9
ᤍᤔᤛ᤻ᤁᤛᤒᤠ ᤗᤠᤶᤔᤥ ᤛᤠᤘᤗᤖᤧ ᤕᤧᤛᤢ᤺ᤴ ᤏᤛᤠ᤺ᤴ ᤆᤥᤃᤢ᤹
ᤛᤣ᤺ᤰᤕᤢᤰᤔᤡᤒᤠ ᥈᥈.᥌-᥇᥌. ᥈᥌.᥇᥈-᥇᥎
1-2 ᤁᤖ ᤍᤠᤱᤒᤠᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤁᤧᤖᤧᤰ ᤛᤧᤵᤔᤠᤛᤡ ᤑᤠ᤹ᤀᤠᤱ ᤛᤠᤘᤗᤖᤧ ᤛᤠ᤹ᤖᤡᤰ ᤕᤱᤔᤠ ᤛᤧᤖᤢᤛᤡᤖᤥ॥ ᤂᤢᤏᤧ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤥ ᤐᤣᤀᤠᤱ ᤍᤔᤛ᤻ᤁᤛᤀᤥ ᤁᤧᤘᤠ᤹ᤒᤠ ᤁᤧᤖᤧᤰ ᤍᤠᤱᤒᤠᤸᤗᤧ ᤁᤢᤗᤠᤶ ᤁᤧᤍᤡᤶᤒᤠ ᤔᤧᤴᤇᤢᤔᤠ᤹ ᤕᤧᤶᤒᤡᤳᤇᤠ᤹ᤜᤠ᤹ ᤐᤢᤱᤗᤠᤎᤠᤒᤠ ᤆᤥ᤺ᤰᤔᤠᤛᤡᤀᤠᤱ ᤕᤖᤢᤛᤗᤧᤶᤔᤥ ᤋᤠ᤺ᤵᤔᤠᤛᤡ ᤜᤧᤰᤁᤩᤠᤱ ᤂᤢᤶᤍᤡᤱ ᤐᤡᤔᤠᤛᤡ ᤛᤢᤰᤋᤢᤱᤗ ᤑᤠ᤹ᤀᤠᤱ ᤍᤔᤛ᤻ᤁᤛᤀᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤗᤠᤃᤡ ᤛᤰᤀᤡᤱᤄᤱ ᤛᤠᤵᤐᤠᤱᤄᤢᤛᤡᤖᤥ॥
3 ᤜᤧᤰᤁᤩᤠᤱ ᤂᤢᤏᤧ᤹ ᤍᤔᤛ᤻ᤁᤛᤖᤧ ᤁᤢᤒᤣᤛᤠᤱ ᤁᤧᤖᤧᤖ ᤐᤳᤇᤧᤸᤗᤧ ᤜᤰᤆᤄᤳ ᤋᤠᤱᤛᤠᤰᤐᤥᤗᤠᤶ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ ᤂᤢᤏᤧ᤹ ᤁᤢᤄᤡᤖᤡ ᤗᤧᤰᤋᤧᤖᤥ॥
4 ᤜᤧᤰᤁᤩᤠᤱ ᤂᤢᤏᤧ᤹ ᤂᤠᤶᤔᤥ ᤜᤷᤃᤢᤵ ᤆᤥ᤺ᤴᤍᤧᤀᤠᤱ ᤀᤡᤰᤗᤠᤎᤡᤰ ᤂᤧᤵᤛᤢ. “ᤛᤠᤘᤗᤀᤣ. ᤛᤠᤘᤗᤀᤣ. ᤀᤡᤱᤃᤠ᤹ ᤌᤣᤀᤠᤱ ᤋᤢᤰᤂᤣ ᤁᤧᤈᤠ᤺ᤳᤋᤠᤒᤠᤒᤣ᥅”
5 ᤛᤠᤘᤗᤖᤧ ᤛᤣ᤺ᤴᤍᤥᤛᤢ. “ᤍᤠᤱᤒᤣ. ᤂᤧᤏᤧ᤹ᤃ ᤜᤠ᤺ᤳᤏᤧᤴᤒᤣ᥅”
ᤜᤧᤰᤁᤣ᤺ᤸᤗᤧ ᤀᤰᤂᤣᤗ᤹ᤖᤡᤰ ᤏᤥᤃᤵ ᤋᤩᤧ. “ᤀᤡᤱᤃᤠ᤹ᤃ ᤋᤢᤰᤂᤣ ᤁᤧᤈᤠ᤺ᤳᤋᤢᤖ ᤁᤧᤘᤠ᤹ᤒᤠ ᤕᤧᤛᤢᤀᤠᤖᤥ॥
6 ᤀᤠᤸᤗ ᤂᤧᤏᤧ᤹ ᤐᤥᤃᤧ᤹ᤀᤠᤱ ᤕᤧᤰᤕᤰᤁᤥ ᤐᤣᤃᤧ᤹॥ ᤂᤧᤵᤔᤥᤀᤣ ᤂᤧᤏᤧ᤹ ᤌᤣ ᤆᤥ᤺ᤰᤔᤠ ᤐᤥ᤺ᤱ ᤀᤡᤱᤃᤠ᤹ ᤔᤧᤳᤏᤧ᤹ᤖᤥ॥”
