4
1 Pita uru Jon asehek sahou i tiri lau kahis le badeh, iri pris hawe tinan ta ndrokei ta asiu tinan ta Kindrei hawe iri Sadusi badeh, ame hawe uru.
2 Ya ndrine iri badeh, ibolosen i toro aposel. Tasah, oro badeh, leheya iri lau ta nyala Jises Krais ndramak ndrame awas ja ta imek tan, eme ma iri lau mari ale kameh winiyan amak ame awas ja ta imek tiri.
3 Eme iri anya katehei uru a ta mada sahou, arile ndra mirihik ta an i andri. Eme ma iri tawi Pita uru Jon ma atehei uru a bolo kou, andrei ben ari.
4 Arile, iri lau solo-an anuhun sahou turu ma iri atehei budon tiri handru i ta aliy. Ya, eme sebenei iri ma kane iri badeh, i sola asahan lamawa (5,000).
5 Eme na len ari ja badeh, iri lau ta atondrok, hawe iri lau-en, hawe iri lau ta leheya kandriyen malen tiri Juwis atukum ame Jerusalem.
6 Iri lau rayah ta lundriye iri pris badeh, are aliy. Ya Anas tinan tiri pris hawe Kayapas oro lau tan. Jon hawe Aleksandra badeh, ado aliy ale.
7 Eme iri kuhi Pita uru Jon ala ales are mada iri ma iri ndremenya uru, “Na boto-on ma hawe nyara are handru, ah amekes iri lahou dah?”
8 Eme Pita idih na Malawin Ndrabun badeh, ma iy tiye i tiri, “Ado lau ta atondrok, hawe ado lau-en tiri lau!
9 I buku none ado kandremenya aso na dah, ta lahou mwasin aso amekes i ta ndramak badan imek ma kalelen iy kamwenen i buku sah,
10 idah kameh, ado ma hawe iri lau badu Isra-el katanan ta ndramak ales udu mada ado ndramwenen dah badeh, na boto-on ta nyara Jises Krais badu Nasaret. Iy mene
ado atahi iy i bada kei tondreh ma iy imek. Ano Kindrei mete-ei iy amak eme awas ta imek tan.
11 Iy badeh, Jises i buku
‘bek, ado lau ta atah asiu bwale ado, na dah, iy ndrasahan kati ndru ta ka-u asiu bek.’ Wari 118:22
12 Taha badeh, winiyan batakalahei ari seben bare ta ari lau ja bwe; tasah ari lau udu baha kandrah ja kada-ah atehei iy ki nyara seben tataha bwe.”
13 Eme oro anyolom Pita uru Jon badeh, banoh se bwe, uru abadok handru. Ma oro atanan uru badeh, mene bakohok tanan tinan bwe, uru badeh lau badu kon laleyah. Eme ya mani oro atur, ma oro atanan, ta uru lau doh mene badu hawe Jises.
14 Eme oro badeh, basehek randra sahou bala bada uru bwe. Tasah, iy ndramak mene uru mesekei iy amwenen badeh, ales ere hawe Pita uru Jon are mada oro mari.
15 Eme oro badeh, tiye iri lau ta ndrokei katiyani Pita uru Jon ka len ta mada iri kansol, ya eme oro atilik nyala oro,
16 “To kamekes sasah handru ki turu lau kede-eh bah? Iri lau mari manyah ado Jerusalem badeh, ndratanan kalem mwasin uru amekes. Ya eme to winiyan babisiniy bwai.
17 Arile, san le doh badeh, to kabwidi lahou dah saseker badeh, to katiye uru badeh, ka-i ta asehek nyara iy ndramak doh.”
18 Ano oro luhi uru ame bolon ja badeh, tiye i turu sasehek sahou ma saleheya boto-on ta nyara Jises ja, ndri-iy ai.
19 Arile, Pita uru Jon anya, “Ado kanone kaseleya ki tado le se. Mwasin ta mada Kindrei ta aso kanuhun boho ado deh, bwe-em kanuhun boho Kindrei?
20 Ya aso kameh winiyan bandru-uk ta asehek lakou aso ndranyolom na mada aso, ma anuhun na ndranye aso amwenen bwai.”
21 Eme oro kansol nohowa oro abadok le gwek, ma tiye uru au. Oro badeh, winiyan badeu maha-an bala turu bwe, tasah iri lau mari atudun le Kindrei ta lahou tinan mene uru amekes.
22 Jaha ta ndramak nane amwenen badeh, sakalawi hanoh (40).
Boto-on ta salom tiri lau ta Kindrei
23 Eme oro tiye uru ame len badeh, ala hawe oro lau turu amwenen, ma asehek nyala oro ta lakou mari, oro tinan tiri pris hawe oro lau-en tiye i turu.
24 Eme oro anuhun badeh, oro asore boho oro i le se i loken, asolom i ta Kindrei. Eme oro anya, “Laban Kindrei, ou le mesekei kandrah ma munyak hawe ndras ma hawe lakou mari udu bahandran ma udu bwele-en.
25 Ou mene asehek sahou na Malawin Ndrabun edek boho lohowam, tubu ahi Debit anya:
‘I buku sah iri lau badu leheleh abolosen le gwek?
Ya i buku sah iri lau atilik budon labwe?
26 Iri kabin badu munyak lowosa iri,
ma hawe iri lau ta atondrok atukum a se amekes bahun i ta Laban
hawe ndramak ta seben tan iy suni iy eme.’ Wari 2:1-2
27 Idoh mene handru, Herot hawe Pontiyus Pailat atukum a hawe iri lau badu leheleh ma hawe iri lau badu Isra-el, badu bolo kon tinan dah amekes budon ta adai Jises. Iy badeh, lohowan tam ndrabun ou mene suni iy eme ta amekes gok tam.
28 Oro amekes doh badeh, in hamon le ta budon ma seken tam, ou ndrasehek.
29 Abo, Laban, na dah badeh, ou anuhun iri anya kanohowa aso, arile ou bwidi aso lohowam kabadok ta asehek sahou tam.
30 Talasei minem kamekes lau kamwenen ma kamekes kalem mwasin na boto-on ta nyara lohowam ndrabun, Jises.”
31 Oro asolom ano, kon nane oro atukum are aliy dah, totoreh. Ma eme oro mari badeh, adah na boto-on ta Malawin Ndrabun ma oro abadok ta asehek sahou ta Kindrei.
Iri lau ta Kindrei anyohan iri ari ari na lakou
32 Eme iri lau ta Kindrei, budon tiri hawe ndrine iri i le ari. Iri mari badeh, bamekes ndrakok bala ta sanuw tiri bwe. Arile, iri mari badeh, anyohan lakou tiri, i tiri ari ari.
33 Eme oro aposel asehek sahou ta nyala amak eme awas ja ta Laban Jises na boto-on ta Kindrei. Ya eme Kindrei apwai nyosowan badeh, i la-u iri mari.
34 Eme iri ari ari badeh, bandriliu ta lakou bwe. Ya len rayah, oro lau heh, munyak toro udu aliy hawe asiu toro udu aliy badeh, adeu i ta sisih.
35 Ya luk ta lakou nane oro asih doh badeh, oro atiye ili hawe oro aposel. Ano oro apou i toro lau heh nane, lakou bwe.
36 Eme Josep badeh, badu boho kamen ta Libai, adeu iy udu Saipres, ya oro aposel badeh, aloh iy Banabas (moson “ndramak ta edeu tanan mwasin.”)
37 Iy eme atehei munyak tan i ta sisih. Eme iy andrei luk badeh, atehei i mine oro aposel.