10
ᤕᤧᤛᤢᤖᤧ ᤏᤢ-ᤏᤧᤳ (᥍᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤡᤱᤓᤴ ᤛᤧ᤺ᤛᤧ ᤐᤠᤱᤄᤢᤛᤡ᤹
ᤂᤧᤴ ᤀᤣᤃᤠᤱ ᤍᤠᤱᤒᤠᤖᤧ ᤘᤣ᤹ ᤏᤢ-ᤏᤧᤳ (᥍᥈) ᤔᤏᤠᤜᤠ᤹ ᤛᤣᤃᤢᤛᤡᤀᤠᤱ ᤐᤣᤖ ᤐᤳᤇᤧᤒᤠ ᤐᤠᤱᤈᤢᤶᤜᤠ᤹ ᤏᤢ ᤐᤠᤱᤓᤣ᤹ᤜᤠ᤹ᤀᤥ ᤏᤧᤵᤑᤢ ᤏᤧᤵᤑᤢ ᤗ᤹ᤖᤡᤰ ᤀᤡᤱᤓᤴ ᤛᤧ᤺ᤛᤧ ᤐᤠᤱᤄᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤛᤢᤶᤔᤠ ᤁᤧᤒᤥ᤺ᤱᤒᤠ ᤆᤠ᤺ᤴ ᤕᤖᤡᤰ ᤏᤧ᤹᤺. ᤁᤖ ᤆᤠ ᤁᤧᤛᤢᤶᤒᤠ ᤕᤠ᤺ᤗᤡᤰᤜᤠ᤹ ᤔᤧᤛᤢ᤺ᤴᤗᤥ॥ ᤜᤧᤰᤁᤣ᤺ᤸᤗᤧ ᤛᤢᤶᤔᤠ ᤁᤧᤒᤥ᤺ᤱᤒᤠ ᤆᤠ᤺ᤸᤗᤧ ᤁᤢᤴᤍᤠᤱᤒᤠᤴ ᤕᤖᤡᤰ ᤕᤠ᤺ᤗᤡᤰᤜᤠ᤹ ᤆᤠ ᤛᤢᤶᤛᤧ ᤐᤠᤱᤄᤢᤛᤡᤖ ᤑᤠ᤹ᤀᤠᤱ ᤂᤡᤏᤡ᤹ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥ ᤔᤧᤸᤗᤢᤰᤛᤠ᤺ᤜᤠ᤹ ᤐᤖᤠᤒᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤐᤠᤱᤔᤏᤠᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤐᤠᤱᤏᤡᤱᤗᤥ॥ ᤀᤠᤸᤗ ᤐᤣᤃᤧᤶᤔᤧ᤹ᤀᤥ॥ ᤂᤡᤏᤡ᤹ ᤗᤠᤶᤍᤡ᤺ᤰᤁᤥ ᤛᤠᤒᤪᤡᤜᤠ᤹. ᤛᤢ᤺ᤰᤘᤠᤜᤠ᤹ ᤜᤧᤰᤁᤩᤠᤱ ᤗᤠᤱᤛᤢ᤺ᤵᤜᤠ᤹ ᤌᤣᤀᤠᤱ ᤔᤧᤕᤠᤱᤅᤠᤛᤡᤶᤔᤧᤴᤏᤧ᤹ᤀᤥ. ᤜᤧᤰᤁᤩᤠᤱ ᤗᤠᤶᤔᤥ ᤔᤏᤠᤜᤠ᤹ᤏᤢ ᤛᤣᤘᤠ ᤔᤕᤧᤶᤔᤧ᤹ᤖ ᤔᤧᤜᤶᤛᤡᤱᤅᤧᤶᤔᤡᤴᤏᤧ᤹ᤀᤥ॥ ᤂᤡᤏᤡ᤹ ᤀᤠᤳᤋᤡᤴ ᤜᤡᤶᤔᤥ ᤁᤧᤗᤠ᤺ᤛ᤻ᤛᤡ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤁᤴ ᤜᤡᤶᤔᤥ ᤜᤠᤖᤠ᤹ ᤛᤏᤠᤖᤢᤱ ᤋᤠᤏᤡᤖᤥ ᤗ᤹ᤖᤡᤰ ᤐᤠ᤺ᤳᤋᤧᤶᤔᤧ᤹॥ ᤂᤧᤴ ᤜᤡᤶᤔᤥ ᤛᤏᤠᤖᤢᤱ ᤂᤥ᤺ᤔᤠ ᤗᤠ᤹ᤖᤢᤒᤠ ᤔᤏᤠ ᤘᤠ᤹ᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤏᤠᤖᤢᤱᤅᤡᤴ ᤂᤧᤵᤔᤥ ᤘᤠ᤹ ᤗᤠ᤺ᤳᤗᤥ. ᤁᤖ ᤜᤧᤰᤋᤱᤒᤠ ᤔᤏᤠ᤺ᤴ ᤜᤥ᤺ᤵᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤏᤠᤖᤢᤱᤅᤡᤴ ᤂᤡᤏᤡ᤹ᤀᤥᤀᤣ ᤕᤠᤱᤏᤠ ᤏᤢ᤺ᤱ ᤋᤠ᤺ᤖᤥ॥ ᤀᤠᤳᤋᤡᤴ ᤜᤡᤶᤔᤥ ᤂᤡᤏᤡ᤹ ᤁᤧᤘᤕᤡ᤹. ᤒᤠ ᤂᤧᤵᤔᤥᤀᤣ ᤘᤕᤧᤶᤔᤧ᤹ᤀᤠᤱ ᤂᤡᤏᤡ᤹ ᤁᤧᤶᤒᤡᤖᤡᤒᤠ ᤆᤠᤔᤠ ᤌᤢᤱᤔᤠᤜᤠ᤹ ᤆᤧᤶᤔᤧ᤹ ᤌᤢᤅᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤕᤠ᤺ᤗᤡᤰᤁᤡᤴ ᤏᤠᤶᤕᤠᤰ ᤂᤥ᤺ᤔᤠ ᤗᤠ᤹ᤖᤢᤖᤥ॥ ᤂᤡᤏᤡ᤹ ᤜᤡᤶ ᤌᤵᤔᤣ ᤋᤠᤰᤔᤧᤃᤴᤍᤧᤶᤔᤡᤴᤏᤧ᤹ᤀᤥ॥ ᤂᤡᤏᤡ᤹ ᤀᤠᤳᤋᤡᤴ ᤐᤠᤱᤈᤢᤶᤔᤥ ᤁᤧᤗᤠ᤺ᤛ᤻ᤛᤡᤸᤗᤧ ᤗᤠᤱᤍᤠ᤺ᤰᤔᤠ ᤁᤧᤶᤒᤡᤖᤡ᤹ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤶᤍᤥ᤺ᤴᤍᤡ᤹ ᤁᤧᤶᤒᤡᤖᤡᤒᤠ ᤆᤠᤜᤠ᤹ ᤆᤧᤶᤔᤧ᤹. ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤘᤣ᤺ᤴᤍᤧᤶᤛᤡᤶᤔᤧ᤹ᤀᤠᤱ ᤀᤰᤂᤣ ᤔᤧᤳᤋᤧᤶᤛᤡᤶᤔᤧ᤹. ‘ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤂᤡᤏᤡ᤹ ᤏᤡ᤺ᤳᤋᤠᤱ ᤋᤩᤧᤀᤠᤱ ᤘᤠ᤹ᤖᤥ॥’ 10 ᤁᤖ ᤀᤠᤳᤋᤡᤴ ᤐᤠᤱᤈᤢᤶᤔᤥ ᤂᤡᤏᤡ᤹ ᤗᤠᤱᤍᤠ᤺ᤰᤔᤠ ᤁᤧᤔᤧᤶᤒᤡᤖᤡᤴ. ᤂᤧᤴ ᤐᤠᤱᤈᤢᤶᤜᤠ᤹ᤀᤥᤒᤠ ᤗᤠᤶ ᤜᤧᤱᤄᤠ᤺ᤳᤋᤡ ᤗ᤺ᤴᤍᤧᤶᤔᤧ᤹ᤀᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤧᤶᤛᤡᤶᤔᤧ᤹. 11 ‘ᤀᤠᤏᤡᤃᤧ ᤗᤠᤱᤅᤥ ᤂᤡᤵᤋᤢᤀᤠᤱ ᤁᤧᤒᤵᤐᤠ ᤂᤡᤏᤡ᤹ ᤐᤠᤱᤈᤢᤶᤔᤥᤒᤠ ᤂᤠᤶᤜᤡ᤺ᤰᤜᤠ᤹ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤀᤠᤏᤡᤃᤧ ᤌᤠᤵᤛᤢᤶᤒᤧᤖᤥ॥ ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤂᤡᤏᤡ᤹ ᤏᤡ᤺ᤳᤋᤠᤱ ᤋᤩᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥ 12 ᤂᤠᤛᤧᤴ ᤕᤧᤴᤏᤥ ᤂᤧᤴ ᤐᤠᤱᤈᤢᤶᤔᤡᤸᤗᤧ ᤁᤢᤍᤢᤰᤂᤣ᤺ᤱᤃ ᤛᤠᤍᤥᤔᤖᤧ ᤁᤢᤍᤢᤰᤂᤣ᤺ᤴᤏᤢ᤺ᤸᤗᤧᤀᤠᤱ ᤁᤧᤛᤠᤰᤐᤠ ᤐᤥ᤺ᤱ ᤑᤠ᤹ᤀᤠᤱ ᤔᤧᤳᤏᤡᤱᤗᤥ॥’ ”
ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤐᤠᤱᤈᤢᤶᤜᤠ᤹
ᤔᤳᤋᤡ ᥇᥇.᥈᥆-᥈᥊
13 “ᤂᤥᤖᤠᤈᤡᤏ ᤏᤢ ᤒᤧᤌᤛᤣᤍᤠ ᤐᤠᤱᤈᤢᤶᤔᤥᤒᤠ ᤔᤏᤠᤛᤣ. ᤆᤡ᤺ᤳᤋᤧᤀᤠᤱᤗᤰ ᤛᤩᤧᤖᤥ᥄ ᤂᤡᤏᤡ᤹ ᤐᤠᤱᤈᤢᤶᤔᤥ ᤐᤥ᤺ᤰᤂᤧᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤕᤧᤰᤕᤰ ᤋᤠᤕᤖ ᤏᤢ ᤛᤡᤍᤥᤴᤏᤥ ᤐᤥ᤺ᤰᤂᤧᤀᤠᤱ ᤘᤕᤧᤸᤗᤧᤃ ᤀᤢᤴᤇᤥ᤺ᤴᤇᤠ ᤂᤧᤵᤔᤥᤒᤠ ᤔᤏᤠᤜᤠ᤹ ᤗᤠᤕᤥᤗᤠᤶ ᤜᤡᤴᤍᤡᤃᤧ ᤑᤠ᤹ᤀᤠᤱ ᤛᤃᤡ ᤋᤣ᤺ᤳ ᤔᤧᤈᤠᤰᤛᤡᤱᤅᤠᤱ ᤂᤠᤵᤐᤢ ᤔᤧᤈᤢ᤺ᤳᤇᤡᤱᤒᤠᤔᤧᤴ॥ 14 ᤁᤖ ᤂᤠᤛᤧᤴ ᤕᤧᤴᤏᤥᤃ ᤂᤡᤏᤡ᤹ ᤋᤢᤰᤂᤣᤏᤢ᤺ᤸᤗᤧ ᤋᤠᤕᤖ ᤏᤢ ᤛᤡᤍᤥᤏᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤢᤰᤂᤣ᤺ᤴ ᤌᤶᤔᤠ ᤛᤢᤰᤁᤧᤍᤧᤵᤐᤠ ᤐᤥ᤺ᤱᤗᤥ॥ 15 ᤜᤧᤰᤁᤩᤠᤱ ᤂᤡᤏᤡ᤹ ᤁᤐᤷᤏᤜᤢᤔ ᤐᤠᤱᤈᤢᤶᤔᤥᤒᤠ ᤔᤏᤠᤛᤣ. ᤛᤠᤱᤃᤪᤠᤶᤐᤣᤍᤠᤱ ᤌᤠᤖᤡᤰ ᤐᤣᤃᤡᤃᤧ᤹ ᤁᤧᤗ᤹ᤖᤡᤒᤡ᥅ ᤔᤧ᤺ᤴᤗᤥ᥄ ᤂᤡᤏᤡ᤹ᤃ ᤂᤧᤔᤠᤕᤱᤛᤱ ᤌᤠᤖᤡᤰ ᤁᤧᤎᤩᤧ᤹ᤀᤡᤖᤥ॥
16 ᤀᤠᤳᤋᤡᤸᤗᤧ ᤂᤡᤏᤡ᤹ ᤐᤠ᤺ᤴ ᤂᤧᤵᤛᤢ᤹. ᤂᤧᤸᤗᤧ ᤀᤠᤒᤠ᤺ᤴᤏᤡᤴᤏᤠᤱ ᤂᤧᤵᤛᤢ᤹॥ ᤀᤠᤳᤋᤡᤸᤗᤧ ᤁᤧᤏᤠ᤹ᤖᤡ᤹. ᤂᤧᤸᤗᤧ ᤀᤡᤱᤃᤠ᤹ᤀᤠᤱ ᤏᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤏᤠ᤹ᤀᤠ. ᤂᤧᤸᤗᤧ ᤕᤠᤵᤔᤡ ᤁᤧᤒᤠᤱᤒᤧᤴᤏᤠᤱ ᤏᤠ᤹ᤖᤢ᤹ᤖᤥ॥”
ᤏᤢ-ᤏᤧᤳ (᥍᥈) ᤜᤢ᤹ᤛᤠᤶᤒᤠᤜᤠ᤹ ᤔᤧᤏᤢ᤺ᤱ ᤔᤧᤍᤠ᤹᤺
17 ᤏᤢ-ᤏᤧᤳ (᥍᥈) ᤜᤢ᤹ᤛᤠᤶᤒᤠᤜᤠ᤹ ᤔᤧᤛ᤺ᤳᤋᤧᤖ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤁᤧᤔᤡᤱᤅᤥᤃ ᤑᤧᤴᤛᤠᤶᤜᤠ᤹ ᤀᤠᤏᤡᤃᤧ ᤕᤢᤰᤁᤥ ᤔᤧᤍᤩᤧᤖᤥ॥”