7 ᤀᤠᤸᤗ ᤛᤠᤘᤗᤏᤢ ᤗᤠᤶᤍᤡ᤺ᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤌᤣᤀᤠᤱ ᤔᤧᤶᤒᤠ᤺ᤳᤋᤣ ᤔᤧᤕᤧᤒᤧ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤀᤡᤰᤗᤠ᤺ᤴ ᤂᤧᤶᤔᤠᤃ ᤔᤧᤄᤧᤵᤛᤢ. ᤁᤖ ᤜᤠ᤺ᤳᤋᤠᤱ ᤔᤧᤴᤏᤡ᤺ᤛᤢᤴᤗᤥ॥
8 ᤛᤠᤘᤗᤧᤴ ᤂᤠᤶᤔᤥᤗᤠᤶ ᤔᤢᤳᤌᤪᤡᤰ ᤐᤥᤃᤧ. ᤁᤖ ᤁᤢᤔᤡᤰᤁᤡᤴ ᤜᤴᤍᤢᤸᤗᤧ ᤌᤣᤀᤠᤱ ᤏᤡ᤺ᤔᤠ ᤔᤧᤛᤢᤰᤋᤢᤴ॥ ᤜᤧᤰᤁᤣ᤺ᤸᤗᤧ ᤂᤢᤏᤧ᤹ᤏᤢ ᤗᤠᤶᤍᤡ᤺ᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤁᤢᤜᤢᤰᤁᤥ ᤔᤧᤍᤧᤶᤛᤢᤀᤠᤱ ᤔᤧᤀᤢ᤺ᤰᤂᤢᤖ ᤍᤔᤛ᤻ᤁᤛᤀᤥ ᤔᤧᤍᤣ᤹ᤖᤢᤖᤥ॥
9 ᤜᤧᤰᤁᤣᤗ᤹ᤖᤡᤰ ᤛᤢᤶᤕᤧᤴ ᤌᤠᤖᤡᤰ ᤌᤧᤔᤠᤀᤠᤱ ᤏᤡ᤺ᤔᤠ ᤔᤧᤛᤢᤰᤋᤢᤴ ᤜᤧᤰᤁᤩᤠᤱ ᤌᤧᤔᤠᤀᤠᤱ ᤔᤧᤈᤏᤧᤴ. ᤔᤧᤎᤢᤅᤢᤴᤗᤥ॥
10 ᤀᤠᤸᤗ ᤍᤔᤛ᤻ᤁᤛᤀᤥ ᤜᤏᤏᤡᤕᤠ ᤔᤧᤵᤔᤏᤠᤒᤠ ᤜᤢ᤹ᤛᤠᤶᤒᤠᤎᤡᤰ ᤘᤕᤧ॥ ᤂᤧᤴ ᤛᤢᤑᤥᤀᤥ ᤍᤠᤱᤒᤠᤸᤗᤧ ᤀᤰᤂᤣ ᤔᤧᤳᤋᤢ. “ᤜᤏᤏᤡᤕᤠᤀᤣ᥄”
ᤜᤏᤏᤡᤕᤠᤖᤧ ᤏᤥᤃᤵ ᤐᤡᤖᤢ. “ᤌᤧᤔᤠᤒᤣ. ᤀᤠᤍᤠᤱᤒᤣ᥅”
11 ᤍᤠᤱᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤋᤥ᤺ᤴᤍᤥ᤺ᤴ ᤔᤧᤵᤔᤏᤠᤒᤠ ᤗᤠᤶᤔᤥ ᤕᤜᤢᤍᤠ᤺ᤸᤗᤧ ᤁᤢᤜᤡᤶᤔᤥ ᤐᤣᤃᤧ᤹॥ ᤂᤧᤵᤔᤥ ᤋᤠᤷᤛᤛᤒᤠ ᤛᤠᤘᤗ ᤔᤧᤵᤔᤏᤠᤒᤠ ᤔᤏᤠ᤺ᤴ ᤘᤠ᤹ᤒᤡ ᤑᤠ᤹ᤀᤠᤱ ᤛᤣ᤺ᤴᤍᤥ᤺ᤛᤧ᤹॥ ᤁᤴ ᤕᤧᤶᤔᤥ ᤂᤢᤏᤧ᤹ ᤂᤧᤵᤔᤥ ᤋᤢᤘᤠ ᤆᤥ᤺ᤰᤏᤢ ᤕᤢᤱᤗᤥ॥
12 ᤂᤢᤏᤧ᤹ ᤛᤢᤑᤥᤀᤥ ᤜᤏᤏᤡᤕᤠ ᤔᤧᤵᤔᤏᤠᤒᤠ ᤔᤏᤠ᤺ᤴ ᤋᤠᤀᤠᤱ ᤂᤢᤏᤧ᤹ ᤕᤠᤶᤔᤥ ᤏᤡ᤺ᤔᤠ ᤛᤢᤰᤋᤢᤏᤡ ᤑᤠ᤹ᤀᤠᤱ ᤁᤢᤜᤢᤰᤜᤠ᤹ ᤁᤢᤎᤧᤃᤣ᤺ᤰᤐᤥ ᤏᤧᤛ᤻ᤛᤢᤒᤡᤖᤢᤒᤠ ᤏᤡ᤺ᤛᤢᤀᤠᤱ ᤘᤠ᤹ᤖᤥ॥”
