ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤜᤠ᤹
ᤏᤡ᤺ᤛᤢᤶ
ᤁᤴ ᤛᤠᤵᤐᤴᤏᤡᤴ ᤗᤢᤁᤠ ᤔᤧᤵᤔᤏᤠᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤕᤠᤱᤛᤡᤒᤠ ᤁᤢᤜᤢ᤹ᤛᤠᤶᤒᤠᤸᤗᤧ ᤛᤠᤵᤋᤢᤒᤠᤖᤥ॥ ᤁᤴ ᤛᤠᤵᤐᤴᤏᤡᤱᤃ ᤋᤃᤡ ᤛᤠᤵᤋᤢᤒᤠ “ᤗᤢᤁᤠᤖᤧ ᤁᤢᤛᤢᤏᤠᤀᤡᤱᤅᤡᤸᤗᤧ” ᤁᤢᤈᤰᤗᤥ॥ ᤁᤴ ᤛᤠᤵᤐᤴ ᤛᤠᤵᤔᤠᤸᤗᤧᤴ ᤁᤢᤈᤧᤰ ᤏᤡᤱᤘᤠ᤹ᤛᤥ᤺ᤰᤁᤡᤱᤃ ᤀᤠᤰᤂᤣᤗ᤹ᤖᤡᤰ ᤜᤢ᤹ᤛᤠᤶᤒᤠᤜᤠ᤹ᤖᤧ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶ ᤏᤢ ᤁᤢᤗᤠᤶᤗᤥ᤺ᤔᤠᤴ ᤔᤧᤄᤥ᤺ᤛᤢ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ “ᤕᤖᤢᤛᤗᤧᤶᤔᤥ. ᤕᤜᤢᤍᤡᤕᤠ ᤏᤢ ᤛᤠᤔᤖᤡᤕᤠ ᤌᤢᤶᤔᤥ. ᤜᤧᤰᤁᤩᤠᤱ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ” ᤛᤢᤏᤠᤀᤡᤱ ᤀᤡᤱᤔᤧᤓᤥ᤺ᤛᤢ ᤁᤧᤗ᤹ᤒᤠᤴ ᤐᤥᤎᤰ ᤆᤥ᤺ᤰᤔᤠᤖᤥ (᥇.᥎)॥ ᤁᤴ ᤜᤡᤴᤍᤥ᤺ᤰᤜᤠ᤹ᤃ ᤀᤠᤰᤂᤣᤗ᤹ᤖᤡᤰ ᤂᤪᤡᤛ᤻ᤋᤠᤏᤡ ᤛᤠᤶᤕᤥ᤺ᤴ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤗᤠᤃᤡ ᤛᤠᤶᤕᤥ ᤐᤥ᤺ᤰᤂᤧ ᤁᤧᤗ᤹ᤒᤠ ᤔᤢᤴᤎᤢᤶᤗᤥ॥ ᤂᤪᤡᤛ᤻ᤋᤠᤏᤡ ᤛᤠᤶᤕᤥ ᤁᤧᤏᤠ᤺ᤵᤐᤠᤜᤠ᤹ ᤖᤥᤔᤡ ᤜᤠᤱᤈᤢᤶᤔᤥ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠ ᤔᤧ᤺ᤴᤇᤡ. ᤁᤖ ᤂᤪᤡᤛ᤻ᤋᤠᤏᤡ ᤏᤛᤠ᤺ᤴᤏᤡᤱᤃ ᤕᤜᤢᤍᤡ ᤛᤠᤶᤕᤥ᤺ᤴ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤛᤠᤶᤕᤥ ᤑᤠ᤹ᤀᤠᤱ ᤜᤧᤴᤏᤡ᤺ᤵᤐᤠᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤁᤴ ᤛᤠᤵᤐᤴᤏᤡᤴ ᤛᤠᤵᤋᤢᤒᤠᤖᤥ॥
