4
ᤕᤧᤛᤢ᤺ᤴ ᤏᤡᤱᤘᤠ᤹ ᤛᤠ᤹ᤔᤥ ᤌᤠ᤹᤺
ᤔᤳᤋᤡ ᥊.᥇-᥇᥇. ᤔᤷᤁᤢᤛ ᥇.᥇᥈-᥇᥉
1 ᤕᤧᤛᤢ᤺ᤴ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤢᤀᤠᤱ ᤕᤷᤍᤏ ᤕᤱᤄᤱᤗᤠᤶ ᤐᤣ. ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤀᤣ᤺ᤰᤛᤠᤍᤧᤴᤏᤥ ᤗᤠᤶᤗᤥᤛᤢᤀᤠᤱ ᤋᤣ᤹ᤖᤢᤖᤥ॥
2 ᤂᤧᤵᤔᤥ ᤗᤡᤒᤥ᤺ᤱ ᤕᤧᤴ (᥊᥆) ᤌᤠᤖᤡᤰ ᤘᤕᤧᤸᤗᤧ ᤔᤠᤑᤧᤴᤛᤠᤶᤔᤡᤸᤗᤧ ᤂᤢᤏᤧ᤹ ᤗᤠᤕᤥ ᤆᤥ᤺ᤰᤐᤠᤱᤔᤠ ᤑᤠ᤹ᤀᤠᤱ ᤁᤢᤏᤡᤱᤘᤠ᤹ ᤛᤠ᤹ᤖᤢ॥ ᤂᤧᤴ ᤕᤧᤶ ᤂᤠᤖᤠᤰ ᤂᤢᤏᤧ᤹ ᤌᤣᤀᤠᤱ ᤔᤧᤈᤏᤧᤴ. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤁᤢᤛᤧᤳᤗᤠ᤺ᤰᤋᤧ॥
3 ᤂᤧᤵᤔᤥ ᤔᤠᤑᤧᤴᤛᤠᤶᤔᤡᤴ ᤋᤩᤧᤀᤠᤱ ᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤛᤠ᤺ᤏᤧ ᤑᤠ᤹ᤃᤪ ᤁᤴ ᤗᤢᤱᤅᤡᤴ ᤂᤖᤧ᤺ᤱ ᤐᤥ᤺ᤰᤂᤧ᤹ ᤑᤠ᤹ᤀᤠᤱ ᤔᤧᤳᤋᤧ᤹॥”
4 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤜᤧᤰᤁᤣ ᤔᤧᤈᤥ᤺ᤰᤁᤠᤴ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤔᤥᤛᤠᤖᤧ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤀᤠᤱ ᤐᤳ. ‘ᤔᤧᤴᤇᤠᤶ ᤕᤠᤵᤔᤡ᤺ᤱᤃ ᤁᤢᤈᤠ᤺ᤸᤗᤧᤖᤰ ᤔᤧᤜᤡᤱᤏᤧᤴ॥’ ”
5 ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤂᤢᤏᤧ᤹ ᤌᤠ᤺ᤱ ᤁᤥ᤺ᤰᤔᤠᤸᤗᤧ ᤁᤢᤛᤶᤔᤥ ᤋᤣ᤹ᤖᤢᤀᤠᤱ ᤔᤡᤰᤆᤡᤖᤠᤵᤐᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤜᤠᤱᤈᤢᤶᤜᤠ᤹ ᤀᤥᤛᤣ᤺ᤴᤎᤠᤰᤋᤢᤀᤠᤱ
6 ᤔᤧᤳᤋᤢ. “ᤁᤴ ᤕᤠᤱᤛᤠᤁᤢᤴᤎᤣᤜᤠ᤹ ᤏᤢ ᤁᤧᤖᤧᤰ ᤕᤢᤰᤜᤠ᤹ ᤀᤡᤱᤃᤠ᤹ ᤐᤡᤔᤠ ᤛᤢᤰᤏᤧ᤹ᤖᤥ. ᤌᤣᤀᤠᤱᤓᤧᤸᤗᤧ ᤁᤴ ᤛᤶᤍᤠᤱ ᤕᤢᤰ ᤂᤥ᤺ᤛᤢᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤀᤠᤛᤡᤖᤠ᤹ ᤁᤧᤎᤠᤱᤒᤧᤴ ᤀᤠᤳᤋᤡᤴᤇᤠᤱ ᤐᤡᤔᤠ ᤛᤢᤰᤋᤢᤱᤗᤥ॥