13 ᤜᤏᤏᤡᤕᤠ᤺ᤸᤗᤧ ᤀᤳᤋᤢᤖ ᤏᤥᤃᤵ ᤐᤡᤖᤢ. “ᤁᤖ ᤀᤠᤍᤠᤱᤒᤣ. ᤂᤧᤸᤗᤧᤃ ᤕᤖᤢᤛᤗᤧᤶᤔᤥᤒᤠ ᤂᤧᤏᤧ᤹ ᤛᤣᤛᤣ ᤁᤧᤔᤏᤠᤜᤠ᤹ ᤕᤖᤡᤰ ᤋᤢᤰᤂᤣ ᤆᤠ᤺ᤳᤋᤢᤛᤡᤒᤠ ᤀᤡᤱᤃᤠ᤹ ᤂᤧᤵᤛᤢᤱᤅᤠᤱ ᤘᤠ᤹ᤀᤠᤖᤥ॥
14 ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤗᤠᤶ ᤕᤢᤰ ᤂᤥ᤺ᤛᤢᤀᤠᤱ ᤂᤧᤏᤧ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤋᤧᤶᤔᤠᤛᤡ ᤑᤠ᤹ᤀᤠᤱ ᤁᤵᤔᤥᤀᤠᤱ ᤋᤩᤧᤀᤠᤱ ᤘᤠ᤹ᤖᤥ॥”
15 ᤁᤖ ᤍᤠᤱᤒᤠᤸᤗᤧ ᤜᤏᤏᤡᤕᤠ᤺ᤴ ᤔᤧᤳᤋᤢ. “ᤂᤧᤏᤧ᤹ ᤐᤣᤃᤧ᤹᥄ ᤌᤣᤀᤠᤱᤓᤧᤸᤗᤧ ᤂᤧᤴ ᤔᤏᤠ᤺ᤴ ᤀᤡᤱᤃᤠ᤹ ᤀᤠᤛᤣᤘᤠ ᤆᤥᤃᤢᤏᤡ ᤑᤠ᤹ᤀᤠᤱ ᤛᤣᤃᤢᤱᤅᤠᤱ ᤘᤠ᤹ᤀᤠᤖᤥ॥ ᤂᤧᤸᤗᤧᤃ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹. ᤜᤠᤱᤜᤠ᤹. ᤏᤢ ᤀᤡᤛᤪᤠᤀᤡᤗᤡᤜᤠ᤹ ᤀᤠᤔᤡᤱ ᤀᤡᤱᤓᤴ ᤆᤥᤃᤢᤛᤡ᤹ᤖᤥ॥
16 ᤀᤡᤱᤃᤠ᤹ ᤀᤠᤗᤠᤃᤡ ᤂᤧᤸᤗᤧ ᤀᤠᤰᤂᤧᤴ ᤋᤢᤰᤂᤣ ᤆᤠᤔᤠ ᤐᤥ᤺ᤱ ᤑᤠ᤹ᤀᤠᤱ ᤀᤡᤱᤃᤠ᤹ ᤀᤥᤛᤣ᤺ᤴᤎᤠᤰᤋᤢᤱᤗᤥ॥”
17 ᤜᤧᤰᤁᤩᤠᤱ ᤜᤏᤏᤡᤕᤠ᤺ᤴ ᤂᤧᤴ ᤜᤡᤶᤔᤥ ᤐᤣᤀᤠᤱ ᤛᤠᤘᤗᤖᤧ ᤁᤢᤎᤧᤃᤣ᤺ᤰ ᤛᤶᤍᤠᤱ ᤁᤢᤜᤢᤰᤜᤠ᤹ ᤏᤧᤛ᤻ᤛᤢᤀᤠᤱ ᤀᤰᤂᤣ ᤔᤧᤳᤋᤢ. “ᤀᤠᤴᤛᤠ᤹ ᤛᤠᤘᤗᤀᤣ. ᤍᤠᤱᤒᤠ ᤕᤧᤛᤢᤖᤧ ᤀᤡᤱᤃᤠ᤹ ᤐᤠᤱᤄᤠᤱᤒᤠᤖᤥ॥ ᤂᤢᤏᤧ᤹ᤃ ᤁᤵᤔᤥ ᤍᤔᤛ᤻ᤁᤛᤀᤥ ᤁᤧᤍᤩᤧᤖ ᤁᤧᤒᤳᤇᤧᤸᤗᤧ ᤗᤠᤶᤔᤥ ᤂᤧᤏᤧ᤹ᤏᤢ ᤀᤥᤛᤣ᤺ᤴᤎᤠᤰᤛᤡᤱ. ᤜᤧᤰᤁᤩᤠᤱ ᤂᤧᤏᤧ᤹ ᤕᤠᤶᤔᤥ ᤏᤡ᤺ᤔᤠ ᤁᤧᤛᤢᤰᤋᤢᤖ. ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤁᤧᤎᤢᤰᤗ ᤑᤠ᤹ᤀᤠᤱ ᤐᤠᤱᤄᤠᤱᤒᤠᤖᤥ॥”
18 ᤂᤡᤔᤥ ᤛᤠᤘᤗᤖᤧ ᤁᤢᤔᤡᤰᤁᤥᤗᤠᤶ ᤅᤠᤛᤣ᤺ᤰ ᤜᤧᤰᤋᤱᤒᤠ ᤔᤰᤌᤩᤧᤀᤠᤱ ᤂᤢᤏᤧ᤹ ᤕᤠᤶᤔᤥ ᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧ॥ ᤂᤢᤏᤧ᤹ ᤐᤥᤃᤧᤀᤠᤱ ᤜᤏᤏᤡᤕᤠ᤺ᤸᤗᤧ ᤒᤵᤋᤡᤛ᤻ᤔᤠ ᤐᤡᤖᤢᤖᤥ॥
