12
ᤕᤧᤛᤢᤖᤧ ᤁᤢᤒᤡ᤺ᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥ᤺ᤱ
ᤂᤧᤸᤗᤧ ᤆᤥᤃᤢᤸᤗᤧ ᤏᤛᤠᤏᤡᤒᤠ ᤜᤡᤱᤔᤴᤗᤧ ᤁᤢᤕᤠ᤺ᤶᤒᤣᤀᤥ ᤁᤶᤔᤩᤠᤰ ᤕᤖᤡᤰ ᤋᤥ᤺ᤴᤍᤡᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤀᤠᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤕᤠᤵᤔᤡ ᤁᤧᤜᤶᤒᤠ ᤐᤠ᤺ᤴᤜᤠ᤹ ᤏᤢ ᤁᤧᤖᤧᤰ ᤐᤖᤡᤰᤗᤧᤴ ᤕᤠᤵᤔᤡ ᤁᤧᤄ᤺ᤒᤠ ᤗᤠᤕᤥᤜᤠ᤹ ᤗᤠᤵᤑᤢᤛᤢᤶᤗᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤧᤛ᤻ᤛᤢ ᤀᤠᤒᤡᤖᤧᤒᤠ ᤗᤥ᤺ᤰᤗᤥ᤺ᤰᤁᤣ ᤆᤠ᤺ᤳᤋᤥ ᤏᤠᤛᤡ ᤌ᤺ᤳᤋᤢᤶᤗ ᤗᤥ᤺ᤰᤋᤡᤖᤥ॥ ᤀᤠᤏᤡ᤹ ᤏᤛᤠ᤺ᤴᤏᤡᤴ ᤁᤧᤜᤣ᤺ᤰᤐᤠ ᤏᤢ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤕᤧᤛᤢ᤺ᤴ ᤀᤥᤔᤧᤳᤋᤢᤶᤗᤥ॥ ᤋᤠ᤺ᤴᤍᤡ ᤁᤧᤍᤠ᤺ᤒᤠ ᤀᤥᤔᤢ ᤗ᤹ᤔᤠᤸᤗᤧ ᤗᤠᤃᤡ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱᤒᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤏᤢ ᤏᤠᤎᤠᤔᤠᤴ ᤂᤢᤏᤧ᤹ ᤌᤣᤀᤠᤱ ᤔᤧᤴᤀᤡ᤺ᤳᤋᤣ ᤌᤖᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤠᤱᤕᤢᤰᤏᤠ᤺ᤸᤗᤧ ᤁᤢᤈᤢᤵᤛᤠᤱᤗᤧᤵᤔᤠᤱ ᤕᤢᤱᤛᤡᤱᤗᤥ॥
ᤗᤠᤕᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤁᤢᤍᤰᤗᤧᤱᤅᤥ ᤔᤧᤍᤠᤖᤢᤒᤠ ᤀᤰᤋᤱᤒᤠ ᤐᤠ᤺ᤴᤜᤠ᤹ ᤁᤧᤎᤶᤒᤠ ᤕᤧᤛᤢ᤺ᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤒᤥ ᤏᤠᤕᤥ ᤁᤧᤶᤒᤥ᤺ᤰᤂᤡᤴᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤛᤰᤔᤠᤀᤠᤱ ᤔᤧᤒᤢ᤹ᤏᤧᤴᤗᤥ॥
ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤠᤏᤢᤍᤡᤱ ᤐᤠ᤺ ᤁᤢᤀᤡᤛᤡ᤺ᤰ ᤆᤥ᤺ᤰ