18 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤔᤠᤑᤧᤴᤛᤠᤶᤔᤡᤴ ᤛᤠ᤺ᤶᤓᤣ ᤗᤧᤰᤋᤧᤒᤠ ᤁᤢᤀᤡᤛᤡ᤺ᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤰᤌᤩᤧᤖ ᤐᤳᤇᤧᤒᤠ ᤀᤡᤱᤃᤠ᤹ ᤏᤡ᤺ᤛᤢᤱ॥ 19 ᤏᤡᤱᤔᤡ᤺ᤸᤗᤧ ᤁᤢᤔᤢᤰᤛᤠᤶ ᤛᤶᤍᤠᤱ ᤀᤡᤱᤃᤠ᤹ ᤕᤢᤰ ᤐᤡᤏᤡᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤀᤛᤣ᤺ᤰᤐᤠᤜᤠ᤹ ᤛᤶᤍᤠᤱ ᤂᤡᤏᤡ᤹ ᤗᤠᤱᤁᤧᤄᤣᤃᤡ᤹. ᤋᤠᤱᤛᤠᤱ ᤂᤧᤒᤰᤜᤠ᤹ ᤁᤧᤍᤥ᤹ᤖᤢᤶᤛᤡᤶ. ᤁᤖ ᤌᤣᤀᤠᤱ ᤁᤧᤔᤧᤶᤔᤧᤳᤋᤡᤴᤗᤥ॥ 20 ᤜᤧᤰᤁᤣᤛᤠᤱ ᤑᤧᤴᤛᤠᤶᤜᤠ᤹ ᤂᤡᤏᤡ᤹ ᤕᤢᤰᤁᤥ ᤔᤧᤘᤠ᤹ ᤑᤠ᤹ᤀᤠᤱ ᤔᤧ᤺ᤴ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥ ᤂᤡᤏᤡ᤹ ᤔᤡᤱ ᤛᤠᤵᤋᤧᤀᤠᤱ ᤐᤵᤐᤠᤸᤗᤧ ᤆᤥᤃᤢᤸᤗᤧ ᤛ᤺ᤳᤋᤧᤶᤔᤧ᤹ᤀᤥ॥”
ᤕᤧᤛᤢᤖᤧ ᤐᤠᤏᤢᤍᤡᤱ ᤁᤢᤶᤒᤠ ᤏᤥᤃᤧᤴ ᤐᤡᤖᤢ᤹
ᤔᤳᤋᤡ ᥇᥇.᥈᥋-᥈᥍. ᥇᥉.᥇᥌-᥇᥍
21 ᤂᤧᤴ ᤕᤧᤶᤔᤥ ᤕᤧᤛᤢ᤺ᤴ ᤛᤣᤛᤣᤔᤠᤱᤅᤡᤸᤗᤧ ᤁᤢᤎᤡᤶ ᤐᤥ᤺ᤰᤂᤧᤀᤠᤱ ᤛ᤺ᤳᤋᤧᤖ ᤐᤠᤖᤧ. “ᤀᤠᤶᤒᤣ. ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤴᤍᤠᤱᤒᤠᤀᤣ. ᤀᤡᤱᤃᤠ᤹ ᤏᤥᤃᤧᤴ ᤐᤡᤏᤧ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤛᤡᤰᤁᤢᤶᤛᤠᤒᤠᤜᤠ᤹ ᤜᤧᤰᤁᤩᤠᤱ ᤆᤠ᤺ᤵᤐᤠᤜᤠ᤹ᤏᤢ ᤁᤧᤔᤠ᤹ᤖᤢᤒᤠ ᤐᤠ᤺ᤴᤏᤡᤴ ᤜᤡᤴᤈᤠ᤹ ᤜᤧᤰᤋᤱᤒᤠᤜᤠ᤹ ᤀᤥᤛᤣ᤺ᤴᤃᤧᤎᤠᤰᤋᤢᤛᤡᤖᤥ॥ ᤀᤠᤶᤒᤣ. ᤒᤠ ᤀᤰᤂᤣ ᤆᤥ᤺ᤰᤔᤠᤀᤣ ᤂᤧᤏᤧ᤹ ᤁᤧᤛᤡᤖᤠ᤹ ᤌᤠᤅᤧᤖᤥ॥”
