2
ᤐᤠᤘᤗ ᤏᤢ ᤘᤣ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹
1 ᤋᤱᤒᤣ ᤌᤡᤰ-ᤗᤡ (᥇᥊) ᤀᤣᤃᤠᤱ ᤀᤡᤱᤃᤠ᤹ ᤒᤖᤏᤠᤒᤠᤛᤧᤴᤏᤢ ᤕᤠᤶᤔᤥ ᤕᤖᤢᤛᤗᤧᤔ ᤌᤥ ᤐᤣᤃᤠᤱᤅᤡᤸᤗᤧ ᤋᤡᤋᤛᤧᤴᤏᤠᤱ ᤀᤡᤱᤃᤠ᤹ᤏᤢᤀᤣ ᤛᤥᤖᤡᤰ ᤋᤣ᤹ᤖᤢᤱᤅᤠᤱ ᤘᤕᤧ॥
2 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤂᤧᤳᤌᤥ ᤐᤣ᤺ᤰᤔᤠᤀᤣ ᤐᤥ᤺ᤱ ᤗ᤹ᤖᤡᤰ ᤀᤥ᤺ᤴᤎᤠᤰᤋᤠᤱᤅᤠᤱ ᤘᤕᤧ॥ ᤀᤡᤱᤃᤠ᤹ ᤂᤧᤵᤔᤥ ᤘᤕᤠᤱᤅᤡᤸᤗᤧ ᤂᤧᤵᤔᤥᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤗᤠᤶᤗᤥ᤺ᤒᤠᤛᤡᤖᤥ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤛᤡᤒᤠᤜᤠ᤹ ᤛᤫᤠ᤺ᤳᤋᤠᤱ ᤋᤢᤔᤢᤱᤛᤡᤱᤅᤠᤱ ᤀᤡᤱᤃᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤡᤱᤓᤥ᤺ᤛᤢᤱᤛᤡᤱᤒᤠ ᤛᤢᤏᤠᤀᤡᤱᤅᤡᤴ ᤆᤧᤰᤋᤢᤱᤛᤡᤱᤗᤥ॥ ᤂᤧᤱᤜᤠ᤹ᤖᤧ ᤀᤠᤒᤠ᤺ᤴᤏᤡᤴ ᤔᤧᤄᤧᤵᤛᤢᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤱᤅᤠᤱ ᤘᤕᤠᤱ. ᤔᤧ᤺ᤴᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤆᤥᤃᤢᤱᤒᤠ ᤔᤠᤱᤛᤣᤘᤠ᤺ᤴ ᤜᤏᤧ ᤁᤧᤒᤥ᤺ᤱᤒᤠ ᤘᤕᤧᤖᤥ॥
3 ᤁᤖ ᤀᤠᤴᤍᤣ᤺ᤱᤒᤠ ᤋᤡᤋᤛᤧᤴ ᤌᤡᤶᤔᤧᤴᤍᤱ ᤛᤢᤘᤠᤱ ᤘᤕᤧᤛᤠᤱ ᤂᤧᤸᤗᤧ ᤜᤷᤍᤥ ᤜᤧᤰᤔᤠ ᤐᤥ᤺ᤱ ᤑᤠ᤹ᤀᤠᤱ ᤔᤧᤶᤒᤠ᤺ᤳᤋᤢᤴᤗᤥ॥
4 ᤁᤖ ᤁᤢᤓᤠ ᤀᤡᤱᤗᤧᤰᤁᤣ ᤑᤢ᤹ᤏᤢᤛᤠ᤹ᤜᤠ᤹ ᤂᤪᤡᤛ᤻ᤋ ᤕᤧᤛᤢᤗᤠᤶ ᤂᤥ᤺ᤛᤢᤶᤒᤧᤒᤠ ᤆᤥ᤺ᤰᤕᤢᤶᤓᤥ᤺ᤴ ᤌᤥ᤺ᤶᤛᤧ ᤀᤠᤏᤡᤃᤧᤏᤢ ᤔᤧᤓᤢᤳᤇᤡᤱᤅᤠᤱ ᤀᤠᤏᤡᤃᤧ ᤕᤥ᤺ᤰᤐᤠ ᤜᤧᤰᤁᤣ ᤆᤥ᤺ᤰᤛᤧ ᤂᤢᤏᤡ᤹ ᤕᤜᤢᤍᤡ ᤛᤠᤶᤕᤥᤌᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥ᤺ᤱ ᤗ᤹ᤖᤡᤰ ᤔᤧᤔᤧᤳᤋᤡᤃᤧᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤁᤠᤰ ᤐᤠ᤺ᤴᤏᤡᤴ ᤐᤥᤃᤧᤒᤠᤖᤥ॥