ᤂᤡᤏᤡ᤹ ᤗᤠᤕᤥ᤺ᤸᤗᤧ ᤁᤢᤍᤰᤗᤧᤱᤘᤠᤀᤥᤒᤠ ᤌᤱᤅᤥ ᤁᤧᤘᤕᤡᤛᤠᤱ ᤛᤡ᤺ᤔᤠᤗᤡᤱᤎᤥᤀᤥ ᤌᤠᤖᤡᤰ ᤔᤧᤱᤃᤧᤳᤋᤣ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ ᤀᤠᤒᤢᤃᤧᤴ ᤀᤠᤛ᤻ᤛᤠ᤺ᤛᤣ ᤗ᤹ᤖᤡᤰ ᤁᤧᤶᤔᤧᤳᤋᤡᤒᤠ ᤂᤠᤜᤢᤴᤏᤡᤴ ᤏᤡᤱᤘᤠ᤹ ᤁᤧᤓᤣ᤺ᤳᤇᤢᤶᤒᤡ᥅
“ᤀᤠᤒᤢᤃᤧᤴ ᤀᤠᤛ᤻ᤛᤠ᤺ᤀᤣ. ᤕᤜᤘᤣ ᤍᤠᤱᤒᤠᤸᤗᤧ ᤁᤢᤜᤧᤴᤌᤡᤶᤔᤡᤴ ᤕᤠᤱᤕᤠᤱ ᤔᤧᤀᤡ᤺ᤳᤋᤧᤴᤏᤧ᤹ᤀᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤓᤧ᤺ᤰᤁᤡᤸᤗᤧ ᤁᤧᤏᤡᤱᤛᤠᤱ ᤔᤧᤒᤢᤃᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴ ᤕᤜᤘᤣ ᤍᤠᤱᤒᤠᤸᤗᤧ ᤗᤢᤱᤔᤠ᤹ ᤋᤢᤰᤋᤢ᤹. ᤂᤧᤴ ᤜᤧᤴᤌᤡᤶ ᤕᤠᤰᤋᤢ᤹. ᤜᤧᤰᤁᤩᤠᤱ ᤂᤢᤏᤧ᤹ ᤋᤧᤴᤍᤡᤱ ᤆᤥᤃᤢᤒᤠ ᤀᤠᤳᤋᤡᤴ ᤁᤢᤛ᤻ᤛᤠ᤺ᤴᤇᤠᤱ ᤂᤢᤶᤍᤡᤱ ᤐᤡᤖᤢ᤹ᤖᤥ॥”*
ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤜᤧᤴᤌᤡᤶ ᤁᤢᤀᤡᤛᤡ᤺ᤰ ᤌᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ ᤁᤢᤀᤡᤛᤡ᤺ᤰ ᤁᤧᤀᤡ᤺ᤳᤋᤡ᤹ᤖᤥ॥ ᤀᤠᤳᤋᤡᤴ ᤐᤠ᤺ᤸᤗᤧ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤜᤧᤴᤌᤡᤶ ᤔᤧᤕᤠᤰᤋᤢᤴᤒᤣ᥅ ᤂᤡᤏᤡ᤹ ᤀᤠᤳᤋᤡᤴᤜᤠ᤹ᤖᤧ ᤐᤠ᤺ᤗᤠᤶ ᤁᤠᤰ ᤛᤠ᤺ᤜᤠ᤹ᤖᤧ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤜᤧᤴᤌᤡᤶᤔᤡᤴ ᤁᤧᤱᤄᤥ᤺ᤛᤢᤶᤔᤡᤴᤏᤧ ᤑᤠ᤹ᤃᤪ ᤂᤡᤏᤡ᤹ᤃ ᤛᤧᤰᤂᤠᤒᤠ ᤛᤠ᤺ ᤔᤧ᤺ᤴ. ᤁᤖ ᤂᤥ᤹ᤛᤠᤏᤡᤱᤗᤥ॥ ᤀᤠᤸᤗ ᤀᤡᤰᤛᤠᤒᤠ ᤀᤠᤏᤡ᤹ ᤐᤠ᤺ᤜᤠ᤹ᤖᤧ ᤜᤧᤴᤌᤡᤶ ᤀᤠᤔᤩᤠᤰᤋᤧᤸᤗᤧᤃ ᤀᤠᤏᤡ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤀᤠᤒᤡᤖᤢᤶᤛᤡᤶᤗᤥ॥ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤠᤏᤡ᤹ ᤕᤠᤶᤛᤠᤶᤔᤡᤸᤗᤧᤴ ᤐᤠ᤺ᤸᤗᤧ ᤜᤧᤴᤌᤡᤶ ᤀᤠᤕᤠᤰᤁᤡᤸᤗᤧ ᤀᤠᤏᤡ᤹ ᤛᤧᤰᤂᤠᤒᤠ ᤜᤡᤱᤔᤴ ᤂᤥ᤺ᤔᤠ ᤑᤠ᤹ᤀᤠᤱ ᤂᤧᤴ ᤜᤧᤴᤌᤡᤶᤔᤡᤸᤗᤧ ᤁᤢᤕᤢᤰᤁᤥ ᤋᤠ᤺ᤔᤠ ᤐᤥ᤺ᤱᤗᤥ॥ 10 ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤒᤠ ᤀᤠᤏᤡ᤹ ᤐᤠ᤺ᤜᤠ᤹ᤖᤧ ᤁᤢᤓᤠ ᤋᤱᤒᤣ ᤌᤠᤖᤡᤰ ᤂᤢᤏᤡ᤹ ᤔᤧᤗᤧᤛ᤻ᤛᤢ ᤔᤧᤏᤡ᤺ᤛᤢᤒᤠ ᤕᤠᤖᤡᤰ ᤜᤧᤴᤌᤡᤶ ᤀᤠᤶᤕᤠᤰᤗᤥ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤀᤡᤛᤡ᤺ᤰ ᤛᤣᤛᤣᤒᤠ ᤀᤠᤒᤥ᤺ᤱᤗ ᤑᤠ᤹ᤀᤠᤱ ᤀᤠᤏᤡ᤹ ᤀᤡᤴᤎᤠ᤺ᤰᤗᤧ ᤗᤠᤃᤡ ᤂᤢᤏᤧ᤹ ᤜᤧᤴᤌᤡᤶ ᤀᤠᤕᤠᤰᤗᤥ॥ 11 ᤀᤠᤳᤋᤡᤴ ᤜᤧᤴᤌᤡᤶᤔᤡᤴᤏᤠᤱ ᤂᤥ᤺ᤔᤠ ᤕᤧᤶᤔᤥ ᤂᤧᤴ ᤛᤡᤖᤠ᤹ ᤁᤧᤎᤠᤱᤒᤠ ᤔᤧᤈᤥ᤺ᤰᤏᤧᤴᤗᤥ ᤁᤖ ᤁᤱᤃ ᤛᤠᤰᤗᤥ. ᤜᤧᤰᤁᤣᤛᤠᤱ ᤕᤠᤱᤛᤡ ᤂᤧᤴ ᤜᤧᤴᤌᤡᤶᤗᤠᤶ ᤛᤃᤧᤎᤠᤛᤡᤱᤒᤠᤜᤠ᤹ ᤛᤠᤶᤕᤥᤏᤡᤒᤠ ᤜᤡᤱᤔᤴᤏᤥ ᤔᤧᤜᤡᤱᤅᤠᤱ ᤛᤏᤠᤖᤢᤱ ᤔᤧᤄᤥ᤺ᤛᤢ᤹ᤖᤥ॥
12 ᤂᤧᤸᤗᤧ ᤆᤥᤃᤢᤸᤗᤧ ᤛᤥᤖᤥ ᤁᤧᤗ᤹ᤒᤠ ᤜᤢᤰᤜᤠ᤹ ᤑᤥ᤺ᤰᤂᤧᤶᤔᤧ᤹ ᤜᤧᤰᤁᤩᤠᤱ ᤌᤧᤃᤰᤁᤰ ᤁᤧᤕᤱᤒᤠ ᤌᤢᤱᤒᤥᤜᤠ᤹ ᤁᤧᤎᤢᤶᤒᤠ ᤆᤥᤃᤧᤶᤔᤧ᤹॥ 13 ᤗᤠᤱᤛᤰᤐᤠᤜᤠ᤹ ᤔᤧᤘᤣ᤺ᤳᤋᤠᤱ ᤔᤧᤴᤈᤥ᤺ᤴᤏᤣ ᤔᤧᤱᤃᤧᤱᤅᤣ ᤗᤠᤱᤄᤣ᤺ᤰᤔᤠ ᤔᤧᤛᤢᤰᤗ ᤑᤠ᤹ᤀᤠᤱ ᤂᤡᤏᤡ᤹ ᤗᤠᤶᤔᤡᤴ ᤋᤥ᤺ᤴᤍᤧᤶᤔᤧ᤹ᤀᤥ॥
ᤏᤡᤱᤘᤠ᤹ᤑᤢᤔᤠᤱᤗᤠᤶ ᤛᤠᤶᤍᤡᤱ
14 ᤁᤠᤰ ᤔᤏᤠᤜᤠ᤹ᤏᤢ ᤛᤏᤠᤖᤢᤱᤅᤥ ᤘᤠ᤹ᤔᤠ ᤏᤢ ᤛᤣᤛᤣ ᤐᤥ᤺ᤱᤔᤠ ᤁᤠᤰ ᤐᤖᤡᤰᤗᤧ ᤋᤶᤛᤡᤴ ᤆᤥᤃᤧᤶᤔᤧ᤹ᤀᤥ॥ ᤛᤣᤛᤣ ᤔᤧᤶᤒᤥ᤺ᤱᤅᤣᤃ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤕᤜᤘᤣ ᤍᤠᤱᤒᤠᤴ ᤔᤧᤏᤡ᤺ᤛᤢᤴᤗᤥ॥ 