3
John 'e faabasua ioli 'ali gera rerei fala dao nala Christ
(Matthew 3:1-12; Mark 1:1-8; John 1:19-28)
1 Ala talasi fo, 'e dao lo ala akwala wala lima fe nali Taebirias 'e 'ilitoa ala falua ba'ela 'i Rom, ma Pontias Paelat ka 'ilitoa fafia 'i Judea, ma Herod 'e 'ilitoa fafia 'i Galili, ma Filip walefae lia ka lio sulia 'i Iturea ma 'i Trakonaetis, ma Lisanias ka lio sulia gulae tolo 'i Abilin.
2 Talasi fo lou, 'Anas failia Kaeafas daroa rua 'ilito'ola fata abu gi ala falua 'i Jerusalem. Ma ala talasi fo, saenala God ka dao ala John wela Sekaraea, talasi 'e io 'i laola abae lifi kwasi li.
3 Ma John ka la ala lifi galia kwai 'i Jodan gi. Ma ka sae 'uri 'e fala ioli, “'Amu bulusi faasia ta'ana 'amiu gi, ma 'amu ka sisiu abu, 'ali God kae kwailufa 'alia ta'ana 'amiu gi.”
4 'E malaa lia ba profet Aesea 'e gerea ka sae 'uri 'e,
“Te wale kae rii 'i laola abae lifi kwasi kae sae 'uri 'e,
‘Aofia kae dao lo mae!
'Amu farada tala fala!
5 Ma 'amu ka fafonua ote gi, ma 'amu ka faootea sifosifona gi failia fe uo gi.
Ma 'amu ka farada tala koki gi, ma 'amu ka fadada tala gilugilua gi.
6 Ma ioli sui kae lesia lia 'e God kae famaurida.’ ”
7 Ma ioli afula gera laa mae 'i so'ela John 'ali ka fasiuabuda. Ma John ka sae 'uri 'e fada, “'Amu malaa mola 'amiu kale wa gi! Iko 'ali lau iilia famiu fasiuabuna kae lau 'ali 'amiu faasia kwaikwaina God ala ikoso 'ali 'amu bulusi faasia ta'ana 'amiu gi li.
8 'Amu taua 'are 'e fatailia 'amu bulusi lo faasia ta'ana 'amiu gi li! Ma ikoso 'ali 'amu malata 'uri 'e 'i laola malatamiu, ‘'I 'amami ioli 'ami futa mae ala kwalofa Abraham gi li. 'Ato ta kwaikwaina faasia God kae dao amaami.’ Ma lakae iili rada ai famiu, 'e talawarau mola 'ala fala God 'ali sakea ta me fau ala fau 'e gi, ma ka raunailia 'alia kwalofa Abraham gi!
9 Ala talasi 'e, God 'e rerei lo 'alia kwaikwaina, malaa wale 'e dau ala me kwaikwai li, ma ka rerei fala tofunala 'ai gi li. Ma 'ai iko 'ali gera funu 'alia tali fuae 'are 'oka gi li, kae tofuda, ma ka tasida 'i laola dunaa.”
10 Sui, ioli gi gera ka soilidi 'uri 'e ala John, “Ta taa 'e 'ami ka taua ka fatailia 'ami bulusi?”
11 Ma John ka olisi 'uri 'e ada, “Ala ta ioli 'e too ala rua toro gi, ka kwatea ruala toro fala ta ioli iko 'ali too ala ta me toro. Ma ala ta ioli 'e too ala fana gi, 'i lia ka tolinia.”
12 Ma nali wale 'asa ala sakenala bata ala takisi li, gera dao lou mae fala sisiuabuna, ma gera ka soilidi 'uri 'e, “Wale li faalalauna, ta taa lo 'ami ka taua ka fatailia 'ami bulusi?”
13 Ma John ka olisi 'uri 'e ada, “'Amu ka logosia mola bata 'e totolia bata taki 'e alua. Ikoso 'ali 'amu suga liufia totofoe bata fo.”
14 Ma nali wale li ofona gera ka soilidia lou 'uri 'e, “Ma 'i 'ameulu, ta taa 'e meulu kae taua ka fatailia 'ami bulusi?”
Ma 'i lia ka sae 'uri 'e fada, “'Amu ala suunailianala ta ioli fala kwate bata na 'amiu. Ma ikoso 'ali 'amu beli ta ioli. Ma moulu ka babalafe fafia me bata gera kae folifoli 'amiu lo 'alida gi.”
15 Ioli gera kwaimamali fala daonala Christ, wale 'e God 'e filia kae famauria ioli lia gi li, gera malata 'uri 'e, “Mala John lo 'e Christ.”
16 Ma John ka sae 'uri 'e fada, “Lakae fasiuabu 'amiu mola 'alia kwai, ma wale 'e kae dao mae 'i lia 'e 'ilitoa ka liufi lau. Ma iko 'ali lau totolia 'ali lau tatalia 'ae botu lia gi faasia 'aela. Ma 'i lia kae faasiu abu amiu 'alia Alo ala God failia dunaa.