5 ᤁᤖ ᤀᤠᤏᤡᤃᤧᤃ ᤛᤧᤰᤂᤠᤒᤠ ᤛᤢᤏᤠᤀᤡᤱᤅᤡᤴ ᤂᤡᤏᤡ᤹ᤏᤢ ᤛᤍᤠᤍᤡᤱ ᤘᤠ᤹ᤖ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤓᤥ᤺ᤰᤂᤢᤒᤠ ᤐᤠ᤺ᤴᤏᤡᤴ ᤛᤵᤑᤠᤎᤡᤰᤁᤠᤱ ᤔᤧᤄᤧᤵᤛᤢᤶᤒᤧᤴᤗᤥ॥
6 ᤜᤧᤰᤁᤩᤠᤱ ᤛᤣᤛᤣᤜᤢᤵᤗᤰᤐᤠ ᤁᤢᤓᤠ ᤗᤠᤶᤗᤥ᤺ᤒᤠᤜᤠ᤹ᤃ–ᤁᤧᤗᤧᤒᤠ ᤁᤧᤏᤡ᤺ᤒᤠ ᤔᤧᤈᤥ᤺ᤰᤛᤠᤱ ᤀᤡᤱᤃᤠ᤹ᤃ ᤌᤣᤀᤠᤱ ᤔᤧᤗᤣ᤺ᤳᤋᤠᤛᤡᤱᤅᤡᤴᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ ᤔᤧᤛᤧᤴᤍᤢᤴᤇᤡᤴᤗᤥ–ᤂᤧᤱᤜᤠ᤹ᤖᤧ ᤀᤡᤱᤓᤥ᤺ᤛᤢᤱᤒᤠ ᤛᤢᤏᤠᤀᤡᤱᤅᤥ ᤌᤣᤀᤠᤱ ᤔᤧᤴᤈᤰᤋᤢᤴᤗᤥ॥
7 ᤂᤧᤸᤗᤧ ᤁᤢᤗᤧᤰᤘᤠ ᤂᤧᤱᤜᤠ᤹ᤖᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤋᤪᤢᤛᤧᤴ ᤕᤜᤢᤍᤡᤜᤠ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤥᤛᤧ ᤐᤠᤱᤄᤢᤒᤠ ᤜᤧᤰᤁᤣᤀᤣ ᤀᤡᤱᤃᤠ᤹ᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠᤛᤡ ᤑᤠ᤹ᤀᤠᤱ ᤗᤰᤐᤧᤴ ᤐᤡᤖᤠᤱᤒᤠᤴ ᤔᤧᤏᤡ᤺ᤛᤢᤖᤥ॥
8 ᤌᤣᤀᤠᤱᤓᤧᤸᤗᤧ ᤐᤋᤪᤢᤛᤧᤖᤧ ᤛᤣ᤺ᤰᤕᤢᤰᤔᤡᤒᤠ ᤁᤢᤕᤠ᤺ᤶᤒᤰᤗᤠᤶ ᤕᤜᤢᤍᤡᤜᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠ᤺ᤶᤒᤰ ᤆᤥᤃᤢᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤛᤣ᤺ᤰᤕᤢᤰᤔᤡᤒᤠ ᤀᤠᤕᤠ᤺ᤶᤒᤰᤗᤠᤶᤔᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤥ ᤕᤠ᤺ᤶᤒᤰ ᤆᤥᤃᤢᤖᤥ॥
9 ᤛᤣᤛᤣᤜᤢᤵᤗᤰᤁᤥᤒᤠ ᤗᤠᤶᤗᤥ᤺ᤒᤠ ᤔᤧᤔᤧᤳᤋᤢᤛᤡᤒᤠ ᤕᤠᤁᤢᤒ. ᤐᤋᤪᤢᤛ ᤏᤢ ᤕᤢᤜᤢᤴᤏᤠᤛᤡᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤆᤥᤃᤢᤱᤒᤠ ᤔᤠᤱᤛᤣᤘᤠᤀᤥ ᤔᤢ᤹ᤀᤡᤛᤠᤶ ᤌᤠ᤺ᤛᤢᤒᤠ ᤔᤧᤏᤡ᤺ᤛᤢᤀᤠᤱ ᤒᤖᤏᤠᤒᤠᤛᤧᤴ ᤏᤢ ᤀᤡᤱᤃᤠ᤹ ᤔᤧᤍᤠ᤺ᤰᤋᤧᤳᤇᤡᤃᤧᤖᤥ॥ ᤂᤧᤱᤜᤠ᤹ ᤀᤠᤴᤇᤡᤃᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤧ ᤐᤣ᤺ᤰᤔᤠ ᤔᤧᤍᤧᤴᤍᤧ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤜᤢᤍᤡᤜᤠ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠ ᤔᤧᤍᤧᤴᤍᤧᤖᤥ॥
