Phid lid piq liq
Awg meh he lehq phehq peg che awg lawn
Phid lid piq liq che awr lehr, Rod maq med nux thawr khuhn awg kawd te pawz geh thad huh Pawd loq buhq lar che haq te lehq su, “Thawnr yehg khuhn tuhaz che liq” lehz koz meh vid lar che yaog. (Ed fed suq liq, Kaw law sehd liq he lehq Phid lid monr liq teq pa liz che kheh kha sur suar te koz meh lar che yaog). Phid lid piq med khuhn chehd che Khreq yad awg mor awr lehr, Ed par phawd diq haq cuh lehq Rod maq med lo Pawd loq haq i hehd ve Laq sawnr fe vid jaw che yaog. Kheh te lehq Rod maq med khuhn Ed par phawd diq nag lehq, Khreq yad teq pa yawd awg pun duhd har jad che yaog. Awg lawn che teq pa haq te lehq, Ed par phawd diq yawd liz lex lehq Phid lid piq med lo kawq koeq gad jad che yaog. Kheh te cheaq te lehq, i hehd haq pehnd che he lehq ga daq che haq bon ir khuhd yaw vid che liq che ve te koz, Pawd loq yawd Phid lid piq med khuhn chehd che awg chawd awg paz Khreq yad teq pa haq buhq fe vid lar che yaog.
Buhq var he lehq buhq che awg yand
Phid lid piq liq che ve khuhn, ka nad nehax awg kawd ped maq ve ted poq khuhn koz lar che, cuh yad Pawd loq yawd buhq lar che lehd koz lar che yaog. Liq buhq che awg khad liz, Pawd loq buhq lar che cehg mag lehz mawa lar che yaog. Liq che awg khuhn awg kag awr ve chaw awg meh teq pa haq koz lar che liz, Liq phu awg suhx khuhn ve liq teq pa khuhn Pawd loq koz che heh, koz lar che yaog. Liq phu che ve te koz buhq che awg yand awr lehr, chaw mad awr ver, A.D. 61 khuhq thad huh buhq lar che yaog lehd koz che yaog.
A yed ir che awg lawn he lehq awg lawn kha peg
Liq che te koz khuhn ve awg lawn nux maz vawr, “Ha lehg duhd sa che” ma hez ver “Ghig sa awg khuhn ha lehg duhd sa che” haq koz buhq lar che yaog. “Ha lehg duhd sa che” lehd koz che Her lar saq ve tawd khuhd che te khuhd awr lehr, liq che te koz awg khuhn 16 pawz kha gag yehd lar che yaog. Kheh te lehq, Pawd loq Khreq yad awg mor haq sa tiq tar vid tug awg ghad pid che tawd khuhd liz buhq lar che yaog. Awg lawn ghod ver, cand par teq pa Khreq yad awg mor awg khuhn liz cawg chehd lehq, awg bag phawd awr liz cawg chehd che yaog. Pawd loq Phid lid piq Khreq yad teq pa haq sa tiq pid lehq a sug yawd khad awg ton awg pun lehax duhd ngawx che he lehq caz mig vix che duhd khad haq sa tiq tar-oq lehd koz vid che yaog. Che nid ceng haq te lehq, Khreq yad awg mor haq kawz tug ir jad che phaz daq gid daq tug te vid gha che yaog. Phid lid piq liq che ve awr lehr, Ghig sa ve tawd khuhd cuhx kig nax jad che awg ceng liz cawg che yaog. Tawd khuhd u ve vawr, Jawd mawd Yer suq mig gig chaw yad ve awg hoq awg han haq khanr puhd che haq koz che yaog. Phid lid piq Khreq yad awg mor haq liz sa tiq pid lehq a sug yawd awg ton pun lehax duhd ngawx che chaw ve duhd khad he lehq caz mig vix che duhd khad haq sa tiq tar lehd koz vid che yaog.
