19
ᤕᤧᤛᤢ᤺ᤴ ᤛᤡ᤺ᤔᤧᤸᤗᤧ ᤂᤢᤶᤍᤡᤱ ᤔᤧᤒᤡᤖᤢ᤹
ᤔᤳᤋᤡ ᥈᥍.᥇᥋-᥉᥇. ᤔᤷᤁᤢᤛ ᥇᥋.᥌-᥈᥆. ᤗᤢᤁᤠ ᥈᥉.᥇᥉-᥈᥋
ᤜᤧᤰᤁᤩᤠᤱ ᤐᤡᤗᤠᤋᤛᤖᤧ ᤕᤧᤛᤢ᤺ᤴ ᤛᤠ᤹ᤖᤡᤰ ᤋᤧ᤺ᤶᤓᤢᤰ ᤕᤠᤰᤐᤠᤱᤄᤢᤛᤡᤖᤥ॥ ᤌᤰᤛᤢᤒᤠᤜᤠ᤹ᤖᤧ ᤋᤡᤱᤃᤪᤣ᤺ᤰᤗᤧᤴ ᤋᤡᤆ᤺ ᤔᤧᤓᤕᤢᤀᤠᤱ ᤕᤧᤛᤢ᤺ᤴ ᤔᤧᤄᤢ᤺ᤰᤋᤢ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤐᤖᤠᤴᤗᤠ ᤜᤠᤱᤋᤣ᤺ᤳᤋᤡᤴ ᤔᤧᤈᤠᤰᤋᤢᤖ ᤁᤢᤍᤃᤡ ᤔᤧᤒᤣᤀᤠᤱ ᤀᤧᤳᤗᤧᤱ ᤕᤜᤢᤍᤡ ᤜᤠᤱᤅᤣ. ᤋᤡᤕᤠᤜᤠ᥄ ᤗ᤹ᤖᤡᤰ ᤔᤧᤔᤧᤳᤋᤢᤖ ᤁᤢᤏᤧᤍᤧᤱᤒᤠᤴ ᤔᤧᤗᤧᤰᤂᤢ ᤔᤧᤒᤡᤖᤢᤖᤥ॥
ᤐᤡᤗᤠᤋᤛᤧᤴ ᤕᤠᤶᤔᤥ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤕᤜᤢᤍᤡᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤏᤠᤀᤥ ᤀᤡᤱᤃᤠ᤹ ᤌᤣᤀᤠᤱ ᤀᤠᤵᤋᤡᤰ ᤔᤧᤱᤄᤥ᤺ᤒᤠᤴᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗ ᤑᤠ᤹ᤀᤠᤱ ᤀᤡᤱᤃᤠ᤹ ᤗᤠ᤺ᤰᤁᤠᤳ ᤗ᤺ᤳᤋᤢᤱᤗ ᤐᤳᤋᤠᤖᤥ॥” ᤜᤧᤰᤁᤩᤠᤱ ᤋᤡᤱᤃᤪᤣ᤺ᤰ ᤋᤡᤆ᤺ᤴ ᤔᤧᤄᤢ᤺ᤰᤋᤢᤒᤠ ᤏᤢ ᤐᤖᤠᤴᤗᤠ ᤜᤠᤱᤋᤣ᤺ᤳᤋᤡᤴ ᤔᤧᤈᤠᤰᤋᤢᤒᤠ ᤕᤧᤛᤢ᤺ᤴ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤖᤥ॥ ᤜᤧᤰᤁᤩᤠᤱ ᤐᤡᤗᤠᤋᤛᤖᤧ ᤔᤧᤳᤋᤢᤛᤡ. “ᤂᤠ. ᤁᤴ ᤔᤏᤠ᤺ᤴ ᤀᤥᤔᤧᤳᤋᤧᤶᤔᤧ᤹᥄”
ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤔᤠᤱᤜᤡᤶ ᤁᤧᤃᤥ᤺ᤒᤠ ᤋᤡᤗᤡᤱᤃᤠᤜᤠ᤹ᤖᤧ ᤂᤢᤏᤧ᤹ ᤔᤧᤏᤡ᤺ᤛᤢᤏᤠᤔᤧ᤺ᤴᤏᤣ “ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤂᤧᤴ ᤑᤥ᤺ᤴᤍᤧ᤹ᤀᤥ. ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤂᤧᤴ ᤑᤥ᤺ᤴᤍᤧ᤹ᤀᤥ” ᤗ᤹ᤖᤡᤰ ᤀ᤺ᤰᤔᤠ ᤔᤧᤜᤣ᤺ᤰᤋᤧᤖᤥ॥
ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ᤀᤣ ᤁᤴ ᤔᤏᤠ᤺ᤴ ᤋᤣ᤹ᤖᤧᤶᤔᤧ᤹ᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧᤶᤔᤧ᤹ᤀᤥ. ᤁᤖ ᤀᤡᤱᤃᤠ᤹ᤃ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣᤀᤠᤱ ᤀᤠᤵᤋᤡᤰ ᤔᤧᤱᤄᤥ᤺ᤒᤠᤴᤗᤥ॥”
ᤁᤖ ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧ ᤁᤳᤋᤢᤶᤒᤧᤒᤠ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰᤃ ᤂᤧᤴ ᤛᤡ᤺ᤔᤠᤀᤣ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤒᤠᤅᤣ ᤏᤡᤱᤘᤠ᤹ᤑᤢᤛᤠ᤺ᤀᤠ ᤑᤠ᤹ᤀᤠᤱ ᤔᤧᤳᤇᤡᤱᤅᤠᤱ ᤘᤠ᤹ᤖᤥ॥”
ᤐᤡᤗᤠᤋᤛᤖᤧ ᤂᤧᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤀᤠᤸᤗᤛᤠᤱ ᤛᤠ᤹ᤖᤡᤰ ᤁᤡ᤺ᤛᤧᤖᤥ॥ ᤂᤢᤏᤧ᤹ ᤕᤠᤶᤔᤥ ᤜᤠᤱᤜᤡᤶ ᤛᤡᤃᤠᤱ ᤗᤠ᤺ᤛᤧᤀᤠᤱ ᤕᤧᤛᤢ᤺ᤴ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤀᤠᤳᤋᤥᤗᤠᤶ ᤁᤧᤍᤩᤧᤒᤠᤒᤣ᥅” ᤁᤖ ᤕᤧᤛᤢᤖᤧ ᤌᤣᤀᤠᤱ ᤏᤥᤃᤵ ᤔᤧᤒᤡᤖᤢᤴᤗᤥ॥ 10 ᤐᤡᤗᤠᤋᤛᤖᤧ ᤕᤧᤛᤢ᤺ᤴ ᤔᤧᤳᤋᤢ. “ᤀᤡᤱᤃᤠ᤹ᤏᤢ ᤌᤣᤀᤠᤱ ᤁᤧᤶᤒᤠ᤺ᤳᤏᤧᤶᤒᤠ᥅ ᤂᤧᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤶᤔᤠ ᤏᤢ ᤗᤧᤵᤔᤠᤍᤣ᤺ᤔᤠ ᤕᤢᤰ ᤁᤳᤋᤢᤱᤒᤠᤴ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤴᤒᤡ᥅”
11 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤶᤒᤡᤖᤧᤴᤏᤡᤸᤗᤧᤃ ᤀᤡᤱᤃᤠ᤹ ᤛᤶᤍᤠᤱ ᤕᤢᤰ ᤁᤧᤱᤃᤳᤋᤢᤴᤒᤠᤖᤥ॥ ᤁᤖ ᤀᤡᤱᤃᤠ᤹ ᤂᤧᤏᤧ᤹ᤀᤥ ᤕᤠᤵᤔᤡ ᤜᤢᤰ ᤁᤧᤛᤢᤵᤐᤠᤸᤗᤧ ᤁᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤗᤠᤕᤥᤖᤧᤴ ᤀᤠᤵᤋᤡᤰ ᤂᤥ᤺ᤛᤢ᤹ᤖᤥ॥”