ᤁᤴ ᤛᤠᤵᤐᤴᤏᤡᤴ ᤛᤢᤶᤛᤡ ᤗᤰᤁᤥ ᤜᤠ᤺ᤔᤠ ᤛᤢᤰᤋᤧᤳᤗᤥ–
(᥇) ᤕᤧᤛᤢ᤺ᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤣᤀᤠᤱ ᤕᤖᤢᤛᤗᤧᤶᤔᤥ ᤂᤪᤡᤛ᤻ᤋᤠᤏᤡ ᤏᤛᤠ᤺ᤴᤏᤡᤴ ᤀᤡᤱᤛᤧ᤺ᤖᤧᤒᤠ
(᥈) ᤐᤩᤠᤗᤧᤛ᤻ᤋᤠᤀᤡᤴ ᤗᤠᤈᤣ᤹ᤖᤧ ᤘᤣ᤹ ᤋᤧᤱᤃᤵ ᤜᤧᤱᤄᤠ᤺ᤳᤋᤡ ᤛᤢᤏᤠᤀᤡᤱ ᤛᤧ᤺ᤖᤧᤒᤠ
(᥉) ᤗᤢᤶᤒᤠ ᤘᤖ᤺ᤱ ᤁᤢᤕᤠᤒᤠ ᤗᤠᤈᤣ᤹. ᤜᤠᤱᤃᤵᤜᤠ᤹ ᤏᤢ ᤖᤥᤔ ᤗᤠᤈᤣ᤹ ᤌᤠᤖᤡᤰ ᤛᤢᤏᤠᤀᤡᤱ ᤛᤧ᤺ᤖᤧᤒᤠ ᤐᤥᤎᤰ॥
ᤁᤴ ᤛᤠᤵᤐᤴᤏᤥᤒᤠ ᤁᤧᤕᤧᤰᤐᤠ ᤐᤠ᤺ᤴᤏᤡᤱᤃ ᤛᤣᤛᤣᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤗᤥ॥ ᤂᤢᤏᤧ᤹ᤃ ᤐᤧᤴᤋᤡᤁᤥᤛ᤻ᤋ ᤕᤧᤴᤏᤥ ᤔᤢᤰᤛᤠᤶᤏᤢ ᤕᤖᤢᤛᤗᤧᤶᤔᤥ ᤁᤧᤘᤠ᤹ᤒᤠ ᤏᤛᤠᤏᤡᤒᤠᤜᤠ᤹ᤀᤥ ᤌᤩᤧ ᤜᤧᤰᤁᤩᤠᤱ ᤛᤣᤛᤣᤜᤢᤵᤗᤰ ᤏᤢ ᤗᤠᤶᤗᤥ᤺ᤒᤠᤜᤠ᤹ ᤁᤴ ᤛᤠᤵᤐᤴᤏᤥ ᤐᤥᤎᤰ ᤐᤥ᤺ᤰᤂᤧᤒᤠ ᤜᤡᤴᤍᤥ᤺ᤰᤜᤠ᤹ᤀᤥ ᤗᤠᤶᤗᤥᤛᤢᤛᤡᤖ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤁᤧᤎᤢᤶᤒᤠ ᤆᤥᤃᤢ ᤜᤧᤰᤁᤩᤠᤱ ᤜᤠᤱᤜᤠᤱ ᤔᤧᤳᤋᤢᤛᤡ᤹ᤖᤥ॥ ᤁᤴ ᤛᤠᤵᤐᤴᤏᤥ ᤛᤠᤵᤋᤧᤒᤠ ᤐᤠ᤺ᤴᤜᤠ᤹ᤖᤧ ᤏᤛᤠᤏᤡᤒᤠᤜᤠ᤹ᤖᤧ ᤜᤡᤱᤔᤴ ᤏᤢ ᤂᤢᤏᤡ᤹ ᤛᤣᤛᤣ ᤆᤢᤶᤗᤢᤱᤅᤥ ᤛᤢᤏᤠᤀᤡᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤥᤎᤰ ᤆᤥᤃᤢ᤹ᤖᤥ॥