Awg lawn nux
1. Awg kawd ve tawd, Ghig sa ve bon haq chid muh lehq bon lawg che (1:1-11)
2. Pawd loq yawd gha phehq gha khanr chehd che awg lawn (1:12-26)
3. Awg ghad pid che tawd (1:27-2:18)
a. Ha lehg che bon khuhd haq kenr daq che a saq teq khad (1:27-30)
b. Yer suq Khreq phehq che heh, awg ceg phehq che chaw ve duhd khad haq veq deh lehq awg ceg ve kanx haq ghaq te che (2:1-18)
4. Pawd loq ha lehg che Bon khuhd mar che haq ga vid che chaw teq pa (2:19-30)
5. Yud daq chaw ve awg lid haq te che chaw he lehq pong che awg lid lehd koz che ma hez hez che mar khad haq te gad che chaw (chaw khuhd maq na vix che chaw) haq sa tiq tar (3:1-4:1)
6. Awg leh med te pawz awg ghad pid che, Awg bon ir khuhd yaw vid che he lehq awg leh med ve tawd (4:2-23)
1
Awg chawd teq pa haq duhd nuhd che tawd
1 Yer suq Khreq ve awg ceg phehq che ngag Pawd loq he lehq Tiq mod ser ngag nid-ag awr lehr, Phid lid piq med khuhn chehd che Yer suq Khreq awg khuhn daq kehg che chaw awg gha lia haq lehd ma koz, Khreq yad awg mor haq ngawx haq sax che chaw teq pa he lehq ga vid che chaw teq pa haq lehd ma koz, liq che buhq fea che yaog.
2 A nig ved Awr pa Ghig sa he lehq Jawd mawd Yer suq Khreq ve awg bon awg sinx he lehq duhd sa gad sa tug nig hehd geh cawg vid-oq.
Phid lid piq med khuhn chehd che Khreq yad teq pa awg pun bon lawg che
3 Pawz gha lia ngag nig hehd haq duhd nuhd che te yand, ngag ved Ghig sa haq chid muh che yaog.
4 Nig hehd awg gha lia awg pun ngag bon lawg thad, pawz gha lia ha lehg che khuhn bon lawg che yaog.
5 Awg kawd teq ni te lehq a meha kha gag, ha lehg che bon khuhd buhg veh tug nig hehd ngag geh teq geha awg chawd te che haq te lehq, ngag Ghig sa haq chid muh che yaog.
6 Nig hehd awg khuhn daq che kanx haq tanr te che Ghig sa awr lehr, Yer suq Khreq ve awg ni te ni kha gag kanx u ve haq te peg vid tug yaog lehz ngag yonr cehg mag che yaog.
7 Nig hehd awg gha lia awg lawn ngag che kheh duhd che awr lehr, cawd che yaog. Awg lawn ghod ver, ni ma awg tawg kha gag ngag nig hehd haq haq che yaog. Ngag thawnr khuhn chehd che lehd ma koz, ha lehg che bon khuhd awr lehr cawd che yaog lehz ngag sax khiz khanr che awg khuhn lehd ma koz, nig hehd ngag geh teq geha Ghig sa ve awg bon haq gha che yaog.
8 Awg lawn ghod ver, Yer suq Khreq ve haq pehnd che awg khuhn ngag nig hehd awg gha lia haq khawd-ehg taw maq duhd nuhd jad che awg lawn Ghig sa awr lehr, ngag awg pun sax khiz khanr gha che yaog.
9-11 Ngag bon lawg che awr lehr, nig hehd daq che awg ceng haq sir vix tug, cud yiq ma yiq ted ceng he lehq pehg daq fir daq vix che ted ceng mad-ag che awg khuhn nig hehd ve haq pehnd che ted ceng sang te sang ir lag mad lag tug awg pun ngag bon lawg che yaog. Kheh te lehq, Ghig sa haq awg mig awg phond pid lehq yawd haq chid muh vid tug, Yer suq Khreq haq te lehq gha che thed che cawd che awg sir nig hehd kha peh ghad cawg lehq, Khreq ve awg ni teq ni awg pun daq che kehg che ni ma cawg lehq, vend bax tar kig mad cawg che chaw phehq gha vid tug awg pun liz ngag bon lawg che yaog.
Ngag teq chehd che ted ceng Khreq phehq che yaog
12 A vix a nax teq paog, ngag gha phud gha khanr che awg ceng teq pa awr lehr, ha lehg che bon khuhd buhg veh vid che law lehz, ngag nig hehd haq sir vid gad che yaog.
13 Kheh te lehq, Khreq awg pun ngag thawnr khuhn gha chehd che haq jawd mawd nux ve maq yad ted taq awg gha lia he lehq awg kag awr ve chaw awg gha lia gha sir che yaog.
14 Ngag thawnr khuhn gha chehd cheaq te lehq, a vix a nax mad-awr ve awr lehr, Jawd mawd Yer suq awg khuhn ni ma yeg lehq, ni ma tag che khuhn yawd ved tawd khuhd mar vid tug i hehd ma kuhz.
15 Chaw ted pehg pehar awr lehr, soer che he lehq ded daq yaq daq gad che awg khuhn Khreq awg lawn bon mar che yaog. Kheh ma khuhd ted pehg pehar awr lehr, daq che awg ceng tuhaz tug duhd law lehq bon mar che yaog.