10 ᤂᤧᤱᤜᤠ᤹ᤖᤧᤃ ᤂᤢᤏᤡ᤹ ᤗᤢᤶᤔᤥᤒᤠ ᤕᤠᤱᤃᤧᤛᤠ᤹ᤒᤠᤜᤠ᤹ ᤑᤠ᤹ᤔᤠᤛᤡ ᤛᤢᤈᤠ ᤔᤧᤒᤡᤖᤡᤃᤧ॥ ᤜᤧᤰᤁᤣ ᤆᤥ᤺ᤰᤔᤠ ᤀᤡᤱᤃᤠ᤹ᤀᤠᤱ ᤀᤠᤛᤡᤖᤠ᤹ ᤌᤠᤅᤧᤖᤥ॥
ᤐᤠᤘᤗᤖᤧ ᤐᤋᤪᤢᤛᤧᤴ ᤀᤳᤋᤢ᤹
11 ᤁᤖ ᤐᤋᤪᤢᤛᤧᤴ ᤀᤣᤴᤋᤡᤀᤥᤁ ᤕᤧᤰᤕᤰᤁᤥ ᤋᤩᤧ᤺ᤸᤗᤧ ᤘᤣ᤹ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡᤀᤣ ᤀᤡᤱᤃᤠ᤹ ᤐᤠ᤺ᤴ ᤔᤧᤳᤋᤢᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤕᤠ᤺ᤶᤒᤰ ᤑᤣ᤺ᤴᤍᤢᤀᤠᤱ ᤘᤕᤧ॥
12 ᤋᤃᤡ ᤂᤢᤏᤧ᤹ ᤌᤡᤶᤔᤧᤴᤍᤱ ᤛᤢᤘᤠᤱᤒᤠ ᤏᤛᤠᤏᤡᤒᤠᤜᤠ᤹ᤏᤢ ᤛᤥᤖᤡᤰ ᤆᤖ ᤘᤕᤧ. ᤁᤖ ᤕᤠᤁᤢᤒᤖᤧ ᤕᤜᤢᤍᤡ ᤁᤢᤴᤈᤢᤶᤜᤠ᤹ ᤂᤧᤵᤔᤥ ᤔᤧᤍᤩᤧᤸᤗᤧ ᤂᤢᤏᤧ᤹ ᤛᤥᤖᤡᤰ ᤕᤢᤱᤔᤠᤀᤠᤱ ᤆᤠᤔᤠ ᤗᤧᤖᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧᤴᤏᤠᤱ ᤜᤷᤍᤥ ᤜᤧᤰᤔᤠᤀᤣ ᤐᤥ᤺ᤱ ᤁᤧᤗ᤹ᤒᤠ ᤂᤧᤴ ᤔᤏᤠᤜᤠ᤹ᤏᤢ ᤁᤡ᤺ᤛᤧᤀᤠᤱ ᤘᤕᤧᤖᤥ॥
13 ᤜᤧᤰᤁᤩᤠᤱ ᤘᤣ᤹ ᤕᤜᤢᤍᤡ ᤏᤛᤠᤏᤡᤒᤠᤜᤠ᤹ᤖᤧᤀᤠᤱ ᤐᤋᤪᤢᤛᤖᤧ ᤁᤡᤛᤪᤢᤰᤐᤠ ᤁᤢᤕᤧᤵᤗᤧᤰᤁᤡᤴ ᤔᤧᤏᤠ᤺ᤳᤋᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤧᤵᤗᤧᤰᤁᤡᤸᤗᤧ ᤒᤖᤏᤠᤒᤠᤛᤧᤴᤏᤠᤱ ᤗᤧᤰᤂᤢ ᤋᤣ᤹ᤖᤢᤖᤥ॥
14 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤛᤢᤏᤠᤀᤡᤱᤅᤡᤸᤗᤧᤴ ᤛᤧᤰᤂᤠᤒᤠ ᤐᤠ᤺ᤴᤏᤥ ᤔᤧᤶᤒᤳᤇᤧᤶᤒᤠ ᤏᤡ᤺ᤛᤢᤱᤛᤡᤱᤅᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤃᤡᤀᤣ ᤐᤋᤪᤢᤛᤧᤴ ᤀᤰᤂᤣ ᤔᤧᤳᤋᤢᤱᤗ ᤑᤧ᤺ᤰᤋᤢᤱ. “ᤂᤧᤏᤧ᤹ᤃ ᤕᤜᤢᤍᤡᤏᤧᤛᤠᤱ ᤕᤜᤢᤍᤡ ᤜᤧᤰᤁᤣ ᤁᤧᤴᤘᤠ᤹ᤏᤧᤴ. ᤁᤖ ᤌᤡᤶᤔᤧᤴᤍᤱ ᤛᤢᤘᤠᤱ ᤁᤢᤀᤡᤛᤡ᤺ᤰ ᤁᤧᤘᤠ᤹॥ ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤗᤧᤖᤢ ᤁᤧᤍᤣ᤺ᤛᤢᤒᤠ ᤕᤜᤢᤍᤡ ᤛᤠᤶᤕᤥᤌᤡᤶᤔᤡᤴ ᤀᤠᤰᤂᤣᤗ᤹ᤖᤡᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥ᤺ᤱ ᤗ᤹ᤖᤡᤰ ᤁᤧᤔᤧᤳᤋᤢᤛᤡᤒᤠᤒᤣ᥅”
15 ᤀᤠᤏᤡ᤹ ᤛᤠᤀᤠᤘᤠ᤺ᤴᤇᤡᤱᤅᤠᤱᤎᤥᤀᤣ ᤕᤜᤢᤍᤡᤛᤡ. ᤌᤡᤶᤔᤧᤴᤍᤱ ᤛᤢᤘᤠᤱ ᤜᤧᤰᤋᤱᤒᤠ “ᤗᤠᤕᤥᤒᤠᤛᤡ” ᤔᤧ᤺ᤴᤗᤥ॥
16 ᤀᤠᤳᤋᤡᤴ ᤔᤏᤠ᤺ᤴᤏᤠᤱ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢᤀᤠᤱ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤐᤥ᤺ᤱᤔᤠ ᤔᤧᤛᤢᤰᤏᤧᤴᤗᤥ. ᤁᤖ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤆᤥᤃᤢᤀᤠᤱᤗᤰ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤐᤥ᤺ᤱᤔᤠ ᤛᤢᤰ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤏᤡ᤹ ᤁᤢᤛᤡᤱ ᤏᤡ᤺ᤵᤔᤠ ᤐᤥ᤺ᤱᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ᤀᤠᤱ ᤂᤪᤡᤛ᤻ᤋᤀᤥᤒᤠ ᤏᤛᤠ᤺ᤴᤗᤠᤶ ᤀᤠᤵᤋᤡᤰ ᤔᤧ᤺ᤴᤏᤣ ᤀᤠᤒᤥ᤺ᤱᤗ ᤑᤠ᤹ᤀᤠᤱ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤀᤠᤈᤥᤃᤢᤶᤗᤥ. ᤁᤖ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤴ ᤀᤠᤀᤡ᤺ᤳᤋᤢᤶ ᤀᤠᤏᤠ᤺ᤳᤋᤢᤶᤒᤠᤗᤠᤶ ᤔᤧ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢᤀᤠᤱ ᤀᤠᤳᤋᤡᤴᤏᤠᤱ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤔᤧᤒᤥ᤺ᤱᤏᤧᤸᤗᤥ॥