7 ᤂᤧᤏᤧ᤹ ᤛᤠᤶᤒᤥ᤺ᤴ ᤁᤧᤓᤴᤇᤡᤱᤅᤠᤱ ᤛᤣᤘᤠ ᤁᤧᤔᤧᤳᤋᤠᤏᤧ ᤑᤠ᤹ᤃᤪ ᤁᤧᤖᤧᤰ ᤂᤧᤏᤧ᤹ᤀᤡᤴ ᤐᤥ᤺ᤱᤗᤥ॥”
8 ᤕᤧᤛᤢᤖᤧ ᤂᤢᤏᤧ᤹ ᤔᤧᤳᤋᤢ. “ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. ‘ᤂᤧᤏᤧ᤹ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤛᤣᤘᤠ ᤆᤥᤃᤧ᤹ ᤜᤧᤰᤁᤩᤠᤱ ᤂᤢᤏᤧ᤹ᤀᤡᤴᤗᤰ ᤔᤠᤱᤛᤣᤘᤠ ᤕᤠ᤺ᤶᤒᤰ ᤆᤥᤃᤧ᤹ᤀᤥ॥’ ”
9 ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤂᤢᤏᤧ᤹ ᤕᤖᤢᤛᤗᤧᤶᤔᤥ ᤋᤣ᤹ᤖᤢᤀᤠᤱ ᤔᤠᤱᤜᤡᤶᤔᤥᤒᤠ ᤁᤠᤰᤏᤢ᤺ᤸᤗᤧ ᤁᤣ᤺ᤶᤒᤠ ᤆᤶᤈᤶᤒᤠ ᤋᤧᤴᤏᤥ ᤕᤧᤵᤛᤢᤀᤠᤱ ᤔᤧᤳᤋᤢ. “ᤂᤧᤏᤧ᤹ ᤛᤧᤰᤂᤠᤀᤣ ᤏᤡᤱᤘᤠ᤹ᤑᤢᤛᤠ᤺ᤏᤧ ᤑᤠ᤹ᤃᤪ. ᤁᤵᤔᤥᤗᤠᤶ ᤕᤥ ᤐᤡᤴᤍᤧ ᤌᤩᤧ᤹.
10 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ.
‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ ᤀᤡᤱᤈᤠ᤺ᤱ ᤐᤡᤖᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤶᤒᤪᤠᤱ ᤁᤧᤶᤔᤧᤳᤗᤥ॥’
11 ᤜᤧᤰᤁᤩᤠᤱ ‘ᤂᤧᤱᤜᤠ᤹ᤖᤧ ᤂᤧᤏᤧ᤹ ᤌᤠ᤺ᤱ ᤌᤠ᤺ᤱᤅᤣ ᤂᤢᤏᤡ᤹ ᤜᤢᤰᤁᤥ ᤁᤧᤶᤍᤠ᤺ᤰᤁᤠᤱ
ᤂᤧᤏᤧ᤹ ᤁᤧᤗᤠᤱᤅᤡᤴ ᤗᤢᤱᤅᤥ ᤔᤧᤎᤠᤶᤛᤡᤱᤅᤡᤴᤗᤥ॥’ ”
12 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤁᤖ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. ‘ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤔᤧᤛᤠ᤹ᤖᤧᤴᤏᤧ᤹ᤀᤥ॥’ ”
13 ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤏᤡᤱᤘᤠ᤹ ᤛᤠ᤹ᤖᤢ ᤛᤢᤖᤢᤀᤠᤱ ᤛᤵᤑᤠᤖᤧ ᤗᤠᤃᤡ ᤕᤠᤶᤔᤥ ᤛᤢᤕᤧᤶ ᤔᤧᤱᤄᤥᤀᤣ ᤌᤠᤖᤡᤰ ᤂᤢᤏᤧ᤹ ᤗᤧᤖᤢᤎᤀᤠᤱ ᤐᤣᤖᤥ॥
