16
Jises amak eme loken ja
(Metiu 28:1-8; Luk 24:1-12; Jon 20:1-10)
1 Eme ya len ta amunyau ndrano ai, eme Mariya badu Makdala hawe Salome hawe Mariya tine Jemis badeh, sihinei suluw. Eme oro anya kala kanyas ki bada Jises.
2 Eme ma ndra wahun ta len ma bwena ta wik ari ja, ma ndraben handru oro au a mada lek, an barame loken ai.
3 Eme oro asehek nyala oro ari ari i buku doh, “Are lau kameh kaseben to katundruwi bek tinan udu mada lek ki-iu ki len?”
4 Oro asehek i buku doh, tasah bek badeh, laba tinan labai. Ano oro suri batu oro eme loken le badeh, oro anyolom bek ta mada lek badeh, ndratundruwiy ndra len.
5 Eme oro a bolon badeh, oro atou ndramak loweu ari asini awin belen nyikilikin labai manyah badeh, udu loboho lim salin. Eme ya oro toroyani oro.
6 Eme iy tiye i toro, “Ado satoroyani ado. Ado anya kasilah Jises badu Nasaret iri mene tatahi iy i bada kei tondreh. Iy badeh, ndramak ndrame awas ja! Ya ado kanyolom ndrahunen mene iri nyahani iy in aliy.
7 Arile ado kala katandra-un toro lau tan ma hawe Pita, ya iy ndra-au ndrala bwena ndrala Galili. Ya idah kameh ado winiyan anyolom iy ereu loboho doh, i buku iy mene ndrasehek tado bwena ndra-au.”
8 Eme ma oro ado bolo lek ame manan, ma sakaliye au a kon. Ma mani oro atur ma oro totoreh, eme ma oro basehek nyala ari lau bwe, tasah, oro anoh.
[Iri lau ta tanan solo-an abudon anya Mak 16:9-20 bado bolo tarou ta Mak torowenei bwena mene bwe.]
Jises asahan hawe Mariya badu Makdala
(Metiu 28:9-10; Jon 20:11-18)
[
9 Eme ma ndra wahun ta len ma bwena ta wik ari ja badeh, Jises asahan ma mwena hawe Mariya badu Makdala ala iy mene tikahei oro malawin ndra-in ma ndro taloh ado bwele-en au en.
10 Eme Mariya ili tiye i toro mene an hawe Jises tikisi iy ma aden iy en.
11 Eme oro anuhun Mariya asehek nyala oro anya ja, “Jises ndramak, jo ndranyolom iy.” Arile oro badeh, batehei budon toro handru ba-en ta aliy bwe.
Jises asahan hawe uru lau tan ma la-uh
(Luk 24:13-35)
12 Ano hamon ta aliy ja, Jises asahan hawe uru lau tan la-uh ja i san randrah labai, idoh na len uru adek ala kon munyak tinan.
13 Eme uru au a hamon ma asehek nyala iri mari, arile bwai, iri batehei budon tiri handru ba-en ta sahou turu bwe.
Jises asahan hawe oro lau tan, ma iy batanau oro
(Metiu 28:16-20; Luk 24:36-49; Jon 20:19-23)
14 Ano hamon ja badeh, Jises asahan hawe oro lau tan ma ronoh ari le, ya oro badeh, manyah an andri aimon nyamon. Ya eme iy tiye sahou boto-on i toro, tasah, ta budon toro handru ba-en tan bwe, ma ndrine oro ndrabadok. Ma oro badeh, mene budon toro handru ba-en toro lau mene anyolom iy hamon ta iy amak eme loken ja bwe.
15 Eme ma iy tiye i toro i buku doh, “Ado kala bolo kon munyak mara-ei badeh, katiye sahou mwasin doh ki tiri lau mari.
16 Ya iy are budon tan handru in ta sahou mwasin ma kanyuwi iy, idah kameh Kindrei sebenei kohan. Arile, iy are lau batehei budon tan handru ba-en ta sahou mwasin bwe, idah kameh iy ales ere ta sahou udu mada Kindrei ma iy kameh akohok ndra-in labai, tasah ta lomondra ndra-in tan.
17 Idah kameh kalem asahan ta are lau budon tan handru in ta aliy. Na boto-on ta nyarak le, iri kameh atikah malawin ndra-in iu, ma idah kameh iri asehek boho kon rakon ja nane iri tana iri bwena bwe.
18 Ya, i buku none iri ateu mwak deh, bwe iri a-un gwa nyakadan, idah kameh iri winiyan bakohok sisi-in ma bamak bwe. Ma idah kameh iri adeu mine iri i bwele-e iri lau abo sik, ya idah kameh sik udu tiri iu.”
Kindrei andrei Jises iu i loken
(Luk 24:50-53; Aposel 1:9-11)
19 Ya eme Laban Jises asehek sahou i toro ano, ma Kindrei andrei iy iu i loken bolo kandrah, ma iy ili manyah udu loboho mine Kindrei salin.
20 Eme ma oro au a len, ma atiye sahou ili bolo kon mari, ma Laban aseben oro ma amekes kalem asahan ta edeu boto-on i ta sahou toro.]