ᤌᤠᤔᤡᤱ
ᤋᤥ᤺ᤴᤍᤡᤖᤧ ᤗᤠᤃᤡ ᤕᤠᤖᤡᤵ ᥇.᥇-᥈᥌
ᤕᤧᤛᤢᤖᤧ ᤀᤣᤃᤠᤱᤒᤠ ᤁᤢᤀᤡᤱᤈᤠ᤺ᤱ ᤏᤢ ᤁᤢᤔᤠᤱᤜᤢᤵ ᥇.᥇–᥇᥊
ᤕᤜᤢᤍᤠᤖᤧ ᤁᤢᤗᤧᤰᤘᤠᤀᤥ ᤛᤣ᤺ᤰᤕᤢᤰ ᥇.᥇᥋–᥈᥌
ᤕᤖᤢᤛᤗᤧᤶᤔᤥ ᤋᤥ᤺ᤴᤍᤡ ᥈.᥇-᥎.᥉
ᤕᤜᤢᤍᤡᤕᤠ ᤏᤢ ᤛᤠᤔᤖᤡᤕᤠᤀᤥ ᤋᤥ᤺ᤴᤍᤡ ᥎.᥊-᥇᥈.᥈᥋
ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤋᤥ᤺ᤴᤍᤡ ᥇᥉.᥇-᥈᥎.᥉᥇
ᤐᤠᤘᤗᤖᤧ ᤆᤥᤃᤢᤒᤠ ᤌᤡᤰᤛᤡᤃᤣ᤺ᤰᤐᤠ ᤀᤡᤱᤓᤴ ᥇᥉.᥇–᥇᥊.᥈᥎
ᤕᤖᤢᤛᤗᤧᤶᤔᤥ ᤁᤧᤒᤥ᤺ᤱᤒᤠ ᤆᤢᤶᤗᤢᤱ ᥇᥋.᥇–᥉᥋
ᤐᤠᤘᤗᤖᤧ ᤆᤥᤃᤢᤒᤠ ᤏᤡᤛᤡᤃᤣ᤺ᤰᤐᤠ ᤀᤡᤱᤓᤴ ᥇᥋.᥉᥌–᥇᥎.᥈᥈
ᤐᤠᤘᤗᤖᤧ ᤆᤥᤃᤢᤒᤠ ᤛᤢᤶᤛᤡᤃᤣ᤺ᤰᤐᤠ ᤀᤡᤱᤓᤴ ᥇᥎.᥈᥉–᥈᥇.᥇᥌
ᤕᤖᤢᤛᤗᤧᤔ. ᤁᤤᤛᤖᤡᤕᤠ ᤏᤢ ᤖᤥᤶᤔᤥ ᤐᤠᤘᤗᤧᤴ ᤛᤠᤰᤐᤠ ᤌᤠᤒᤠ ᥈᥇.᥇᥍–᥈᥎.᥉᥇
1
ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤒᤠ ᤛᤣᤛᤣᤔᤠᤱ
1-2 ᤀᤠᤔᤡ᤺ᤶ ᤌᤡᤕᤥᤑᤡᤗᤛᤣ. ᤀᤡᤱᤃᤠ᤹ ᤋᤃᤡᤒᤠ ᤀᤠᤛᤠᤵᤐᤴᤏᤥ ᤕᤧᤛᤢᤖᤣ ᤀᤡᤱᤈᤠ᤺ᤱ ᤐᤡᤖᤢᤛᤡᤀᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤔᤧᤴᤍᤣ᤹ᤀᤣ ᤌᤠᤖᤡᤰ ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤏᤢ ᤜᤢ᤹ᤖᤢᤛᤡᤒᤠ ᤁᤠᤰ ᤐᤠ᤺ᤴᤜᤠ᤹ ᤛᤠᤵᤋᤢᤱ ᤐᤡᤏᤧᤀᤠᤱ ᤐᤳᤗᤥ॥