ᤕᤧᤛᤢᤖᤧ ᤃᤠᤗᤡᤗᤀᤥ ᤔᤠᤱᤛᤣᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤜᤣ᤺ᤰᤋᤢ
ᤔᤳᤋᤡ ᥊.᥇᥈-᥇᥍. ᤔᤷᤁᤢᤛ ᥇.᥇᥊-᥇᥋
14 ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤁᤢᤎᤡᤶ ᤐᤥ᤺ᤰᤂᤧᤀᤠᤱ ᤕᤧᤛᤢ᤺ᤴ ᤃᤠᤗᤡᤗ ᤌᤢᤶᤔᤥ ᤏᤢ᤺ᤰᤂᤧ॥ ᤂᤢᤏᤧ᤹ ᤂᤧᤵᤔᤥ ᤋᤩᤧᤒᤠ ᤀᤡᤱᤄᤱᤅᤡᤴ ᤂᤡᤖᤡᤒᤠ ᤁᤠᤰ ᤗᤠᤈᤣ᤹ᤀᤥ ᤛᤧ᤺ᤖᤧᤖᤥ॥
15 ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤌᤢᤶᤔᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤜᤠ᤹ᤀᤥ ᤐᤣᤖ ᤜᤢ᤹ᤖᤢᤛᤡᤸᤗᤧ ᤁᤧᤖᤧᤰᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢᤖᤥ॥
ᤏᤠᤛᤖᤋᤀᤥ ᤕᤧᤛᤢ᤺ᤴ ᤔᤧᤏᤠ᤹ᤖᤢ
ᤔᤳᤋᤡ ᥇᥉.᥋᥉-᥋᥎. ᤔᤷᤁᤢᤛ ᥌.᥇-᥌
16 ᤜᤧᤰᤁᤩᤠᤱ ᤕᤧᤛᤢ᤺ᤴ ᤐᤥ᤺ᤖᤧᤀᤠᤱ ᤌᤠᤱᤒᤧᤴ ᤁᤧᤖᤧᤒᤠ ᤏᤠᤛᤖᤋ ᤐᤠᤱᤈᤢᤶᤔᤥ ᤋᤩᤧ॥ ᤂᤢᤏᤧ᤹ ᤁᤢᤕᤧᤵᤗᤧᤰ ᤁᤢᤀᤡᤛᤡ᤺ᤰ ᤏᤠ᤺ᤶᤛᤡᤱ ᤕᤧᤴᤏᤥ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤀᤠᤱ ᤛᤠᤶᤕᤥᤛᤠᤵᤗᤠ᤺ᤴ ᤏᤡ᤺ᤵᤔᤠ ᤑᤠ᤹ᤀᤠᤱ ᤕᤧᤶᤛᤡᤱ॥
17 ᤂᤧᤵᤔᤥ ᤁᤧᤘᤠ᤹ᤒᤠ ᤛᤠᤶᤕᤥᤛᤠᤵᤗᤠ ᤁᤧᤃᤵᤐᤠᤜᤠ᤹ᤖᤧ ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤛᤠᤵᤋᤢᤒᤠ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤁᤢᤃᤡᤳᤏᤠ᤺ᤴ ᤔᤧᤒᤡᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤑᤠ᤺ᤰᤂᤢᤀᤠᤱ ᤀᤰᤂᤣᤗ᤹ᤖᤡᤰ ᤁᤧᤒᤵᤐᤧᤴ ᤂᤥ᤺ᤛᤢᤀᤠᤱ ᤏᤡ᤺ᤖᤢ–
18-19 “ᤍᤠᤱᤒᤠᤸᤗᤧ ᤁᤢᤛᤣᤛᤣᤔᤠᤱᤅᤡᤴ ᤀᤡᤱᤃᤠ᤹ ᤀᤠᤛᤶᤍᤠᤱ ᤘᤠ᤹.
