2 Tiq mod ser liq
Awg meh he lehq phehq peg che awg lawn
A.D. 62-63 khuhq thad huh Pawd loq Rod maq ve thawnr khuhn tuhaz vehr lehq yawd 4 pawz te pawz ha lehg che bon khuhd ca mar tod peg khaz nuhr, 1 Tiq mod ser he lehq Tid tuq liq haq yawd buhq lar che yaog. Kheh te lehq A.D. 66-67 awg yand awg khuhn Jawd mawd nux Ner ror uq penr che thad liz, Pawd loq haq su thawnr khuhn te pawz kawq yug ke vid che yaog. Thawnr yad te ghad heh te lehq gawg jad che mig kor thawnr khuhn son caz pheh lehq ke huh lar che haq te lehq, Pawd loq yawd ved awg ton liz awg ghad nud jad vehr che yaog. Pawd loq awr lehr yawd ved kanx lehd ma koz, yawd ved a saq lehd ma koz peg vehr tez chehd che haq yawd sir che yaog.
Buhq var he lehq buhq che awg yand
Liq phu che ve te koz awg khuhn ka nad nehax ted mag awg khuhn Pawd loq awr lehr buhq var yaog lehd koz lar che yaog. Kheh te lehq liq che ve khuhn kha koz chi lar che awg lawn teq pa khuhn liz, Pawd loq buhq cheawg lehz sax khiz khanr lar che yaog. 2 Tiq mod ser liq che ve haq A.D. 66 khuhq kheh thad huh khuhn buhq lar che yaog.
A yed ir che awg lawn he lehq awg lawn kha peg
Awg lawn che sehz ceng haq te lehq Pawd loq yawd Tiq mod ser haq liq che ve te koz buhq vid lar che yaog. (1) Pawd loq haq awg chawd teq pa chid bag lar haz lehq ni ma har jad che haq te lehq, Tiq mod ser haq har naq laor ghud vid chehd che yaog. (2) Jawd mawd nux Ner ror uq penr che huhx chehd lehq du deh che haq gha khanr chehd che Khreq yad awg mor teq pa awg pun Pawd loq duhd har duhd khix jad lehq Tiq mod ser haq ha lehg che bon khuhd haq kha sehax haq sax lehq, ha lehg che bon khuhd u ve awg pun gha tuq gha khanr cawd liz tuq khanr tug awg ghad pid che yaog. (3) Tiq mod ser haq cud lehq Ed fed suq Khreq yad awg mor haq liq buhq fe vid gad che yaog.
Awg lawn nux
1. Pawd loq Tiq mod ser awg pun duhd khix che (1:1-4)
2. Pawd loq yawd awg ton gha phud chehd che awg lawn (1:15-18)
3. Tiq mod ser haq sa tiq pid lehq tawd sanr vid che (2:1-26)
4. Awg leh med ve awg yand awg lawn sa tiq pid che (3:1-17)
5. Pawd loq tawd sanr lehq lawg khawx vid che he lehq laq kuhr cax che tawd (4:1-22)
1
Awg chawd haq duhd nuhd che tawd
1-2 Yer suq Khreq haq te lehq co ha gha teq che yaog lehd koz che kar tiq tawd khuhd awg lawn koz mar vid tug, Ghig sa ve a lor cawd che haq te lehq Yer suq Khreq ve cuh yad phehq che ngag Pawd loq awr lehr, ngag haq che yad Tiq mod ser haq liq che buhq fea che yaog. Awr pa Ghig sa he lehq a nig ved Jawd mawd Yer suq Khreq ve awg bon awg sinx, har kax vix che ted ceng he lehq duhd sa gad sa che ted ceng nawg geh cawg vid-oq.
Yer suq awg pun sax khiz khanr tug mad yaq taw
3 Bon lawg che awg khuhn ngag nawg haq khar thad liz duhd nuhd lehq Ghig sa haq ngag chid muh che yaog. Ngag ved a pux a pi teq pa heh te lehq, daq che kehg che sir vix che ni ma cawg che awg khuhn yawd awg pun ngag liz kanx te che yaog.
4 Nawg ved mehz ghig yaq che haq ngag duhd nuhd che te yand, ni gha hax gha lia ngag nawg haq mawg gad chehd che yaog. Nawg haq gha mawg ver, ngag ha lehg che cawg mad-ag tug yaog.
