10
Jises asehek kandriyen ta ndramak tikahei udun iu
(Metiu 19:1-12; Luk 16:18)
1 Eme ma Jises hawe oro lau tan ruwani kon Kapena-um, ma oro au ala loboho kon Judiya ereu kapa gwa Jodan bilisiu. Eme ma iri lau solo-an solo-an atukum ame hawen ja, ya eme i buku none kandriyen tan ala iy ndramekes ndramekes ndra-au, eme ma iy leheya iri.
2 Eme iri Parasi ame hawe Jises anya kanone iy. Eme iri ndremenya iy, “Sebwe sahou batanau tataha anya, ndramak winiyan atikah udun iu deh bwe?”
3 Eme Jises tiye i tiri anya, “Moses mene batanau sasah handru i taha?”
4 Eme iri anya, “Moses tiye tahi anya ndramak winiyan atorou la-ukei ta amendren tasou, ya iy atehei i mine badih tan ano iy winiyan aruwe badih tan iu.”
5 Eme Jises tiye i tiri i buku doh, “Batu ado boto-on labai, eme Moses torowenei batanau i taha.
6 Arile, bwena handru kala Kindrei mene
‘mesekei lakou mari, iy mesekei lau mwan ma badih.’ Jenesis 1:27
7 ‘Ta katin le doh, iy mwan karuwani taman uru tinen ya iy keme len hawe udun,
8 ya uru kasahan ari buruwen.’ Jenesis 2:24
Kindrei asehek anya, bada uru la-uh bwai, bada uru ndrasahan ari le buruwen.
9 Idoh le, saba lakou Kindrei ndrasawei mari ndrase, ari ndramak sasaniy ja ai.”
10 Eme oro a hamon a asiu, oro lau tan ndremenya iy ta sahou mene.
11 Eme Jises tiye i toro, “Ndramak tikahei udun iu ya i buku none iy sudi badih ari ja, iy le mesekei karei i tan.
12 Ma ale i buku none iy badih tikahei udun mwan ya i buku none iy ili i tasou i ta mwan ari ja, badeh, iy mesekei karei i tan ale.”
Jises aseken iri nah kala hawen
(Metiu 19:13-15; Luk 18:15-17)
13 Ano iri lau atiye iri nah ala hawe Jises ta iy kedeu minen ki bada iri. Eme oro lau tan abolosen i tiri.
14 Eme Jises seleyaniy, ma iy ibolosen i toro lau tan, “Ado karuwani iri nah kame hawek. Ado saturuk iri, ndri-iy. Tondrok ta Kindrei badeh, tiri lau buku iri nah nadu bwisik kede-eh.
15 Jo tiye sahou handru ewek tado. I buku ado basahan buku none iri nah bwisik bwe, ado kameh winiyan bala bolo tondrok ta Kindrei bwe.”
16 Eme iy nyuruwini iri nah nane ame hawen. Iy atehei minen i bwele-e oro ari ari, ma asehek sahou ta nyosowan boto-on i tiri nah dah.
Sahou nyala ndramak tan lakou solo-an
(Metiu 19:16-30; Luk 18:18-30)
17 Eme Jises anya kedek san anya ki-iu le badeh, ndramak ari sakaniy in hamon tan eme, aluh udu andri mada Jises, ma iy ndremenya iy, “Ndramak ta leheya, ou mwasin handru. Jo kamekes saba kandriyen handru ya jo kakohok kohan mwasin ta ereu le buku doh len mari?”
18 Eme Jises tiye i tan i buku doh, “Tasah handru ou aloh jo mwasin handru? Ari ndramak badeh, bala mwasin i buku none Kindrei bwe, Kindrei le ari, kabwe.
19 Ou tanam batanau ta Kindrei,
‘Ou sadai ndramak samak, ou samekes karei ta badih tasou, ou sabahana, ou sawasai, madam salikis. Arile, ou a-en bahandra tamam uru tinem, ma ou anuhun sahou turu.’ ” Eksodus 20:12-16; Dutoronomi 5:16-20
20 Eme ndramak dah anya, “Ndramak ta leheya, jo ma loweu eme taku dah, jo in hamon ta sahou batanau mari le ai.”
21 Eme Jises anyolom iy ndramak dah, ma iy tikisi iy, ma iy anya, “Lakou ari le kahis. Ou ala atehei iri lakou tam mari kili mada ba-en, ya luk ou akohok ta iri lakou tam nane ou adeu ki tiri lau tiri lakou bwe. Ou amekes i buku doh kameh ou tam lakou mwasin handru udu kandrah. Ano ou bara-en hamon tek.”
