7
ᤖᤥᤔᤡ ᤌᤰᤋᤢᤶᤒᤠᤸᤗᤧ ᤁᤢᤕᤥ᤺ᤰᤐᤧᤴ ᤕᤧᤛᤢᤖᤧ ᤏᤢᤛᤢ᤹
ᤔᤳᤋᤡ ᥎.᥋-᥇᥉. ᤕᤢᤜᤢᤴᤏᤠ ᥊.᥊᥉-᥋᥊
1 ᤜᤧᤰᤁᤩᤠᤱ ᤕᤧᤛᤢᤖᤧ ᤔᤏᤠᤜᤠ᤹ ᤁᤧᤖᤧᤰ ᤛᤡᤘᤠᤍᤡᤱ ᤂᤠᤜᤢᤴᤜᤠ᤹ ᤔᤧᤳᤋᤢ ᤛᤢᤖᤢᤛᤡᤀᤠᤱ ᤂᤢᤏᤧ᤹ ᤁᤐᤷᤏᤜᤢᤔ ᤐᤠᤱᤈᤢᤶᤔᤥ ᤗᤠ᤺ᤛᤧ॥
2 ᤂᤧᤵᤔᤥᤒᤠ ᤖᤥᤔᤡ ᤌᤰᤋᤢᤶᤒᤠᤸᤗᤧ ᤁᤧᤖᤧᤰᤏᤢ᤺ᤸᤗᤧ ᤁᤢᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤒᤠ ᤁᤢᤕᤥ᤺ᤰᤐᤧᤴ ᤋᤢᤃᤧᤀᤠᤱ ᤛᤡ᤺ᤔᤠᤗᤡᤱᤎᤥᤀᤥ ᤁᤧᤖᤧᤀᤠᤱ ᤏᤧᤛ᤻ᤛᤧᤖᤥ॥
3 ᤂᤧᤴ ᤌᤰᤋᤢᤶᤒᤠᤸᤗᤧ ᤕᤧᤛᤢ᤺ᤴ ᤐᤠᤱᤈᤢᤶᤔᤥ ᤋᤩᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤂᤧᤵᤛᤢᤀᤠᤱ ᤜᤠᤖᤠ᤹ ᤑᤧᤴᤏᤠᤱ ᤁᤢᤕᤥ᤺ᤰᤐᤧᤴ ᤘᤣ᤺ᤴᤍᤢᤖ ᤑᤠ᤹ᤀᤠᤱ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤕᤧᤛᤢᤖᤧ ᤁᤢᤗᤠ᤺ᤛᤧ ᤐᤠᤱᤄᤢᤛᤡᤖᤥ॥
4 ᤂᤧᤱᤜᤠ᤹ᤀᤠᤱ ᤕᤧᤛᤢᤖᤥ ᤔᤧᤍᤩᤧᤀᤠᤱ ᤀᤰᤂᤣ ᤔᤧᤔᤧᤳᤋᤢᤖ ᤐᤣᤗᤡ ᤔᤧᤓᤠᤰᤋᤢ. “ᤀᤠᤍᤠᤱᤒᤣ. ᤂᤧᤴ ᤌᤰᤋᤢᤶᤒᤧᤴ ᤂᤧᤏᤧ᤹ᤗᤠᤶ ᤁᤢᤓᤠ᤹ ᤂᤥ᤺ᤔᤠ ᤗᤠ᤹ᤖᤢᤖᤥ.