19 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤈᤠ ᤆᤀᤠᤱ ᤁᤢᤛᤰᤔᤠ ᤋᤩᤧᤖᤥ॥
ᤛᤠᤘᤗᤖᤧ ᤍᤔᤛ᤻ᤁᤛᤀᤥ ᤛᤢᤏᤠᤀᤡᤱ ᤛᤧ᤺ᤛᤢ᤹
ᤛᤠᤘᤗᤧᤴ ᤁᤢᤓᤠ ᤕᤧᤴ ᤌᤠᤖᤡᤰ ᤍᤔᤛ᤻ᤁᤛᤀᤥᤒᤠ ᤏᤛᤠᤏᤡᤒᤠᤜᤠ᤹ᤏᤢ ᤘᤕᤧ॥
20 ᤂᤢᤏᤧ᤹ ᤂᤧᤵᤔᤥ ᤕᤜᤢᤍᤡ ᤆᤢᤶᤗᤢᤱᤜᤡᤶ ᤜᤧᤱᤄᤠ᤺ᤳᤋᤡ ᤐᤣᤀᤠᤱ ᤕᤧᤛᤢ᤺ᤴ ᤏᤡᤱᤘᤠ᤹ᤑᤢᤛᤠ᤺ᤖᤥ ᤑᤠ᤹ᤀᤠᤱ ᤂᤡᤔᤥ ᤀᤡᤱᤓᤴ ᤆᤥ᤺ᤰᤔᤠ ᤜᤣ᤺ᤰᤋᤢᤖᤥ॥
21 ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴ ᤁᤧᤄᤧᤶᤒᤠ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤀᤰᤂᤣᤗ᤹ᤖᤡᤰ ᤔᤧᤔᤧᤳᤇᤡᤱ. “ᤕᤖᤢᤛᤗᤧᤶᤔᤥ ᤕᤧᤛᤢ᤺ᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤜᤶ ᤁᤧᤈᤥ᤺ᤰᤐᤧᤴ ᤒᤠᤁᤴ ᤔᤏᤠ᤺ᤴ ᤔᤧ᤺ᤶᤒᤡ᥅ ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤥ ᤋᤧᤶᤔᤠ ᤋᤣ᤹ᤔᤠᤛᤡ ᤑᤠ᤹ᤀᤠᤱ ᤁᤵᤔᤥᤀᤠᤱ ᤋᤩᤧᤒᤠᤃ ᤔᤧ᤺ᤶᤒᤡ᥅”
22 ᤁᤖ ᤛᤠᤘᤗᤖᤧ ᤀᤠᤸᤗᤛᤠᤱ ᤔᤢᤰᤛᤠᤶ ᤁᤢᤎᤡᤶᤒᤠ ᤀᤡᤱᤓᤴ ᤛᤧ᤺ᤛᤢᤖ ᤐᤣᤀᤠᤱ ᤍᤔᤛ᤻ᤁᤛᤀᤥ ᤁᤧᤘᤠ᤹ᤒᤠ ᤕᤜᤢᤍᤡᤜᤠ᤹. ᤕᤧᤛᤢ᤺ᤴᤏᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ ᤑᤠ᤹ᤀᤠᤱ ᤕᤠ᤺ᤴᤍᤢᤛᤡᤖᤥ॥ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤏᤥᤃᤵᤐᤣ ᤐᤡᤔᤠ ᤔᤧᤴᤇᤢᤰᤋᤢᤴᤗᤥ॥
23 ᤜᤧᤰᤁᤩᤠᤱ ᤕᤖᤡᤰ ᤕᤧᤶ ᤀᤣᤃᤠᤱ ᤂᤧᤵᤔᤥᤒᤠ ᤕᤜᤢᤍᤡᤜᤠ᤹ᤖᤧ ᤛᤠᤘᤗᤧᤴ ᤛᤧᤵᤔᤠ ᤑᤠ᤹ᤀᤠᤱ ᤀᤡᤱᤔᤧᤍᤱᤄᤢ.