17 Ma kae rerei lo fala lokokwaikwaina fala ioli sui, ka malaa na wale kae kefoa bouboui 'are 'oka gi faasia sunasunae 'are gi. Ma ka logosia bouboui 'are 'oka gi 'i laola luma li goli 'are na, ma ka 'agofia lo sunasunae 'are gi 'i laola dunaa la ikoso 'ali mae.”
18 Ma John ka sae sulia Faronona 'Oka fada 'alia alaana afula 'urifo gi, ma ka saefida 'ali gera olisia falafala gera gi.
19 Ma talasi fo lou, John ka sae nanata rasua fala Herod, wale 'e 'ilitoa fafia gulae tolo fo li, sulia Herod 'e tolea Herodias, wateu walefae lia Filip, ma ka taua 'are ta'a afula gi lou.
20 Ma me 'are ta'a ka ba'ela rasua Herod 'e taua lo 'e sakea John, ma ka alua 'i laola rara.
Sisiuabunala Jesus
(Matthew 3:13-17; Mark 1:9-11)
21 Ma 'i lao ala talasi Herod 'e alua John 'i laola raraa li, John 'e fasiuabua ioli afula gi. Jesus 'e la mae, ma John ka fasiuabua lou. Ma talasi Jesus 'e foa, lofola raloo ka tafa,
22 ma Alo ala God ka sifo mae fafia malaa na fe bola. Ma te linae 'are ka talo mae faasia 'i nali ka sae 'uri 'e, “'I'o wela moutae lau ma lau kwaima rasua amu. Lau babalafe rasua 'ali'o.”
Kwalofa Jesus
(Matthew 1:1-17)
23 Ala talasi Jesus 'e dao lo totolia olu akwala fe nali 'i burila futa nala, ka fuli'ae liu lo fala faalalauna. Ma ioli sui, gera fia 'uria Jesus wela 'a Josef mola. Ma
Josef 'e futa ala Hilae.
24 Hilae 'e futa ala Matat,
Matat ka futa ala Lifae,
Lifae ka futa ala Melkae,
Melkae ka futa ala Janae,
Janae ka futa ala Josef.
25 Josef wela Matataeas,
Matataeas ka futa ala Emos,
Emos ka futa ala Neham,
Neham ka futa ala Eslae,
Eslae ka futa ala Nagae.
26 Nagae wela 'a Meata,
Meata ka futa ala Matataeas,
Matataeas ka futa ala Semein,
Semein ka futa ala Josek,
Josek ka futa ala Joda.
27 Joda wela Joanan,
Joanan ka futa ala Risa,
Risa ka futa ala Serababel,
Serababel ka futa ala Sialtiel,
Sialtiel ka futa ala Nirae.
28 Nirae wela Melkae,
Melkae ka futa ala Adae,
Adae ka futa ala Kosam,
Kosam ka futa ala Elmadam,
Elmadam ka futa ala Ere.
29 Ere wela Josua,
Josua ka futa ala Eliesa,
Eliesa ka futa ala Jorim,
Jorim ka futa ala Matat,
Matat ka futa ala Lifae.
30 Lifae wela Simion,
Simion ka futa ala Juda,
Juda ka futa ala Josef,
Josef ka futa ala Jonam,
Jonam ka futa ala Elaeakim.
31 Elaeakim wela Milia,
Milia ka futa ala Mena,
Mena ka futa ala Matata,
Matata ka futa ala Netan,
Netan ka futa ala David walelitalona.
32 David wela Jesi,
Jesi ka futa ala Obed,
Obed ka futa ala Boas,
Boas ka futa ala Salmon,
Salmon ka futa ala Nason.
33 Nason wela Aminadab,
Aminadab ka futa ala Admin,
Admin ka futa ala Anae,
Anae ka futa ala Hesron,
Hesron ka futa ala Peres,
Peres ka futa ala Juda.
34 Juda wela Jakob,
Jakob ka futa ala Aesak,
Aesak ka futa ala Abraham,
Abraham ka futa ala Tera,
Tera ka futa ala Neho.
35 Neho wela Sirag,
Sirag ka futa ala Riu,
Riu ka futa ala Pileg,
Pileg ka futa ala Eba,
Eba ka futa ala Sela.
36 Sela wela Keinan,
Keinan ka futa ala Afaksad,
Afaksad ka futa ala Siem,
Sem ka futa ala Noa,
Noa ka futa ala Lamek.
37 Lamek wela Metusala,
Metusala ka futa ala Enok,
Enok ka futa ala Jered,
Jered ka futa ala Mahelalel,
Mahelalel ka futa ala Kenan.
38 Kenan wela Enos,
Enos ka futa ala Set,
Set ka futa ala Adam wela God.