21
ᤐᤠᤘᤗᤖᤧ ᤕᤖᤢᤛᤗᤧᤔ ᤗᤧᤵᤔᤠᤱ ᤗᤠᤶᤍᤡ᤺ᤰ ᤆᤥᤃᤢ᤹
ᤀᤠᤸᤗ ᤀᤣᤑᤡᤛᤛᤛ᤻ᤔᤠ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤛᤧᤶᤔᤢ᤹ᤀᤡ ᤐᤡᤖᤢᤛᤡᤀᤠᤱ ᤂᤧᤵᤔᤥᤏᤢ ᤘᤠᤗᤠᤎᤠᤗᤠᤶ ᤁᤥᤛ ᤘᤠᤃᤵᤂᤠᤶ ᤗᤧᤵᤔᤠᤱ ᤐᤣ᤺ᤰᤔᤏᤠ॥ ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤖᤥᤍᤥᤛ ᤔᤧᤵᤔᤏᤠᤒᤠ ᤘᤠᤃᤵᤂᤠᤶ ᤁᤧᤵᤔᤏᤠᤀᤠᤱ ᤂᤧᤵᤔᤥᤗᤠᤶ ᤐᤋᤠᤖᤠ ᤕᤧᤰᤕᤰᤁᤥ ᤋᤠ᤺ᤔᤏᤠᤖᤥ॥ ᤂᤧᤵᤔᤥ ᤛᤡᤖᤡᤕᤠᤛ᤻ᤔᤠ ᤑᤥᤏᤡᤛᤡᤕᤠ ᤋᤧᤱᤃᤵ ᤗᤧᤵᤔᤠᤱ ᤁᤧᤒᤣ᤺ᤰᤐᤠᤖ ᤁᤧᤒᤵᤐᤠ ᤘᤣ᤹ ᤘᤠᤗᤠᤎᤠᤎᤡᤰ ᤂᤥ᤺ᤔᤏᤠ. ᤜᤧᤰᤁᤩᤠᤱ ᤂᤧᤵᤔᤥ ᤗᤠ᤺ᤵᤔᤏᤠᤀᤠᤱ ᤌᤠᤛᤡᤱᤔᤏᤠᤖᤥ॥ ᤜᤧᤰᤁᤩᤠᤱ ᤛᤤᤐᤪᤛ ᤗᤠᤈᤣ᤹ᤀᤡᤴ ᤏᤡᤎᤠ᤺ᤒᤧᤀᤠᤱ ᤀᤠᤏᤡᤃᤧ ᤆᤢᤵᤛᤠᤱ ᤗᤧᤵᤔᤠᤱ ᤐᤥ᤺ᤱᤔᤏᤠᤖ ᤛᤡᤖᤡᤕᤠ ᤗᤧᤵᤔᤠᤱ ᤌᤠᤛᤡᤱᤔᤏᤠ॥ ᤘᤠᤗᤠᤎᤠ᤺ᤸᤗᤧ ᤘᤠᤃᤰᤜᤠ᤹ ᤋᤠᤕᤖ ᤕᤧᤰᤕᤰᤁᤥ ᤗ᤺ᤵᤔᤠ ᤑᤠ᤹ᤀᤠᤱ ᤂᤧᤵᤔᤥ ᤏᤠ᤺ᤶᤛᤡᤱᤗᤥ॥ ᤂᤧᤵᤔᤥ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤁᤥ᤺ᤵᤔᤏᤠᤛᤡᤀᤠᤱ ᤂᤧᤱᤜᤠ᤹ ᤋᤢᤶᤔᤏᤠᤛᤡ ᤜᤧᤰᤁᤩᤠᤱ ᤕᤧᤳᤏᤠᤶ ᤌᤠᤖᤡᤰ ᤂᤧᤱᤜᤠ᤹ᤏᤢ ᤘᤠ᤹ᤔᤏᤠ॥ ᤂᤧᤱᤜᤠ᤹ᤖᤧ ᤛᤣᤛᤣᤔᤠᤱᤗᤠᤶ ᤐᤠᤘᤗᤧᤴ ᤕᤖᤢᤛᤗᤧᤶᤔᤥ ᤔᤧᤒᤣᤃᤧᤏᤧ᤹ ᤑᤠ᤹ᤀᤠᤱ ᤔᤧᤔᤧᤳᤋᤢᤖᤥ॥ ᤁᤖ ᤂᤧᤴ ᤕᤧᤳᤏᤠᤶ ᤀᤣᤃᤠᤱ ᤂᤧᤱᤜᤠ᤹ᤏᤢ ᤛᤧ᤺ᤶᤏᤠᤀᤠᤱ ᤌᤠᤛᤡᤱᤶᤏᤠ॥ ᤁᤧᤖᤧᤰ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤂᤢᤏᤡ᤹ ᤔᤣ᤺ᤳ ᤛᤠ᤺ᤜᤠ᤹ ᤀᤠᤏᤡᤃᤧ ᤛᤠ᤺ᤛᤧ ᤕᤧᤰᤕᤰ ᤗᤠ᤺ᤰᤁᤠᤳ ᤌᤠᤖᤡᤰ ᤔᤧᤓᤧᤖᤧᤀᤠᤱ ᤀᤠᤏᤡᤃᤧ ᤛᤥᤖᤡᤰ ᤘᤠᤜᤱᤅᤡᤸᤗᤧ ᤁᤢᤕᤠᤀᤥ ᤌᤢᤱᤒᤥᤜᤈ᤹ ᤕᤢᤱᤔᤏᤠᤖ ᤋᤢᤘᤠ ᤆᤥ᤺ᤰᤔᤏᤠᤖᤥ॥ ᤛᤧᤶᤔᤢ᤹ᤀᤡ ᤆᤥ᤺ᤰᤔᤏᤠᤀᤠᤱ ᤀᤠᤏᤡᤃᤧ ᤘᤠᤗᤠᤎᤠᤀᤥ ᤗᤠᤛᤡᤃᤧᤀᤠᤱ ᤂᤧᤱᤜᤠ᤹ ᤂᤢᤏᤡ᤹ ᤜᤡᤶᤔᤥ ᤔᤧᤏᤢ᤺ᤰᤂᤧ ᤔᤧᤒᤣᤖᤥ॥
