatana God 'are wawade mola, nanatana God, nanata 'e tasa liufia nanatana ioli li.
26 Alae waasila lau, ikoso 'ali 'amu bulono 'alia iona ba 'amu io mae 'alia 'i lao 'ua ala talasi ba God 'e soi 'amiu fala fakwalaimokina li. Sulia 'i maala ioli gi, barae ioli mola amiu gera too ala liotoo, failia 'ilitoana. Ma barae ioli mola amiu gera la mae faasia fuui ioli 'ilitoa gi. 27 Wasua ka 'urifo, God 'e fili 'amiu ioli 'e gera ilia 'amu kwekwe'ela gi, 'ali kae fa maua ioli liotoo gi. Ma ka fili 'amiu ioli 'e gera ilia 'amu watoutou gi, 'ali kae fa maua ioli 'ilitoa gi. 28 Ma God ka fili 'amiu ioli 'e iko 'ali gera soi ba'ela amiu ma gera ka barasi 'ali 'amiu gi, ma gera ka ilia 'i 'amiu me 'are gwaugwau mola 'ali gi, 'ali kae fafuta'a 'are 'e gera ilia 'alia 'are 'ilitoa gi li. 29 Ma sulia 'e 'urifo, iko ta ioli 'ali saiai ka 'aurae sulia 'i lia talala 'i maala God. 30 God lo 'e alua gia ka io raratai failia Jesus Christ, ma God lo ka kwatea liotoo faga 'alia Jesus Christ. Ma God ka fa aolo gia 'alia Jesus Christ. Ma 'alia Jesus Christ lou, God 'e lufa gia, ma ka fa abu gia lo fala 'i talala. 31 Ma 'e malaa Geregerena Abu ba 'e ilia, “Ite 'e oga ka sae naunau, 'i lia ka sae naunau 'i osiala 'are Aofia 'e taua.”