Etala Geregerena Fasia John
Lifurono John lo 'e gerea buka 'e. 'I lia na teke wale ala akwala wala rua wale li galona ba Jesus gi, ma 'i lia ba 'e gerea lou Faronona 'Oka John. 'I laola geregerena 'e, 'e ilia fala ioli fakwalaimoki gi geraka ura nasi ala falafala God gi, ma geraka malinailia faalalauna rero gi. Ala talasi fo, nali wale kotokoto gera ilia Jesus iko 'ali sifo mae 'alia rabe ioli kwalaimoki. John ka ilia fala ioli fakwalaimoki gi geraka malinailia faalalauna rero gi. John ka oga Kristin 'ali gera dona faalalauna Jesus Christ lia ba lifurono gi gera alaa lo mae sulia. Lifurono ba gera lesia Jesus talasi 'e io 'ua ai li. Ma gera ka totolia falalauna sulia.
Me 'are 'ilitoa 'i laola buka 'e li:
Jesus Christ lo Alaana ala Maurina li (1:1-10)
Kwaikaena sulia kwaimanaa li (2:1-17)
Malimae Jesus Christ (2:18-29)
Kwaimana amiu famiu talamiu (3:1-24)
Ioli faalalau kotokoto gi (4:1-6)
God 'e fatailia faga kwaimaana gia ka too ai faga (4:7-21)
Fitoona golu ala Jesus 'e liufia molagali (5:1-21)
1
Jesus Christ Alaana ala Maurina li
1 Lakae geregere ko famiu sulia Alaana 'e kwatea maurina kwalaimoki li. Christ lo Alaana ala Maurina kwalaimoki li. Ma ka io 'ua mae ala fulinala molagali. Ma talasi 'e, 'i 'ameulu lifurono gi meulu ronoa lo, ma meulu ka lesia lo 'alia maameulu. Ma meulu ka dau lo tonala 'alia limameulu.
2 Maurina kwalaimoki 'e futali ioli lo, ma meulu ka lesia lo. 'Are 'e meulu sae sulia, ma meulu ka faarono 'amiu 'alia Maurina firi 'e io lo mae ala fuli na failia God Mama. Ma God ka fatailia lo Maurina kwalaimoki fameulu.
3 Meulu lesia ma meulu ka ronoa Christ 'e 'i lia lo Alaana ala Maurina kwalaimoki li, ma meulu ka faarono lou 'alia famiu, 'ali 'amu ka 'ado fae 'ameulu 'i laola maurina 'e meulu io 'alia failia Mama ma Jesus Christ Wela lia.
4 Ma meulu gerea ko 'are 'e gi famiu 'ali babalafenaga 'ali io talau.
God madakwana
5 Ma faronona 'e 'ami ronoa faasia Wela God ma 'ami ka ilia famiu 'e 'uri 'e: God 'e malaa madakwana sulia 'i lia 'e 'oka ka tasa rasua, ma iko ta mae rodo ala.
6 Ma ala gia ilia 'uri gia 'ado kwaima lo failia God, ma gia ka io 'ua mola 'aga 'i laola mae rodo, gia kae koto rasua 'alia saenaga, ma falafala gia gi iko 'ali io mola sulia kwalaimoki na.
7 Wasua ma ala gia io sulia maurina ala madakwana God li, malaa God 'e io sulia madakwana lia, 'urifo gia 'ado ruru 'i matanaga, ma maenala Jesus, Wela lia, ka fakwaga gia faasia ta'ana gi sui.
8 Ma ala gia ilia iko 'ali gia taua mola ta rerona, gia kotofi gia 'i talaga. Ala gia sae 'urifo, 'urila ma iko 'ali gia sai mola ala kwalaimokina God.
9 Wasua ma ala gia fuunailia rerona gia gi fala God, 'i lia kae kwailufa 'alia rerona gia gi, ma ka fakwaga gia faasia ta'ana gia gi sui, sulia 'i lia kae fakwalaimokia etae alafuuna lia fala taunala me 'are fo li, ma 'i lia radana.
10 Ma ala gia ilia iko 'ali gia taua mola ta rerona 'urila li gia ilia God wale kotokoto ma saenala God iko 'ali io mola 'i laola maurinaga.