ᤌᤣᤀᤠᤱᤓᤧᤸᤗᤧ ᤕᤠᤱᤃᤧᤛᤠ᤹ᤒᤠᤜᤠ᤹ ᤛᤢᤏᤠᤀᤡᤱ ᤀᤡᤱᤓᤴ ᤆᤥ᤺ᤰᤛᤧ ᤔᤠᤱᤎᤥ᤺ᤰᤏᤠ ᤐᤡᤖᤠᤱᤅᤠᤱ ᤘᤠ᤹ᤀᤠᤖᤥ॥
ᤂᤢᤏᤧ᤹ ᤛᤠᤰᤐᤠ ᤁᤧᤎᤠ᤺ᤒᤠᤜᤠ᤹ ᤆᤥ᤺ᤰᤕᤢᤶᤓᤥᤖᤧᤴ ᤀᤡᤱᤓᤴ ᤆᤥ᤺ᤰᤛᤧ. ᤔᤡᤰᤑ᤺ᤶᤒᤠᤜᤠ᤹ᤖᤧ ᤂᤢᤏᤡ᤹ ᤔᤡᤰᤛᤠ᤺ᤴ ᤘᤣ᤺ᤶᤔᤠ ᤀᤡᤱᤓᤴ ᤆᤥ᤺ᤰᤛᤧ.
ᤜᤧᤰᤁᤩᤠᤱ ᤀᤣᤵᤗᤧᤰᤂᤧᤀᤥ ᤁᤧᤘᤠ᤹ᤒᤠᤜᤠ᤹ ᤆᤥ᤺ᤰᤕᤢᤶᤓᤥ ᤐᤡᤛᤧ ᤏᤢ ᤍᤠᤱᤒᤠᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤋᤱᤒᤣᤸᤗᤧᤴ ᤀᤡᤱᤓᤴ ᤆᤥ᤺ᤰᤛᤧ ᤀᤡᤱᤃᤠ᤹ ᤐᤠᤱᤄᤠᤱᤅᤠᤱ ᤘᤠ᤹ᤀᤠᤖᤥ॥”
20 ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤛᤠᤶᤕᤥᤛᤠᤵᤗᤠ᤺ᤴ ᤛᤢᤒᤢᤀᤠᤱ ᤂᤧᤵᤔᤥ ᤁᤧᤕᤧᤵᤐᤧᤴ ᤐᤡᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤕᤢᤱᤛᤡᤱ॥ ᤜᤧᤰᤁᤩᤠᤱ ᤁᤧᤖᤧᤰᤗᤧ ᤂᤢᤏᤧ᤹ ᤀᤥᤔᤧᤔᤧᤳᤋᤢᤸᤗᤧ
21 ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤠᤀᤡᤴ ᤁᤴ ᤁᤧᤄᤧᤵᤛᤢᤶᤔᤡᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤁᤧᤒᤵᤐᤠ ᤐᤠ᤺ᤴᤜᤠ᤹ ᤂᤡᤏᤡ᤹ᤀᤥ ᤁᤧᤖᤧᤀᤠᤱ ᤘᤠ᤹ᤖᤥ॥”
22 ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤢᤄᤧᤶ ᤁᤧᤏᤢ᤹ᤒᤠ ᤐᤠ᤺ᤴᤜᤠ᤹ ᤔᤧᤄᤧᤵᤛᤢᤀᤠᤱ ᤁᤧᤖᤧᤰᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢ. ᤜᤧᤰᤁᤩᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤰᤂᤣ ᤔᤧᤔᤧᤳᤇᤡᤱ. “ᤁᤱᤃ ᤕᤢᤛᤢᤑᤖᤧ ᤁᤢᤛ᤻ᤛᤠ᤺ ᤔᤧ᤺ᤶᤒᤡ᥅”