ᤀᤠᤏᤡᤃᤧ ᤋᤠᤕᤖᤏᤢ ᤘᤠᤗᤠᤶᤍᤡ᤺ᤰ ᤆᤥ᤺ᤰᤔᤏᤠᤖ ᤋᤥᤗᤣᤔᤠᤀᤡᤛ ᤁᤧᤵᤔᤏᤠ॥ ᤂᤧᤵᤔᤥ ᤏᤛᤠᤏᤡᤒᤠᤜᤠ᤹ᤏᤢ ᤛᤣᤘᤠ ᤔ᤺ᤔᤏᤠᤀᤠᤱ ᤌᤡᤰᤕᤧᤴ ᤕᤠ᤺ᤰᤔᤏᤠ॥ ᤁᤢᤍᤠ᤺ᤴᤍᤡᤰᤔᤠ ᤛᤡᤈᤖᤡ ᤁᤧᤵᤔᤏᤠᤀᤠᤱ ᤛᤢᤏᤠᤀᤡᤱᤄᤱ ᤀᤡᤱᤓᤴ ᤁᤧᤈᤥ᤺ᤰᤐᤠ ᤑᤡᤗᤡᤐᤖᤧ ᤁᤢᤜᤡᤶᤔᤥ ᤐᤣ᤺ᤰᤔᤏᤠᤖᤥ॥ ᤂᤢᤏᤧ᤹ᤀᤣ ᤕᤖᤢᤛᤗᤧᤶᤔᤥ ᤔᤣᤔᤣᤍᤢᤔᤠᤜᤠ᤹ ᤔᤠᤱᤛᤣᤘᤠ ᤕᤠ᤺ᤶᤒᤰᤁᤥ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤁᤢᤓᤠ᤹ ᤐᤡᤛᤧ ᤔᤧᤛᤣᤃᤢᤛᤡᤒᤠ ᤏᤢᤛᤡ ᤔᤏᤠᤜᤠ᤹ᤀᤥ ᤌᤡᤰ ᤘᤕᤧᤖᤥ॥ ᤂᤧᤸᤗᤧᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤔᤠ ᤗᤡᤛᤡ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤔᤠ ᤁᤢᤛ᤻ᤛᤠ᤺ᤜᤠ᤹ ᤔᤧᤘᤕᤧ॥ 10 ᤀᤠᤸᤗ ᤂᤧᤵᤔᤥ ᤘᤕᤡᤃᤧᤒᤠ ᤁᤢᤓᤠ ᤕᤧᤴ ᤀᤣᤃᤠᤱ ᤕᤜᤢᤍᤡᤕᤠᤗᤠᤶ ᤀᤃᤠᤒᤛ ᤔᤧᤵᤔᤏᤠᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤎᤡᤰ ᤋᤩᤧ॥ 11 ᤂᤧᤴ ᤀᤠᤏᤡᤃᤧ ᤘᤕᤡᤃᤧᤒᤠᤀᤥ ᤋᤩᤧᤀᤠᤱ ᤐᤠᤘᤗᤖᤧ ᤁᤢᤓ᤹ᤀᤡ᤺ᤴ ᤑᤠ᤺ᤰᤂᤢᤀᤠᤱ ᤀᤠᤒᤠᤅᤣ ᤁᤢᤗᤠᤱ ᤁᤢᤜᤢᤰᤁᤥ ᤀᤡᤄᤣ᤺ᤱᤛᤡᤱᤗ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢ. “ᤛᤣᤛᤣᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤁᤴ ᤑ᤹ᤀᤡ ᤍᤠᤱᤒᤠᤴ ᤕᤖᤢᤛᤗᤧᤶᤔᤥ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤔᤧᤍᤧᤶᤛᤢᤀᤠᤱ ᤀᤰᤂᤣᤗ᤹ᤖᤡᤰ ᤀᤡᤔᤧᤄᤣ᤺ᤰᤂᤢ. ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤜᤢᤰᤔᤧᤛᤢᤵᤋᤢ᤹॥’ ”