5 ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤏᤡ᤹ ᤕᤜᤢᤍᤡ ᤛᤢᤘᤠᤱᤜᤠ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰ॥ ᤜᤧᤰᤁᤩᤠᤱ ᤀᤠᤏᤡ᤹ ᤗᤠᤃᤡ ᤕᤜᤢᤍᤡ ᤆᤢᤶᤗᤢᤱᤜᤡᤶᤎᤡᤰ ᤀᤠᤈᤥᤃᤧ ᤀᤠᤒᤡᤖᤧᤀᤠᤱ ᤘᤠ᤹ᤖᤥ॥”
6 ᤜᤧᤰᤁᤩᤠᤱ ᤕᤧᤛᤢ᤺ᤴ ᤂᤧᤱᤜᤠ᤹ᤏᤢ ᤌᤠᤛᤡᤱ॥ ᤂᤧᤱᤜᤠ᤹ ᤂᤧᤴ ᤌᤰᤋᤢᤶᤒᤠᤸᤗᤧ ᤁᤢᤜᤡᤶᤔᤥ ᤁᤧᤵᤔᤠᤏᤢ᤺ᤸᤗᤧ ᤋᤃᤡ ᤂᤧᤴ ᤌᤰᤋᤢᤶᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤁᤢᤴᤈᤢᤶᤜᤠ᤹ ᤐᤠᤱᤄᤢᤛᤡ. “ᤀᤠᤍᤠᤱᤒᤣ. ᤋᤢᤰᤂᤣ ᤔᤧᤈᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤂᤧᤏᤧ᤹ ᤀᤠᤜᤡᤶᤔᤥ ᤗᤠᤱᤍᤠ᤺ᤰᤔᤠ ᤔᤧᤗᤠ᤹ᤀᤠᤴᤗᤥ॥
7 ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤀᤠᤒᤠᤅᤣᤀᤠᤱ ᤂᤧᤏᤧ᤹ᤀᤥ ᤋᤠ᤺ᤔᤠ ᤔᤧᤗᤠ᤹ᤀᤠᤴᤗᤥ॥ ᤂᤧᤏᤧ᤹ ᤐᤠ᤺ᤴ ᤛᤢᤳᤗᤠᤎᤡᤰᤗᤰ ᤁᤧᤒᤠ᤺ᤳᤋᤢᤛᤠᤱ ᤀᤠᤕᤥ᤺ᤰᤐᤧᤴ ᤘᤣ᤺ᤳᤗᤥ॥
8 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤀᤠᤱ ᤀᤠᤎᤢᤱᤎᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤁᤧᤘᤠ᤹ᤒᤠ ᤔᤏᤠᤀᤠᤖᤥ. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤀᤠᤕᤢᤰᤁᤥ ᤌᤰᤛᤢᤒᤠᤜᤠ᤹ ᤔᤧᤘᤠ᤹ᤖᤥ॥ ᤀᤡᤱᤃᤠ᤹ ᤌᤰᤛᤢᤒᤠᤎᤡᤰᤁᤡᤴ ‘ᤐᤣᤃᤧ᤹’ ᤔᤧᤳᤋᤢᤱᤅᤡᤸᤗᤧ ᤐᤣ᤺ᤰ. ᤜᤧᤰᤁᤩᤠᤱ ᤘᤣ᤹ ᤌᤰᤛᤢᤒᤠᤴ ‘ᤑᤧᤖᤧ᤹’ ᤔᤧᤳᤋᤢᤱᤅᤡᤸᤗᤧ ᤑᤧᤴ॥ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤕᤥ᤺ᤰᤐᤧᤴ ‘ᤁᤴ ᤆᤥᤃᤧ᤹’ ᤔᤧᤳᤋᤢᤱᤅᤡᤸᤗᤧ ᤆᤥᤃᤢ᤹ᤖᤥ॥”