22 Ndramak dah anuhun, ma sa-ar asahan bwilin, ma iy tikisiy labai, tasah tan lakou solo-an labai, ma iy bwalen ta edeu iu, ya eme ma iy edek iu.
Bohosak ta ndramak tan lakou solo-an
23 Iy ndramak nane ndra-au ai. Eme Jises anyolom ili eme, ma iy tiye i toro lau tan i buku doh, “Idah kameh boto-on labai ta ndramak tan lakou solo-an, i buku none iy anya kili bolo tondrok ta Kindrei!”
24 Eme oro lau tan badeh, boho oro asak, tasah ta sahou iy asehek. Eme Jises asehek ili le, “Ado naduk, idah kameh boto-on labai ta ndramak anya kili bolo tondrok ta Kindrei!
25 Masakan boto-on boto-on boto-on labai ta ndramak tan lakou solo-an ta iy ili bolo tondrok ta Kindrei, arile manamun labai ja ta kamel i buku iy i bolo manamunu nunu.”
26 Jises asehek, ma mani oro atur labai. Eme ma oro ndremenya iy, “Buku none i buku baden eh, are lau handru kameh winiyan akohok kohan mwasin ta ereu le buku doh?”
27 Eme Jises anyolom amwenen i toro, ma iy anya, “Lau winiyan bwe, arile Kindrei badeh, bala buku aliy bwe. Kindrei le ari winiyan amekes iri lakou marakon.”
Kunoh ta ndramak ruwani lakou ya iy in hamon ta Jises
28 Jises asehek, ma Pita anya, “Ou atou, aso ndraruwani lakou taso mari, ya aso ndra-en hamon tam.”
29 Pita asehek i buku doh, ma Jises asehek i toro anya, “Jo tiye tado handru. Are lau ruwani asiu tan, ma nadu tinen mwan, ma buru-un, ma taman uru tinen, ma nadun, ma bilin tan tasah ta jo, ma ta sahou mwasin,
30 iy kameh akohok lakou solo-an handru na len dah. Iy kameh akohok ndramas buku san rinek (100) ja i bwele-e lakou tan bwena. Ndramas doh buku asiu solo-an ja, ma nadu tinen mwan solo-an ja ma buru-un solo-an solo-an ja, ma tinen hawe nadun ma bilin solo-an, ma ale hawe iri lau amekes ndra-in i tan ale. Arile len hamon, Kindrei kameh winiyan edeu kohan handru i tan ta winiyan bano bwe ta udu le buku doh.
31 Arile lau solo-an na len dah areu bwena, iri kameh ame hamon. Ya iri lau solo-an na len dah areu hamon iri kameh kala bwena.”
Jises asehek nyala imek ma amak tan san rasan ja
(Metiu 20:17-19; Luk 18:31-34)
32 Ano Jises hawe iri lau ado san adek ala Jerusalem, ma Jises edek iu i bwena tiri, eme ma oro lau tan mani oro atur, ma iri lau an hamon tan badeh, anoh. Eme Jises ma hawe oro lau tan ma ronoh la-uh a ka-un ya eme iy tiye nyala oro ta sasah kameh asahan badan.
33 Eme iy tiye nyala oro i buku doh, “Ado kanuhun, na dah to ala loke ala Jerusalem, ma iri kameh atehei Nadu Ndramak Awas ili mine iri tinan tiri pris ma hawe iri lau ta leheya kandriyen tiri Juwis. Ya iri kameh atehei iy ili ta mada sahou, ma iri kameh atilik sahou i se ta kadai iy kimek, ma iri kameh adeu iy i mine iri lau badu leheleh.
34 Ma iri kameh bobose iy ma omor iy ma a-um iy na malou sakabuk i bek ma hawe adai iy imek, arile hamon ta len taloh kameh iy amak ja.”