12 ᤜᤧᤰᤁᤣ᤺ᤸᤗᤧᤃ ᤐᤡᤗᤠᤋᤛᤖᤧ ᤕᤧᤛᤢ᤺ᤴ ᤗᤧᤵᤔᤠᤍᤣ᤺ᤔᤠ ᤏᤡᤱᤘᤠ᤹ ᤆᤥᤃᤢ. ᤁᤖ ᤕᤜᤢᤍᤡᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤀᤰᤂᤣ ᤔᤧᤒᤠ᤺ᤳᤋᤢᤖ ᤔᤧᤀ᤺ᤰᤋᤧᤖᤥ. “ᤁᤴ ᤔᤏᤠ᤺ᤴ ᤁᤧᤗᤧᤖᤢ ᤁᤧᤍᤣ᤺ᤛᤢᤏᤧ ᤑᤠ᤹ᤃᤪ ᤂᤧᤏᤧ᤹ᤃ ᤛᤡᤈᤖᤗᤧ* ᤁᤢᤴᤍᤣ᤺ᤱᤒᤠ ᤁᤧᤶᤒᤥ᤺ᤱᤏᤧᤴᤗᤥ॥ ᤀᤠᤳᤋᤡᤸᤗᤧ ᤀᤠᤒᤠᤅᤣ ᤜᤠᤱ ᤐᤥ᤺ᤱᤔᤠ ᤏᤡᤱᤘᤠ᤹ ᤆᤥᤃᤢ᤹ ᤂᤧᤴ ᤛᤡᤈᤖᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ॥”
13 ᤐᤡᤗᤠᤋᤛᤖᤧ ᤂᤧᤴ ᤂᤧᤵᤛᤢᤀᤠᤱ ᤕᤧᤛᤢ᤺ᤴ ᤗᤠ᤺ᤰᤁᤠᤳ ᤗ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤗᤢᤱ ᤑᤧ᤺ᤔᤏᤠᤒᤠ ᤂᤠᤛᤧᤴ ᤕᤢᤰᤏᤠᤀᤥ ᤕᤢᤱᤛᤡᤱᤗᤥ॥ (ᤂᤧᤴ ᤋᤧᤴᤏᤡᤴ ᤜᤡᤒᤪᤢ ᤐᤠ᤺ᤴᤏᤥ ᤃᤒ᤻ᤒᤌᤠ ᤔᤧᤔᤧᤳᤋᤢᤖᤥ॥) 14 ᤜᤧᤰᤁᤩᤠᤱ ᤁᤱᤃ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤸᤗᤧ ᤌᤡᤰ ᤕᤧᤴ ᤋᤃᤡ ᤗᤧᤴᤍᤡᤰ ᤐᤥ᤺ᤰᤂᤧᤖ ᤐᤳᤇᤧ॥
ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤜᤠᤱᤅᤡᤴ ᤁᤵᤔᤥ ᤘᤠ᤹ᤖᤥ॥”
15 ᤜᤧᤰᤁᤣ᤺ᤸᤗᤧ ᤕᤜᤢᤍᤡᤜᤠ᤹ ᤛᤠ᤹ᤖᤡᤰ ᤔᤧᤀ᤺ᤰᤋᤧᤖ ᤔᤧᤔᤧᤳᤋᤢ. “ᤂᤧᤴ ᤋᤣ᤹ᤖᤧ᤹ᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧ᤹᥄”
ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤜᤠᤱᤅᤡᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤢᤱᤒᤠᤒᤡ᥅”
ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧ ᤜᤠᤱᤅᤡᤱᤃ ᤛᤡᤈᤖᤧᤴᤗᤰᤗᤥ॥” 16 ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤕᤧᤛᤢ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤖ ᤑᤠ᤹ᤀᤠᤱ ᤜᤢᤰᤛᤢᤵᤋᤢᤛᤡᤖᤥ॥