12 ᤜᤧᤰᤁᤩᤠᤱ ᤀᤠᤏᤡᤃᤧ ᤁᤴ ᤐᤠ᤺ᤴᤏᤡᤴ ᤂᤧᤶᤔᤏᤠᤀᤠᤱ ᤀᤠᤏᤡᤃᤧ ᤏᤢ ᤘᤣ᤹ ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤕᤖᤢᤛᤗᤧᤔ ᤔᤧᤒᤣᤃᤧᤴᤏᤧ᤹ ᤑᤠ᤹ᤀᤠᤱ ᤂᤢᤏᤧ᤹ᤏᤢ ᤆᤰᤔᤧᤸᤗ᤹ᤀᤣ ᤐᤣᤗᤡ ᤑᤠᤰᤔᤏᤠ॥ 13 ᤁᤖ ᤐᤠᤘᤗᤖᤧ ᤀᤠᤏᤡᤃᤧ ᤀᤰᤂᤣ ᤔᤧᤳᤋᤡᤃᤧ. “ᤂᤡᤏᤡ᤹ ᤌᤣᤀᤠᤱ ᤁᤧᤜᤠᤒᤡᤀᤠᤱ ᤀᤠᤛᤠ᤹ᤀᤡ ᤕᤰᤗ ᤁᤧᤕᤠ᤺ᤴᤍᤢᤶᤒᤠᤒᤣ᥅ ᤀᤡᤱᤃᤠ᤹ᤃ ᤕᤖᤢᤛᤗᤧᤶᤔᤥ ᤍᤠᤱᤒᤠ ᤕᤧᤛᤢᤖᤧ ᤁᤢᤗᤠᤃᤡ ᤛᤠᤰᤛᤡᤱᤔᤠᤖᤰ ᤔᤧ᤺ᤴ. ᤁᤖ ᤛᤡ᤺ᤔᤠ ᤐᤥ᤺ᤱᤛᤠᤱ ᤕᤠᤖᤡᤵ ᤘᤠ᤹ᤀᤠᤖᤥ॥” 14 ᤜᤧᤰᤁᤩᤠᤱ ᤀᤠᤸᤗ ᤂᤢᤏᤧ᤹ ᤁᤢᤏᤡᤱᤘᤠ᤹ ᤏᤢ᤺ᤰᤔᤠ ᤛᤢᤰᤔᤧᤍᤧᤳᤏᤧᤴᤒᤠ ᤏᤡ᤺ᤔᤏᤠᤀᤠᤱ ᤀᤰᤂᤣ ᤐᤠ᤺ᤵᤔᤏᤠ. “ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣᤀᤣ ᤐᤥ᤺ᤱᤏᤡᤖᤥ॥”
ᤐᤠᤘᤗᤧᤴ ᤕᤖᤢᤛᤗᤧᤶᤔᤥ ᤔᤧᤍᤣ᤹ᤖᤢ᤹
15 ᤂᤧᤴ ᤀᤣᤃᤠᤱ ᤕᤠᤖᤡᤵ ᤐᤥ᤺ᤱᤔᤏᤠᤀᤠᤱ ᤕᤖᤢᤛᤗᤧᤔ ᤗᤧᤵᤔᤠᤱ ᤐᤣ᤺ᤰᤔᤏᤠᤖᤥ॥ 16 ᤛᤡᤈᤖᤡᤕᤠᤗᤠᤶ ᤁᤢᤓᤠ ᤏᤛᤠᤏᤡᤒᤠᤜᤠ᤹ᤀᤠᤱ ᤀᤠᤏᤡᤃᤧᤏᤢᤀᤣ ᤔᤧᤎᤠᤛᤡᤱᤅᤠᤱ ᤛᤤᤐᤪᤛ ᤘᤠᤃᤵᤂᤠᤶᤒᤠ ᤋᤃᤡ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤏᤠᤛᤥᤏᤖᤧ ᤁᤢᤜᤡᤶᤔᤥ ᤘᤠ᤹ᤔᤠ ᤑᤠ᤹ᤀᤠᤱ ᤕᤠᤵᤔᤡ ᤋᤣ᤹ᤖᤧᤖᤥ॥
17 ᤜᤧᤰᤁᤩᤠᤱ ᤕᤖᤢᤛᤗᤧᤔ ᤁᤧᤵᤔᤏᤠ᤺ᤸᤗᤧ ᤂᤧᤵᤔᤥᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤗᤢᤱᤔᤧᤴᤍᤡᤱ ᤕᤠᤵᤔᤡ ᤗᤠᤶᤔᤧᤍᤠ᤺ᤰᤋᤡᤃᤧᤖᤥ॥ 18 ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤐᤠᤘᤗᤧᤴ ᤀᤠᤏᤡᤃᤧ ᤗᤠᤶᤗᤥ᤺ᤒᤠ ᤕᤠᤁᤢᤒᤖᤧ ᤁᤢᤜᤡᤶᤔᤥ ᤀᤠᤏᤡᤃᤧᤏᤢ ᤐᤣ॥ ᤂᤧᤵᤔᤥ ᤁᤧᤖᤧᤰ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤕᤢᤅᤧᤖᤥ॥ 19 ᤐᤠᤘᤗᤖᤧ ᤂᤧᤱᤜᤠ᤹ ᤁᤧᤖᤧᤰ ᤛᤣᤘᤠ ᤔᤧᤳᤋᤢᤛᤡᤀᤠᤱ ᤂᤢᤏᤧ᤹ ᤁᤢᤜᤢᤰᤁᤥᤗᤠᤶ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤥ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠ᤺ᤶᤒᤰ ᤆᤥᤃᤢ ᤁᤧᤗ᤹ᤒᤠ ᤁᤠᤰ ᤐᤠ᤺ᤴᤜᤠ᤹ ᤆᤧᤰᤋᤢᤛᤡᤖᤥ॥