Jemis uru Jon anya kasahan tinan
(Metiu 20:20-28)
35 Eme nadu Sebedi, Jemis uru Jon ame hawe Jises, eme uru tiye i tan, “Ndramak ta leheya, aru anya kandremenya ou, saba lakou aru ndremenya, ou mesekei keme taru.”
36 Eme Jises anya, “Saba lakou ah aseken jo kamesekei kewek ta-ah?”
37 Eme uru tiye i tan, “I buku none ou aseken, aru anya kamanyah ka-en hawem, ari kamanyah kudu bilisiu minem salin, ya ari kamanyah kudu bilisiu minem kamweu kudu bolo lomadan tam.”
38 Arile Jises tiye i turu, “Ah bala tanan ta saba lakou ah ndremenya kede-eh bo-oh! Sebwe ah winiyan a-un na bwiniu jo kameh a-un na aliy dah nadeh? Ya, sebwe ah winiyan anyu na inyu jo kameh inyu na aliy?”
39 Eme uru tiye i tan, “Aru winiyan.” Eme Jises tiye i turu ja, “Handru, bwiniu kameh jo a-un na aliy, ah kameh a-un na aliy ale, ma inyu, jo inyu na aliy, ah kameh anyu na aliy ale.
40 Arile, are kameh manyah ereu minek salin ma are kameh manyah ereu minek kamweu, idoh jo winiyan batiye bwai. Tasah kon doh tiri lau ale tama Kindrei ndralowosani iri kabwe.”
41 Ya eme oro lau tan ma ronoh anuhun sahou turu, oro anya kabolosen ki ta Jemis uru Jon.
42 Ano Jises luhi oro lau tan mari ame hawen ma iy tiye i toro i buku doh, “Ado tana ado, iri lau lomondra ta atondrok iri lau badu leheleh badeh, tiri boto-on ta atondrok iri lau tiri, ma iri badeh, batanau boto-on labai ta iri lau tiri kanuhun sahou tiri handru.
43 Arile, kandriyen doh sa-en ndrokowa ado, ndri-iy. Ndramak anya ki tinan kereu ndrokowa ado, iy kasahan lau ta gok kereu ndrokowa ado.
44 Ma are anya kereu bwena tado iy kasahan ndramak ta gok laleyah kereu ndrokowa ado.
45 Tasah Nadu Ndramak Awas ale eme ta iri lau kamekes gok tan, bwe. Iy eme ta aseben iri, ma ta edeu kohan ta akunoh lau mari.”
Jises mesekei mada Batimeyus amwenen ja
(Metiu 20:29-34; Luk 18:35-43)
46 Ano oro ame Jeriko, ya Jises hawe oro lau tan anya ka-au ta Jeriko ma hawe iri lau solo-an solo-an. Eme nadu Timeyus nyaran Batimeyus, iy madan bwe, manyah udu ka-u san anyolou iri lau ta lakou.
47 Eme iy anuhun, idoh Jises badu Nasaret le ai, eme iy aloh, “Jises, ou nadu tubu kabin Debit, ou tikisi jo!”
48 Eme iri lau solo-an abolosen i tan ma tiye iy kandru-uk, arile bwai, iy aloh ma arah boto-on le gwek ai, “Nadu tubu kabin Debit ou tikisi jo!”
49 Eme Jises udu rasi ma tiye sahou i tan i buku doh, “Ado kaluhi iy keme.” Eme ma oro luhi Batimeyus ma oro tiye sahou i tan i buku doh, “Ndrinem kamunum! Ou suri ou ma ou ame. Jises aloh ou!”
50 Eme Batimeyus suri iy ales i loken suwi suwi. Iy asini kolau ta bwele-en iu, ma ruwaniy udu api, ma iy edek amwenen ili hawe Jises.
51 Iy edek ili isos le badeh, Jises tiye i tan i buku doh, “Ou aso-ok jo kamekes sasah ki tam?”
Eme ndramak madan kaseu dah anya, “Ndramak ta leheya, jo anya kanyolom kon ja.”
52 Eme Jises tiye i tan, “Ou au ai, budon tam handru ndramesekei ou ndramwenen ja.” Eme ma nawin bwe madan amwenen ma iy anyolom ja ma iy in hamon ta Jises.