4
Ta lahou ta Krais le badeh, taha lohowan tan asahan nadu Kindrei
1 Ya, kandriyen tataha ari badeh, i buku sahou sokek ta amekes moso sahou jo atorou dah kaleu kamwenen. Buku ndramak ari munyak tan ranah laba tinan udu aliy, ya, buku iy ndramak doh, nadun mwan ari udu aliy. Nadun amwenen badeh, ibo gok udu bwele-e munyak doh, luluwen labai i buku ari bonyo-ou. Udu hamon, buku taman anyolom nadun ndrasahan awas handru, iy kameh winiyan tiye nadun ta atondrok munyak tan doh.
2 Tasah, iy mene ma bwisik badeh, iy in hamon ta sahou tiri lau ta atondrok iy, ma iy i buku ndramak ari laleyah ta gok le, winiya na len le taman barasan ben tan.
3 Eme ma, nadu sahou sokek jo nane torowenei dah badeh, moson ta aliy i buku doh: I buku taha mene are ndra buku iri nah bwisik badeh, ta budon tataha, ma taha mene a buku bonyo-ou, tasah kandriyen ma batanau solo-an nane badu bolo munyak atondrok taha.
4 Eme na len ta aliy amwenen asahan, Kindrei suni nadun amwenen eme. Iy asahan eme len ta badih awas eme udu baha kandriyen ma batanau malen tiri lau badu Juwis.
5 Ya, Jises eme akunoh taha are bahandra batanau malen tiri bonyo-ou tiri Juwis ame len, ma taha asahan nadu Kindrei. Eme ma, na len dah ja badeh, taha ndrasahan ndra tinan, ma taha winiyan akohok ma atondrok iri lakou mwasin nane tama taha ndratehei ndrame tataha nadun amwenen.
6 Eme ma Kindrei suni Malawin Mwasin ta nadun Jises eme udu ndrine taha ari ari, tasah taha ndrasahan nadun. Eme ma iy bwidi taha aloh i ta Kindrei i buku doh, “Tama, tama.”
7 Eme ma, taha badeh, bado buku nadu Kindrei nyandren, buku bonyo-ou tan ja bwe, tasah taha ndrasahan ndra tinan ndra en, ma Kindrei ndratehei kalem ndrame tataha ta akohok manyah mwasin doh, hamon.
Pol abudon iri lau badu kon Galesiya
8 Bwena mene ndra-au, aha tana aha Kindrei bwe. Eme aha a bonyo-ou tiri kindrei rayah ja; iri doh badeh, Kindrei handru bwe.
9 Arile, na dah, aha ndratana aha Kindrei handru. O, sebwe jo katiye taha ki buku doh: Kindrei ndratanan aha. Ya, i buku sah ja, aha anya kala hamon ja kala hawe iri malawin ndra-in ja? Iri nyamu iri bwe, ma iri winiyan bala ari lakou handru bwe. I buku sah, aha anya kala bonyo-ou tiri ja?
10 Aha atehei budon taha ihis ta kandriyen tiri Juwis ta len, ta bun, ma jaha, ma hawe len ta ur ma an.
11 Eme ya jo abudon aha solo-an labai. Sebwe, boto-on ta lahou tek ewek taha badeh, iu laleyah?
12 Aha nadu tine, jo aseken aha kanuhun sahou tek. Jo badu hawe iri Isra-el, arile batanau malen tahi badeh, bateu jo bareu bolo kou ja bwai. Eme ma na dah, jo udu bahandra maha-an ta aliy eme len, ma jo udu laleyah buku aha lau badu leheleh amwenen. Arile, nadah ja, aha anya kala bahandra tondrok ta batanau malen ja. Kora-on aha kala bolo kou ta kandriyen taha nane doh. Ndri-iy ai. Aha ka-en hamon tek, buku jo ki-in hamon ta Krais. Aha bamekes ari budon ndra-in bame badak bwe.
13 Aha ndratana aha, ma mwena handru mene jo atiye sahou mwasin ewek taha badeh, sik le sahei, ma jo asehek sahou ta Kindrei mwasin ewek taha.
14 Ya eme sik tek badeh, ndra-in labai, arile aha basumukok jo bwe. Handru, aha nyowo-ei jo, i buku none angelo ta Kindrei badu loken; ya, i buku none Jises Krais keme i buku none jo dah, sebwe aha kandrei iy, ki le buku jo nadeh?