9 ᤕᤧᤛᤢᤖᤧ ᤁᤴ ᤂᤧᤵᤛᤢᤀᤠᤱ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤔᤕᤧᤀᤠᤱ ᤂᤡᤖᤡ ᤜᤡᤛᤡᤱᤅᤠᤱ ᤂᤢᤏᤧ᤹ ᤁᤧᤍᤡᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤰᤋᤱᤒᤠ ᤕᤶᤒᤠ ᤏᤛᤠ᤺ᤴ ᤁᤧᤃᤵᤐᤠ ᤔᤏᤠ᤺ᤱᤃ ᤀᤡᤛᤪᤠᤀᤡᤗᤀᤥᤀᤠᤱ ᤀᤡᤱᤃᤠ᤹ ᤔᤧᤱᤄᤥᤀᤣ ᤘᤠ᤹ᤀᤠᤖᤥ᥄
10 ᤜᤧᤰᤁᤩᤠᤱ ᤌᤰᤋᤢᤶᤒᤠᤸᤗᤧ ᤐᤠᤱᤄᤢᤛᤡᤒᤠ ᤔᤏᤠᤜᤠ᤹ ᤔᤧᤏᤢ᤺ᤰᤂᤧᤀᤠᤱ ᤜᤡᤶᤔᤥ ᤔᤧᤃᤧᤖᤧᤸᤗᤧ ᤂᤧᤴ ᤕᤥ᤺ᤰᤐᤧᤴ ᤘᤣ᤺ᤳᤋᤧᤀᤠᤱ ᤕᤢᤅᤧᤒᤠ ᤔᤧᤍᤢᤔᤢᤖᤥ॥”
ᤔᤣᤔᤣᤍᤢᤔᤠᤸᤗᤧ ᤁᤢᤛ᤻ᤛᤠ᤺ᤴ ᤕᤧᤛᤢᤖᤧ ᤁᤢᤜᤡᤱᤘᤧᤳ ᤆᤥᤃᤢ᤹
11 ᤜᤧᤰᤁᤩᤠᤱ ᤁᤢᤓᤠ ᤕᤧᤴ ᤀᤣᤃᤠᤱ ᤕᤧᤛᤢ᤺ᤴ ᤏᤠᤀᤡᤴ ᤐᤠᤱᤈᤢᤶᤔᤥ ᤐᤣ॥ ᤂᤢᤏᤧ᤹ᤏᤢᤀᤣ ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤢ ᤕᤖᤡᤰ ᤔᤏᤠᤜᤠ᤹ᤀᤠᤱ ᤔᤧᤒᤣᤖᤥ॥
12 ᤂᤢᤏᤧ᤹ ᤐᤠᤱᤈᤢᤶᤔᤥᤒᤠ ᤕᤶᤒᤠ ᤋᤠ᤺ᤰᤜᤴᤏᤥ ᤁᤧᤖᤧᤸᤗᤧ ᤔᤣᤔᤣᤍᤢᤔᤠᤎᤡᤰᤗᤧ ᤗᤳᤇᤠᤖᤰ ᤁᤧᤘᤠ᤹ᤒᤠ ᤁᤢᤛ᤻ᤛᤠ᤺ ᤕᤧᤶᤒᤡᤳᤇᤠ᤹ᤀᤡᤴ ᤛᤩᤧᤀᤠᤱ ᤁᤢᤈᤣᤎᤠ᤺ᤵᤐᤡᤴ ᤐᤠᤱᤈᤢᤶᤔᤥᤒᤠ ᤔᤏᤠᤜᤠ᤹ᤖᤧ ᤔᤧᤓᤧᤳᤋᤢᤖ ᤔᤧᤒᤳᤇᤧᤒᤠ ᤋᤢᤔᤢ॥ ᤂᤧᤴ ᤔᤣᤔᤣᤍᤢᤔᤠᤴᤏᤢ ᤕᤖᤡᤰ ᤔᤏᤠᤜᤠ᤹ ᤔᤧᤘᤕᤧᤖᤥ॥
13 ᤕᤧᤛᤢᤖᤧ ᤂᤧᤴ ᤔᤣᤔᤣᤍᤢᤔᤠᤴ ᤀᤥᤔᤧᤳᤋᤢᤸᤗᤧ ᤁᤢᤗᤢᤱᤔᤠ᤹ ᤛᤡᤕᤥ᤺ᤴ ᤕᤥ᤺ᤴᤍᤧᤀᤠᤱ ᤂᤧᤏᤧ᤹ ᤔᤧᤜᤠᤒᤧᤴᤏᤧ᤹ᤀᤥ ᤔᤧᤳᤋᤢᤖ ᤀᤠ᤺ᤴᤇᤡᤱᤔᤠ ᤐᤡᤖᤢᤖᤥ॥
14 ᤜᤧᤰᤁᤩᤠᤱ ᤐᤣᤀᤠᤱ ᤆᤣᤎᤠ᤺ᤵᤐᤡᤴ ᤛᤢ᤺ᤛᤢᤸᤗᤧ ᤂᤧᤴ ᤆᤣᤎᤠ᤺ᤵ ᤁᤧᤒᤱᤒᤠᤜᤠ᤹ ᤔᤧᤕᤧᤶᤛᤡᤱ॥ ᤕᤧᤛᤢᤖᤧ ᤔᤧᤳᤋᤢ. “ᤗᤠᤈᤣ. ᤐᤥᤃᤧ᤹ᤀᤥ॥”
15 ᤜᤧᤰᤁᤩᤠᤱ ᤂᤧᤴ ᤁᤧᤛᤡ᤺ᤒᤠ ᤌᤠᤱᤒᤧᤴᤏᤡᤴᤏᤠᤱ ᤐᤥᤃᤧᤀᤠᤱ ᤐᤠ᤺ᤵᤔᤠ ᤜᤣ᤺ᤰᤋᤧ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤁᤢᤶᤔᤠ ᤜᤢᤰᤛᤢᤵᤋᤢᤖᤥ॥