15 ᤜᤧᤰᤁᤩᤠᤱ ᤂᤡᤏᤡ᤹ ᤗᤢᤶᤔᤥ ᤀᤠᤳᤋᤡᤴᤏᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶ ᤔᤧᤱᤄᤥ᤺ᤔᤏᤠᤒᤠ ᤔᤧᤒᤥ᤺ᤱᤏᤧᤴᤗ. ᤛᤡᤰ ᤐᤥ᤺ᤰᤔᤠᤸᤗᤧ ᤂᤣᤔᤠ ᤌᤰᤔᤠ ᤔᤧᤓᤥ᤺ᤰᤂᤢᤴᤗ. ᤜᤧᤰᤁᤩᤠᤱ ᤂᤧᤴ ᤏᤡᤱ ᤁᤢᤀᤡᤛᤡ᤺ᤰᤐᤠ ᤛᤡᤰᤁᤢ᤺ᤔᤠᤸᤗᤧ ᤘᤣ᤹ ᤔᤏᤠᤜᤠ᤹ᤀᤠᤱ ᤔᤧᤈᤡ᤺ᤴᤍᤢᤴᤇᤡᤸᤗ ᤑᤠ᤹ᤀᤠᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥ 16 ᤜᤧᤰᤁᤩᤠᤱ ᤀᤠᤳᤋᤡᤴᤏᤠᤱ ᤆᤠᤃᤧᤗᤠᤶᤒᤠ ᤀᤡᤃᤪ ᤀᤧᤛᤠᤀᤢ ᤜᤧᤰᤋᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤱᤃᤥ᤺ᤵᤔᤏᤠ ᤔᤧᤶᤒᤥ᤺ᤱᤏᤧᤴᤗᤖᤥ॥ ᤂᤧᤸᤗᤧᤃ ᤆᤠᤔᤠ ᤌᤢᤱᤔᤠᤖᤧᤗᤠᤃᤡ ᤋᤢᤶᤒᤠ ᤁᤢᤕᤢᤰᤁᤡᤴ ᤗᤧᤰᤋᤢᤖᤥ॥ 17 ᤜᤧᤰᤁᤩᤠᤱ ᤕᤠᤱᤛᤡ ᤁᤢᤶᤒᤠᤗᤠᤶᤒᤠ ᤔᤢ᤹ᤀᤡᤛᤠᤶ ᤂᤥ᤺ᤔᤠ ᤑᤠ᤹ᤀᤠᤱ ᤀᤠᤰᤂᤧᤴ ᤁᤥ᤺ᤳᤋᤢᤛᤠᤱ ᤂᤧᤴ ᤏᤠ᤹ᤖᤧᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤏᤡ᤺ᤛᤢᤶᤗᤥ॥ ᤂᤧᤸᤗᤧ ᤁᤢᤔᤡᤰᤘᤠ ᤌᤠ᤺ᤛᤢᤖ ᤔᤢ᤹ᤀᤡᤛᤠᤶ ᤂᤥ᤺ᤔᤠ ᤏᤡᤱᤘᤠ᤹ ᤆᤥᤃᤢᤛᤠᤱ ᤋᤠᤵᤑᤧ᤺ᤶᤒᤠ ᤁᤢᤕᤠ᤺ᤶᤒᤰᤗᤠᤶᤒᤠ ᤏᤢ᤺ᤱᤔᤠ ᤕᤧᤶᤔᤡᤴ ᤗᤧᤰᤋᤧᤒᤣᤀᤠᤱ ᤘᤕᤧᤖᤥ॥
18-19 ᤂᤡᤏᤡ᤹ᤃ ᤛᤡᤏᤠᤀᤡ ᤁᤥ᤺ᤰᤔᤠ ᤜᤧᤰᤋᤱᤒᤠ ᤛᤢ᤺ᤔᤠ ᤛᤢᤰᤁᤧᤍᤧᤵᤐᤠ ᤍᤧᤴᤏᤥ ᤔᤧᤴᤍᤠᤀᤣ ᤁᤧᤘᤕᤡ᤹. ᤜᤧᤰᤁᤩᤠᤱ ᤔᤡ ᤁᤧᤍᤡ᤺ᤵᤐᤠ. ᤂᤠᤃᤧᤍᤠᤶᤒᤠ. ᤔᤠᤰᤁᤧᤗ᤹ᤒᤠ ᤜᤧᤰᤁᤩᤠᤱ ᤁᤡᤵᤔᤠ ᤁᤧᤄᤢ᤺ᤒᤠ ᤛᤥᤖᤡᤳ ᤁᤣᤈᤱ ᤁᤧᤜᤢᤒᤠ ᤍᤧᤴᤏᤥ. ᤌᤢᤳᤋᤢᤖᤡ᤺ᤵᤐᤠ ᤔᤢᤰᤋᤧᤒᤠ ᤀᤡᤰᤗᤠ ᤏᤢ ᤁᤡᤵᤔᤠ ᤁᤧᤄᤢᤒᤠ ᤀᤡᤰᤗᤠ᤺ᤸᤗᤧ ᤁᤢᤒᤣᤛᤠᤱ ᤔᤧᤴᤍᤠᤀᤣ ᤁᤧᤘᤕᤡ᤹ᤖᤥ॥ ᤂᤧᤴ ᤁᤧᤄᤧᤶᤒᤠᤜᤠ᤹ᤖᤧ ᤕᤠᤶᤔᤥ ᤀᤰᤋᤱᤒᤠ ᤁᤡᤵᤔᤠ ᤁᤧᤄᤢ᤺ᤒᤠ ᤀᤡᤰᤗᤠᤀᤥ ᤂᤢᤏᤡ᤹ᤏᤢ ᤔᤧᤒᤠ᤺ᤳᤏᤧᤴᤗ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤖᤥ॥ 20 ᤌᤣᤀᤠᤱᤓᤧᤸᤗᤧ “ᤁᤴ ᤁᤥ᤺ᤰᤔᤠᤴ ᤁᤧᤛᤢᤒᤠ ᤀᤠᤳᤋᤡᤴ ᤌᤰᤛᤠ᤺ᤴᤇᤠᤱ ᤗᤢᤱᤅᤡᤸᤗᤧ ᤗᤧᤵᤋᤧᤶ ᤛᤧᤖᤧᤶᤔᤧ᤹”* ᤁᤧᤗ᤹ᤒᤠ ᤀᤡᤱᤈᤠ᤺ᤱᤅᤡᤴ ᤂᤧᤱᤜᤠ᤹ᤖᤧ ᤌ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥ 21 ᤁᤴ ᤏᤡᤕᤠᤖᤠ᤺ᤱᤃ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢ᤺ᤒᤠ ᤆᤥᤃᤧ. ᤜᤧᤰᤁᤩᤠᤱ ᤔᤥᤛᤠᤖᤧᤀᤠᤱ ᤀᤡᤱᤃᤠ᤹ᤃ ᤀᤠᤃᤡ᤺ᤔᤠᤸᤗᤧ ᤕᤱᤅᤠᤖᤥ* ᤗ᤹ᤖᤡᤰ ᤐᤠ᤺ᤳᤋᤢᤖᤥ॥ 