15 Aha mene sekesek handru ta kandriyen mene jo ndramekes. Eme na dah ja, saba lakou ndramesekei aha? Bwena mene, aha winiyan baso-ok jo kameh imeson o barah ta ari lakou bwe-en. Na bolo len bwena mene doh, aha winiyan sekesek ta aha sudi mada aha amwenen, ma atehei eme tek, ta aseben jo.
16 Ya jo asehek sahou handru. Aha abudon anya, jo dah budon tek ndra-in i bada aha, tasah jo atiye sahou handru dah?
17 Iri lau rayah aseken labai ta anya kaliu budon taha ki hawe budon tiri ja, arile budon tiri badeh, ndra-in. Iri anya kasosokok aha same hawek. Eme iri anya kaliu budon taha ki hawe budon tiri ta aseben ma atudun iri le.
18 Ya, i buku none jo udu hawe aha, deh, jo bado hawe aha bwe, mwasin, aha kamekes lahou mwasin le kili. Ma, i buku kati budon taha ta amekes lahou amwenen, aha katehei budon taha handru na len mari kihis ta lahou doh.
19 Eme ya, aha naduk, jo atona isi, ma jo tikisi aha laba tinan labai, i buku isi ta badih anya kedeu nah udu ndrinen eme len. Tasah, len mari jo tikisiy ma abudon aha, ma atondrok kandriyen ta Krais handru barawek ndrine aha.
20 Jo badeh, aso-ok labai ta udu hawe aha, arile jo udu len labai. Buku jo kudu hawe aha, badeh, kameh jo winiyan seleyani aha, ta iri saba lakou handru, i nyara kati maha-an asahan taha badeh, ma jo ale winiyan asehek iri sahou rayah ja. Arile, na len dah badeh, jo anya kasehek boto-on kewek taha, ta maha-an tinan labai udu bwele-ek, eme ma jo atorou la-ukei ramen dah ewek taha ta aliy.
I buku none Haga uru Sara
21 Jo anya katiye taha, ta are lau oro anya ka-en hamon ta batanau malen tahi lau badu Isra-el: Aha banuhun batanau malen tiye i buku sah bwe le?
22 Udu bolo buk ndrabun ndratorowenei i buku doh: Abraham nadun mwan ma la-uh. Iy ari, asahan ta udun amwenen Sara, ya iy ari, asahan ta lohowan tan Haga.
23 Eme, nah badu ndrine lohowan tan, adeu iy eme len i buku none iri adeu nah eme len kede-eh. Arile, i nah ta udun handru, adeu iy eme len in hamon le ta tandrakan ta Kindrei.
24 Eme budon dah, moson asahan i la-uh. Uru badih ma la-uh leheya sahou lundra. Nadu Haga oro, sahou randra le, badeh, ari ai. Ya oro badu mandrei Sainai, atehei oro ta asahan bonyo-ou.
25 Haga badeh, moson i buku mandrei Sainai udu bolo kon Arabiya. Eme, kandriyen ta bonyo-ou badu ta Haga ndrame Jerusalem na dah, tasah iy ma hawe lundriyen oro badeh, bonyo-ou kahis le.
26 Arile, Jerusalem badu kandrah badeh, kon tiri bonyo-ou bwe. Iy doh, tine taha mari.
27 Tasah, tarou ta Kindrei badeh, tiye i buku doh:
“Ou badih kis badeh, ou sekesek,
ou sarakau ma ou sandroh,
ou mene batona isi ta nah bwe.
Tasah, badih udun ruwani iy kameh nadun i sola,
sakalau badih udun udu aliy ja.” Aisaya 54:1
28 Eme, aha nadu tine, aha badeh, nadu Kindrei i hamon ta tandrakan i le buku Aisik.
29 Eme na len doh mene, nah adeu iy eme len i buku nah mari kede-eh, kameh, iy edeu sisi-in i ta nah asahan na boto-on ta Malawin Ndrabun. Ya na dah i buku aliy le.
30 Arile, sahou bolo buk ndrabun tiye i buku doh,
“Ou tikahei badih ta bonyo-ou ma nadun uru ka-au. Tasah, nadu badih ta bonyo-ou kameh, winiyan bakohok se lakou badu mine taman bwe. Nah le badu ndrine udun amwenen badeh, bonyo-ou bwe. Iy kameh akohok lakou mari.” Jenesis 21:10
31 Eme, aha nadu tine, taha badeh, lundriye badih ta bonyo-ou bwe. Taha bonyo-ou bwe, taha badeh, lundriye udu Abraham ta badih bwena labai, eme ma taha ado mwasin ai.