17 ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤆᤥ᤺ᤰᤔᤠᤗᤠᤶ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤐᤥ᤺ᤱᤔᤠ ᤀᤠᤃᤥ᤺ᤳᤋᤢᤶᤔᤡᤸᤗᤧ ᤘᤣ᤹ᤜᤠ᤹ᤖᤧ ᤂᤡᤏᤡ᤹ ᤗᤠᤕᤥᤀᤥ ᤁᤧᤘᤠ᤹ᤒᤠᤏᤡᤱ ᤀᤠᤶᤔᤧᤳᤗᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤀᤠᤗᤧᤖᤢᤶᤔᤠᤱ ᤀᤠᤘᤠ᤹॥ ᤂᤧᤴ ᤑᤠ᤹ᤀᤡᤴ ᤂᤪᤡᤛ᤻ᤋᤖᤧ ᤗᤠᤕᤥᤀᤥ ᤗᤠᤶᤀᤠᤗᤥ᤺ᤒᤠᤒᤡ᥅ ᤜᤧᤰᤁᤣ ᤔᤧ᤺ᤴᤗᤥ᥄
18 ᤂᤧᤸᤗᤧ ᤁᤢᤗᤧᤰᤘᤠ ᤀᤡᤱᤃᤠ᤹ ᤗᤧᤖᤢᤱᤍᤣ᤺ᤛᤢᤱᤒᤠ ᤐᤠ᤺ᤴᤏᤡᤴ ᤕᤠᤶᤔᤥ ᤜᤢ᤹ᤖᤢᤱᤛᤡᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤗᤠᤕᤥᤒᤠ ᤐᤥ᤺ᤱᤅᤠᤖᤥ॥
19 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤥ᤺ᤳᤋᤢᤱᤅᤡᤸᤗᤧ ᤜᤠᤒᤠ ᤂᤧᤴ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤸᤗᤧ ᤀᤠᤵᤋᤡᤰ ᤁᤢ᤺ᤳᤋᤠᤱᤗᤥ॥ ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤜᤡᤱᤅᤠᤖ ᤑᤠ᤹ᤀᤠᤱ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠᤀᤠᤱ ᤛᤧᤴᤗᤵ ᤂᤥ᤺ᤔᤠ ᤋᤶᤛᤡᤴ ᤆᤥ᤺ᤰᤔᤠ ᤗᤧᤖᤢᤱᤗᤥ॥
20 ᤀᤡᤱᤃᤠ᤹ᤃ ᤂᤪᤡᤛ᤻ᤋᤧᤴᤏᤢ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤛᤩᤠᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤀᤠᤸᤗᤀᤠᤱᤎᤥ ᤀᤡᤱᤃᤠ᤹ᤃ ᤔᤧᤜᤡᤱᤅᤠᤴ. ᤁᤖ ᤂᤪᤡᤛ᤻ᤋᤧᤴ ᤀᤡᤱᤃᤠ᤹ᤀᤥ ᤜᤡᤱᤗᤥ॥ ᤀᤡᤱᤃᤠ᤹ᤃ ᤁᤴ ᤏᤠᤛᤡᤱᤃᤧᤴ ᤌᤰᤁᤥ ᤜᤡᤱᤅᤠᤸᤗᤧ ᤏᤡᤱᤘᤠ᤹ᤑᤢᤛᤠ᤺ᤀᤥᤒᤠ ᤏᤛᤠ᤺ᤴᤗᤠᤶ ᤜᤡᤱᤅᤠᤖᤥ॥ ᤂᤢᤏᤧ᤹ᤀᤣ ᤗᤢᤱᤔᤠ᤹ ᤋᤢᤰᤋᤠᤱ ᤜᤧᤰᤁᤩᤠᤱ ᤀᤠᤗᤠᤃᤡ ᤁᤢᤜᤡᤱᤔᤴᤏᤡᤴ ᤐᤡᤖᤢᤖᤥ॥
21 ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤌᤣᤏᤠᤎᤣᤒᤠ ᤔᤧᤀᤡ᤺ᤳᤋᤠᤴᤗᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤐᤥ᤺ᤱᤔᤠ ᤀᤠᤛᤢᤰᤏᤧ ᤑᤠ᤹ᤃᤪ ᤂᤪᤡᤛ᤻ᤋᤧᤴ ᤜᤏᤧᤖᤰ ᤛᤩᤧᤖᤥ॥