16 ᤜᤧᤰᤁᤩᤠᤱ ᤔᤏᤠᤜᤠ᤹ ᤁᤧᤖᤧᤰ ᤔᤧᤃᤡᤛᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤠᤏᤡ᤹ ᤗᤢᤶᤔᤥᤀᤠᤱ ᤕᤶᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴ ᤘᤠ᤹ᤖᤥ॥” ᤜᤧᤰᤁᤩᤠᤱ ᤕᤠᤶᤔᤥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤔᤏᤠᤜᤠ᤹ ᤁᤢᤓᤠ᤹ ᤐᤡᤛᤧ ᤏᤢ ᤁᤶᤒᤪᤠᤱ ᤔᤧᤳᤇᤧ ᤕᤧᤖᤥ॥
17 ᤜᤧᤰᤁᤩᤠᤱ ᤁᤴ ᤜᤡᤴᤍᤥ᤺ᤰᤁᤡᤴ ᤁᤧᤖᤧᤰ ᤐᤡᤛᤠᤱ ᤕᤜᤢᤍᤡᤕᤠ ᤏᤢ ᤂᤧᤴ ᤂᤡᤖᤡᤒᤠ ᤌᤢᤶᤔᤥ ᤛᤧ᤺ᤖᤧᤖᤥ॥”
ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤐᤠᤱᤄᤢᤛᤡᤒᤠ ᤀᤡᤱᤛᤠᤒᤠᤜᤠ᤹
ᤔᤳᤋᤡ ᥇᥇.᥈-᥇᥏
18 ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤥᤗᤠᤶ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢ॥
19 ᤜᤧᤰᤁᤩᤠᤱ ᤏᤧᤵᤑᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤍᤠᤱᤒᤠᤸᤗᤥ ᤁᤴ ᤀᤡᤱᤄᤱᤅᤡᤴ ᤜᤠᤅᤢᤍᤣ᤺ᤛᤢ–“ᤀᤠᤸᤗ ᤁᤧᤍᤠ᤺ᤒᤠ ᤂᤪᤡᤛ᤻ᤋᤧᤴ ᤒᤠ ᤂᤧᤏᤧ᤹ᤀᤣᤒᤡ᥅ ᤀᤡ ᤀᤠᤏᤡᤃᤧ ᤘᤣ᤹ᤛ᤻ᤔᤠᤴ ᤜᤠᤱᤄᤢᤶᤒᤧᤒᤠᤒᤡ᥅”
20 ᤜᤧᤰᤁᤩᤠᤱ ᤂᤧᤴ ᤀᤡᤱᤛᤠᤒᤠᤜᤠ᤹ᤀᤠᤱ ᤕᤧᤛᤢᤖᤥ ᤐᤣᤛᤧᤳᤇᤡᤀᤠᤱ ᤔᤧᤳᤋᤧᤇᤢ. “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤕᤠᤵᤔᤡ ᤐᤠᤱᤄᤧᤳᤇᤡᤃᤧᤀᤠᤱ ᤘᤠ᤹ᤛᤡᤃᤧᤖᤥ. ‘ᤀᤠᤸᤗ ᤁᤧᤍᤠ᤺ᤒᤠ ᤂᤪᤡᤛ᤻ᤋᤧᤴ ᤒᤠ ᤂᤧᤏᤧ᤹ᤀᤣᤒᤡ. ᤀᤡ ᤀᤠᤏᤡᤃᤧ ᤘᤣ᤹ᤛ᤻ᤔᤠᤴ ᤜᤠᤱᤄᤢᤶᤒᤧᤒᤠᤒᤡ᥅’ ”
21 ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤕᤧᤶᤔᤥ ᤕᤧᤛᤢᤖᤧ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤏᤢ ᤑᤧᤴᤛᤠᤶᤔᤡᤸᤗᤧ ᤋᤖᤢᤛᤡᤒᤠᤜᤠ᤹ ᤏᤢᤛᤢᤛᤡ ᤜᤧᤰᤁᤩᤠᤱ ᤕᤖᤡᤰ ᤔᤡᤰᤑ᤺ᤶᤒᤠᤜᤠ᤹ᤀᤠᤱ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤆᤥᤃᤢᤛᤡᤖᤥ॥