24 ᤁᤖ ᤁᤴ ᤐᤠ᤺ᤴᤏᤡᤴ ᤛᤠᤘᤗᤖᤧ ᤏᤡᤱᤘᤠ᤹ ᤂᤥ᤺ᤛᤢᤖᤥ॥ ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ᤖᤧ ᤛᤧᤴᤍᤡᤰ ᤗᤧᤴᤍᤡᤰ ᤂᤢᤏᤧ᤹ ᤋᤧᤶᤔᤠᤀᤠᤱ ᤛᤧᤵᤔᤠ ᤑᤠ᤹ᤀᤠᤱ ᤕᤧᤰᤕᤰᤁᤥᤒᤠ ᤐᤕᤶ ᤗᤠᤶᤎᤣ᤺ᤵᤜᤠ᤹ᤀᤥ ᤔᤧᤛᤢᤃᤢᤖᤥ॥
25 ᤁᤖ ᤌᤡᤰ ᤛᤧᤴᤍᤡᤰ ᤛᤠᤘᤗᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤛᤠᤵᤐᤥᤀᤥ ᤔᤧᤕᤠᤰᤋᤢᤀᤠᤱ ᤕᤧᤰᤕᤰᤁᤡᤸᤗᤧ ᤗᤢᤱᤎᤠᤰ ᤗᤠ᤺ᤰᤁᤠᤳ ᤀᤡᤍᤠ᤺ᤰᤁᤡᤸᤗᤧ ᤔᤧᤓᤥ᤺ᤴᤍᤢ ᤔᤧᤎᤠᤛᤢᤀᤠᤱ ᤔᤧᤄᤧᤳᤋᤢ ᤔᤧᤍᤣ᤺ᤛᤢᤖᤥ॥
26 ᤛᤠᤘᤗᤧᤴ ᤕᤖᤢᤛᤗᤧᤔ ᤐᤣᤀᤠᤱ ᤂᤧᤵᤔᤥᤒᤠ ᤜᤢ᤹ᤛᤠᤶᤒᤠᤜᤠ᤹ᤏᤢ ᤛᤥᤖᤡᤰ ᤘᤠ᤹ᤔᤠ ᤏᤡᤱᤘᤠ᤹ ᤆᤥᤃᤢ. ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤠ᤹ᤖᤡᤰ ᤔᤧᤃᤡᤖᤢ ᤜᤧᤰᤁᤩᤠᤱ ᤂᤢᤏᤧ᤹ ᤜᤢ᤹ᤛᤠᤶᤒᤠ ᤑᤠ᤹ᤀᤠᤱ ᤁᤢᤏᤠᤛᤠ᤹ᤔᤠᤀᤣ ᤔᤧᤴᤇᤢᤰᤋᤢᤴᤗᤥ॥
27 ᤁᤖ ᤒᤖᤏᤠᤒᤠᤛᤧᤴ ᤋᤩᤧᤀᤠᤱ ᤛᤠᤘᤗᤧᤴ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤥ ᤋᤠᤖᤢᤀᤠᤱ ᤀᤠᤰᤂᤣᤗ᤹ᤖᤡᤰ ᤛᤠᤘᤗᤖᤧ ᤍᤔᤛ᤻ᤁᤛ ᤐᤣ᤺ᤰᤔᤠ ᤗᤠᤶᤔᤥ ᤍᤠᤱᤒᤠᤴ ᤋᤢᤔᤢ ᤜᤧᤰᤁᤩᤠᤱ ᤍᤠᤱᤒᤠᤴ ᤂᤢᤏᤧ᤹ᤏᤢ ᤐᤠᤖᤧ. ᤜᤧᤰᤁᤩᤠᤱ ᤀᤠᤰᤂᤣᤗ᤹ᤖᤡᤰ ᤍᤔᤛ᤻ᤁᤛᤀᤥ ᤔᤧᤱᤃᤡᤀᤣ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤛᤠᤘᤗᤖᤧ ᤀᤡᤱᤓᤴ ᤛᤧ᤺ᤛᤢ ᤁᤧᤗ᤹ᤒᤠᤴ ᤁᤠᤰ ᤆᤧᤰᤋᤢᤛᤡᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤍᤠ᤺ᤰᤋᤢᤖᤥ॥
