Geregerena Paul Fala Ioli Fakwalaimoki 'I Galesia Gi
Paul 'e gerea buka 'e fala ioli fakwalaimoki 'i Galesia gi. Paul 'e galo failida, ma ka iko 'ali tekwa mola 'i burila Paul ka tafisida, gera ka fuli'ae geraka bulusi fala ronona fala na falalauna mamata lou. Nali wale falalau kotokoto gera dao tonala Kristin gi 'i Galesia, ma gera ka ilia 'ali gera fuli'ae fala dona nala falafala Jiu gi li. Na falafala Jiu lia 'e 'ole wale na (circumcision). Jiu fo gi gera falalau 'uria ronona sulia taki Moses gi 'e kwatea ma ioli ka rada 'i maala God, ma 'ole wale na lo totofo ioli God gi li. Wasua ma Paul 'e falalau, ka ilia fitoona ala Jesus 'ala 'e kwatea ioli ka rada 'i maala God, ma Aloe 'are Abu failia iona rada lo totofo 'e fatailia 'i gia ioli God gi. Gia fakwalaimoki ala Christ Jesus 'ali gia rada 'i maala God. God 'e soi rada aaga 'e iko 'ali 'i osiala ronona sulia taki gi li, wasua ma 'i osiala 'ala lia 'e gia fakwalaimokia Christ. Ronona sulia taki gi li iko 'ali totolia 'ali faradaa ta ioli 'i maala God.
'Are 'ilitoa 'i laola buka 'e li gi li:
Sae ailafena (1:1-11)
Paul 'i lia na lifurono kwalaimoki (1:11—2:21)
Ioli kae farada ionala failia God 'alia fitoona ala Jesus (3:1—4:31)
Maurinala Kristin gi 'e la sulia kwaitalaina Aloe 'are Abu (5:1—6:18)
1
1-2 Geregerena 'e 'e laa mae faasi 'i lau Paul, failia barae wai asila ala Christ lia gera io faelau 'i lifi 'e li, famiu ioli fakwalaimoki God gi 'i laola gulae tolo 'i Galesia. 'I lau na lifurono ala Jesus. Iko ta ioli 'ali fili lau fala galona 'e. Wasua ma Jesus Christ failia God, Mama 'e taea Jesus faasia maenali, daroa lo daro fili lau fala lifurono na.
Lau foa 'ali God Mama gia failia Jesus Christ Aofia kae kwai'ofe amiu ma ka kwatea aroarona famiu.
Christ 'e kwatea 'i lia talala fala ta'ana gia gi 'ali ka lufa gia faasia abulo ta'ana afula gi 'i laola molagali ala talasi 'e. 'Urifo 'e ronosulia kwaiogalina God Mama gia li. Lau oga gia ka 'auraea God io firi! 'Eo ka 'urifo.
Teke Faronona 'Oka mola
Lau kwele 'alia 'are 'e 'amu taua, sulia 'e iko 'ali tekwa mola 'amu ka sigi tatau lo faasia God lia 'e fili 'amiu lo 'ali 'amu ka io 'i malula kwai'ofena Christ li, ma talasi 'e 'amu ka fakwalaimoki lo 'amiu na falalauna mamata lou lia nali ioli gera soia 'alia Faronona 'Oka. Wasua ma falalauna fo iko lou Faronona 'Oka kwalaimoki sulia Christ. Nali ioli mola gera feo 'amiu, ma gera ka mailia fala olisinala Faronona 'Oka sulia Christ. Ma wasua ala 'i 'ameulu 'o ma ta eniselo faasia 'i nali ka faatalo 'alia famiu ta faronona 'e mamata faasia ai ba meulu faatalo lo 'alia famiu 'i lao, 'e totolia God kae 'ui 'alia ioli fo 'i laola dunaa 'e 'ago ikoso mae. Malaa ba meulu ilia ka sui lo mae 'i lao, ma lakae ilia lou famiu: Ala ta ioli kae fatalo'alia famiu ta falalauna 'e mamata faasia ai ba 'amu fakwalaimoki sui lo ai, 'e totolia God kae 'ui 'alia ioli la 'i laola dunaa 'e 'ago ikoso mae.
10 Talasi lau ilia alaana fo gi li, iko 'ali lau tau lou 'alia ioli gi gera ka 'aurae lau. Iko mola. Lau oga mola God 'ala 'i talala kae 'aurae lau. Ala laka tau fala ioli 'ali gera oga lau, 'urilali ma 'i lau iko lou wale li galona Christ.
Alaana Paul sulia talasi Jesus 'e filia fala lifurono na li
11 Alae walefae lau ma gelifae lau ala Christ, lakae ilia famiu, Faronona 'Oka 'e lau faarono 'alia, 'e iko 'ali fuli'ae mae faasia ioli gi. 12 Iko 'ali lau sakea faasia ta ioli, ma iko ta ioli 'ali falalau lau mola 'alia. Wasua ma Jesus Christ 'ala 'e talae fatailia fagu.
13 'Amu rono sui lo sulia ionagu mae 'i lao, talasi ba lau foasia 'ua God malaa Jiu gi gera taua. 'Amu ronoa lou ba lau malakwaita rasua ala ioli fakwalaimoki God gi, ma laka mailia rasua fala tagalaenada. 14 Talasi lau ulufa'alu 'ua, afulanala wale Jiu gi gera ulufa'alu fae lau, lau liufida 'alia ronona sulia falalauna 'amami Jiu gi li ma sulia falafala koko 'ualo 'amami gi.
15 Wasua ka 'urifo 'ala, sulia kwai'ofena God 'i lao ala futanagu, God 'e fili lau lo fala galona lia gi. 16 Ma God ka babalafe fala fatailianala Wela lia fagu, 'ali laka fatalo'alia Faronona 'Oka sulia Jesus fala ioli mamataa faasia Jiu gi li. Ma talasi God 'e fatailia lo Wela lia fagu, iko 'ali lau la 'i so'ela ta ioli 'ali ka falalau lau. 17 'Urifo iko 'ali lau la 'alaa fala 'i Jerusalem fala lesinala wale gera lifurono etaeta agu gi. Lau la 'agua fala gulae tolo 'i Arabia, sui laka oli lou mae fala 'i Damaskas. 18 Sui 'i burila olu fe falisi gi, laka bi la fala 'i Jerusalem fala lesinala Peter, ma laka io failia sulia akwala wala lima fe atoa gi. 19 Ma laka alaa ruru failia James, ai burila Aofia li, ma iko 'ali lau lesia tali lifurono lou.
20 'Are 'e lau gereda ko famiu gi sui 'are kwalaimoki tefau gi mola. God 'e saiai iko 'ali lau koto.
21 'I buri, laka la lou fala gulae tolo 'i Siria ma 'i Silisia gi. 22 Ala talasi fo, ioli fakwalaimoki Christ gi 'i laola gulae tolo 'i Judea, iko 'ali gera sai mola agu. 23 Gera sai mola 'ada ala saena nali ioli gera alaa suli lau 'alida 'uri 'e gi, “Wale ba 'e malakwaita aga 'i lao ma ka mailia fala fafuta'anala ioli fakwalaimoki Christ gi laa. Talasi 'e, 'e faatalo lo sulia Christ 'ali ioli gi gera ka fakwalaimoki ala.” 24 Ma 'i osiala faronona fo gera ka batafea lo God fafia 'are lau tauda gi.