27
Oro tiyani Jises ili hawe Pailat
(Mak 15:1; Luk 23:1-2; Jon 18:28-32)
1 Na mandraben handru en, iri tinan tiri pris ma hawe iri lau tinan amekes budon i bada Jises ta kadai iy kimek.
2 Iri sawei iy, ma tiyani iy ili, ma atehei iy ili mine tinan tiri Rom nyaran Pailat.
Imek ta Judas
(Aposel 1:18-19)
3 Judas, ndramak ta edeu Jises ili mine iri lau ndra-in, iy i tanan ta iri atehei maha-an i la-u Jises, iy tubuni budon tan, ma iy kuhi luk silba bororoh ma tonoh (30) iu ili hamon ili mine tinan tiri pris ma tinan tiri lau.
4 Iy anya, “Jo ndrabwidi kandriyen ndra-in. Ndramak jo atehei ewek mine ado badeh, babwidi ari kandriyen ndra-in bwe, ya ado kameh adai iy imek.”
Oro asumon bohon i buku doh, “Ari lakou taso bwe, badeh lokowam labai.”
5 Iy akahei luk nane ili andri in bolo asiu tinan ta Kindrei, ma iy sakaliye iu. Eme iy ili simidi iy.
6 Tinan tiri pris kuhi luk nane ma iy anya, “Luk dah ta sa-oh. To satehei sala hawe luk badu bolo asiu tinan ta Kindrei, ndri-iy.”
7 Oro mari atehei sahou i se, ya luk nane oro sihinei munyak ranah tiri lau ta amekes kun na ndren, ya munyak doh iri a-eh iri lau badu leheleh amak ala aliy.
8 Idoh le ya iri aloh munyak doh, “Munyak ta ndra,” eme isos dah.
9 Idoh mesekei sahou ta propet nyaran Jeremaya asahan handru anya,
“Oro kuhi luk silba bororoh ma tonoh (30), kanen badeh, iri lau badu Isra-el sekesek ta akohok buku none sihinen,
10 Ya na luk nane oro sihinei munyak tiri lau ta amekes kun, buku none le Laban tiye tek.” Jeremaya 19:1-13; Sekaraya 11:12-13
Pailat ndremenya Jises
(Mak 15:2-5; Luk 23:3-5; Jon 18:33-38)
11 Jises ales udu bwena ta tinan tiri Rom, ma iy ndremenya iy anya, “Ou kabin tiri Juwis, neh?”
Jises anya, “Ou ndrasehek badeh, kabwai.”
12 Arile, iy basumon ari sahou bwe-en, kala tinan tiri pris hawe tinan tiri lau to-en sahou ili tan.
13 Eme Pailat tiye tan buku doh, “Oh anuhun iri sahou doh iri lau to-en ewek la-um kede-eh deh bwe?”
14 Arile Jises basehek ari sahou bwe, idoh mesekei tinan tiri Rom abudon solo-an labai.
Pailat anya Jises kimek ki-in kei tondreh
(Mak 15:6-15; Luk 23:13-25; Jon 18:39–19:16)
15 Jaha mari na len ta nyamon tinan, ndramak in bwena ta kon tinan ruwani ndramak ari badu bolo kou eme len. Iri lau le aloh nyaran, ya Pailat kameh aruwe iy ili mine iri.
16 Na len doh ndramak ari nyaran Barabas udu bolo kou ale tasah iy ta amekes kandriyen ta ramwes.
17 Iri lau tukumwi iri, ma Pailat ndremenya iri anya, “Aha aso-ok are lau jo karuwaniy kewek mine aha? Barabas deh Jises, iri asehek anya iy Krais, Kindrei suni iy eme.”
18 Pailat asehek buku doh, tasah iy tanan, ndrine iri ndra-in ta Jises, ma iri tiyani iy eme mada sahou.
19 Ma kala Pailat manyah udu bada koyeu tan ta anuhun sahou kahis le, udun atehei sahou eme anya, “Ou samekes ari lakou sala bada iy lau badeh, ndri-iy, tasah na ben jo ameh jo atou ndramak badeh, ya ameh doh mesekei budon tek andra-i labai.”
20 Eme iri tinan tiri pris ma oro lau tinan tiri lau sosokok iri lau solo-an dah anya, “Aha kaloh, ‘Ahi aso-ok Barabas keme mine ahi, ya ou adai Jises kimek.’ ”
21 Pailat ndremenya iri ja, “Are lau handru aha aso-ok jo karuwaniy kewek mine aha?”
Iri arah, “Barabas!”