20 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤔᤧᤄᤧᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤀᤰᤂᤣ ᤔᤧᤔᤧᤳᤋᤢ. “ᤏᤢᤛᤠ᤹ᤀᤣ. ᤀᤥᤔᤧᤳᤋᤧ᤹ᤏᤠ. ᤁᤵᤔᤥᤀᤠᤱ ᤕᤖᤡᤰ ᤜᤧᤴᤇᤡᤱ ᤕᤜᤢᤍᤡᤜᤠ᤹ᤖᤧ ᤕᤧᤛᤢ᤺ᤴ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤂᤢᤏᤡ᤹ ᤛᤡᤰ ᤁᤧᤛᤶᤒᤠ ᤔᤧᤈᤥ᤺ᤰ॥
21 ᤌᤡᤶᤔᤧᤴᤍᤱ ᤛᤢᤘᤠᤱᤗᤢᤶᤔᤥ ᤁᤧᤕᤢᤱᤒᤠ ᤕᤜᤢᤍᤡᤜᤠ᤹ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶᤔᤡᤴ ᤗᤧᤵᤔᤠᤍᤣ᤺ᤔᤠ ᤜᤧᤰᤁᤩᤠᤱ ᤂᤢᤏᤡ᤹ ᤕᤧᤶᤒᤡᤳᤇᤠ᤹ᤛᤠ᤺ᤜᤠ᤹ᤀᤠᤱ ᤜᤷᤍᤥ ᤜᤧᤰᤔᤠ ᤐᤡᤔᤠᤛᤡ ᤔᤧ᤺ᤴ. ᤜᤧᤰᤁᤩᤠᤱ ᤀᤠᤏᤡ᤹ ᤕᤜᤢᤍᤡ ᤛᤠᤶᤕᤥᤌᤡᤶᤔᤠᤱ ᤏᤠ᤺ᤵᤔᤠ ᤔᤧ᤺ᤴ ᤗ᤹ᤖᤡᤰ ᤁᤧᤜᤢ᤹ᤖᤢᤛᤡᤖᤥ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤔᤧᤘᤠ᤹ᤖᤥ॥ 22 ᤂᤧᤏᤧ᤹ ᤁᤵᤔᤥ ᤁᤧᤍᤩᤧᤀᤠᤱ ᤁᤧᤘᤠ᤹ᤒᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤛᤧᤰᤂᤠᤛᤠᤱ ᤔᤧᤄᤧᤵᤛᤢ᤹॥ ᤀᤠᤸᤗ ᤌᤣ ᤆᤥ᤺ᤰᤔᤠᤒᤣ᥅
23 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤧ ᤛᤢᤈᤠ ᤐᤡᤀᤠᤛᤡᤃᤧᤒᤠ ᤁᤢᤀᤡᤛᤡ᤺ᤰᤁᤣ ᤂᤧᤏᤧ᤹ ᤆᤥᤃᤧ᤹ᤀᤥ॥ ᤁᤵᤔᤥ ᤀᤠᤏᤡᤃᤧᤏᤢ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤠᤱᤃᤧᤜᤧᤰᤛᤡᤱᤒᤠ ᤗᤡᤛᤡ ᤑᤢ᤹ᤏᤢᤛᤠ᤹ᤜᤠ᤹ ᤔᤧᤘᤠ᤹ᤖᤥ॥ 