23 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤡᤛ᤻ᤛᤣᤛᤠᤱ ᤂᤡᤏᤡ᤹ ᤁᤴ ᤂᤧᤍᤠ᤹ᤀᤡᤴ ᤀᤡᤱᤃᤠ᤹ ᤀᤠᤔᤧᤴᤏᤥ ᤁᤧᤒᤠ᤺ᤳᤋᤢᤶᤒᤡᤗᤠ. ‘ᤛᤡᤍᤠ᤹ᤛᤠᤶᤒᤣ. ᤋᤃᤡ ᤂᤧᤏᤧ᤹ ᤏᤢᤛᤡᤱᤅᤧ᤹ᤀᤥ॥’ ᤜᤧᤰᤁᤣᤗ᤹ᤖᤡᤰ ᤁᤐᤷᤏᤜᤢᤶᤔᤥ ᤁᤧᤈᤥᤃᤢᤒᤠ ᤀᤠᤏᤡᤃᤧ ᤂᤧᤵᤛᤢᤶᤒᤧᤒᤠ ᤜᤧᤰᤁᤣᤀᤣ ᤁᤴ ᤁᤧᤒᤠᤱᤈᤢᤶᤔᤥᤀᤠᤱ ᤆᤥᤃᤧ᤹ᤀᤥ॥
24 ᤁᤖ ᤂᤢᤏᤧ᤹ ᤔᤧᤳᤋᤢᤛᤡ. ᤀᤡᤱᤃᤠ᤹ ᤔᤧᤳᤏᤡᤱ. ᤀᤠᤳᤋᤡᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴᤏᤠᤱ ᤁᤢᤒᤠᤱᤓᤣ᤹ᤛᤠᤒᤠᤜᤠ᤹ᤖᤧ ᤔᤧᤴᤍᤠ᤺ᤰᤋᤢᤴᤗᤥ॥
25 ᤛᤧᤰᤂᤠᤀᤣ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤸᤗᤧ ᤁᤢᤕᤧᤶᤔᤥ ᤀᤡᤛᤪᤠᤀᤡᤗᤀᤥ ᤕᤖᤡᤰ ᤔᤣᤔᤣᤍᤢᤔᤠᤜᤠ᤹ ᤔᤧᤘᤕᤧ॥ ᤂᤧᤴ ᤕᤧᤶᤔᤥ ᤋᤠᤱᤛᤠᤰᤐᤧᤴ ᤋᤱᤒᤣ ᤛᤢᤶᤛᤡᤀᤠᤱ ᤁᤢᤓᤪᤧ᤺ᤱ ᤌᤠᤖᤡᤰ ᤛᤢᤵᤛᤡᤱᤅᤠᤱ ᤐᤠᤱᤃᤧᤴᤍᤡᤱ ᤘᤠᤜᤡ᤺ᤳ ᤔᤧᤎᤩᤧᤏᤧᤴᤏᤠᤱ ᤂᤧᤴ ᤗᤠᤈᤣ᤹ᤀᤥ ᤁᤡᤵᤔᤠ ᤁᤧᤄᤢ᤺ᤒᤠ ᤕᤶᤒᤠ ᤛᤠᤰ ᤐᤥᤃᤧᤖᤥ॥
26 ᤂᤧᤵᤔᤥ ᤕᤖᤡᤰ ᤔᤣᤔᤣᤍᤢᤔᤠᤜᤠ᤹ ᤔᤧᤘᤕᤧᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤣᤗᤡᤕᤠ᤺ᤴ ᤀᤡᤛᤪᤠᤀᤡᤗᤀᤥ ᤔᤧ᤺ᤴ. ᤁᤖ ᤛᤡᤍᤥᤏ ᤌᤢᤶᤔᤥᤒᤠ ᤛᤠᤖᤑᤋ ᤐᤠᤱᤈᤢᤶᤔᤥᤒᤠ ᤔᤣᤔᤣᤍᤢᤔᤠᤸᤗᤥᤖᤰ ᤐᤠᤱᤄᤢᤖᤥ॥