3 ᤕᤧᤛᤢ᤺ᤴ ᤋᤢᤰᤂᤣ ᤆᤩᤧᤀᤠᤱ ᤛᤩᤧ. ᤜᤧᤰᤁᤩᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤀᤠᤱ ᤗᤡᤒᤥ᤺ᤱ (᥊᥆) ᤕᤧᤴ ᤌᤠᤖᤡᤰ ᤂᤢᤏᤧ᤹ ᤛᤧᤰᤂᤠᤀᤣ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤰᤛᤡᤱᤔᤠ ᤑᤠ᤹ᤀᤠᤱ ᤀᤧᤳᤗᤧᤱ ᤀᤥᤛᤣ᤺ᤴᤎᤠᤰᤛᤡᤱ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤆᤧᤰᤋᤢᤛᤡᤖᤥ॥
4 ᤌᤡᤰᤗᤧᤱ ᤂᤢᤏᤧ᤹ ᤂᤧᤱᤜᤠ᤹ᤏᤢ ᤆᤖ ᤕᤢᤅᤧᤸᤗᤧ ᤀᤰᤂᤣ ᤔᤧᤳᤋᤢᤛᤡ. “ᤕᤖᤢᤛᤗᤧᤔ ᤗᤧᤖᤧᤶᤔᤧ᤹ᤀᤠᤱ ᤀᤠᤸᤗᤥᤛᤠ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤛᤣᤛᤣᤔᤠᤱ ᤐᤡᤏᤡᤱ ᤗ᤹ᤖᤡᤰ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤜᤠᤱᤄᤧᤶᤔᤧ᤹॥ ᤁᤱᤃ ᤋᤃᤡ ᤔᤧᤳᤏᤡᤱᤒᤠ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
5 ᤕᤢᤜᤢᤴᤏᤠᤖᤧᤃ ᤆᤫᤠ᤺ᤳᤋᤡᤸᤗᤧ ᤒᤵᤋᤡᤛ᤻ᤔᤠ ᤁᤧᤒᤡᤖᤡ. ᤁᤖ ᤁᤢᤓᤠ ᤕᤧᤴ ᤀᤣᤃᤠᤱ ᤛᤣᤛᤣᤔᤠᤱᤗᤠᤶ ᤒᤵᤋᤡᤛ᤻ᤔᤠ ᤁᤧᤒᤥ᤺ᤰᤂᤡ᤹ᤖᤥ॥”
ᤕᤧᤛᤢ᤺ᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤋᤣ᤹
ᤔᤳᤋᤡ ᥇᥌.᥇᥏-᥈᥆. ᤗᤢᤁᤠ ᥈᥊.᥋᥆-᥋᥉
6 ᤌᤡᤰᤕᤧᤴ ᤂᤧᤱᤜᤠ᤹ᤖᤧ ᤂᤢᤏᤧ᤹ᤏᤢ ᤛᤥᤖᤡᤰ ᤔᤧᤘᤕᤧᤸᤗᤧ ᤔᤧᤔᤧᤳᤋᤢ “ᤀᤠᤍᤠᤱᤒᤣ. ᤒᤠ ᤁᤴ ᤕᤧᤶᤔᤥᤀᤣ ᤀᤡᤛᤪᤠᤀᤡᤗᤡᤜᤠ᤹ ᤆᤥ᤺ᤰᤕᤢᤶᤓᤥ ᤁᤧᤒᤡᤖᤢᤛᤡᤀᤠᤱ ᤀᤠᤏᤡ᤹ ᤜᤠᤱᤈᤢᤶᤔᤡᤴ ᤕᤠᤶᤔᤥ ᤁᤧᤈᤥᤃᤢ᤹ᤒᤡ᥅”
7 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤵᤑᤠᤸᤗᤧ ᤁᤴ ᤐᤠ᤺ᤴᤜᤠ᤹ ᤁᤧᤳ ᤁᤧᤗ᤹ᤒᤠᤴ ᤏᤡ᤺ᤔᤠ ᤌᤠ᤺ᤔᤠ ᤂᤡᤏᤡ᤹ ᤕᤠ᤺ᤶᤒᤰ ᤔᤧ᤺ᤴᤗᤥ॥ ᤂᤧᤱᤃ ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤠᤒᤠᤅᤣ ᤁᤢᤏᤡᤱᤘᤠ᤹ᤀᤥ ᤏᤡ᤺ᤴᤎᤥ ᤆᤥᤃᤢ᤹ᤖᤥ॥