24 ᤂᤧᤏᤧ᤹ᤀᤠᤱ ᤁᤱᤜᤠ᤹ ᤔᤠᤱᤜᤡᤶᤔᤥ ᤋᤣ᤹ᤖᤧᤛᤧ᤹ᤀᤠᤱ ᤂᤧᤱᤜᤠ᤹ᤏᤢᤀᤣ ᤛᤥᤖᤡᤰ ᤛᤣᤛᤣ ᤐᤥ᤺ᤰᤂᤧ᤹ᤀᤥ॥ ᤂᤧᤱᤜᤠ᤹ᤖᤧ ᤛᤡᤍᤢᤱᤈᤓᤠ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤴ ᤌᤡᤶᤔᤥ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤆᤡᤃ᤺ᤰᤘᤠᤜᤠ᤹ ᤂᤧᤏᤧ᤹ ᤁᤣ᤺ᤳᤋᤧ ᤐᤡᤖᤧᤛᤧ᤹ᤀᤥ॥ ᤂᤧᤱᤜᤠ᤹ᤖᤧ ᤔᤠᤱᤜᤧᤰᤛᤡᤱᤔᤠᤴ ᤁᤧᤖᤧᤖᤥ ᤁᤧᤗ᤹ᤒᤠ ᤀᤥᤛᤣ᤺ᤴᤎᤠᤰᤛᤧ ᤂᤢᤏᤡ᤹ ᤌᤧᤃᤣ᤺ᤰᤁᤡᤴ ᤜᤠᤖᤠ᤹ ᤔᤧᤏ᤺ᤰᤂᤢᤏᤡᤖᤥ॥ ᤀᤰᤂᤣᤗ᤹ᤖᤡᤰ ᤂᤧᤏᤧ᤹ ᤛᤠᤶᤕᤥᤌᤡᤶᤔᤡᤴ ᤁᤧᤏᤠ᤺ᤳᤋᤢᤒᤠ ᤁᤧᤀᤡ᤺ᤳᤋᤢᤒᤠ ᤕᤜᤢᤍᤡᤜᤠ᤹ᤖᤧ ᤔᤧᤏᤡ᤺ᤛᤢᤀᤠᤱ ᤁᤧᤕᤠ᤺ᤶᤒᤣᤀᤥ ᤔᤧᤄᤧᤵᤛᤢᤒᤠ ᤐᤠ᤺ᤴᤏᤡᤴ ᤛᤧᤰᤂᤠ ᤔᤧ᤺ᤴᤗᤧᤇ ᤑᤠ᤹ᤀᤠᤱ ᤁᤧᤖᤧᤰᤗᤧ ᤏᤡᤱᤘᤠ᤹ ᤔᤧᤄᤥ᤺ᤛᤢᤖᤥ॥ 25 ᤁᤖ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧᤃ. ᤜᤠᤖᤠ᤹ ᤏᤠᤘᤠᤀᤡᤳᤗᤠᤀᤥ ᤛᤡᤍᤢᤱᤈᤓᤠ ᤆᤥ᤺ᤰᤔᤏᤠᤒᤠ ᤆᤠ᤺ᤴ ᤔᤧᤴᤈ᤺ᤏᤧᤴᤗ. ᤛᤠᤔᤠᤰᤂᤡ᤹ ᤏᤢ ᤁᤢᤛᤡᤳᤗᤠ ᤕ᤹ᤔᤏᤠ ᤛᤧᤵᤔᤏᤠᤒᤠ ᤛᤠ ᤆᤠᤔᤠ ᤔᤧᤏᤢ᤹ᤏᤧᤴᤗᤥ. ᤜᤧᤰᤁᤩᤠᤱ ᤆᤠᤖᤠᤶᤔᤥᤗᤠᤶ ᤀᤣ᤺ᤰ ᤔᤧᤘᤠ᤹ᤏᤡᤖᤥ ᤁᤧᤗ᤹ᤒᤠ ᤀᤠᤏᤡᤃᤧ ᤏᤡ᤺ᤴᤎᤥ ᤐᤠ᤺ᤴᤜᤠ᤹ ᤛᤰᤀᤡᤱᤄᤱᤅᤥ ᤛᤠᤵᤋᤢᤶᤒᤧᤀᤠᤱ ᤐᤳᤗᤥ॥”
ᤐᤠᤘᤗᤧᤴ ᤔᤧᤍᤧᤶᤛᤢ᤹
26 ᤜᤧᤰᤁᤣᤗ᤹ᤖᤡᤰ ᤐᤠᤘᤗᤧᤴ ᤋᤧᤴᤍᤧᤀᤠᤱ ᤁᤢᤍᤠ᤺ᤴᤍᤡᤰᤔᤠ ᤂᤧᤴ ᤗᤡᤛᤡ ᤔᤏᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤕᤜᤢᤍᤡ ᤌᤡᤶ ᤁᤢᤀᤡᤛᤡ᤺ᤰ ᤛᤢᤳᤌᤥ ᤆᤥ᤺ᤰᤛᤡᤱ॥ ᤜᤧᤰᤁᤩᤠᤱ ᤛᤣᤛᤣ ᤐᤥ᤺ᤱᤔᤠ ᤕᤧᤴᤏᤡᤴ ᤀᤠᤵᤑᤠᤸᤗᤧ ᤆᤢ᤺ᤳᤋᤠᤱ ᤁᤠᤰᤗᤧ ᤗᤠᤃᤡ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤐᤥ᤺ᤱ ᤁᤧᤗ᤹ᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤀᤡᤱᤄᤱ ᤐᤡᤛᤧ ᤂᤢᤏᤧ᤹ ᤔᤠᤱᤜᤡᤶ ᤛᤡᤃᤠᤱ ᤗᤠ᤺ᤛᤧᤖᤥ॥