22 “ᤀᤠᤶᤒᤠᤖᤧ ᤁᤠᤰ ᤐᤠ᤺ᤴᤜᤠ᤹ ᤐᤡᤖᤠᤱᤅᤠᤱ ᤘᤠ᤹ᤖᤥ॥ ᤁᤢᤛ᤻ᤛᤠ᤺ᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤁᤢᤶᤒᤠᤖᤧᤖᤰ ᤁᤢᤛᤡᤱ ᤏᤡ᤺ᤳᤋᤢ᤹. ᤘᤣ᤹ᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤐᤠ᤺ᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤑᤠ᤹ᤀᤠᤱ ᤁᤢᤛ᤻ᤛᤠ᤺ᤸᤗᤧ ᤀᤥᤛᤣ᤺ᤴᤎᤠᤰᤋᤢᤛᤡᤒᤠ ᤔᤏᤠᤜᤠ᤹ᤖᤧᤖᤰ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ॥”
23 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤛᤫᤠ᤺ᤳᤋᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ᤃ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤔᤡᤰᤁᤡᤸᤗᤧ ᤁᤴ ᤐᤠ᤺ᤴᤜᤠ᤹ ᤏᤡ᤺ᤛᤢ᤹ᤖᤥ॥ 24 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤕᤖᤡᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤜᤠᤱᤜᤠ᤹ᤖᤧ ᤂᤡᤏᤡ᤹ ᤁᤧᤏᤡ᤺ᤛᤢᤶᤒᤠ ᤁᤧᤄᤧᤵᤛᤢᤶᤒᤠ ᤐᤠ᤺ᤴᤜᤠ᤹ ᤏᤡ᤺ᤔᤠ ᤏᤢ ᤂᤧᤶᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤘᤕᤧ. ᤁᤖ ᤔᤧᤱᤄᤥ᤺ᤛᤢᤴᤗᤥ॥”
ᤏᤢ᤺ᤒᤠ ᤛᤠᤔᤠᤖᤡ᤺ᤸᤗᤧᤴ ᤂᤧᤍᤠ᤹
25 ᤌᤡᤰ ᤕᤧᤴ ᤛᤠᤶᤕᤥᤌᤡᤶᤛᤠᤶᤒᤠᤎᤡᤰ ᤕᤧᤶᤛᤡᤱᤅᤠᤱ ᤕᤧᤛᤢ᤺ᤴ ᤐᤠ᤺ᤴᤏᤥ ᤌᤠ᤺ᤔᤠ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢ. “ᤛᤡᤰᤛᤠᤶᤒᤣ. ᤀᤡᤱᤃᤠ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤔᤠ ᤌᤣ ᤆᤥ᤺ᤰᤔᤠ ᤐᤥ᤺ᤱᤒᤣ᥅”