16 Ha lehg che bon khuhd awr lehr, cawd che yaog lehz ngag gha yaw khuhq vid tug awg pun ngag chuhr huh gha chehd chehd che yaog lehz, daq che haq duhd law lehq mar che chaw teq pa sir lehq haq pehnd che awg khuhn bon mar che yaog.
17 Kheh ma khuhd, soer che awg khuhn Khreq awg lawn bon mar che chaw teq pa awr lehr, thed che ni ma mad cawg. Ngag thawnr khuhn gha chehd che haq lex lehq tuq khanr jad tug i hehd duhd lar lehq, tanr daq che awg khuhn bon mar che yaog.
18 Kheh te ver, khawd-ehg kheh le. Her ka che awg khuhn lehd ma koz, thed che cawd che awg khuhn lehd ma koz, awg ceng gha lia awg khuhn Khreq awg lawn su bon mar chehd che yaog. Khreq awg lawn su bon mar chehd cheaq te lehq ngag ha lehg lehq, awg ghud suh phawd awr liz kawq ha lehg tug ser che yaog.
19 Awg lawn ghod ver, nig hehd bon lawg che he lehq Yer suq Khreq ve Awg ha phu ga cheaq te lehq, ngag gha pong tug yaog lehz ngag sir che yaog.
20 Ngag duhd law lehq he gad che awr lehr, che kheh yaog. Khar ve ted ceng awg khuhn liz ngag maq gha yaq taw tug yaog. Pong lag thad heh te lehq a meha liz ngag ni ma tag che kha nehax cawg che awg khuhn, ngag teq chehd lehd ma koz, suh che lehd ma koz, ngag ved awg ton khuhn Khreq haq chid ir chid muh tug yaog.
21 Awg lawn ghod ver, ngag teq chehd che ted ceng awr lehr, Khreq phehq che yaog. Ngag suh ver, ngag awg pun awg mehaq gha tug yaog.
22 Ngag awg ton teq chehd ver, ngag kanx te che awg khuhn awg sir nuhaq vid tug yaog. Kheh te lehq, suh che he lehq teq che, khar ve ted ceng haq ngag gha lez yug tug lehq nar maq sir.
23 U ve nid ceng awg kanr huh ngag chehd lehq duhd ma tuhz che yaog. Ngag he gad che awr lehr, ngag koeq lehq Khreq geh chehd gad che yaog. Cheawg lehr lex lehq daq jad che ted ceng yaog.
24 Kheh ma khuhd, awg ton awg khuhn ngag gha chehd che awr lehr, nig hehd awg pun lex lehq awg bon cawg che yaog.
25 Ngag che ve haq kha nehax yonr cheaq te lehq, yonr che awg khuhn nig hehd ir lag lehq ha lehg tug awg pun, nig hehd awg gha lia geh teq geha ngag gha chehd tug yaog lehz ngag sir chehd che yaog.
26 Kheh te lehq, ngag nig hehd geh te pawz kawq lag che te yand, ngag haq te lehq Yer suq Khreq awg khuhn nig hehd lex lehq Ghig sa haq chid muh gha tug yaog.
27 Khawd-ehg kheh te liz, nig hehd kha te kha duhd che teq pa Khreq ve ha lehg che bon khuhd haq kenr daq vid-oq. U kheh te ver, ngag lag gag lehq nig hehd haq gha mawg che te yand lehd ma koz, nig hehd geh ma chehd che te yand lehd ma koz, nig hehd ni ma teq sir lehax tar lehq, duhd khad te khad lehax tar che awg khuhn, ha lehg che bon khuhd haq caz daq che yonr che ted ceng awg pun nig hehd teq geha hax ceh nux te chehd che awg lawn haq ngag gha kad tug yaog.
28 Nig hehd haq tawr lar che chaw teq pa haq ta kuhz. Ma kuhz ver, i hehd awg pun awg hez che ve nid ceng phehq tug yaog. I hehd gha lug gha sez che awg hez phehq lehq, nig hehd awr lehr Ghig sa lo lag che thaer khuhq che haq gha lar che awg hez phehq tug yaog.
29 Awg lawn ghod ver, Khreq haq te lehq nig hehd gha che awg bon awr lehr, yawd haq yonr che ted ceng lehax ma hez, yawd awg pun gha tuq gha khanr tug ted ceng haq liz gha che yaog.
30 Ngag gha bawz daq che he lehq nig hehd gha bawz daq che, ted ceng lehax phehq che yaog. Bawz daq che che ve, pong lag thad ngag te chehd che haq nig hehd gha mawg lehq, a meha liz ngag te chehd che awg lawn haq nig hehd gha kad che yaog.