22 Eme Pailat ndremenya iri, “Ya jo kamekes sasah ki ta Jises iri aloh Krais?”
Iri mari anya, “Katahi iy ki bada kei tondreh!”
23 Iy anya, “Buku sah handru, saba lakou ndra-in handru iy mesekei?”
Arile bwai, iri sarakau i loken le gwek anya, “Katahi iy ki bada kei tondreh!”
24 Pailat ndratanan ai, buku iri kameh winiyan banuhun sahou tan bwai, ya mirihik bahun anya kasahan. Eme iy kuhi gwa, ma iy sikine minen ereu mada iri lau mari, ma iy anya, “Ado sato-en sahou same la-uk buku none ndramak dah imek. Lokowa ado ai!”
25 Eme iri lau mari anya, “Ndrayen badeh, keme la-u ahi, ma nadu ahi!”
26 Pailat eme ruwani Barabas ili mine iri, arile iy atehei Jises ili mine iri lau ta bahun, ta iri ka-um iy na malou sakabuk i bek. Ano iy atehei Jises ili mine iri lulik ta katahi iy kili ta kei tondreh.
Iri lau ta bahun bobose Jises
(Mak 15:16-20; Jon 19:2-3)
27 Iri lau ta bahun ta Pailat kuhi Jises ili bolo asiu tinan ta atukum tiri Rom, ma iri mari tukumwi iri ame ales are madan.
28 Eme iri tarani kolau tan iu, ma atehei kolau ari saraman lawe-en ili la-un.
29 Ya oro tabuwi bada malou bobodon i se buku none barak ma atehei ili batun. Ano oro atehei bala banap ari ili minen salin; ano oro atehei bwili ndru-u oro in bwena tan ma oro bobose iy anya, “Ou kabin tiri Juwis ou, areu le buku doh len mari!”
30 Eme oro amuri iy, ano oro kuhi bala banap nane ereu mine oro ubwiy i batun.
31 Oro bobose iy ano, oro tolowei kolau saraman nane udu la-un iu, eme ma oro tani kolau tan amwenen ili hamon i badan. Ano oro sirini iy iu ili ta kadai iy ki bada kei tondreh.
Oro atahi Jises i bada kei tondreh
(Mak 15:21-32; Luk 23:26-43; Jon 19:17-27)
32 Oro adek au ala len, oro ndruni ndramak ari badu Sairini nyaran Saimon. Oro lau ta bahun andrekei iy bwese-ei kei tondreh ta Jises.
33 Oro ame asos kon iri aloh Golgata, moson ta aliy iri aloh, “Kon ta bwisi bar ta ndramak.”
34 Oro atehei waen, oro tubuni i hawe gwa ari nyakadan labai anya iy ka-un, arile Jises atona, eme iy ba-un bwai.
35 Oro atahi iy i bada kei tondreh, ano oro atehei kolau tan i andri ma oro amekes laki na aliy, ta andrei kolau tan i le winiya iri.
36 Ano oro manyah ado andri, ma oro atondrok iy.
37 Udu bwele-e batun loken, oro torowenei sahou tanan ta bobose anya, “Idah Jises, Kabin tiri Juwis.”
38 Ano oro atahi uru lau la-uh ta bahana areu mirihik ta Jises. Iy ari ereu minen salin, ya iy ari ereu minen kamweu.
39 Eme ya iri lau adek mirihik tan, nyokoda batu iri ili eme ma bobose Jises i buku doh,
40 “Ou adeh, ou mene anya ou kameh tohowei asiu tinan ta Kindrei eme andri, ano kameh ou tutuniy ja na len taloh le. Ya abo, ou sebenei ou le ai, buku none ou Nadu Kindrei, ou ame andri ta kei tondreh badeh!”
41 Oro tinan tiri pris ma iri lau ta leheya kandriyen tiri Juwis ma tinan tiri lau bobose Jises buku aliy ale.
42 Iri anya, “Iy sebenei iri lau rayah, arile iy winiyan basebenei iy amwenen bwe! Iy badeh, kabin tiri Isra-el; iy keme andri ta kei tondreh, ya eme aso kameh atehei budon taso in hamon tan.