5 Nawg ni ma awg tawg kha gag yonr che ted ceng haq ngag duhd nuhd che yaog. Nawg yonr che awr lehr, awg kawd thad nawg ved a pi Lawd iz he lehq nawg ved awr ye Ud niq awg khuhn cawg lehq, a meha nawg awg khuhn lo liz cawg che haq ngag kha nehax sir che yaog.
6 Ta lend mehr. A mir toq tuag che heh, ngag nawg thang huh laq kuhr tar cheaq te lehq nawg cawg lar che Ghig sa ve laq sawnr haq nawg khar thad liz yehd don chehd-oq.
7 Awg lawn ghod ver, Ghig sa awr lehr a nig haq kuhz vix che ni ma pehar che ma hez. Kheh ma khuhd, kand pax cawg che ni ma, haq pehnd che ni ma he lehq a sug yawd awg ton haq ghad vix che ni ma yawd a nig haq pehar che yaog.
8 Kheh te lehq, a nig ved Jawd mawd Yer suq awg pun sax khiz khanr tug tad yaq taw. Yawd awg pun thawnr khuhn gha chehd che ngag haq te lehq liz tad yaq taw. Ghig sa ve kand pax haq yehd lehq, ha lehg che bon khuhd awg pun gha tuq gha khanr che teq pa haq ngag geh teq geha khanr-oq.
9 Ghig sa awr lehr, a mig thad lo mig gig haq maq te phanr ser thad loar, yawd duhd lar che heh phehaq vid tug, yawd ved awg bon haq te lehq a nig haq thaer khuhq ax lehq, daq kehg che haq te tug awg pun a nig haq kug yug lar che yaog. A nig kanx te che haq te lehq yawd pehar che ma hez. Yawd ved awg bon u ve awr lehr, Yer suq Khreq haq te lehq a nig haq pehar lar lehq,
10 A nig ved Thaer khuhq par Yer suq Khreq tuhaz che haq te lehq, a meha awg bon u ve haq a nig kha sehax gha mawg che yaog. Yawd awr lehr, suh che ted ceng haq te lug lehq, co ha teq che ted ceng he lehq mad lug ma sez vix che ted ceng haq, ha lehg che bon khuhd awg khuhn lo kha sehax tuhaz vid lar peg che yaog.
11 Ha lehg che bon khuhd che awg pun bon mar par, cuh yad he lehq sar lar te tug, Ghig sa ngag haq lez yug ax che yaog.
12 Kheh te cheaq te lehq, ngag che kheh gha tuq gha khanr che yaog. Kheh ma khuhd, ngag mad yaq taw. Awg lawn ghod ver, ngag yonr chehd che awg sehr phad haq ngag sir chehd che yaog. Ngag yawd haq kha chid aq vid lar che teq pa, awg ni u ve teq ni kha gag yawd haq sax lar gha che yaog lehz ngag kha nehax sir chehd che yaog.
13 Yer suq Khreq haq caz daq che yonr che he lehq haq che ted ceng khuhn, nawg awr lehr, ngag geh gha kad lar che daq jad cawd jad che tawd khuhd teq pa haq kha nehax na yug lehq te kae-o.
14 A nig awg khuhn chehd chehd che Daq che kehg che Awg ha phu haq cud lehq nawg haq chid aq ax peg che daq jad che awg ceng haq kha nehax haq sax laor.
15 Ar siq muhd mig khuhn chehd che chaw awg gha lia ngag haq chid bag lar haz vehr che lehz nawg sir che yaog. I hehd awg khuhn, Phur ger luz he lehq Her rar mod genr liz chehd che yaog.
16 Awd ner sir phawd ted yehg haq Jawd mawd Yer suq har kax che ted ceng cawg vid-oq. Awg lawn ghod ver, yawd ngag haq laex pawz duhd sa tug tea che yaog. Ngag son caz pheh lar che haq yawd mad yaq taw.
17 Yawd Rod maq med lo lag gag che te yand, ngag haq mawg thad kha gag hax ceh nux ca che yaog.
18 Yawd awr lehr, suhx jehg suhx taz che awg ni teq ni khuhn Jawd mawd Yer suq geh har kax che ted ceng haq gha tug, Jawd mawd Yer suq yawd haq har kax vid-oq. Ed fed suq med khuhn liz, yawd ngag haq khawd-ehg taw maq ga lar peg che awg lawn haq nawg kha nehax sir chehd che yaog.