22 ᤜᤧᤰᤁᤩᤠᤱ ᤕᤧᤛᤢᤖᤧ ᤕᤢᤜᤢᤴᤏᤠᤗᤠᤶ ᤁᤧᤍᤠ᤺ᤒᤠᤜᤠ᤹ ᤔᤧᤳᤋᤢᤛᤡ. “ᤐᤣᤛᤧᤳᤇᤧ᤹ᤀᤠᤱ ᤁᤴ ᤁᤧᤏᤡ᤺ᤛᤧᤳᤇᤢ. ᤁᤧᤄᤧᤵᤛᤧᤳᤇᤢᤒᤠ ᤐᤠ᤺ᤴᤏᤡᤴ ᤕᤢᤜᤢᤴᤏᤠ᤺ᤴ ᤔᤧᤳᤋᤧᤇᤧ᤹–ᤀᤰᤂᤣᤗ᤹ᤖᤡᤰ ᤔᤡᤰᤑ᤺ᤶᤒᤠᤜᤠ᤹ᤖᤧ ᤏᤡ᤺ᤔᤠ ᤔᤧᤛᤢᤰᤋᤢ᤹. ᤜᤧᤰᤁᤩᤠᤱ ᤗᤠᤱᤛᤰᤐᤠᤜᤠ᤹ ᤗᤠᤱᤔᤧᤄᤣ᤺ᤰ. ᤗᤥᤃᤣ᤹ᤖᤧ ᤋᤖᤢᤛᤡᤒᤠᤜᤠ᤹ ᤔᤧᤘᤣ᤺ᤳ. ᤜᤧᤰᤁᤩᤠᤱ ᤏᤠᤎᤧᤰᤁᤪᤧᤱᤜᤠ᤹ᤖᤧ ᤔᤧᤄᤧᤵᤛᤢ. ᤁᤧᤛᤡ᤺ᤒᤠᤜᤠ᤹ ᤕᤠᤶᤔᤥ ᤔᤧᤜᤡᤱ. ᤜᤧᤰᤁᤩᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ᤖᤧ ᤛᤢᤏᤠᤀᤡᤱᤅᤡᤴ ᤔᤧᤄᤧᤵᤛᤢ᤹ᤖᤥ॥
23 ᤜᤧᤰᤁᤩᤠᤱ ᤀᤡᤱᤃᤠ᤹ᤏᤢ ᤁᤢᤏᤡᤱᤘᤠ᤹ ᤔᤧᤴᤍᤢᤰᤔᤏᤠᤒᤠᤀᤠᤱ ᤕᤠᤵᤔᤡ ᤆᤵᤆᤡ ᤔᤧᤴᤈᤥ᤺ᤰᤔᤏᤠᤒᤠᤴ ᤔᤢ᤹ᤀᤡᤛᤠᤒᤠᤖᤥ॥”
24 ᤜᤧᤰᤁᤩᤠᤱ ᤕᤢᤜᤢᤴᤏᤠᤖᤧ ᤁᤢᤀᤡᤱᤛᤠᤒᤠᤜᤠ᤹ ᤐᤣᤛᤧᤳᤇᤡᤀᤠᤱ ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ ᤕᤢᤜᤢᤴᤏᤠᤖᤧ ᤁᤢᤔᤧᤴᤏᤥ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤣ᤺ᤰᤛᤠᤍᤧᤴᤏᤥ ᤌᤧᤔᤠ ᤀᤥᤔᤧᤳᤇᤧ ᤁᤧᤒᤣᤃᤡᤒᤠ᥅ ᤛᤢᤖᤡᤳᤔᤠᤸᤗᤧ ᤘᤠ᤺ᤴᤍᤢᤒᤠ ᤌᤡᤱᤏᤧ᤺ᤳᤋᤧᤴᤒᤡ᥅”
25 ᤏᤢ᤺ᤒᤠ ᤆᤠᤱ ᤋᤣ᤺ᤳ ᤁᤧᤈᤠᤱᤒᤠ ᤔᤏᤠ᤺ᤴ ᤀᤥᤔᤧᤳᤇᤧ ᤗᤠ᤺ᤰᤁᤠᤳ ᤁᤧᤒᤣᤃᤡᤒᤡ᥅ ᤜᤧᤰᤋᤱᤒᤠᤜᤠ᤹ ᤏᤢ ᤜᤠᤱᤜᤠᤱ ᤗ᤹ᤖᤡᤰ ᤁᤧᤕᤢᤱᤒᤠᤜᤠ᤹ᤃ ᤜᤠᤱᤜᤡᤶᤔᤥᤖᤰ ᤔᤧᤘᤠ᤹ᤖᤥ॥
26 ᤌᤧᤔᤠ ᤀᤥᤔᤧᤳᤇᤧ ᤁᤧᤒᤡᤃᤡᤒᤠ᥅ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴᤒᤡ᥅ ᤛᤧᤰᤂᤠ᤺ᤸᤗᤧ ᤀᤡᤱᤃᤠ᤹ ᤔᤧᤳᤏᤡᤱ. ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴᤏᤢ᤺ᤸᤗᤧ ᤕᤶᤒᤠ ᤔᤏᤠ᤺ᤴ ᤁᤧᤏᤡ᤺ᤛᤢᤶᤗᤥ॥
27 ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤔᤧᤴᤏᤥ. ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ.