28 ᤜᤧᤰᤁᤩᤠᤱ ᤛᤠᤘᤗᤧᤴ ᤂᤧᤱᤜᤠ᤹ᤏᤢ ᤛᤥᤖᤡᤰ ᤘᤠ᤹ᤔᤠ ᤜᤣ᤺ᤰᤋᤧᤀᤠᤱ ᤕᤖᤢᤛᤗᤧᤔ ᤂᤠᤖᤠᤰ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤔᤧᤱᤃᤡᤀᤣ ᤀᤡᤱᤓᤴ ᤆᤥᤃᤢᤖᤥ॥
29 ᤜᤧᤰᤁᤩᤠᤱ ᤃᤪᤡᤁ ᤁᤧᤒᤠ᤺ᤵᤐᤠ ᤕᤜᤢᤍᤡᤜᤠ᤹ᤏᤢᤀᤠᤱ ᤐᤠ᤺ᤴᤎᤰᤋᤧ. ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤧᤵᤔᤠ ᤑᤠ᤹ᤀᤠᤱ ᤗᤠᤶ ᤔᤧᤃᤥ᤺ᤳᤋᤢᤖ ᤔᤧᤘᤕᤧ॥
30 ᤁᤴ ᤐᤠ᤺ᤴᤏᤡᤴ ᤘᤣ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤂᤢᤏᤧ᤹ ᤛᤡᤈᤖᤡᤕᤠᤀᤥ ᤔᤧᤍᤣ᤹ᤖᤢ॥ ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤛᤠᤘᤗᤧᤴ ᤋᤠᤷᤛᤛ ᤕᤧᤰᤕᤰ ᤗᤧᤵᤔᤠᤱ ᤘᤠᤗᤠᤎᤠᤗᤠᤶ ᤔᤧᤒᤠᤱᤄᤢ ᤔᤧᤍᤣ᤺ᤛᤢᤖᤥ॥
31 ᤜᤧᤰᤁᤩᤠᤱ ᤕᤜᤢᤍᤡᤕᤠ. ᤃᤠᤗᤡᤗ. ᤏᤢ ᤛᤠᤔᤖᤡᤕᤠᤀᤥᤛ᤻ᤔᤠ ᤛᤣᤛᤣᤜᤢᤵᤗᤰᤜᤠ᤹ᤀᤥ ᤏᤡᤱᤄᤢᤶ ᤐᤥ᤺ᤱᤔᤠ ᤆᤰ ᤌᤩᤧᤀᤠᤱ ᤕᤧᤶᤕᤧᤶᤘᤠ ᤋᤩᤧ॥ ᤂᤧᤱᤜᤠ᤹ᤖᤧ ᤍᤠᤱᤒᤠᤴ ᤛᤠ᤹ᤖᤡᤰ ᤀᤡᤱᤎᤠ᤺ᤱ ᤔᤧᤒᤡ. ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤀᤠ᤺ᤴᤇᤡᤱᤔᤠ ᤐᤡᤖᤢᤛᤡᤀᤠᤱ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤔᤧᤒᤥ᤺ᤰᤂᤧᤖ ᤂᤧᤱᤜᤠ᤹ ᤔᤧᤒᤥ᤺ᤖᤧᤖ ᤔᤧᤒᤣᤖᤥ॥
ᤀᤣᤏᤡᤕᤠᤛᤧᤴ ᤘᤣ᤺ᤳ
32 ᤜᤧᤰᤁᤩᤠᤱ ᤐᤋᤪᤢᤛᤧᤴ ᤗᤠᤶᤍᤡ᤺ᤰ ᤆᤥᤃᤧᤖ ᤗᤡᤍ᤻ᤍᤠᤒᤠ ᤏᤛᤠᤏᤡᤒᤠᤜᤠ᤹ᤀᤠᤱ ᤛᤠ᤹ᤖᤢᤛᤡᤖᤥ॥
33 ᤂᤧᤵᤔᤥ ᤀᤣᤏᤡᤕᤠᤛ ᤔᤧᤵᤔᤏᤠᤒᤠ ᤋᤱᤒᤣ ᤕᤧᤳᤇᤡᤀᤠᤱᤎᤥ (᥎) ᤗᤱᤗᤧ᤺ᤱ ᤋᤢᤰᤔᤠᤸᤗᤧ ᤋᤖᤢᤀᤠᤱ ᤏᤧᤳᤏᤠᤀᤥᤖᤰ ᤁᤧᤏᤧᤒᤠ ᤔᤏᤠ᤺ᤴ ᤋᤢᤔᤢ॥