ᤕᤧᤛᤢ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢ᤹
ᤔᤳᤋᤡ ᥈᥍.᥉᥈-᥊᥊. ᤔᤷᤁᤢᤛ ᥇᥋.᥈᥇-᥉᥈. ᤗᤢᤁᤠ ᥈᥉.᥈᥌-᥊᥉
ᤂᤧᤸᤗᤧ ᤆᤥᤃᤢᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤕᤧᤛᤢ᤺ᤴ ᤂᤧᤵᤔᤥᤗᤠᤶ ᤔᤧᤍᤣ᤹ᤖᤢᤖᤥ॥ 17 ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤔᤧᤃᤢ᤺ᤳᤋᤢᤀᤠᤱ ᤔᤡᤰᤂᤥ᤺ᤰᤐᤠ ᤁᤥ᤺ᤰᤔᤠᤀᤥ ᤔᤧᤍᤣ᤹ᤖᤢᤖᤥ॥ (ᤂᤧᤴ ᤁᤥ᤺ᤰᤔᤠᤴ ᤜᤡᤒᤪᤢ ᤐᤠ᤺ᤴᤏᤥ ᤃᤗᤃᤌᤠ ᤔᤧᤔᤧᤳᤋᤢᤖᤥ॥) 18 ᤂᤧᤵᤔᤥ ᤕᤧᤛᤢ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤔᤧᤓᤥ᤺ᤴᤍᤢ॥ ᤂᤢᤏᤧ᤹ ᤁᤢᤈᤢᤵᤛᤠᤱ ᤏᤢ ᤁᤢᤓᤧᤴᤇᤠᤱᤒᤠ ᤛᤡᤗᤠᤶᤛᤠᤰᤔᤠ ᤛᤡᤱᤜᤠ᤹ ᤛᤶᤍᤠᤱ ᤏᤧᤵᤑᤢ ᤔᤏᤠᤜᤠ᤹ᤀᤠᤱ ᤔᤧᤓᤥ᤺ᤴᤍᤢᤛᤡᤖᤥ॥
19 ᤐᤡᤗᤠᤋᤛᤖᤧ ᤏᤠᤛᤖᤋᤒᤠ ᤕᤧᤛᤢ ᤕᤜᤢᤍᤡ ᤜᤠᤱ ᤗ᤹ᤖᤡᤰ ᤁᤧᤒᤵᤐᤠ ᤀᤠᤵᤋᤡᤰ ᤛᤰᤁᤡᤴ ᤛᤠᤵᤋᤢᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤶᤔᤠ ᤐᤠᤱᤄᤢᤛᤡᤖᤥ॥ 20 ᤂᤧᤴ ᤕᤖᤡᤰ ᤕᤜᤢᤍᤡᤜᤠ᤹ᤖᤧ ᤔᤧᤏᤡ᤺ᤖᤢᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤋᤧᤴᤏᤡᤴ ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱᤅᤣ ᤏᤧᤛ᤻ᤛᤧ ᤜᤧᤰᤁᤩᤠᤱ ᤂᤧᤱᤃ ᤜᤡᤒᤪᤢ. ᤗᤩᤠᤋᤡᤏ ᤏᤢ ᤃᤪᤡᤁ ᤐᤠ᤺ᤴᤍᤠᤱᤅᤥ ᤛᤠᤵᤋᤧᤀᤠᤱ ᤐᤳᤇᤧ॥ 21 ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤐᤡᤗᤠᤋᤛᤧᤴ ᤀᤰᤂᤣ ᤔᤧᤔᤧᤳᤋᤢᤖ ᤔᤧᤀᤳᤋᤢᤖᤥ. “ᤂᤧᤴ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤗ᤹ᤖᤡᤰ ᤔᤧᤛᤠᤵᤋᤧᤴᤏᤧ᤹ᤀᤥ. ᤁᤖ ᤁᤴ ᤔᤏᤠ᤺ᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱᤀᤠ ᤗ᤹ᤖᤡᤰ ᤐᤠ᤺ᤳᤋᤢᤖᤥ ᤗ᤹ᤖᤡᤰ ᤛᤠᤵᤋᤧ᤹ᤀᤥ॥”