“ᤀᤡᤱᤃᤠ᤹ ᤀᤠᤀᤡᤱᤛᤠᤒᤧᤴ ᤁᤧᤗᤠᤃᤡ ᤗᤠᤶ ᤕᤠᤖᤡᤵ ᤆᤥ᤺ᤰᤛᤧ
ᤂᤧᤏᤧ᤹ᤏᤢ᤺ᤸᤗᤧ ᤋᤃᤡ ᤐᤠᤱᤄᤢᤱᤗᤥ॥
28 ᤜᤧᤰᤁᤩᤠᤱ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤗᤢᤶᤔᤥ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤴᤏᤢ᤺ᤸᤗᤧ ᤕᤶᤒᤠ ᤜᤠ᤺ᤳᤋᤠᤱ ᤜᤥ᤺ᤵᤗᤥ॥ ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤁᤠᤰᤏᤢ ᤆᤢᤰᤐᤧᤴ ᤕᤢᤜᤢᤴᤏᤠ᤺ᤴᤏᤢ᤺ᤸᤗᤧ ᤕᤶᤒᤠ ᤆᤥ᤺ᤰ ᤑᤠ᤹ᤀᤠᤱ ᤔᤧᤳᤏᤡᤱᤗᤥ॥”
29 ᤀᤰᤂᤣᤗ᤹ᤖᤡᤰ ᤁᤧᤖᤧᤰ ᤔᤏᤠᤜᤠ᤹ᤖᤧ ᤜᤧᤰᤁᤩᤠᤱ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ᤖᤧᤀᤠᤱ ᤕᤧᤛᤢᤖᤧ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤶᤔᤡᤴ ᤏᤢ᤺ᤒᤠ ᤑᤠ᤹ᤀᤠᤱ ᤋᤧᤴᤍᤡᤱ ᤔᤧᤈᤥᤃᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤢᤜᤢᤴᤏᤠᤗᤠᤶ ᤒᤵᤋᤡᤛ᤻ᤔᤠ ᤔᤧᤈᤥ᤺ᤰᤛᤡᤱᤅᤠᤱ ᤔᤧᤘᤕᤧᤖᤥ॥
30 ᤁᤖ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤛᤣ᤺ᤰᤁᤡᤴ ᤔᤧᤏᤠ᤹ᤖᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤢᤜᤢᤴᤏᤠᤗᤠᤶ ᤒᤵᤋᤡᤛ᤻ᤔᤠ ᤔᤧᤴᤈᤥ᤺ᤰᤛᤡᤱᤅᤡᤴᤗᤥ॥
31 ᤕᤧᤛᤢᤖᤧ ᤕᤠᤶᤔᤥ ᤐᤠ᤺ᤳᤋᤢ. “ᤀᤠᤸᤗ ᤁᤴ ᤕᤧᤶᤔᤥᤒᤠ ᤔᤏᤠᤜᤠ᤹ ᤀᤠᤰᤋᤱᤒᤠ ᤔᤧᤈᤥ᤺ᤰ ᤑᤠ᤹ᤀᤠᤱ ᤌᤧᤔᤠ᤺ᤴᤏᤢ ᤋᤱᤄᤢᤱᤛᤡᤱᤒᤠᤒᤣ᥅
32 ᤂᤧᤱᤜᤠ᤹ᤃ ᤐᤠᤱᤈᤢᤶᤔᤥ ᤁᤧᤘᤠ᤹ᤒᤠ ᤜᤡᤴᤈᤠ᤹ᤒᤡᤳᤇᤠ ᤁᤢᤀᤡᤛᤡ᤺ᤰ ᤔᤧᤈᤥ᤺ᤰᤗᤥ॥
ᤂᤧᤱᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤔᤧᤳᤇᤡᤱ. ‘ᤀᤠᤏᤡᤃᤧ ᤔᤢ᤹ᤑᤪᤠᤔᤠ ᤜᤡᤵᤔᤏᤠ. ᤁᤖ ᤂᤡᤏᤡ᤹ ᤁᤧᤴᤗᤠ᤺ᤰᤂᤡᤴ॥
ᤀᤠᤏᤡᤃᤧ ᤔᤣᤖᤡᤱ ᤌᤰᤔᤏᤠ. ᤁᤖ ᤂᤡᤏᤡ᤹ ᤁᤧᤴᤜᤠᤒᤡᤴ॥’
33 ᤌᤣᤀᤠᤱᤓᤧᤸᤗᤧ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤴ ᤋ᤺ᤰᤏᤧᤳᤋᤥ ᤕᤢᤅᤧᤖ ᤀᤠᤔᤔᤒᤠᤴ ᤔᤧᤴᤎᤢᤱᤅᤣ ᤋᤩᤧ. ᤁᤖ ‘ᤂᤧᤸᤗᤧ ᤑᤧᤴᤛᤠᤶ ᤁᤳᤋᤢ᤹’ ᤁᤧᤔᤧᤳᤋᤢᤶᤗᤥ॥
34 ᤔᤧᤴᤇᤠᤶᤛᤠ᤺ᤴ ᤆᤖ ᤌᤢᤅᤢᤖ ᤋᤩᤧ. ᤜᤧᤰᤁᤩᤠᤱ ‘ᤂᤧᤴ ᤋ᤺ᤰᤌᤧ᤺ᤰᤁᤧᤜᤠ᤹. ᤌᤡ᤺ᤔᤛᤠᤱᤜᤠ᤹. ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ ᤏᤢ ᤗᤠᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤋᤣ᤺ᤱᤒᤠᤖᤥ’ ᤁᤧᤔᤧᤳᤋᤢᤶᤗᤥ॥
35 ᤏᤡᤱᤘᤠ᤹ᤑᤢ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤴ ᤋᤧᤴᤍᤡᤱ ᤁᤧᤈᤥ᤺ᤰᤐᤠᤀᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤂᤧᤴ ᤏᤡᤛ᤻ᤛᤣ ᤆᤥ᤺ᤰ ᤑᤠ᤹ᤀᤠᤱ ᤀᤥᤛᤣ᤺ᤴᤀᤠᤶᤎᤠᤰᤗᤥ॥”
ᤗᤠᤕᤥ ᤁᤧᤈᤥ᤺ᤰᤔᤠ ᤔᤧᤴᤇᤢᤔᤠ᤹ᤎᤡᤰᤗᤧ ᤗᤧᤵᤔᤡ ᤂᤥ᤺ᤛᤢ᤹
36 ᤑᤖᤡᤛᤡᤎᤡᤰᤗᤧ ᤕᤧᤛᤢ᤺ᤴ ᤕᤢ᤺ᤴᤇᤡᤰ ᤆᤠᤈᤠᤛᤧ ᤀᤢ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤡᤶᤔᤥ ᤐᤣᤀᤠᤱ ᤆᤠᤈᤠᤛᤧ ᤕᤢᤱᤛᤡᤱᤗᤥ॥