22 ᤁᤖ ᤂᤡᤏᤡ᤹ᤃ ᤛᤡᤕᤥᤏ ᤁᤥ᤺ᤰᤔᤠᤀᤥ. ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤧᤰᤕᤰ ᤛᤠᤱᤃᤪᤠᤶᤐᤣᤍᤠᤱᤒᤠ ᤕᤖᤢᤛᤗᤧᤶᤔᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡᤖᤥ॥ ᤂᤡᤏᤡ᤹ᤃ ᤜᤧᤴᤇᤡᤱ ᤜᤧᤴᤇᤡᤱᤅᤠᤱᤎᤥ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤀᤥᤔᤢ ᤗ᤹ᤔᤠᤖᤧ ᤁᤢᤎᤡᤶᤒᤠ ᤂᤢᤏᤡ᤹ ᤆᤢᤶᤗᤢᤱᤅᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ॥ 23 ᤂᤡᤏᤡ᤹ᤃ ᤛᤠᤱᤃᤪᤠᤶᤐᤣᤍᤠᤱᤅᤥ ᤂᤢᤏᤡ᤹ ᤔᤡᤱᤜᤠ᤹ ᤛᤠᤵᤋᤧᤀᤠᤱ ᤁᤧᤘᤠ᤹ᤒᤠ ᤋᤢᤶᤒᤠ ᤗᤰ ᤁᤧᤄᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤆᤢᤶᤗᤢᤱᤅᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ᤃ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤂᤠᤛᤧᤴᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤥ. ᤜᤧᤰᤁᤩᤠᤱ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤔᤧᤈᤥᤃᤧᤒᤠ ᤛᤠᤶᤕᤥᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤕᤠᤶᤛᤠᤶᤗᤢᤶᤔᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ॥ 24 ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤏᤠᤜᤠ᤹ ᤗᤢᤶᤔᤥ ᤁᤢᤛᤱ ᤔᤠᤱᤜᤢᤵᤗᤧᤴ ᤐᤠ᤺ᤴᤍᤱᤛᤠᤒᤠ ᤕᤧᤛᤢᤖᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡ᤹॥ ᤜᤧᤰᤁᤩᤠᤱ ᤂᤡᤏᤡ᤹ᤃ ᤜᤠᤒᤡᤗᤖᤧ ᤁᤢᤔᤠᤰᤂᤡ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤏᤢ᤺ᤒᤠ ᤐᤠ᤺ᤴ ᤁᤧᤒᤠ᤺ᤵᤐᤠ ᤛᤠᤱᤔᤏᤠᤒᤠ ᤕᤧᤛᤢᤖᤧ ᤁᤢᤔᤠᤰᤂᤡ᤹ᤀᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡᤖᤥ॥*
25 ᤂᤡᤏᤡ᤹ᤏᤢ ᤁᤧᤒᤠ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤴᤏᤠ᤹ᤔᤠ ᤑᤠ᤹ᤀᤠᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤒᤠ ᤀᤡᤱᤃᤧᤛᤠᤒᤠ ᤔᤥᤛᤠ᤺ᤸᤗᤧ ᤁᤢᤛᤠᤶᤍᤡᤱᤅᤡᤴ ᤂᤧᤶᤔᤠ ᤔᤧᤴᤍᤧᤶᤔᤏᤠᤒᤠ ᤀᤡᤛᤪᤠᤀᤡᤗᤡᤜᤠ᤹ ᤋᤠᤱᤔᤧᤴᤇᤧ᤺ᤵᤋᤧᤴᤏᤡᤸᤗᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤍᤡᤱ ᤀᤠᤒᤡ᤺ᤸᤗᤧ ᤀᤠᤏᤡ᤹ ᤀᤠᤏᤠ᤹ᤖᤢᤶᤏᤧ ᤑᤠ᤹ᤃᤪ ᤀᤠᤏᤡ᤹ᤀᤠᤱ ᤀᤠᤴᤍᤠᤱᤏᤧᤴᤗᤥ॥ 26 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤡᤏᤠᤀᤡ ᤁᤥ᤺ᤰᤔᤠᤗᤠᤶ ᤐᤠᤖᤧᤸᤗᤧ ᤁᤢᤀᤡᤰᤗᤠ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤕᤰᤂᤢ. ᤁᤖ ᤀᤠᤸᤗᤥ ᤂᤢᤏᤧ᤹ ᤔᤠᤱᤜᤧᤰ ᤆᤥᤃᤢᤀᤠᤱ ᤘᤠ᤹. “ᤕᤠᤶᤔᤥ ᤌᤡᤰᤗᤧᤱ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴᤗᤰ ᤔᤧ᤺ᤴ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤡᤴᤏᤠᤱ ᤕᤰᤂᤢᤱᤗᤥ॥”* 27 ᤁᤴ “ᤕᤠᤶᤔᤥ ᤌᤡᤰᤗᤧᤱ” ᤐᤠ᤺ᤵᤔᤏᤠᤒᤠ ᤛᤢᤳᤗᤠ᤺ᤸᤗᤧᤃ ᤁᤠᤰ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤴ ᤕᤱᤅᤠᤱ ᤆᤳᤇᤡᤱ ᤐᤣ᤺ᤰᤗᤥ ᤁᤧᤗ᤹ᤒᤠᤴ ᤀᤥᤛᤣ᤺ᤴᤀᤠᤎᤠᤰᤗᤥ. ᤁᤖ ᤕᤱᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤐᤠ᤺ᤴᤜᤠ᤹ᤖᤰ ᤏᤧᤕᤠ᤺ᤰᤗᤥ॥ 