43 Iy atehei budon tan in ta Kindrei, ma iy anya, iy badeh, Nadu Kindrei. Mwasin, aso anya katou iy kasebenei iy amwenen na dah
44 Uru lau mala-uh nane sukik areu hawen ale asehek sahou ndra-in i tan ale.
Jises imek
(Mak 15:33-41; Luk 23:44-49; Jon 19:28-30)
45 Na mada an udu le alih, lulik tubuluhi kon marakon udu gwek winiya mada an i taloh na beyeh.
46 Mada an ili taloh na beyeh, Jises arah boto-on labai anya,
“Eli, Eli, lama sabaktani?”
moson ta aliy i buku doh,
“Kindrei tek, Kindrei tek, buku sah handru ya ou ruwani jo?” Wari 22:1
47 Eme iri lau ra-on areu mirihik anuhun sahou tan ma anya, “Iy kede-eh aloh Alaija!”
48 Eme ma, suwi handru oro ari toro sakaliye ili kuhi konyei ari, tolomwani i bolo waen titi-in, ma atehei ili no-o banap ma atehei ili bohon ta iy ka-un.
49 Arile oro ra-on anya, “Kareu op, to kanyolom, idah kameh Alaija eme aseben iy deh bwe.”
50 Eme Jises arah tinan labai ja, ano iy ruwani kohan ma iy imek.
51 Kala doh amwenen kolau tinan badu bolo asiu tinan ta Kindrei atarah i ma lusi ereu loken eme andri. Munyak totoreh ma iri bek asak, i ma lusi.
52 Ma lek tiri lau mwasin ndramak bwena asak, ma iri lau mwasin ta Kindrei amak ame loken.
53 Iri ruwani lek tiri. Hamon ta Jises amak eme loken, iri ala bolo kon tinan Jerusalem, ma iri lau solo-an atou iri.
54 Iri lau ta bahun ma tinan tiri nane atondrok Jises nane atou kon totoreh ma iri lakou mari nane asahan, oro anoh labai ma oro anya, “Handru labai, iy kede-eh Nadu Kindrei handru!”
55 Iri badih solo-an ale ales areu len anyolom le, iri mene areu hamon tan adek loboho Galili ame ta aseben iy.
56 Ereu ndrokowa iri badeh, Mariya badu Makdala ma hawe Mariya ari ja tine Jemis uru Josep ma hawe udu Sebedi ale.
Oro atehei Jises ili munu bek ari
(Mak 15:42-47; Luk 23:50-55; Jon 19:38-42)
57 Kon abeyeh, ndramak ari nadu batun, tan luk solo-an badu Arimateya asahan, nyaran Josep. Iy badeh, ndramak ari ale badu hamon ta Jises.
58 Iy ili atou Pailat ta ndremenya bada kei, ma Pailat atehei sahou ta oro katehei bada kei kili mine Josep.
59 Eme Josep kuhi bada kei eme andri, ma su-i iy na kolau ari ha-un,
60 ma atehei iy ili bolo lek tan ma ha-un le iy ihiy in bolo munu bek. Ano iy tundruwi bek ari laba tinan ili turuki madan ano iy iu ai.
61 Mariya badu Makdala hawe Mariya ari ja uru ale manyah anyolom ili boho lek nane.
Oro lau ta bahun atondrok mada lek
62 Len ta alokou iri lakou ta len ta amunyau ano, ya len ari hamon, iri tinan tiri pris ma hawe iri Parasi ala atou Pailat.
63 Oro tiye tan buku doh, “Tinan, aso bwetenei sahou ari ndramak ta wasai kede-eh mene asehek kala iy mene ereu loken kahis le, iy anya, ‘Hamon ta len taloh, jo kameh amak eme loken ja.’
64 Idoh le ya ou tiye, ya oro katondrokei mada lek nane kamwenen winiya len taloh, koro-an oro lau tan same sabwese-ei bada kei sa-au, ano oro kameh asehek tiri lau anya iy ndramak ndrame loken. Sahou wasai doh kameh ndra-in ja sakalawi wasai nane ndrasahan bwena.”
65 Pailat tiye toro anya, “Ado kakuhi iri lulik kala katondrokei lek nane, ya oro katondrokei kamwenen handru en.”
66 Eme oro ala turuki mada lek nane, ma oro lulik ales areu aliy ta atondrok.