26 ᤜᤧᤰᤁᤩᤠᤱ ᤕᤧᤛᤢᤖᤧᤀᤠᤱ ᤂᤧᤴ ᤛᤣ᤺ᤴᤍᤥᤛᤢ. “ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤌᤣ ᤛᤠᤵᤋᤧᤀᤠᤱ ᤐᤳ᥅ ᤂᤧᤴ ᤀᤠᤰᤂᤣᤗ᤹ᤖᤡᤰ ᤁᤢᤛᤡᤱ ᤁᤧᤏᤡ᤺ᤳᤋᤢᤒᤣ᥅”
27 ᤂᤧᤸᤗᤧ ᤏᤥᤃᤵ ᤐᤡᤖᤢ. “ ‘ᤂᤧᤏᤧ᤹ ᤁᤧᤴᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤖᤧᤰ ᤁᤧᤛᤡᤰᤗᤢᤱᤔᤠᤸᤗᤧ. ᤁᤧᤖᤧᤰ ᤁᤧᤛᤰᤔᤠᤛᤠᤶᤔᤡᤸᤗᤧ. ᤁᤧᤖᤧᤰ ᤁᤧᤎᤢᤶᤔᤡᤸᤗᤧ ᤜᤧᤰᤁᤩᤠᤱ ᤁᤧᤖᤧᤰ ᤁᤧᤏᤡᤱᤘᤠ᤹ᤀᤡᤸᤗᤧ. ᤔᤡ᤺ᤶᤈᤡ ᤔᤧᤳᤋᤧ᤹.’ ᤜᤧᤰᤁᤩᤠᤱ ‘ᤀᤠᤵᤑᤣ᤺ᤰ ᤗᤢᤱᤔᤠ᤹ ᤁᤧᤍᤢᤰᤛᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤁᤧᤜᤡᤶᤒᤣᤛᤠᤱᤒᤠᤜᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤧᤛᤧ᤹ᤀᤥ॥’ ”*
28 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤍᤱᤒᤠ ᤏᤥᤃᤵ ᤁᤧᤒᤡᤖᤢᤖᤥ॥ ᤜᤧᤰᤁᤩᤠᤱ ᤒᤠ ᤜᤧᤰᤁᤣ ᤆᤥᤃᤧ᤹ᤀᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤁᤧᤄᤥ᤺ᤛᤢ᤹ᤖᤥ॥” 29 ᤁᤖ ᤂᤧᤸᤗᤧ ᤛᤠᤶᤕᤥᤏᤡᤒᤠ ᤌᤠ᤺ᤶᤛᤡᤱᤔᤠ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤏᤢ᤺ᤒᤠ ᤗᤧᤱᤛᤡᤱᤗ ᤛᤣ᤺ᤴᤍᤥᤛᤢ. “ᤀᤡᤱᤃᤠ᤹ ᤀᤠᤜᤡᤶᤒᤣᤛᤠᤱᤒᤠᤜᤠ᤹ ᤜᤠ᤺ᤳᤇᤡᤒᤣ᥅”
30 ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢᤀᤠᤱ ᤔᤧᤳᤋᤢ. “ᤌᤡᤰᤕᤧᤴ ᤗᤳᤇᤠ ᤔᤏᤠ᤺ᤴ ᤕᤖᤢᤛᤗᤧᤔᤗᤠᤶ ᤕᤥ ᤕᤧᤖᤡᤜᤥᤀᤥ ᤐᤣᤖ ᤐᤳᤇᤧᤸᤗᤧ ᤑᤠ᤺ᤴᤍᤠᤜᤠ᤹ᤖᤧ ᤔᤧᤕᤠᤱᤄᤢᤀᤠᤱ ᤁᤢᤍᤣ᤺ᤳᤜᤠ᤹ ᤔᤧᤓᤧᤴᤍᤢ ᤔᤧᤒᤡᤖᤢᤀᤠᤱ ᤛᤡ᤺ᤔᤠᤗᤡᤱᤎᤥ ᤁᤧᤖᤧᤖ ᤜᤠᤶᤒᤪᤧᤰ ᤔᤧᤜᤡᤵᤋᤢᤀᤠᤱ ᤗᤠᤶᤔᤥ ᤗᤠᤵᤔᤧᤓᤢᤛᤢ ᤔᤧᤎ॥ 31 ᤜᤠᤒᤠ ᤂᤧᤴ ᤗᤠᤶᤔᤥᤗᤠᤶ ᤏᤡᤱᤘᤠ᤹ᤑᤢᤛᤠᤶᤒᤠᤎᤡᤰ ᤕᤧ᤺ᤖ ᤐᤳᤇᤧ॥ ᤂᤧᤸᤗᤧ ᤂᤧᤴ ᤔᤏᤠ᤺ᤴ ᤏᤡ᤺ᤛᤢᤛᤠᤱ ᤔᤧᤴᤏᤡ᤺ᤔᤏᤠ ᤗᤧᤱᤛᤡᤱᤅᤠᤱ ᤗᤠᤶ ᤁᤒᤢᤎᤀᤠᤱ ᤐᤣᤖᤥ॥ 32 ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤗᤠᤶᤔᤥ ᤔᤠᤱᤜᤡᤶᤔᤥ ᤁᤧᤓᤠ᤹ᤒᤠ ᤗᤧᤒᤡᤎᤡᤰᤁᤠᤱ ᤕᤧ᤺ᤖ ᤐᤳᤇᤧ ᤂᤧᤸᤗᤧᤀᤠᤱ ᤂᤧᤴ ᤔᤏᤠ᤺ᤴ ᤏᤡ᤺ᤛᤢᤛᤠᤱ ᤔᤧᤴᤏᤡ᤺ᤔᤏᤠ ᤗᤧᤱᤛᤡᤱᤅᤠᤱ ᤗᤠᤶ ᤁᤒᤢᤎᤀᤠᤱ ᤐᤣᤖᤥ॥ 33 ᤁᤖ ᤛᤠᤔᤖᤡᤕᤠᤛ᤻ᤔᤠ ᤔᤏᤠᤎᤡᤰ ᤜᤠᤒᤠ ᤂᤧᤴ ᤗᤠᤶᤔᤥᤗᤠᤶ ᤐᤣᤖᤒᤳᤇᤧᤸᤗᤧ ᤂᤧᤴ ᤔᤏᤠ᤺ᤴ ᤏᤡ᤺ᤛᤢᤀᤠᤱ ᤗᤢᤱᤔᤠ᤹ ᤋᤢᤰᤋᤢᤖᤥ॥ 34 ᤂᤧᤴ ᤛᤠᤔᤖᤡ᤺ᤴ ᤐᤣᤀᤠᤱ ᤁᤠ᤺ᤴᤍᤧᤒᤠ ᤁᤢᤕᤠᤱᤄᤣ᤺ᤰᤁᤥ ᤛᤡᤍᤠ᤹ᤀᤡᤴ ᤜᤢ᤺ᤳᤋᤢ ᤐᤡᤖᤢᤀᤠᤱ ᤋᤣ᤺ᤳ ᤆᤡᤖᤡᤰᤜᤠ᤹ᤖᤧ ᤀᤡᤓᤢᤳᤋᤢ ᤐᤡᤖᤢ. ᤜᤧᤰᤁᤩᤠᤱ ᤁᤢᤀᤍᤱ ᤛᤶᤍᤠᤱ ᤕᤢᤰᤂᤢᤀᤠᤱ ᤆᤧᤕᤠᤱᤎᤥ᤺ᤰᤁᤥ ᤋᤣ᤹ᤖᤢᤀᤠᤱ ᤏᤢ᤺ᤖᤡᤰᤁᤠᤱ ᤁᤶᤒᤪᤠᤱ ᤔᤧᤳᤋᤢᤖᤥ॥ 35 ᤁᤢᤍᤠ᤺ᤴᤍᤡᤰᤔᤠ ᤂᤧᤴ ᤛᤠᤔᤠᤖᤡ᤺ᤸᤗᤧ ᤆᤧᤕᤠᤱᤎᤥ᤺ᤰ ᤍᤠᤱᤒᤠᤴ ᤏᤧᤳᤇᤡ ᤕᤢᤵᤐᤠᤕᤠᤱ ᤐᤡᤖᤢᤀᤠᤱ ᤔᤧᤳᤋᤢ. ‘ᤁᤴ ᤔᤏᤠ᤺ᤴ ᤏᤢ᤺ᤖᤡᤰᤁᤠᤱ ᤁᤶᤒᤪᤠᤱ ᤔᤧᤳᤋᤧ᤹ᤀᤥ. ᤀᤡᤱᤃᤠ᤹ ᤏᤢ᤺ᤱᤅᤠ ᤋᤠᤀᤠᤸᤗᤧ ᤁᤴᤏᤠᤱᤎᤥ ᤁᤧᤗᤠ᤺ᤵᤐᤠ ᤕᤠᤱᤅᤡᤴ ᤜᤢᤅᤢᤱ ᤐᤡᤏᤧᤖᤥ॥’ ”
36 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤛᤣ᤺ᤴᤗᤠᤵᤋᤢ. “ᤁᤴ ᤛᤢᤶᤛᤡ ᤔᤏᤠᤜᤠ᤹ᤀᤥ ᤀᤠᤳᤋᤡᤴ ᤔᤏᤠ᤺ᤴ ᤑᤠ᤺ᤴᤍᤠᤜᤠ᤹ᤖᤧ ᤔᤧᤕᤠᤱᤄᤢᤒᤠᤸᤗᤧᤴ ᤁᤧᤏᤢ᤹ᤒᤠ ᤁᤢᤜᤡᤶᤒᤣᤛᤠᤱᤒᤠ ᤐᤥ᤺ᤰᤂᤧ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤒᤣ᥅”
37 ᤂᤧᤴ ᤛᤠᤶᤕᤥᤌᤡᤶᤛᤠᤶᤒᤠᤸᤗᤧ ᤏᤥᤃᤵ ᤐᤡᤖᤢ. “ᤂᤢᤏᤧ᤹ ᤁᤶᤒᤪᤠᤱ ᤁᤧᤔᤧᤵᤐᤧᤴᤗᤥ॥”
ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤣᤃᤧ᤹ᤀᤠᤱ ᤂᤧᤏᤧ᤹ᤀᤠᤱ ᤒᤠ ᤜᤧᤰᤁᤣᤀᤣ ᤆᤥᤃᤧ᤹ᤀᤥ॥”