28 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤕᤱᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤜᤠᤱᤈᤢᤶᤔᤡᤴ ᤀᤠᤄᤥ᤺ᤛᤢᤶᤗ ᤀᤠᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤏᤥᤃᤧᤴᤛᤠᤒᤠ ᤐᤥ᤺ᤰᤂᤡᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤡᤱᤘᤠ᤹ ᤋᤠ᤺ᤔᤠ ᤑᤠ᤹ᤀᤠᤱ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤀᤡ ᤁᤡᤖᤢᤶᤗ ᤛᤣᤘᤠ ᤆᤥᤃᤢᤶᤗᤥ॥ 29 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ “ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤁᤠᤰ ᤔᤡᤍᤡᤰᤔᤠ ᤁᤧᤛᤢᤰᤐᤠ ᤐᤠ᤺ᤴᤜᤠ᤹ ᤂᤠᤵᤐᤢ ᤌᤩ᤺ᤱ ᤁᤧᤈᤥ᤺ᤰᤐᤠ ᤔᤡᤖᤥ॥”*
* 12:6 ᤛᤡᤘᤠᤍᤡᤱ ᤂᤠᤜᤢᤴ ᥉.᥇᥇-᥇᥈ * 12:20 ᤗᤠᤶᤍᤡ᤺ᤰ ᥇᥏.᥇᥉ * 12:21 ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱ ᥏.᥇᥏ * 12:24 ᤀᤢᤴᤇᤣ᤺ᤴ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤐᤡᤔᤠᤖᤧ ᤗᤠᤃᤡ ᤔᤠᤱᤜᤡᤶᤔᤥᤒᤠ ᤛᤣᤛᤣ ᤋᤧᤴᤏᤥ ᤔᤠᤰᤂᤡ᤹ ᤛᤠᤰᤂᤢᤒᤠ ᤜᤧᤰᤁᤣ. ᤀᤠᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤐᤡᤔᤠᤖᤧ ᤗᤠᤃᤡ ᤕᤧᤛᤢᤖᤧ ᤁᤢᤔᤠᤰᤂᤡ᤹ᤀᤡᤴ ᤘᤠᤍᤣ᤺ᤴᤍᤢ॥ ᤁᤖ ᤁᤕᤡᤏᤖᤧ ᤛᤧᤖᤢᤒᤠ ᤁᤢᤴᤛᤠ᤹ ᤜᤠᤒᤡᤗᤖᤧ ᤁᤢᤔᤠᤰᤂᤡ᤹ᤀᤡᤸᤗᤧ ᤂᤢᤶᤍᤡᤱ ᤏᤠ᤺ᤰᤋᤢᤖ ᤀ᤺ᤰᤋᤧ (ᤋᤥᤗᤡᤱᤛᤥᤔᤢ ᥊) * 12:26 ᤜᤠᤃ᤻ᤃᤤ ᥈.᥌ * 12:29 ᤗᤠᤶᤍᤡ᤺ᤰ ᥈᥊.᥈᥌. ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱ ᥊.᥈᥊