22 ᤁᤖ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤆᤩᤠ ᤛᤠᤵᤋᤢᤱ. ᤂᤧᤴ ᤛᤠᤵᤋᤢᤱ ᤛᤠᤵᤋᤢᤱ॥”
23 ᤌᤰᤛᤢᤒᤠᤜᤠ᤹ᤖᤧ ᤕᤧᤛᤢ᤺ᤴ ᤔᤧᤓᤥ᤺ᤴᤍᤢ ᤔᤧᤛᤢᤖᤢᤀᤠᤱ ᤂᤢᤏᤧ᤹ ᤁᤢᤍᤣ᤺ᤳᤜᤠ᤹ ᤗᤡᤛᤡ ᤗᤰᤁᤥ ᤔᤧᤜᤠ᤺ᤳᤇᤡᤱᤗᤥ॥ ᤁᤖ ᤁᤢᤗᤃᤣ᤺ᤳᤋᤡᤴ* ᤁᤢᤍᤢᤶᤒᤣ ᤔᤧ᤺ᤴᤏᤣᤒᤠ ᤛᤷᤎᤰ ᤑ᤺ᤔᤏᤠᤒᤠ ᤆᤥᤃᤧ. 24 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤁᤱᤃ ᤀᤠᤏᤡ᤹ ᤌᤧ᤺ᤰᤂᤢᤶ ᤔᤧ᤺ᤴᤗᤥ. ᤁᤖ ᤋ᤹ᤕᤠ᤺ᤴᤛᤥ᤺ᤴ ᤁᤧ᤺ᤛᤢᤶᤗᤥ॥ ᤀᤠᤳᤋᤡᤸᤗᤧ ᤁᤢᤗᤰᤁᤥ ᤌᤠ᤺. ᤜᤠᤖᤠ᤹ ᤂᤧᤸᤗᤧᤀᤣ ᤂᤧᤴ ᤋᤣ᤹ᤖᤢᤏᤡᤖᤥ॥” ᤁᤴ ᤐᤠ᤺ᤴᤏᤡᤱᤃ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤀᤠᤈᤠᤱᤜᤠ᤹ ᤔᤧᤜᤠ᤺ᤳᤇᤡᤱᤗᤥ. ᤜᤧᤰᤁᤩᤠᤱ ᤀᤠᤍᤣ᤺ᤳᤋᤡᤴ ᤋ᤹ᤕᤠᤏ᤺ᤴᤛᤥ᤺ᤴ ᤔᤧᤃᤧᤛᤢ᤹ᤖᤥ ᤗ᤹ᤖᤡᤰ ᤛᤠᤵᤋᤧᤀᤠᤱ ᤁᤧᤒᤵᤐᤧᤴ ᤁᤧᤖᤧᤒᤠᤖᤥ॥ ᤜᤧᤰᤁᤣᤗ᤹ᤖᤡᤰ ᤌᤰᤛᤢᤒᤠᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣᤀᤣ ᤔᤧᤈᤥᤃᤢᤖᤥ॥
25 ᤕᤧᤛᤢ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤔᤧᤓᤥ᤺ᤴᤍᤢᤒᤠᤸᤗᤧ ᤁᤢᤒᤣᤛᤠᤱ ᤁᤢᤶᤔᤠ. ᤁᤢᤴᤇᤢᤔᤠ᤹. ᤰᤗᤥᤐᤠᤛᤖᤧ ᤁᤢᤔᤣ᤺ᤳ ᤔᤖᤡᤕᤔ. ᤜᤧᤰᤁᤩᤠᤱ ᤔᤖᤡᤕᤔ ᤔᤃ᤻ᤍᤗᤡᤏᤡᤛᤡ ᤔᤧᤕᤧᤒᤧᤖᤥ॥ 26 ᤕᤧᤛᤢᤖᤧ ᤁᤢᤶᤔᤠ ᤜᤧᤰᤁᤩᤠᤱ ᤗᤢᤱᤔᤠ᤹ ᤋᤢᤰᤋᤢᤒᤠ ᤁᤢᤜᤢ᤹ᤛᤠᤶᤒᤠᤴᤏᤠᤱ ᤂᤧᤵᤔᤥ ᤏᤡ᤺ᤳᤋᤠᤱ ᤕᤧᤒᤧᤳᤇᤡᤒᤠ ᤏᤡ᤺ᤛᤢᤛᤡᤸᤗᤧ ᤁᤢᤶᤔᤠ ᤔᤧᤳᤋᤢ. “ᤂᤢᤏᤧ᤹ᤃ ᤁᤧᤛ᤻ᤛᤠ᤺ᤖᤥ॥” 27 ᤜᤧᤰᤁᤩᤠᤱ ᤂᤧᤴ ᤜᤢ᤹ᤛᤠᤶᤒᤠᤴ ᤔᤧᤳᤋᤢ. “ᤂᤢᤏᤧ᤹ᤃ ᤌᤠᤔᤧᤴᤍᤡᤱ ᤁᤧᤶᤔᤠᤖᤥ॥” ᤂᤧᤴ ᤕᤧᤶᤔᤠᤱᤎᤥᤃ ᤂᤧᤴ ᤜᤢ᤹ᤛᤠᤶᤒᤠᤸᤗᤧ ᤔᤖᤡᤕᤶᤔᤡᤴ ᤁᤢᤜᤡᤶᤔᤥ ᤋᤣ᤹ᤖᤢᤖᤥ॥