27 ᤜᤧᤰᤁᤣᤗ᤹ᤖᤡᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤛᤠ᤺ᤸᤗᤧᤀᤠᤱ ᤀᤡᤛᤪᤠᤀᤡᤗᤀᤥ ᤕᤖᤡᤰ ᤗᤥᤃᤣ᤹ᤖᤧ ᤋᤖᤢᤛᤡᤒᤠ ᤔᤏᤠᤜᤠ᤹ ᤔᤧᤘᤕᤧᤛᤠᤱ ᤀᤠᤳᤋᤡᤴᤏᤠᤱ ᤔᤧᤏᤢᤛᤢᤴ. ᤁᤖ ᤛᤡᤖᤡᤕᤠᤛ᤻ᤔᤠ ᤏᤠᤔᤠᤏᤧᤴᤗᤰ ᤏᤢᤛᤢᤖᤥ॥”
28 ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤛᤡᤰ ᤐᤥᤃᤧ॥
29 ᤂᤧᤱᤜᤠ᤹ ᤔᤧᤒᤥᤃᤧᤀᤠᤱ ᤕᤧᤛᤢ᤺ᤴ ᤔᤧᤍᤧᤶᤛᤢᤀᤠᤱ ᤐᤠᤱᤈᤢᤶ ᤗᤠ᤺ᤰᤁᤠᤳ ᤔᤧᤀᤢ᤺ᤰᤂᤢ ᤔᤧᤗ᤺ᤳᤋᤢ॥ ᤜᤧᤰᤁᤩᤠᤱ ᤐᤠᤱᤈᤢᤶᤔᤡᤸᤗᤧ ᤁᤢᤒᤣᤛᤠᤱᤒᤠ ᤕᤠᤰᤁᤣ᤺ᤰᤁᤥᤗᤠᤶ ᤗᤠᤵᤑᤢᤔᤠ ᤌᤠ᤺ᤔᤠ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤔᤧᤍᤣ᤹ᤖᤢ.
30 ᤁᤖ ᤔᤏᤠᤗᤢᤶᤔᤥᤗᤠᤶ ᤂᤢᤏᤧ᤹ ᤑᤡ᤺ᤴᤇᤡᤱᤅᤠᤱ ᤗ᤺ᤴᤍᤧ ᤐᤣᤖᤥ॥
ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠ᤺ᤴ
ᤔᤷᤁᤢᤛ ᥇.᥈᥇-᥈᥎
31 ᤜᤧᤰᤁᤩᤠᤱ ᤂᤢᤏᤧ᤹ ᤃᤠᤗᤡᤗ ᤌᤢᤶᤔᤥᤒᤠ ᤁᤐᤷᤏᤜᤢᤔ ᤐᤠᤱᤈᤢᤶᤔᤥ ᤐᤣᤀᤠᤱ ᤏᤠ᤺ᤶᤛᤡᤱ ᤕᤧᤴᤏᤥ ᤂᤧᤵᤔᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤔᤏᤠᤜᤠ᤹ ᤜᤢ᤹ᤔᤠ ᤜᤣ᤺ᤰᤋᤢᤛᤡ॥
32 ᤂᤢᤏᤧ᤹ ᤁᤢᤏᤡᤛᤠᤶᤔᤡᤴ ᤔᤧᤄᤧᤵᤛᤢᤀᤠᤱ ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ. ᤌᤣᤀᤠᤱᤓᤧᤸᤗᤧ ᤕᤧᤛᤢ᤺ᤴ ᤕᤢᤰ ᤁᤧᤃᤵᤐᤠ ᤁᤢᤀᤡᤛᤡ᤺ᤰ ᤐᤠᤖᤧᤖᤥ॥
33 ᤂᤧᤵᤔᤥ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠᤎᤡᤰ ᤘᤕᤧ॥ ᤂᤧᤸᤗᤧ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤀᤰᤂᤣ ᤐᤠ᤺ᤳᤋᤢ.