27 ᤛᤣᤛᤣ ᤆᤥ᤺ᤰᤛᤡᤱᤔᤠ ᤏᤢᤛᤡᤃᤣ᤺ᤰᤛᤔᤠ ᤕᤧᤴ ᤁᤧᤵᤔᤠ ᤀᤡ᤺ᤳᤋᤧᤀᤠᤱ ᤘᤕᤧᤸᤗᤧ ᤁᤢᤓᤠ ᤀᤣᤛᤡᤕᤠᤛ᤻ᤔᤠ ᤕᤜᤢᤍᤡᤜᤠ᤹ᤖᤧ ᤐᤠᤘᤗᤧᤴ ᤔᤠᤱᤜᤡᤶ ᤛᤡᤃᤠᤱ ᤔᤧᤏᤡ᤺ᤛᤢᤀᤠᤱ ᤔᤏᤠᤜᤠ᤹ ᤔᤧᤜᤢᤛᤢᤛᤡᤖ ᤂᤢᤏᤧ᤹ ᤔᤧᤍᤧᤶᤛᤢᤖᤥ॥ 28-29 ᤂᤧᤱᤜᤠ᤹ᤖᤧ ᤀᤣᤑᤡᤛᤛᤀᤥ ᤒᤠ ᤋᤪᤥᤑᤡᤔᤛ ᤔᤧᤵᤔᤏᤠᤒᤠ ᤔᤏᤠ᤺ᤴ ᤕᤧᤰᤕᤰᤁᤥ ᤂᤢᤏᤧ᤹ᤏᤢ ᤋᤠᤰᤁᤴᤏᤡ ᤘᤕᤧᤒᤠ ᤔᤧᤏᤡ᤺ᤛᤢᤀᤠᤱ ᤒᤠ ᤂᤧᤴᤏᤣ ᤐᤠᤘᤗᤖᤧ ᤕᤜᤢᤍᤡ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤍᤰᤗᤧᤱᤅᤥ ᤔᤠᤱᤜᤡᤶ ᤛᤡᤃᤠᤱ ᤁᤣ᤺ᤳᤋᤢᤒᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤀᤡ᤺ᤳᤋᤢᤀᤠᤱ ᤂᤧᤱᤜᤠ᤹ ᤀᤡᤛᤪᤠᤀᤡᤗᤡᤛᤣ. ᤕᤠᤵᤔᤡ ᤁᤢᤓᤠ᤹ ᤀᤠᤒᤡᤖᤧᤶᤔᤧ᤹ᤀᤥ᥄ ᤁᤴ ᤔᤏᤠ᤺ᤸᤗᤧ ᤀᤠᤳᤋᤠᤴᤇᤠᤱ ᤀᤠᤏᤡ᤹ ᤛᤢᤘᤠᤱᤜᤠ᤹ ᤏᤢ ᤀᤠᤏᤡ᤹ ᤕᤜᤢᤍᤡ ᤛᤠᤶᤕᤥᤌᤡᤶ ᤜᤧᤰᤁᤩᤠᤱ ᤁᤴ ᤔᤠᤱᤜᤡᤶ ᤋᤰᤗᤧᤱᤘᤠᤀᤥ ᤔᤏᤠᤜᤠ᤹ ᤏᤡᤛᤠᤶ ᤜᤢ᤹ᤖᤢᤛᤡᤖ ᤘᤠ᤹ᤖᤥ॥ ᤁᤶᤔᤩᤠᤰᤗᤰ ᤔᤧ᤺ᤴᤗᤥ. ᤁᤸᤗᤧᤃ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤠᤱ ᤔᤠᤱᤜᤡᤶ ᤛᤡᤃᤠᤱ ᤋᤠᤖᤢᤛᤡᤀᤠᤱ ᤁᤴ ᤛᤣᤛᤣ ᤋᤧᤴᤏᤡᤴᤏᤣ ᤆᤡ᤺ᤴᤍᤢᤖᤥ ᤗ᤹ᤖᤡᤰ ᤀ᤺ᤰᤔᤠ ᤔᤧᤜᤣ᤺ᤰᤋᤧᤖᤥ॥
30 ᤜᤧᤰᤁᤩᤠᤱ ᤕᤧᤰᤕᤰᤁᤥ ᤛᤡᤍᤠᤰ ᤜᤕᤱᤁᤡᤸᤗᤡᤱ ᤐᤥ᤺ᤰᤂᤧᤀᤠᤱ ᤁᤠᤰ ᤐᤡᤛᤠᤱᤗᤠᤶ ᤔᤏᤠᤜᤠ᤹ ᤔᤧᤗᤥ᤺ᤰᤋᤧᤖ ᤔᤧᤍᤩᤧᤖᤥ॥ ᤂᤧᤱᤜᤠ᤹ᤖᤧ ᤐᤠᤘᤗᤧᤴ ᤔᤧᤍᤧᤶᤛᤢᤀᤠᤱ ᤔᤠᤱᤜᤡᤶᤗᤠᤶ ᤗᤠ᤺ᤰᤁᤠᤳ ᤔᤧᤀᤢ᤺ᤰᤂᤢᤖ ᤔᤧᤗ᤺ᤳᤋᤢᤀᤠᤱ ᤂᤡᤔᤥ ᤔᤠᤱᤜᤡᤶᤗᤧᤴ ᤗᤠᤶᤎᤣ᤺ᤵᤜᤠ᤹ ᤔᤧᤛᤢᤒᤢᤖᤥ॥* 31 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤧᤵᤔᤠ ᤔᤧᤃᤥ᤺ᤳᤋᤢᤸᤗᤧ ᤕᤖᤢᤛᤗᤧᤶᤔᤥ ᤜᤕᤱᤁᤡᤸᤗᤡᤱ ᤁᤧᤒᤥ᤺ᤱᤒᤠᤖ ᤁᤧᤒᤵᤐᤠ ᤀᤡᤱᤄᤱᤅᤡᤴ ᤖᤥᤔᤡ ᤋᤢᤖᤠᤛ᤻ᤔᤠ ᤌᤰᤋᤢᤶᤒᤠᤸᤗᤧ ᤁᤢᤏᤧᤰᤂᤥ᤹ᤀᤥ ᤋᤥ᤺ᤰᤋᤧ॥ 