8 ᤁᤖ ᤂᤡᤏᤡ᤹ ᤌᤧᤔᤠ ᤏᤡᤱᤘᤠ᤹ ᤂᤥ᤺ᤔᤠ ᤐᤥ᤺ᤱ ᤑᤠ᤹ᤗᤧ ᤛᤣᤛᤣᤔᤠᤱᤅᤡᤴ ᤂᤡᤏᤡ᤹ᤀᤥ ᤋᤠ᤺ᤸᤗᤧ ᤔᤢᤰᤛᤠᤶ ᤁᤧᤄᤥ᤺ᤛᤢᤶᤔᤠᤱ ᤂᤡᤏᤡ᤹ ᤕᤖᤢᤛᤗᤧᤶᤔᤥ. ᤕᤜᤢᤍᤡᤕᤠ ᤏᤢ ᤛᤠᤔᤖᤡᤕᤠ ᤌᤢᤶᤔᤥ ᤜᤧᤰᤁᤩᤠᤱ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤠᤖᤠᤰ ᤀᤡᤱᤃᤠ᤹ ᤀᤠᤍᤥ᤺ᤴᤍᤡ ᤁᤧᤒᤥ᤺ᤰᤂᤡ᤹ᤖᤥ॥”
9 ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢ ᤛᤢᤖᤢᤀᤠᤱ ᤂᤢᤏᤧ᤹ ᤀᤥᤔᤧᤔᤧᤳᤋᤢᤖ ᤔᤧᤒᤳᤇᤧᤸᤗᤧᤀᤣ ᤌᤠ᤺ᤱᤎᤠ᤺ᤱ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤐᤰᤂᤧᤖ ᤂᤠᤵᤔᤡ᤺ᤳᤋᤡᤸᤗᤧ ᤀᤡ᤺ᤵᤋᤢ ᤋᤣ᤹ᤖᤢᤖᤥ॥
10 ᤂᤧᤱᤜᤠ᤹ᤖᤧ ᤋᤠᤱᤛᤠᤰᤐᤥ ᤂᤢᤏᤧ᤹ ᤐᤱᤛᤡᤱᤒᤠ ᤀᤥᤔᤧᤔᤧᤳᤋᤢᤖ ᤔᤧᤕᤧᤒᤧᤸᤗᤧ ᤑ᤺ᤃᤧᤗ᤹ᤒᤠ ᤋᤣ᤺ᤳ ᤁᤧᤈᤠᤱᤒᤠ ᤏᤧᤵᤑᤢ ᤔᤠᤱᤗᤠᤀᤡᤱᤒᤠᤜᤠ᤹ ᤜᤰᤆᤄᤳ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤣᤛᤠᤱ ᤕᤧᤶᤏᤧᤳᤇᤡᤀᤠᤱ
11 ᤐᤠᤖᤧᤳᤇᤡ. “ᤃᤠᤗᤡᤗᤒᤠ ᤔᤏᤠᤛᤣ. ᤌᤣᤀᤠᤱ ᤋᤠᤱᤛᤠᤰᤐᤥ ᤀᤥᤃᤧᤔᤧᤳᤋᤢᤶᤒᤠᤒᤣ᥅ ᤕᤧᤛᤢ᤺ᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤥᤎᤥ ᤐᤱᤛᤡᤱ ᤐᤣᤒᤠ ᤜᤧᤰᤁᤣᤀᤣ ᤂᤢᤏᤧ᤹ ᤌᤡᤰᤕᤧᤴ ᤕᤠᤶᤔᤥ ᤕᤢ᤺ᤖᤥ॥”
ᤕᤜᤢᤍᤠ᤺ᤸᤗᤧ ᤁᤢᤗᤧᤰᤘᤠ ᤔᤏᤠᤎᤡᤰ ᤔᤧᤛᤣᤃᤢ᤹