ᤕᤧᤛᤢᤖᤧ ᤁᤢᤛᤡ᤺ᤔᤧᤴ
ᤔᤳᤋᤡ ᥈᥍.᥊᥋-᥋᥌. ᤔᤷᤁᤢᤛ ᥇᥋.᥉᥉-᥊᥇. ᤗᤢᤁᤠ ᥈᥉.᥊᥊-᥊᥏
28 ᤕᤠᤱᤛᤡ ᤕᤧᤛᤢᤖᤧ ᤁᤠᤰ ᤐᤠ᤺ᤴᤜᤠ᤹ ᤐᤥ᤺ᤰᤂᤧ ᤆᤢᤖᤧᤒᤠ ᤏᤡ᤺ᤛᤢᤀᤠᤱ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤒᤠᤴ ᤁᤧᤳᤗ ᤑᤠ᤹ᤀᤠᤱ ᤐᤠ᤺ᤳᤋᤢ. “ᤀᤡᤱᤃᤠ᤹ ᤀᤠᤘᤠᤔᤡ᤺ᤛᤧᤖᤥ॥”* 29 ᤂᤧᤵᤔᤥ ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤹ ᤌᤡ᤺* ᤁᤧᤕᤠᤰᤐᤠ ᤐᤷᤕᤠᤔᤠᤎᤡᤰ ᤕᤢᤅᤧ॥ ᤜᤧᤰᤁᤣ᤺ᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤂᤡᤃᤠᤰᤔᤠ᤺ᤴ ᤆᤧᤸᤗᤧᤰᤛᤣ᤹ ᤌᤡᤀᤥ ᤔᤧᤏᤡ᤺ᤵᤛᤢᤀᤠᤱ ᤜᤡᤛᤵ ᤛᤡᤱᤅᤡᤸᤗᤧ ᤁᤢᤒᤥᤖᤠ᤺ᤰᤁᤥ ᤔᤧᤓᤳᤇᤢ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤔᤢᤖᤠᤀᤥ ᤂᤧᤴ ᤔᤧᤎᤢᤵᤋᤢ ᤔᤧᤒᤡᤖᤢᤖᤥ॥ 30 ᤕᤧᤛᤢᤖᤧ ᤂᤧᤴ ᤐᤡ᤺ᤳᤋᤢᤀᤠᤱ ᤐᤠ᤺ᤳᤋᤢ. “ᤀᤠᤸᤗ ᤆᤢᤖᤧᤖᤥ॥” ᤜᤧᤰᤁᤣ ᤐᤠ᤺ᤳᤋᤢᤖ ᤁᤢᤎᤧᤃᤣ᤺ᤰᤐᤧᤴ ᤋᤷᤄᤢ᤹ ᤌᤠ᤺ᤛᤢ ᤜᤧᤰᤁᤩᤠᤱ ᤁᤢᤛᤰᤔᤠᤴ ᤗᤧᤖᤢᤍᤣ᤺ᤛᤢᤀᤠᤱ ᤛᤩᤧᤖᤥ॥
31 ᤁᤱᤃ ᤋᤱᤒᤣᤒᤠ ᤁᤧᤖᤧᤰᤏᤢ᤺ᤸᤗᤧ ᤛᤣᤛᤣᤒᤠ ᤜᤧᤰᤁᤩᤠᤱ ᤕᤶᤒᤠ ᤏᤠ᤺ᤶᤛᤡᤱ ᤕᤧᤴᤏᤡᤴᤏᤢ᤺ᤸᤗᤧ ᤌᤡᤰ ᤕᤧᤴ ᤋᤃᤡ ᤘᤕᤧᤖᤥ॥ ᤕᤜᤢᤍᤡᤜᤠ᤹ᤖᤧ ᤏᤠ᤺ᤶᤛᤡᤱ ᤕᤧᤴᤏᤥ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ* ᤆᤣᤜᤠ᤹ ᤔᤧᤒᤵᤐᤠ ᤂᤢᤏᤡ᤹ ᤛᤡᤖᤠ᤹ ᤔᤧᤎᤠᤱᤅᤡᤴᤒᤠᤸᤗᤧ ᤆᤥᤃᤢᤸᤗᤧ ᤜᤠᤖᤠ ᤔᤧᤛᤡ᤺ᤖ ᤑᤠ᤹ᤀᤠᤱ ᤂᤢᤏᤡ᤹ ᤗᤠᤱᤜᤠ᤹ ᤔᤧᤀᤧᤰᤂᤢᤀᤠᤱ ᤔᤧᤎᤠ᤺ᤛᤢᤛᤡᤖ ᤑᤠ᤹ᤀᤠᤱ ᤐᤡᤗᤠᤋᤛᤧᤴ ᤐᤣᤗᤡ ᤔᤧᤓᤠᤰᤋᤢᤖᤥ॥ 32 ᤂᤧᤸᤗᤧ ᤆᤥᤃᤢᤸᤗᤧ ᤌᤰᤛᤢᤒᤠᤜᤠ᤹ ᤔᤧᤒᤣᤀᤠᤱ ᤕᤧᤛᤢ᤺ᤴᤏᤢ ᤔᤧᤓᤥ᤺ᤴᤍᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤜᤠ᤹ ᤔᤧᤀᤧᤰᤂᤢᤖᤥ॥ 