32 ᤂᤡᤔᤥ ᤂᤧᤴ ᤌᤰᤋᤢᤶᤒᤠᤸᤗᤧ ᤁᤢᤓᤠ ᤋᤢᤶᤌᤰᤛᤢᤒᤠᤜᤠ᤹ ᤏᤢ ᤌᤰᤛᤢᤒᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤔᤏᤠᤜᤠ᤹ ᤔᤧᤘᤕᤧᤒᤠ ᤋᤧᤴᤏᤥ ᤗᤥ᤺ᤰᤋᤧᤖ ᤁᤧᤖᤧ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤏᤡ᤺ᤛᤢᤛᤡᤀᤠᤱ ᤐᤠᤘᤗᤧᤴ ᤜᤡᤵᤔᤠ ᤔᤧᤗᤧᤖᤢᤖᤥ॥
33 ᤂᤧᤴ ᤌᤰᤋᤢᤶᤒᤧᤴ ᤐᤣᤀᤠᤱ ᤐᤠᤘᤗᤧᤴ ᤋᤧᤶᤛᤢᤀᤠᤱ ᤏᤧᤳᤇᤡ ᤑᤧᤴᤛᤡᤰᤂᤡᤜᤠ᤹ᤖᤧ ᤀᤡᤄᤣ᤺ᤱᤔᤠ ᤐᤠᤱᤄᤢᤛᤡ॥ ᤜᤧᤰᤁᤩᤠᤱ ᤂᤧᤸᤗᤧ ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤁᤴ ᤔᤏᤠ᤺ᤴ ᤜᤠ᤺ᤳᤏᤡᤒᤣ᥅ ᤜᤧᤰᤁᤩᤠᤱ ᤁᤸᤗᤧ ᤌᤣ ᤆᤥᤃᤢᤀᤠᤱ ᤘᤠ᤹᥅” 34 ᤂᤧᤴ ᤔᤏᤠᤜᤠ᤹ᤀᤥ ᤁᤢᤓᤠᤖᤧ ᤌᤡᤰ ᤐᤠ᤺ᤴ ᤔᤧᤒᤠ᤺ᤳᤋᤢ ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧ ᤘᤣ᤹ ᤐᤠ᤺ᤴ ᤔᤧᤒᤠ᤺ᤳᤋᤢᤖ ᤔᤧᤀ᤺ᤰᤋᤧ॥ ᤁᤴ ᤌᤣ ᤐᤥ᤺ᤰᤂᤧᤒᤠ ᤑᤠ᤹ᤀᤠᤱ ᤂᤧᤴ ᤌᤰᤋᤢᤶᤒᤧᤸᤗᤧ ᤛᤧᤰᤂᤠ ᤐᤠ᤺ᤴ ᤌᤣᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤔᤧᤛᤢᤰᤋᤢᤴᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤁᤢᤔᤏᤠᤜᤠ᤹ ᤐᤠᤘᤗᤧᤴ ᤌᤰᤛᤢᤒᤠ ᤕᤰᤁᤥ ᤌᤠ᤺ᤱ ᤋᤣ᤹ᤔᤠ ᤐᤠᤱᤄᤢᤛᤡᤖᤥ॥ 35 ᤜᤧᤰᤁᤩᤠᤱ ᤂᤧᤱᤜᤠ᤹ ᤌᤖᤣ᤹ᤀᤡᤴ ᤔᤧᤗᤡᤅᤢᤖ ᤔᤧᤒᤳᤇᤧᤸᤗᤧ ᤔᤏᤠᤜᤠ᤹ᤖᤧ ᤀᤠᤳᤋᤡᤋᤡ ᤜᤕᤱᤁᤡᤸᤗᤡᤱ ᤔᤧᤈᤥᤃᤢᤀᤠᤱ ᤐᤠᤘᤗᤧᤴ ᤛᤧᤵᤔᤠ ᤔᤧᤃᤥ᤺ᤳᤋᤢᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤐᤠᤘᤗᤧᤴ ᤔᤧᤒᤰᤂᤢᤀᤠᤱ ᤔᤧᤍᤣ᤹ᤖᤢᤖᤥ॥ 36 ᤂᤧᤱᤜᤠ᤹ ᤂᤢᤏᤡ᤹ ᤀᤣ᤺ᤰᤀᤣ᤺ᤰ ᤂᤧᤴ ᤔᤏᤠ᤺ᤴ ᤛᤧᤖᤧᤶᤔᤧ᤹. ᤛᤧᤖᤧᤶᤔᤧ᤹ ᤗ᤹ᤖᤡᤰ ᤔᤧᤀ᤺ᤰᤋᤧᤖ ᤔᤧᤍᤡᤶᤍᤢᤛᤡᤖᤥ॥