34 “ᤏᤠᤛᤖᤋᤒᤠ ᤕᤧᤛᤢᤀᤣ. ᤂᤧᤏᤧ᤹ ᤀᤠᤏᤡᤃᤧᤏᤢ ᤌᤣ ᤁᤧᤃᤥ᤺ᤳᤋᤢᤒᤠᤒᤣ᥅ ᤂᤧᤏᤧ᤹ ᤀᤠᤏᤡᤃᤧ ᤔᤧᤱᤛᤧ ᤁᤧᤍᤩᤧᤒᤠᤒᤡ᥅ ᤂᤧᤏᤧ᤹ ᤜᤠ᤺ᤳᤏᤧᤒᤣ ᤑᤠ᤹ᤀᤠᤱ ᤏᤡ᤺ᤛᤢᤶᤒᤧᤖᤥ–ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤠᤱᤄᤧᤒᤠ ᤛᤣᤛᤣ ᤁᤢᤔᤏᤠᤏᤧᤖᤥ॥”
35 ᤕᤧᤛᤢᤖᤧ ᤂᤧᤴ ᤑᤧᤴᤛᤠᤶᤔᤡᤴ ᤑᤧ᤺ᤰᤋᤢ. “ᤛᤫᤠ᤺ᤳ᥄ ᤂᤧᤴ ᤔᤏᤠ᤺ᤴ ᤗᤧᤖᤧ᤹ᤀᤠᤱ ᤐᤣᤃᤧ᤹᥄” ᤜᤧᤰᤁᤩᤠᤱ ᤂᤧᤴ ᤑᤧᤴᤛᤠᤶᤔᤡᤸᤗᤧ ᤂᤧᤴ ᤔᤏᤠ᤺ᤴ ᤂᤢᤏᤡ᤹ ᤋᤃᤡᤀᤣ ᤐᤡᤷᤎᤠᤵ ᤌᤠᤵᤛᤢᤀᤠᤱ ᤔᤧᤱᤄᤠ᤺ᤴᤏᤣ ᤗᤧᤖᤢᤎ᤺ᤖᤥ॥
36 ᤜᤧᤰᤁᤩᤠᤱ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. “ᤁᤱᤃ ᤀᤠᤰᤋᤱᤒᤠ ᤏᤡᤛᤠᤶᤒᤣ᥅ ᤁᤴ ᤔᤏᤠ᤺ᤸᤗᤧᤃ ᤕᤢᤰ ᤏᤢ ᤔᤢᤰᤛᤠᤶᤔᤡᤸᤗᤧ ᤑᤧᤴᤛᤠᤶᤜᤠ᤹ ᤀᤡᤱᤈᤠ᤺ᤱ ᤐᤡᤖᤢᤛᤡᤸᤗᤧ ᤔᤧᤗ᤺ᤴ ᤔᤧᤒᤣ᤺ᤰᤗᤥ᥄”
37 ᤁᤴ ᤀᤡᤱᤄᤱᤅᤡᤴ ᤂᤧᤴ ᤌᤢᤶᤔᤥ ᤁᤧᤖᤧᤰ ᤐᤡᤛᤠᤱ ᤛᤧ᤺ᤖᤧᤖᤥ॥
ᤕᤧᤛᤢᤖᤧ ᤕᤖᤡᤰ ᤔᤏᤠᤜᤠ᤹ ᤘᤣ᤺ᤴᤍᤢᤛᤡ᤹
ᤔᤳᤋᤡ ᥎.᥇᥊-᥇᥍. ᤔᤷᤁᤢᤛ ᥇.᥈᥏-᥉᥊
38 ᤜᤧᤰᤁᤩᤠᤱ ᤕᤧᤛᤢ᤺ᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤐᤣ॥ ᤛᤡᤔᤥᤏᤖᤧ ᤁᤢᤴᤏᤥ᤺ᤵᤔᤧᤴ ᤋᤢᤱᤅᤡᤸᤗᤧ ᤋᤖᤢᤀᤠᤱ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤧᤸᤗᤧ ᤁᤢᤔᤧᤴᤏᤥ ᤕᤧᤛᤢ᤺ᤴ ᤔᤧᤔᤧᤳᤋᤢ॥
39 ᤕᤧᤛᤢ᤺ᤴ ᤁᤧᤍᤢᤰᤔᤠᤸᤗᤧ ᤁᤢᤏᤧᤳᤏᤠ᤺ᤸᤗᤧ ᤁᤢᤒᤣᤛᤠᤱ ᤐᤣᤀᤠᤱ ᤂᤧᤴ ᤋᤢᤱ ᤋᤢᤰᤔᤠᤴ ᤑᤧ᤺ᤰᤋᤢ. ᤜᤧᤰᤁᤩᤠᤱ ᤂᤡᤔᤥ ᤛᤡᤔᤥᤏᤖᤧ ᤁᤢᤴᤏᤥ᤺ᤵᤔᤧᤴ ᤏᤢᤖᤧᤀᤠᤱ ᤂᤧᤱᤜᤠ᤹ ᤋᤖᤣ ᤋᤥ᤺ᤛᤢᤛᤡᤖᤥ॥