33 ᤁᤖ ᤂᤧᤱᤜᤠ᤹ ᤕᤧᤛᤢᤖᤥ ᤔᤧᤓᤧᤖᤧᤸᤗᤧ ᤕᤧᤛᤢ᤺ᤱᤃ ᤋᤃᤡᤀᤣ ᤛᤩᤧᤒᤠ ᤔᤧᤏᤡ᤺ᤛᤢᤀᤠᤱ ᤂᤢᤏᤧ᤹ ᤁᤢᤗᤠᤱᤜᤠ᤹ ᤔᤧᤴᤀᤧᤰᤂᤢᤴᤗᤥ॥ 34 ᤜᤧᤰᤁᤣᤛᤠᤱ ᤌᤡᤰ ᤌᤰᤛᤢᤒᤠᤸᤗᤧ ᤕᤧᤛᤢᤖᤧ ᤁᤢᤗᤧᤶᤓᤣ᤺ᤵᤔᤥ ᤗᤠ᤺ᤰᤁᤡᤸᤗᤧ ᤌᤢᤒᤢᤸᤗᤧ ᤂᤡᤔᤥ ᤂᤧᤵᤔᤥᤗᤠᤶ ᤔᤠᤰᤂᤡ᤹ ᤏᤢ ᤆᤫᤠ᤺ᤳ ᤗ᤺ᤴᤍᤧᤖᤥ॥ 35 ᤂᤡᤏᤡ᤹ᤀᤠᤱ ᤏᤛᤠ᤺ᤴ ᤁᤧᤈᤥᤃᤢᤶᤗ ᤑᤠ᤹ᤀᤠᤱ ᤂᤧᤴ ᤐᤥ᤺ᤰᤂᤧᤒᤠ ᤐᤠ᤺ᤴ ᤁᤧᤏᤡ᤺ᤒᤠᤸᤗᤧ ᤁᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤒᤠᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ᤃ ᤛᤧᤰᤂᤠᤀᤣᤖᤥ॥ 36 “ᤂᤢᤏᤧ᤹ ᤁᤢᤕᤧ᤺ᤵᤐᤠᤜᤠ᤹ ᤗᤳᤌᤡᤰᤁᤠᤱ ᤔᤧᤀᤧᤰᤏᤧᤴᤗᤥ”* ᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤵᤐᤠ ᤛᤠᤶᤕᤥᤛᤠᤵᤗᤠ᤺ᤴ ᤁᤧᤳᤗ ᤑᤠ᤹ᤀᤠᤱ ᤀᤰᤂᤣ ᤐᤥ᤺ᤰᤂᤧᤒᤠᤖᤥ. 37 ᤜᤧᤰᤁᤩᤠᤱ ᤘᤣ᤹ ᤋᤧᤴᤏᤥ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤀᤠᤱ ᤛᤠᤵᤋᤧᤀᤠᤱ ᤐᤳᤗᤥ. “ᤁᤧᤎᤢᤵᤐᤠᤜᤠ᤹ᤖᤧ ᤀᤠᤒᤠᤅᤣ ᤔᤧᤎᤢᤒᤢᤒᤠᤴ ᤀᤥᤔᤧᤔᤧᤳᤋᤢᤖᤥ॥”*
ᤕᤧᤛᤢ᤺ᤴ ᤀᤡᤵᤐᤢᤱᤅᤥ ᤔᤧᤈᤡᤰᤂᤢ᤹
ᤔᤳᤋᤡ ᥈᥍.᥋᥍-᥌᥇. ᤔᤷᤁᤢᤛ ᥇᥋.᥊᥈-᥊᥍. ᤗᤢᤁᤠ ᥈᥉.᥋᥆-᥋᥌
38 ᤂᤧᤴ ᤀᤣᤃᤠᤱ ᤀᤠᤖᤡᤔᤠᤌᤡᤕᤠ ᤐᤠᤱᤈᤢᤶᤒᤠ ᤕᤢᤛᤢᤑᤧᤴ ᤐᤡᤗᤠᤋᤛᤖᤥ ᤐᤣᤀᤠᤱ ᤕᤧᤛᤢᤖᤧ ᤁᤢᤎᤰᤁᤡᤴ ᤏᤠ᤺ᤰᤋᤢ॥ ᤂᤢᤏᤧ᤹ ᤕᤜᤢᤍᤡᤜᤠ᤹ ᤁᤡᤖᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤛᤫᤠ᤺ᤳᤋᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥ ᤐᤡᤗᤠᤋᤛᤖᤧ ᤀᤡᤱᤍᤳ ᤐᤡᤖᤢᤀᤠᤱ ᤂᤧᤸᤗᤧ ᤕᤧᤛᤢᤖᤧ ᤁᤢᤎᤰᤁᤡᤴ ᤌᤠ᤺ᤛᤢᤀᤠᤱ ᤋᤣ᤹ᤖᤢ॥ 39 ᤋᤃᤡ ᤛᤧᤴᤍᤡᤰ ᤕᤧᤛᤢᤖᤧ ᤁᤢᤍᤢᤶᤛᤧ ᤁᤧᤍᤠ᤺ᤒᤠ ᤏᤡᤁᤥᤍᤣᤔᤛᤖᤧ ᤕᤢᤛᤢᤑᤧᤴ ᤋᤣ᤺ᤱ ᤔᤧᤳᤋᤢᤀᤠᤱ ᤘᤕᤧ॥ ᤏᤡᤁᤥᤍᤣᤔᤛᤖᤧ ᤔᤢᤷᤖ ᤏᤢ ᤂᤠᤶᤍᤥᤗᤡ ᤑ᤺ᤶᤔᤏᤠᤒᤠ ᤁᤢᤏᤠᤶᤃᤧᤏᤢ᤹ᤒᤠ ᤛᤢᤶᤛᤢᤶ (᥉᥉) ᤁᤡᤗᤥ ᤔᤠᤖᤢᤰᤁᤡᤴ ᤋᤠᤖᤢᤀᤠᤱ ᤘᤕᤧᤖᤥ॥ 40 ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤎᤰᤁᤡᤴ ᤋᤣ᤹ᤖᤧᤳᤇᤢᤀᤠᤱ ᤕᤜᤢᤍᤡ ᤆᤣ ᤗᤢᤵᤔᤠ ᤌᤡᤶ ᤁᤢᤀᤡᤛᤡ᤺ᤰ ᤔᤠᤖᤢᤰᤁᤡᤴ ᤜᤢ᤺ᤳᤋᤧᤳᤇᤢᤀᤠᤱ ᤏᤢ᤺ᤒᤠ ᤆᤣᤍᤣ᤺ᤳᤋᤡᤸᤗᤧ ᤁᤡᤳᤋᤧᤳᤇᤢᤖᤥ॥ 41 ᤀᤠᤸᤗ ᤕᤧᤛᤢ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤔᤧᤓᤥ᤺ᤴᤍᤢᤒᤠ ᤋᤧᤴᤏᤥ ᤑᤢᤱᤀᤡᤰ ᤌᤡᤰ ᤏᤧᤛ᤻ᤛᤧ॥ ᤂᤧᤴ ᤑᤢᤱᤀᤡᤰᤁᤥ ᤀᤠᤸᤗᤥ ᤌᤠᤖᤡᤰ ᤔᤏᤠ ᤔᤧᤴᤏᤧᤀᤣ ᤁᤧᤘᤠ᤹ᤒᤠ ᤀᤡᤵᤐᤢᤱᤎᤡᤰ ᤏᤧᤛ᤻ᤛᤧᤖᤥ॥ 42 ᤁᤱᤃ ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧᤴ ᤕᤠᤖᤡᤵ ᤆᤥ᤺ᤰᤔᤠ ᤕᤧᤴ ᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤀᤡᤵᤐᤢᤱᤅᤡᤴ ᤏᤡ᤺ᤳᤋᤠᤱ ᤏᤧᤛ᤻ᤛᤧᤒᤠᤸᤗᤧ ᤆᤥᤃᤢᤸᤗᤧ ᤕᤧᤛᤢᤖᤧ ᤁᤢᤎᤰᤁᤡᤴ ᤋᤣ᤹ᤖᤧᤳᤇᤢᤀᤠᤱ ᤏᤧᤛ᤻ᤛᤧᤳᤇᤢᤖᤥ॥
* 19:12 ᤖᤥᤔᤡ ᤛᤢᤜᤠᤱᤕᤢᤰᤐᤠᤀᤥ ᤁᤠᤰᤏᤢ᤺ᤸᤗᤧ ᤕᤶᤒᤠ ᤔᤏᤠ᤺ᤴ ᤛᤢᤜᤠᤱ (ᤐᤕᤶ ᤜᤠᤱ) ᤘᤕᤧ॥ ᤂᤢᤏᤧ᤹ ᤛᤡᤈᤖ ᤔᤧᤔᤧᤳᤋᤢ॥ * 19:23 ᤏᤡᤱᤘᤠ᤹ᤑᤢᤛᤠᤶᤗᤥ ᤛᤢᤶ ᥈᥈.᥇᥎ * 19:28 ᤏᤡᤱᤘᤠ᤹ᤑᤢᤛᤠᤶᤗᤥ ᤛᤢᤶ ᥈᥈.᥇᥋. ᥌᥏.᥈᥇ * 19:29 ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤔᤧᤴᤈᤥ ᤘᤠᤔᤡ᤺ᤔᤠ ᤁᤧᤈᤡᤶᤒᤠ ᤌᤡ᤺ ᤘᤕᤧ॥ ᤁᤴ ᤌᤡ᤺ᤴ ᤌᤰᤛᤢᤒᤠᤜᤠ᤹ ᤏᤢ ᤘᤣ᤹ ᤕᤠᤱᤃᤧᤛᤠ᤹ᤒᤠᤜᤠ᤹ᤖᤧ ᤔᤧᤎᤢᤅᤢ॥ * 19:31 ᤗᤠᤱ ᤀᤧᤱᤔᤠᤸᤗᤧ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤶᤔᤏᤠᤒᤠ ᤔᤏᤠᤜᤠ᤹ ᤜᤠᤖᤠ ᤔᤧᤛᤡ᤺॥ * 19:36 ᤗᤠᤶᤍᤡ᤺ᤰ ᥇᥈.᥊᥌. ᤏᤡᤱᤘᤠ᤹ᤑᤢᤛᤠᤶᤗᤥ ᤛᤢᤶ ᥉᥊.᥈᥆. ᤂᤠᤏᤡ᤺ᤳ ᥏.᥇᥈ * 19:37 ᤈᤁᤖᤡᤕᤠ ᥇᥈.᥇᥆