ᤕᤧᤛᤢᤖᤧ ᤔᤠᤷᤌᤠ ᤏᤢ ᤔᤖᤡᤕᤶᤔᤡᤴ ᤋᤢᤔᤢᤛᤡ᤹
38 ᤀᤠᤸᤗ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤌᤡᤰ ᤐᤠᤱᤓᤣ᤹ᤀᤥ ᤔᤧᤃᤧᤖᤧᤀᤠᤱ ᤂᤧᤵᤔᤥ ᤔᤠᤷᤌᤠ ᤔᤧᤵᤔᤏᤠᤔᤠᤸᤗᤧ ᤁᤢᤜᤡᤶᤔᤥ ᤗᤠᤱᤍᤠ᤺ᤰᤔᤠ ᤐᤡᤖᤢᤛᤡᤀᤠᤱ ᤂᤧᤱᤜᤠ᤹ ᤁᤢᤜᤡᤶᤔᤥ ᤔᤧᤒᤣ॥ 39 ᤜᤧᤰᤁᤩᤠᤱ ᤔᤠᤷᤌᤠᤖᤧ ᤁᤢᤴᤛᤠ᤹ ᤔᤖᤡᤕᤔ ᤔᤧᤵᤔᤏᤠᤔᤠᤴ ᤘᤕᤧ॥ ᤂᤢᤏᤧ᤹ ᤍᤠᤱᤒᤠᤸᤗᤧ ᤁᤢᤗᤠᤱᤈᤰᤐᤥ ᤕᤢᤱᤛᤡᤱᤅᤠᤱ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤛᤡᤰᤁᤢᤶᤍᤡᤱ ᤂᤠᤜᤢᤴᤜᤠ᤹ ᤂᤧᤵᤛᤢᤖᤥ॥ 40 ᤁᤖ ᤔᤠᤷᤌᤠᤖᤧ ᤋᤖᤣ ᤋᤥᤔᤠ ᤕᤖᤡᤰ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤒᤥ᤺ᤱᤒᤠ ᤐᤥ᤺ᤰᤂᤧᤒᤠᤸᤗᤧ ᤁᤢᤛᤰᤔᤠ ᤜᤢ᤹ᤖᤢ ᤜᤧᤰᤁᤩᤠᤱ ᤐᤣᤀᤠᤱ ᤍᤠᤱᤒᤠᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤕᤠᤵᤔᤡ ᤁᤶᤒᤪᤠᤱ ᤁᤧᤶᤔᤧᤳᤋᤠᤴᤒᤡ᥅ ᤀᤡᤱᤃᤠ᤹ ᤀᤠᤴᤛᤠ᤹ᤖᤧᤃ ᤁ᤹ᤕᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤓᤠ᤹ᤀᤠᤴᤒᤧ॥ ᤀᤡᤱᤃᤠ᤹ ᤕᤠ᤺ᤶᤒᤰᤁᤥ ᤜᤠᤖᤠ᤹ ᤑᤠ᤹ᤀᤠᤏᤡ ᤑᤠ᤹ᤀᤠᤱ ᤔᤧᤳᤋᤠᤱ ᤐᤡᤖᤠᤱᤅᤧ᤹ᤏᤠ॥”
41 ᤁᤖ ᤕᤧᤛᤢᤖᤧ ᤔᤧᤳᤋᤢ. “ᤔᤠᤷᤌᤠᤀᤣ. ᤂᤧᤏᤧ᤹ᤃ ᤕᤖᤡᤰ ᤐᤠ᤺ᤴᤜᤠ᤹ᤀᤥ ᤏᤡᤱᤘᤠ᤹ ᤁᤧᤒᤡᤖᤢᤀᤠᤱ ᤀᤠᤒᤠᤅᤣ ᤋᤢᤰᤂᤣ ᤁᤧᤈᤠ᤺ᤳᤇᤡᤱᤅᤠᤱ ᤁᤧᤘᤠ᤹ᤖᤥ. 42 ᤁᤖ ᤁᤧᤕᤧᤰᤐᤠ ᤗᤰ ᤌᤡᤰᤗᤰ ᤘᤠ᤹ᤖᤥ. ᤜᤧᤰᤁᤩᤠᤱ ᤔᤖᤡᤕᤔᤖᤧᤃ ᤂᤧᤴ ᤏᤢ᤺ᤒᤠ ᤗᤰᤁᤡᤴ ᤛᤣᤃᤢᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ᤏᤢ ᤂᤧᤴ ᤗᤰᤁᤡᤴ ᤏᤠᤵᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥”
* 10:27 ᤗᤧᤒᤡ ᥇᥏.᥇᥎