ᤐᤠᤘᤗᤧᤴ ᤏᤠᤱᤛᤡᤱ
ᤛᤣ᤺ᤰᤕᤢᤰᤔᤡᤒᤠ ᥏.᥇-᥇᥏. ᥈᥌.᥇᥈-᥇᥎
37 ᤂᤧᤱᤜᤠ᤹ᤖᤧ ᤐᤠᤘᤗᤧᤴ ᤌᤰᤛᤢᤒᤠ ᤕᤰᤁᤥ ᤋᤣ᤹ᤔᤠ ᤔᤧᤀᤡ᤺ᤳᤋᤢᤸᤗᤧ ᤐᤠᤘᤗᤖᤧ ᤌᤰᤋᤢᤶᤒᤧᤴ ᤀᤰᤂᤣ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤂᤧᤏᤧ᤹ᤏᤢ ᤁᤢᤓᤠ ᤐᤠ᤺ᤴ ᤐᤠ᤺ᤵᤔᤠ ᤛᤢᤰᤁᤠᤒᤡ᥅”
ᤜᤧᤰᤁᤩᤠᤱ ᤂᤧᤴ ᤌᤰᤋᤢᤶᤒᤠᤸᤗᤧᤀᤠᤱ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤃᤪᤡᤁ ᤐᤠ᤺ᤴᤏᤠᤱ ᤐᤠ᤺ᤵᤔᤠ ᤁᤧᤗᤧᤛ᤻ᤛᤢᤒᤡ᥅ 38 ᤜᤧᤰᤁᤣᤏᤧ ᤑᤠ᤹ᤃᤪ ᤁᤢᤓᤠ ᤋᤱᤒᤣ ᤋᤃᤡ ᤜᤠᤱᤒᤡᤑᤩᤢᤱ ᤁᤧᤜᤣ᤺ᤰᤐᤠ ᤂᤧᤴ ᤔᤡᤛᤪᤡ ᤔᤏᤠ᤺ᤱᤃ ᤂᤧᤏᤧ᤹ᤀᤣᤒᤡᤗᤠᤒᤧ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ ᤂᤧᤸᤗᤧ ᤕᤧ᤺ᤱᤄᤠᤍᤧᤴᤏᤥ ᤜᤧᤴᤇᤡᤱ ᤗᤡᤛᤡ (᥊᥆᥆᥆) ᤜᤠᤱᤒᤡᤑᤩᤢᤱᤒᤠᤜᤠ᤹ ᤗᤠᤶᤗᤥᤛᤢᤛᤡᤀᤠᤱ ᤘᤕᤧᤖᤥ॥”
39 ᤐᤠᤘᤗᤖᤧ ᤔᤧᤳᤋᤢ. “ᤀᤡᤱᤃᤠ᤹ ᤔᤧ᤺ᤴᤏᤠ᤹ᤖᤥ. ᤀᤡᤱᤃᤠ᤹ᤃ ᤕᤜᤢᤍᤡᤀᤠ. ᤜᤧᤰᤁᤩᤠᤱ ᤛᤡᤗᤡᤛᤡᤕᤠ ᤌᤢᤶᤔᤥᤒᤠ ᤋᤠᤷᤛᤛ᤻ᤛᤥ ᤛᤠᤘᤠ᤺ᤴᤇᤡᤱᤅᤠᤱᤒᤠ॥ ᤀᤡᤱᤃᤠ᤹ ᤁᤧᤕᤧᤰᤐᤠ ᤕᤧᤰᤕᤰᤁᤥᤒᤠ ᤕᤰᤕᤢᤱᤒᤠᤀᤠ॥ ᤀᤠᤍᤠᤱᤒᤣ. ᤁᤴ ᤔᤏᤠᤜᤠ᤹ᤏᤢ ᤀᤡᤱᤃᤠ᤹ ᤐᤠ᤺ᤵᤔᤠ ᤐᤠᤱᤄᤠᤱᤅᤧ᤹ᤀᤥ॥”
40 ᤌᤰᤋᤢᤶᤒᤧᤸᤗᤧᤀᤠᤱ ᤐᤠ᤺ᤵᤔᤠ ᤋᤧᤴᤍᤡᤱ ᤐᤡᤖᤢ॥ ᤜᤧᤰᤁᤩᤠᤱ ᤐᤠᤘᤗᤧᤴ ᤌᤖᤣ᤹ᤗᤧ ᤏᤠᤱᤛᤣ᤺ᤰᤁᤥ ᤕᤧᤶᤛᤡᤱᤅᤠᤱ ᤔᤏᤠᤜᤠ᤹ ᤜᤢᤰᤆᤠ᤺ᤸᤁᤡ ᤐᤡᤖᤢᤛᤡᤖᤥ॥ ᤜᤧᤰᤁᤣ᤺ᤸᤗᤧ ᤂᤧᤴ ᤔᤏᤠᤜᤠ᤹ ᤛᤫᤠ᤺ᤳ ᤔᤧᤒᤥ᤺ᤰᤂᤧᤀᤠᤱ ᤂᤧᤴ ᤔᤏᤠᤜᤠ᤹ᤏᤢ ᤐᤠᤘᤗᤧᤴ ᤜᤡᤒᤪᤢ ᤐᤠ᤺ᤴᤏᤥ ᤐᤠ᤺ᤵᤔᤠ ᤜᤣ᤺ᤰᤋᤧᤖᤥ॥
* 21:30 ᤗᤠᤶᤎᤣ᤺ᤵᤜᤠ᤹ ᤔᤧᤛᤢᤒᤢ–ᤐᤠᤘᤸᤗᤧᤴ ᤕᤠᤶᤔᤥ ᤔᤠᤱᤜᤡᤶᤔᤥ ᤗᤠ᤺ᤳᤋᤠᤱ ᤔᤠᤱᤜᤡᤶᤔᤴ ᤔᤧᤈᤡ᤺ᤴᤍᤢᤴᤗ ᤑᤠ᤹ᤀᤠᤱ ᤔᤠᤱᤜᤡᤶᤔᤡᤸᤗᤧᤴ ᤗᤠᤶᤎᤣ᤺ᤵᤜᤠ᤹ ᤔᤧᤛᤢᤒᤢᤒᤠᤖᤥ॥