34 ᤐᤋᤪᤢᤛᤖᤧ ᤂᤧᤴ ᤔᤧᤳᤋᤢ. “ᤀᤣᤏᤡᤕᤠᤛᤣ. ᤕᤧᤛᤢ ᤂᤪᤡᤛ᤻ᤋᤖᤧ ᤁᤧᤘᤣ᤺ᤴᤗᤥ॥ ᤐᤥᤃᤧ᤹ᤀᤠᤱ ᤁᤧᤏᤧᤳᤏᤠ᤺ᤴ ᤑᤥ᤺ᤰᤂᤧ᤹ᤀᤥ᥄” ᤂᤡᤔᤥ ᤂᤧᤴ ᤔᤢᤳᤌᤪᤡᤰ ᤐᤥᤃᤧ॥
35 ᤜᤧᤰᤁᤩᤠᤱ ᤗᤡᤍ᤻ᤍᤠ ᤕᤧᤰᤕᤰᤁᤥ ᤏᤢ ᤛᤠᤖᤥᤏ ᤋᤧᤶᤒᤣ᤹ᤀᤥ ᤁᤧᤘᤠ᤹ᤒᤠ ᤕᤖᤡᤰ ᤔᤏᤠᤜᤠ᤹ᤖᤧ ᤂᤧᤴ ᤔᤏᤠ᤺ᤴ ᤘᤣ᤺ᤳᤋᤧᤒᤠ ᤔᤧᤏᤡ᤺ᤛᤢᤀᤠᤱ ᤍᤠᤱᤒᤠ ᤗᤧᤵᤔᤠᤱ ᤔᤧᤜᤡᤛᤡᤱᤗᤥ॥
ᤐᤋᤪᤢᤛᤖᤧ ᤋᤒᤡᤳᤋᤠ᤺ᤴ ᤘᤣ᤺ᤴᤍᤢ᤹
36 ᤜᤧᤰᤁᤩᤠᤱ ᤈᤥᤵᤐᤠ ᤕᤧᤰᤕᤰᤁᤥ ᤋᤒᤡᤋᤠ ᤔᤡᤱ ᤁᤧᤘᤠ᤺ᤵᤔᤠ ᤜᤢ᤹ᤛᤠᤶᤔᤠ ᤌᤡᤰ ᤘᤕᤧ॥ (ᤂᤧᤸᤗᤧ ᤁᤢᤔᤡᤱ ᤃᤪᤡᤰᤁᤥ ᤍᤥᤖᤁᤠᤛ ᤘᤕᤧ–ᤂᤧᤴ ᤑᤠ᤹ᤀᤡᤴ ᤐᤧ᤺ᤱᤘᤠ ᤐᤥ᤺ᤱᤗᤥ॥) ᤂᤧᤴ ᤛᤍᤠᤍᤡᤱ ᤘᤣ᤹ᤜᤠ᤹ᤖᤧ ᤗᤠᤃᤡ ᤏᤢ᤺ᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤏᤢ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤧᤓᤠ᤹ᤔᤠ ᤘᤕᤧᤖᤥ॥
37 ᤂᤢᤏᤧ᤹ ᤂᤧᤴ ᤕᤧᤶᤔᤥ ᤋᤢᤃᤧᤀᤠᤱ ᤛᤩᤧ. ᤜᤧᤰᤁᤩᤠᤱ ᤁᤢᤎᤰᤁᤡᤴ ᤘᤠᤔᤧᤜᤵᤋᤢᤀᤠᤱ ᤌᤥ᤺ᤛ᤻ᤔᤠ ᤕᤠᤰᤑᤠᤀᤥ ᤔᤧᤍᤣ᤹ᤖᤢᤀᤠᤱ ᤔᤧᤏᤧᤛ᤻ᤛᤢᤖᤥ॥
38 ᤈᤥᤵᤐᤠ ᤕᤧᤰᤕᤰᤁᤡᤴ ᤗᤡᤍ᤻ᤍᤠ ᤕᤧᤰᤕᤰᤗᤠᤶ ᤔᤧᤔᤠ᤺ᤰᤂᤧᤴ. ᤜᤧᤰᤁᤣ᤺ᤸᤗᤧ ᤜᤢ᤹ᤛᤠᤶᤒᤠᤜᤠ᤹ᤖᤧ ᤐᤋᤪᤢᤛᤧᤴ ᤗᤡᤍ᤻ᤍᤠᤀᤥ ᤘᤠ᤹ ᤁᤧᤗ᤹ᤒᤠ ᤔᤧᤄᤧᤵᤛᤢᤀᤠᤱ ᤏᤧᤵᤑᤢ ᤔᤏᤠᤜᤠ᤹ ᤁᤢᤗᤠ᤺ᤛᤧ ᤔᤧᤒᤠᤱᤄᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤣᤛᤧᤳᤇᤡᤀᤠᤱ ᤐᤋᤪᤢᤛᤧᤴ. “ᤀᤠᤍᤠᤱᤒᤣ. ᤜᤠᤖᤠ᤹ ᤈᤥᤵᤐᤠᤀᤥ ᤑᤧᤖᤧ᤹ᤀᤥ.” ᤔᤧᤳᤋᤧᤇᤢᤖ ᤐᤣᤗᤡ ᤑᤠᤰᤋᤧᤳᤇᤢᤖᤥ॥