ᤔᤳᤋᤡ ᥈᥍.᥉-᥇᥆
12 ᤜᤧᤰᤁᤩᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤈᤤᤋᤢᤏ ᤔᤧᤵᤔᤏᤠᤒᤠ ᤁᤥ᤺ᤰᤔᤠᤗᤠᤶ ᤕᤖᤢᤛᤗᤧᤔ ᤔᤧᤏᤢ᤺ᤰᤂᤧ॥ ᤂᤧᤴ ᤕᤖᤢᤛᤗᤧᤔᤗᤠᤶ ᤁᤡᤗᤥᤔᤡᤋᤖᤎᤡᤰ ᤔᤠ᤺ᤱᤗᤥ॥
13 ᤕᤧᤰᤕᤰᤁᤥ ᤔᤧᤗᤠ᤺ᤛᤧᤀᤠᤱ ᤂᤧᤱᤜᤠ᤹ ᤔᤧᤕᤠᤃᤧᤒᤠ ᤌᤠ᤺ᤱᤛ᤻ᤔᤠ ᤕᤠᤰᤑᤠᤀᤥ ᤔᤧᤗᤠ᤺ᤛᤧ॥ ᤂᤧᤵᤔᤥ ᤐᤋᤪᤢᤛ. ᤕᤢᤜᤢᤴᤏᤠ. ᤕᤠᤁᤢᤒ. ᤀᤠᤴᤍᤪᤡᤕᤠᤛ. ᤑᤡᤗᤡᤐ. ᤌᤥᤔᤠ. ᤒᤠᤖᤌᤥᤗᤥᤔᤠᤀᤡ. ᤔᤳᤋᤡ. ᤀᤸᤑᤠᤕᤛᤖᤧ ᤁᤢᤛ᤻ᤛᤠ᤺ ᤕᤠᤁᤢᤒ. ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠ ᤛᤡᤔᤥᤏ ᤜᤧᤰᤁᤩᤠᤱ ᤕᤠᤁᤢᤒᤖᤧ ᤁᤢᤛ᤻ᤛᤠ᤺ ᤕᤜᤢᤍᤠ ᤔᤧᤘᤕᤧᤖᤥ॥
14 ᤂᤧᤱᤜᤠ᤹ ᤁᤠᤰ ᤛᤥᤖᤡᤰ ᤔᤧᤒᤥ᤺ᤰᤂᤧᤖ ᤆᤰᤔᤧᤸᤗ᤹ᤀᤣ ᤋᤢᤘᤠ ᤆᤥ᤺ᤰᤁᤡ ᤔᤧᤕᤠᤃᤧ॥ ᤂᤧᤱᤜᤠ᤹ᤀᤥ ᤕᤧᤛᤢᤖᤧ ᤁᤢᤶᤔᤠ ᤔᤖᤡᤕᤔ ᤏᤢ ᤘᤣ᤹ ᤔᤧᤴᤇᤢᤔᤠᤜᤠ᤹ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤴᤛᤠ᤹ᤛᤡᤀᤠᤱ ᤔᤧᤘᤕᤧᤖᤥ॥
15 ᤂᤧᤴ ᤕᤧᤶᤔᤥ ᤐᤋᤪᤢᤛᤧᤴ ᤁᤡᤵᤌᤡᤰᤁᤠᤱ ᤏᤡᤒᤥ᤺ᤱ ᤕᤠᤖᤡᤰ (᥇᥈᥆) ᤏᤛᤠᤏᤡᤒᤠ ᤗᤢᤶᤔᤥ ᤕᤧᤶᤛᤡᤱᤅᤠᤱ
16-17 ᤂᤧᤱᤜᤠ᤹ ᤔᤧᤳᤋᤢᤛᤡ. “ᤑᤢ᤹ᤏᤢᤛᤠ᤹ᤛᤣ. ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤡᤴ ᤀᤠᤏᤡ᤹ᤏᤢᤀᤣ ᤘᤕᤧ. ᤜᤧᤰᤁᤩᤠᤱ ᤁᤴ ᤔᤠᤱᤛᤣᤘᤠ ᤆᤥ᤺ᤰᤔᤠ ᤗᤰᤁᤡᤴ ᤍᤠᤱᤒᤠᤗᤠᤶ ᤂᤥ᤺ᤛᤢᤀᤠᤱ ᤘᤕᤧᤖᤥ॥ ᤁᤖ ᤂᤧᤸᤗᤧ ᤀᤰᤂᤣᤗ᤹ᤖᤡᤰ ᤕᤧᤛᤢᤖᤧ ᤁᤢᤍᤧᤶᤛᤧ ᤁᤧᤍᤠ᤺ᤒᤠᤜᤠ᤹ ᤗᤠᤶᤗᤥᤛᤢᤛᤡ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤛᤣᤛᤣᤔᤠᤱᤅᤡᤸᤗᤧ ᤋᤃᤡᤛᤠ ᤍᤠᤀᤢᤍ ᤜᤠᤱᤗᤠᤶ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤒᤠ ᤐᤠ᤺ᤴᤏᤡᤴ ᤁᤧᤵᤔᤠ ᤐᤥ᤺ᤰᤂᤧᤖᤥ॥”
18 (ᤁᤴ ᤔᤏᤠ᤺ᤸᤗᤧ ᤑᤧᤴ ᤕᤠ᤺ᤶᤒᤰᤗᤠᤶ ᤌᤃᤢᤒᤠ ᤕᤠᤱᤅᤡᤸᤗᤧ ᤐᤩᤠᤱᤛᤡᤃᤧᤴ ᤀᤡᤰᤋᤠᤵ ᤀᤡᤅᤢᤀᤠᤱ ᤘᤕᤧ॥ ᤂᤢᤏᤧ᤹ ᤂᤧᤵᤔᤥ ᤑᤥ᤺ᤴᤇᤡᤱᤅᤡᤸᤗᤧ ᤔᤰᤌᤩᤧᤀᤠᤱ ᤁᤢᤛᤠᤵᤐᤥ᤺ᤰᤁᤡᤴ ᤋᤧᤛ᤻ᤛᤧᤀᤠᤱ ᤁᤢᤜᤡᤍᤢᤳ ᤗ᤺ᤴᤍᤧᤀᤠᤱ ᤛᤩᤧ॥
19 ᤜᤧᤰᤁᤩᤠᤱ ᤕᤖᤢᤛᤗᤧᤔᤒᤠ ᤔᤏᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤄᤥ᤺ᤛᤢᤀᤠᤱ ᤂᤧᤴ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤡᤴ “ᤀᤰᤁᤣᤸᤍᤠᤔᤠ” ᤔᤡᤱ ᤔᤧᤘᤠ᤺ᤳᤋᤢᤖᤥ॥ ᤂᤧᤴ ᤑᤠ᤹ᤀᤡᤴ ᤔᤠᤰᤂᤡ᤹ ᤀᤡᤰᤋᤠᤵ ᤐᤥ᤺ᤱᤗᤥ॥)
20 ᤐᤋᤪᤢᤛᤖᤧ ᤐᤠ᤺ᤳᤋᤢ. “ᤀᤰᤂᤣᤗ᤹ᤖᤡᤰ ᤁᤴ ᤐᤠ᤺ᤴᤏᤡᤴ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳ.
‘ᤂᤧᤸᤗᤧ ᤁᤢᤜᤡᤶᤎᤠ᤺ᤱᤜᤠ᤹ ᤁᤢᤄᤠᤗᤧᤶ ᤐᤥ᤺ᤱᤗᤖᤥ॥’
ᤜᤧᤰᤁᤩᤠᤱ ‘ᤂᤧᤵᤔᤥ ᤁᤧᤕᤢᤱᤒᤠ ᤜᤠ᤺ᤳᤋᤠᤱ ᤔᤧᤜᤥ᤺ᤵᤗᤖᤥ॥’
ᤜᤧᤰᤁᤩᤠᤱ ‘ᤔᤠᤱᤛᤣᤘᤠ ᤆᤥ᤺ᤰᤔᤠ ᤁᤢᤗᤰᤁᤡᤴ ᤘᤣ᤹ ᤔᤏᤠ᤺ᤸᤗᤧ ᤂᤥ᤺ᤛᤢᤖᤖᤥ॥’
21 ᤜᤧᤰᤁᤣ᤺ᤸᤗᤧ ᤍᤠᤱᤒᤠ ᤕᤧᤛᤢ᤺ᤴᤏᤢ ᤛᤥᤖᤡᤰ ᤀᤠᤘᤕᤧᤸᤗᤧ ᤀᤠᤏᤡ᤹ᤏᤢᤀᤣ ᤁᤧᤘᤠ᤹ᤒᤠ ᤔᤏᤠ᤺ᤸᤗᤧ ᤁᤢᤗᤧᤰᤘᤠ ᤗᤳᤌᤡᤰ ᤛᤣ᤺ᤰᤔᤠᤀᤣ ᤐᤥ᤺ᤱ॥
