☰ 1 Thed sa lawd niq liq 5
5
1 A vix a nax teq paog, awg ceng che teq pa ve awg ni awg hax he lehq awg cuhx awg yand teq pa awg lawn nig hehd haq liq buhq ax tug maq lor. 2 Awg lawn ghod ver, muhd khax huh chaw khuhd lag che heh Jawd mawd Yer suq ve awg ni* gag vehr tug haq nig hehd kha nehax sir chehd che yaog. 3 Muhd mig gawg vehr lehq a nig teq chaweh duhd har tug mad cawg lehz, su koz daq chehd che te yand, yad paw tug nag che yad mid te ghad nag jad che haq gha khanr che heh, lug che sez che ted ceng i hehd awg khod-aq teq pear lehax gag tug yaog. I hehd pong kig a cehax liz mad cawg. 4 Kheh ma khuhd, a vix a nax teq paog, nig hehd naz hoq che† khuhn ma chehd che haq te lehq, awg ni u ve awr lehr chaw khuhd heh te lehq nig hehd geh lag tug ma hez. 5 Awg lawn ghod ver, nig hehd awg gha lia awr lehr awg ghiz ve awg yad awg dug he lehq muhd kaw ve awg yad awg dug‡ phehq che yaog. A nig awr lehr muhd phiq che ted ceng haq lehd ma koz, naz hoq che ted ceng haq lehd ma koz, ma caz daq. 6 Kheh te cheaq te lehq, awg kag awr ve chaw teq pa yuhq mir ka che§ heh a nig yuhq mir taq ka chehd. A nig kha nehax law lar lehq sa tiq tar-ag veg. 7 Awg lawn ghod ver, yuhq mir ka che chaw teq pa awr lehr, muhd khax huh yuhq mir ka che yaog. Juhg dawg buhz che chaw teq pa liz, muhd khax thad dawg buhz che yaog. 8 Kheh ma khuhd, a nig awr lehr muhd kaw haq caz daq che chaw teq pa phehq che haq te lehq, sa tiq te chehd-ag veg. Yonr che he lehq haq pehnd che ted ceng ni ma pi haq thang tug* heh veq deh lehq, thaer khuhq che haq duhd law che lehd koz che son ux cuhr† haq khuhz lar-ag veg. 9 Awg lawn ghod ver, cir yanr che haq gha khanr tug Ghig sa a nig haq fir teh lar che ma hez. A nig ved Jawd mawd Yer suq Khreq haq te lehq thaer khuhq che haq gha tug, yawd a nig haq fir teh lar che yaog. 10 A nig teq chehd che lehd ma koz, suh che lehd ma koz, yawd geh teq geha gha teq chehd tug, yawd a nig awg pun khanr suh peor. 11 Kheh te cheaq te lehq, a meha nig hehd te chehd che heh, te ghad he lehq te ghad awg ghad pid daq lehq, te ghad he lehq te ghad ir lag yeg lag tug te daoq.
Pawd loq i hehd haq awg ghad pid che
12 A vix a nax teq paog, ngag hehd nig hehd haq che kheh te lawg khawx che yaog. Nig hehd awg khuhn kanx te lehq, Jawd mawd Yer suq awg khuhn nig hehd haq haq sax lehq sa tiq pehar che chaw teq pa haq yawz yan-o. 13 I hehd te che kanx teq pa haq te lehq, haq pehnd che awg khuhn i hehd haq kha sehax tar ir tar muh vid-oq. Nig hehd liz, te ghad he lehq te ghad cawd daq hawr daq chehd-oq.
14 A vix a nax teq paog, ngag hehd nig hehd haq awg ghad che kheh te pehar che yaog. Kanx maq te che chaw‡ haq sa tiq pid-oq. Ni ma i vix che chaw teq pa haq awg ghad pid-oq. Awg ghad nud che chaw teq pa haq ga vid-oq. Chaw awg gha lia haq ni ma yehg chawa tar-og. 15 Su haeg che ted ceng tea che te yand, nig hehd te ghad-e liz haeg che ted ceng maq gha kawq te khuhq vid tug sa tiq teo. Kheh ma khuhd, nig hehd te ghad he lehq te ghad haq lehd ma koz, chaw awg gha lia haq lehd ma koz, khar thad liz daq che ted ceng haq te vid tug hax ceh nux cud cad chehd-oq.
16 Khar thad liz ha lehg chehd-oq. 17 Khar thad liz bon lawg don laor. 18 Awg ceng gha lia awg khuhn Ghig sa haq chid muh chehd-oq.§ Awg lawn ghod ver, Yer suq Khreq awg khuhn che kheh te tug nig hehd awg pun Ghig sa ve a lor cawd che yaog.
19 Awg ha phu ve a mir haq taq sex vehr. 20 Ghig sa ve Awg ha phu duhd pawnr vid lehq koz teh lar che tawd khuhd haq maq sawnr ma caz taq te. 21 Kheh ma khuhd, awg ceng gha lia haq sawr ngawx tehz ngawx-oq.* Daq che awg ceng haq kha nehax yug cid lar-oq. 22 Haeg che awg ceng gha lia haq jaw kae-o.
23 Duhd sa vid sehr phad Ghig sa yawd nig hehd haq awg ceng gha lia awg khuhn daq lag kehg lag vid-oq. A nig ved Jawd mawd Yer suq Khreq kawq yaq che te yand, nig hehd ve ni ma, co ha he lehq awg ton awg gha lia vend bax tar kig mad cawg tug, Ghig sa nig hehd haq haq sax vid-oq. 24 Nig hehd haq kug yug sehr phad awr lehr, kar tiq yeg lehq, nig hehd haq che kheh tea tug yaog.
Awg leh med ve tawd khuhd he lehq bon naq vid che tawd
25 A vix a nax teq paog, ngag hehd awg pun bon lawr-oq.
26 A vix a nax awg gha lia haq daq che kehg che awg khuhn bux daq† lehq laq kuhr cax daoq.
27 A vix a nax awg gha lia haq liq che ghawn mar vid tug, Jawd mawd Yer suq haq ngag cud lehq nig hehd haq tawd sanr fea che yaog.
28 A nig ved Jawd mawd Yer suq Khreq ve awg bon awg sinx nig hehd geh cawg vid-oq.
* 5:2 Yer suq ve awg ni Yer suq kawq yaq tug ve awg ni haq koz che yaog. 1K 5:5, Am 5:18 † 5:4 naz hoq che Vend bax khuhn chehd che haq koz che yaog. Yh 1:5, Cy 26:18 ‡ 5:5 awg ghiz ve awg yad awg dug he lehq muhd kaw ve awg yad awg dugYer suq khuhn chaw awg suhx phehq vehr che teq pa haq koz che yaog. Lk 16:8, Mt 5:14 § 5:6 yuhq mir ka che Co ha phawd ma duhd sir che chaw haq koz che yaog. Rm 1:21, 24, 28 * 5:8 thang tug Ef 6:14 haq ngawx. † 5:8 son ux cuhr Ef 6:17 haq ngawx. ‡ 5:14 Kanx maq te che chaw Yer suq kawq yaq tug haq duhd law lehq teq chaweh kanx maq te che haq koz che yaog. § 5:18 chid muh chehd-oq Che awr lehr Khreq yad teq pa te kenr che kanx phehq che yaog. * 5:21 sawr ngawx tehz ngawx-oq Liq phu mar lar che haq hawr maq hawr che char ngawx che haq koz che yaog. Cy 17:11 † 5:26 bux daq A mig thad teq coaq ve chaw teq pa awg chawd te daq che awg hez phehq che yaog.
☰