40 ᤜᤧᤰᤁᤩᤠᤱ ᤏᤠᤶᤎᤩᤧᤀᤠᤱ ᤔᤏᤠᤜᤠ᤹ᤖᤧ ᤕᤖᤡᤰ ᤐᤖᤡᤰᤐᤠ ᤋᤢᤰᤔᤠᤸᤗᤧ ᤋᤖᤢᤛᤡᤒᤠ ᤔᤏᤠᤜᤠ᤹ ᤕᤧᤛᤢᤀᤥ ᤔᤧᤍᤠᤖᤢᤛᤡ॥ ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤶᤍᤠᤱ ᤜᤢᤰ ᤏᤧᤛ᤻ᤛᤢᤒᤡᤖᤢᤛᤡᤀᤠᤱ ᤏᤢᤛᤢᤛᤡᤖᤥ॥
41 ᤜᤧᤰᤁᤩᤠᤱ ᤑᤧᤴᤛᤠᤶᤜᤠ᤹ᤃ ᤀᤰᤂᤣ ᤔᤧᤒᤠ᤺ᤳᤋᤢᤖ ᤔᤧᤗ᤺ᤴᤍᤧ ᤔᤧᤒᤣᤖᤥ. “ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤛᤠ᤺ᤏᤧᤖᤥ॥” ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤑᤧ᤺ᤰᤋᤢᤛᤡᤖ ᤐᤠ᤺ᤵᤔᤠ ᤔᤧᤒᤠᤱᤄᤢᤴᤛᤡᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ ᤑᤠ᤹ᤀᤠᤱ ᤔᤧᤏᤡ᤺ᤛᤢᤀᤠᤱ ᤔᤧᤘᤕᤧᤖᤥ॥
ᤕᤧᤛᤢᤖᤧ ᤆᤰᤔᤧᤸᤗ᤹ᤀᤣ ᤛᤢᤏᤠᤀᤡᤱ ᤀᤡᤱᤓᤴ ᤆᤥᤃᤢ᤹
ᤔᤷᤁᤢᤛ ᥇.᥉᥋-᥉᥏
42 ᤜᤧᤰᤁᤩᤠᤱ ᤋᤠᤏᤠᤶᤛᤠ ᤕᤧᤛᤢ᤺ᤴ ᤀᤣ᤺ᤰᤛᤠᤍᤧᤴᤏᤥ ᤐᤣ. ᤁᤖ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤀᤠᤳᤋᤥ ᤘᤠ᤹ᤒᤣ ᤑᤠ᤹ᤀᤠᤱ ᤔᤧᤃᤥ᤺ᤳᤋᤢ॥ ᤂᤢᤏᤧ᤹ ᤔᤧᤍᤢᤔᤢᤀᤠᤱ ᤂᤢᤏᤡ᤹ᤏᤢᤀᤣ ᤘᤠ᤹ᤖ ᤑᤠ᤹ᤀᤠᤱ ᤛᤠᤰᤔᤠ ᤔᤧᤃᤥ᤺ᤳᤋᤢᤖᤥ.
43 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤁᤴ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧᤴ ᤛᤢᤏᤠᤀᤡᤱᤅᤡᤴ ᤘᤣ᤹ᤛ᤻ᤔᤠ ᤐᤠᤱᤈᤢᤶᤜᤠ᤹ᤀᤥᤀᤠᤱ ᤀᤡᤱᤓᤥ᤺ᤔᤠᤀᤣ ᤐᤥ᤺ᤱᤗᤥ॥ ᤀᤡᤱᤃᤠ᤹ᤃ ᤒᤠ ᤂᤧᤸᤗᤧ ᤗᤠᤃᤡᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤠᤱᤒᤠᤖᤥ॥”
44 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤕᤜᤢᤍᤡᤕᤠ ᤌᤢᤶᤔᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤜᤠ᤹ᤀᤥ ᤐᤣᤀᤠᤱ ᤛᤢᤏᤠᤀᤡᤱ ᤛᤧ᤺ᤛᤢᤖᤥ॥