22 ᤂᤢᤏᤧ᤹ ᤕᤢᤜᤢᤴᤏᤠᤖᤧ ᤆᤥᤃᤢᤒᤠ ᤒᤵᤋᤡᤛ᤻ᤔᤠᤀᤠᤱᤎᤥ ᤍᤠᤱᤒᤠ ᤕᤧᤛᤢ᤺ᤴ ᤀᤠᤏᤡ᤹ ᤗᤢᤶᤔᤥᤏᤢ ᤛᤠᤱᤃᤪᤠᤶᤐᤣᤍᤠᤱ ᤐᤣᤒᤠ ᤌᤠᤖᤡᤰ ᤁᤧᤏᤡ᤺ᤒᤠ ᤐᤥ᤺ᤱᤔᤠ ᤐᤥ᤺ᤱ॥ ᤂᤢᤏᤧ᤹ ᤀᤠᤏᤡ᤹ᤏᤢᤀᤣ ᤍᤠᤱᤒᤠ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤸᤗᤧᤴ ᤋᤥ᤺ᤴᤍᤡ ᤐᤥ᤺ᤱᤔᤠ ᤐᤥ᤺ᤱᤗᤥ॥”
23 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤏᤧᤵᤑᤢ ᤔᤏᤠᤜᤠ᤹ ᤔᤧᤍᤥ᤺ᤴᤍᤢᤛᤡ—ᤒᤖᤛᤠᤒᤠᤛ ᤔᤧᤵᤔᤏᤠᤒᤠ ᤕᤢᤛᤢᤑ (ᤂᤧᤸᤗᤧ ᤁᤢᤔᤡᤱᤅᤡᤴ ᤕᤢᤛ᤻ᤋᤛᤀᤠᤱ ᤘᤕᤧ) ᤜᤧᤰᤁᤩᤠᤱ ᤔᤳᤋᤡᤕᤠᤛ॥
24-25 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤋᤢᤖ ᤋᤢᤘᤠ ᤔᤧᤈᤥᤃᤢ. “ᤀᤠᤍᤠᤱᤒᤣ. ᤂᤧᤏᤧ᤹ᤃ ᤔᤧᤴᤇᤠᤶᤃᤧᤴ ᤕᤠᤵᤔᤡᤖᤧ ᤂᤢᤏᤡ᤹ ᤛᤡᤰᤗᤢᤱᤔᤥᤒᤠ ᤐᤠ᤺ᤴᤏᤡᤴ ᤁᤧᤏᤡ᤺ᤛᤢ᤹ᤖᤥ॥ ᤁᤴ ᤛᤣ᤺ᤰᤕᤢᤰᤔᤡᤒᤠ ᤔᤠᤱᤛᤣᤘᤠ ᤗᤰᤁᤡᤴ ᤆᤥ᤺ᤰᤔᤠ ᤑᤠ᤹ᤀᤠᤱ ᤕᤜᤢᤍᤠ᤺ᤸᤗᤧ ᤁᤢᤗᤧᤰᤘᤠ ᤁᤴ ᤏᤧᤵᤑᤢᤀᤥ ᤁᤧᤛᤣᤃᤢᤒᤠ ᤔᤏᤠ᤺ᤴ ᤀᤥᤛᤣ᤺ᤴᤍᤠᤱ ᤆᤥᤃᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤕᤜᤢᤍᤠ᤺ᤸᤗᤧ ᤂᤧᤴ ᤗᤧᤖᤢᤀᤠᤱ ᤗᤠ᤹ᤖᤢᤒᤠ ᤁᤢᤗᤠᤶᤔᤥ ᤐᤣᤖᤥ॥”
26 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤛᤡᤱᤈᤣ᤺ᤰ ᤔᤧᤀᤧᤰᤂᤢᤸᤗᤧ ᤂᤧᤴ ᤔᤳᤋᤡᤕᤠᤛᤖᤧ ᤁᤢᤔᤡᤱᤅᤥ ᤌᤩᤧᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤌᤡᤰ-ᤌᤡᤰ (᥇᥇) ᤛᤣ᤺ᤰᤕᤢᤰᤔᤡᤒᤠᤜᤠ᤹ᤀᤥ ᤕᤥ᤹ᤛᤡᤱᤗᤥ॥