39 ᤂᤧᤸᤗᤧ ᤆᤥᤃᤢᤸᤗᤧ ᤐᤋᤪᤢᤛᤧᤴᤏᤠᤱ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤂᤧᤱᤜᤠ᤹ᤏᤢ ᤈᤥᤵᤐᤠᤀᤥ ᤐᤣ॥ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤖᤧᤏᤢᤔᤧ᤺ᤴᤏᤣ ᤂᤢᤏᤧ᤹ ᤌᤥ᤺ᤛ᤻ᤔᤠ ᤕᤠᤰᤑᤠᤀᤥ ᤔᤧᤍᤣ᤹ᤖᤢ॥ ᤂᤧᤵᤔᤥ ᤔᤣᤔᤣᤍᤢᤔᤠᤜᤠ᤹ ᤐᤋᤪᤢᤛᤖᤧ ᤁᤢᤄᤡᤖᤡ ᤔᤧᤕᤧᤒᤧᤀᤠᤱ ᤍᤥᤖᤁᤠᤛᤖᤧ ᤁᤢᤜᤡᤱᤘᤧᤳ ᤘᤕᤧᤸᤗᤧ ᤋᤕᤢᤒᤠ ᤋᤣ᤺ᤵᤑᤢᤱᤜᤠ᤹ ᤀᤥᤛᤣ᤺ᤴᤔᤧᤎᤠᤰᤋᤢᤖ ᤔᤧᤜᤠᤒᤧ॥
40 ᤐᤋᤪᤢᤛᤧᤴ ᤐᤣᤀᤠᤱ ᤂᤧᤵᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤕᤠᤰᤑᤠᤗᤠᤶ ᤗᤠ᤺ᤰᤁᤠᤳ ᤐᤠᤱᤄᤢᤛᤡ ᤜᤧᤰᤁᤩᤠᤱ ᤂᤢᤏᤧ᤹ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤋᤢᤘᤠ ᤆᤥᤃᤢᤀᤠᤱ ᤂᤧᤴ ᤁᤧᤛᤡ᤺ᤔᤠ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤔᤧᤳᤋᤢ. “ᤋᤒᤡᤋᤠᤀᤣ. ᤐᤥᤃᤧ᤹ᤀᤥ॥” ᤂᤧᤸᤗᤧ ᤁᤢᤔᤡᤰᤜᤠ᤹ ᤜᤴᤍᤢ. ᤜᤧᤰᤁᤩᤠᤱ ᤐᤋᤪᤢᤛᤧᤴ ᤏᤡ᤺ᤛᤢ ᤜᤧᤰᤁᤩᤠᤱ ᤐᤥᤃᤧᤀᤠᤱ ᤕᤢᤱᤛᤡᤱᤗᤥ॥
41 ᤐᤋᤪᤢᤛᤖᤧ ᤁᤢᤜᤢᤰᤁᤥ ᤋᤧᤶᤛᤢᤀᤠᤱ ᤕᤧᤵᤛᤢ ᤜᤧᤰᤁᤩᤠᤱ ᤔᤣᤔᤣᤍᤢᤔᤠᤜᤠ᤹ ᤏᤢ ᤘᤣ᤹ ᤏᤛᤠᤏᤡᤒᤠᤜᤠ᤹ ᤐᤋᤪᤢᤛᤖᤧ ᤀᤢ᤺ᤳᤋᤢᤛᤡᤀᤠᤱ ᤂᤧᤴ ᤜᤢᤰᤛᤢᤵᤋᤢᤛᤡᤖᤥ॥
42 ᤜᤧᤰᤁᤩᤠᤱ ᤈᤥᤵᤐᤠ ᤂᤠᤖᤠᤰ ᤁᤴ ᤐᤠ᤺ᤴᤏᤡᤴ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥ᤺ᤛᤢᤀᤠᤱ ᤕᤖᤡᤰᤗᤧ ᤍᤠᤱᤒᤠᤴ ᤏᤛᤠ᤺ᤴ ᤔᤧᤈᤥᤃᤢᤖᤥ॥
43 ᤐᤋᤪᤢᤛᤧᤴ ᤈᤥᤵᤐᤠᤀᤥ ᤁᤢᤓᤠ ᤕᤧᤶ ᤛᤧᤜᤥᤒᤠᤸᤗᤧ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤕᤠ᤺ᤰᤋᤧᤖᤥ॥