37 ᤂᤧᤴ ᤐᤠᤱᤈᤢᤶᤔᤥ ᤁᤧᤳᤏᤡᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤔᤧᤴᤇᤢᤔᤠ᤹ᤎᤡᤰ ᤘᤕᤧ॥ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤕᤧᤛᤢ᤺ᤴ ᤑᤖᤡᤛᤡ᤺ᤸᤗᤧ ᤁᤢᤜᤡᤶᤔᤥ ᤆᤠᤈᤠᤛᤧ ᤋᤩᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤂᤧᤵᤛᤢᤀᤠᤱ ᤂᤧᤸᤗᤧ ᤀᤡᤔᤧᤸᤗᤢᤱᤒᤠ ᤐᤷᤕᤠᤔᤠᤎᤡᤰ ᤁᤢᤗᤧᤶ ᤑᤢᤱᤏᤠᤶ ᤕᤠᤱᤛᤡᤅᤧᤀᤠᤱ
38 ᤕᤧᤛᤢᤖᤧ ᤁᤢᤀᤣᤃᤠᤱ ᤗᤧᤵᤔᤠᤱ ᤋᤩᤧᤀᤠᤱ ᤜᤠᤒᤧᤖ ᤕᤧᤛᤢᤖᤧ ᤁᤢᤗᤠᤱᤅᤥ ᤁᤢᤔᤡᤰᤘᤠ᤺ᤸᤗᤧ ᤘᤠᤖᤰᤂᤢᤖᤥ॥ ᤜᤧᤰᤁᤩᤠᤱ ᤁᤢᤎᤧᤃᤣ᤺ᤰᤀᤡ᤺ᤸᤗᤧ ᤋᤢᤃᤢᤀᤠᤱ ᤜᤣ᤺ᤛᤢᤖ ᤁᤢᤗᤠᤱᤅᤡᤴ ᤆᤢᤵ ᤔᤧᤳᤋᤢᤀᤠᤱ ᤂᤧᤴ ᤑᤢᤱᤏᤠᤶᤔᤡᤴ ᤜᤢ᤺ᤳᤋᤢᤖᤥ॥
39 ᤜᤧᤰᤁᤣ᤺ᤸᤗᤧ ᤂᤧᤴ ᤑᤖᤡᤛᤡ᤺ᤸᤗᤧ ᤏᤡ᤺ᤛᤢᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱ. “ᤁᤴ ᤔᤏᤠ᤺ᤴ ᤛᤧᤰᤂᤠᤀᤣ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤘᤕᤧᤸᤗᤧᤃ ᤂᤢᤏᤧ᤹ ᤁᤧᤛᤢᤔᤠ ᤔᤧᤴᤇᤢᤔᤠ᤹ᤀᤡᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤒᤠᤔᤧᤴ. ᤌᤣᤀᤠᤱᤓᤧᤸᤗᤧ ᤂᤧᤴ ᤛᤧᤰᤂᤠᤀᤣ ᤗᤠᤕᤥ ᤁᤧᤈᤥ᤺ᤰᤔᤠᤀᤣᤖᤥ॥”
40 ᤕᤧᤛᤢᤖᤧ ᤂᤧᤴ ᤑᤖᤡᤛᤡ᤺ᤴ ᤔᤧᤳᤋᤢ. “ᤛᤡᤔᤥᤏᤣ. ᤀᤡᤱᤃᤠ᤹ ᤂᤧᤏᤧ᤹ᤏᤢ ᤗᤳᤇᤠ ᤐᤠ᤺ᤴᤎᤡᤰ ᤐᤠ᤺ᤵᤔᤠ ᤁᤳᤋᤢᤱᤗᤥ॥”
ᤛᤡᤔᤥᤏᤖᤧᤀᤠᤱ ᤏᤥᤃᤵ ᤐᤡᤖᤢ. “ᤛᤡᤰᤛᤠᤶᤒᤣ. ᤔᤧᤳᤋᤠᤱᤅᤧ᤹ᤀᤥ॥”
41 ᤕᤧᤛᤢᤖᤧ ᤔᤧᤳᤋᤢ. “ᤌᤡᤰ ᤋᤧᤴᤏᤥ ᤏᤧᤵᤑᤢ ᤔᤏᤠᤜᤠ᤹ ᤘᤕᤧᤳᤇᤡ॥ ᤂᤧᤱᤜᤠ᤹ᤖᤧ ᤛᤡᤱᤏᤠ᤺ᤳ ᤕᤠᤱ ᤁᤧᤃᤧᤒᤠᤸᤗᤥᤗᤠᤶ ᤗᤳᤇᤠᤖᤧ ᤅᤠᤃᤡᤵ (᥋᥆) ᤕᤢᤵᤐᤠᤕᤠᤱ ᤏᤢ ᤘᤣ᤹ᤛ᤻ᤔᤠᤸᤗᤧ ᤁᤢᤃᤡᤵ ᤅᤠᤛᤡ (᥋᥆᥆) ᤕᤢᤵᤐᤠᤕᤠᤱ ᤋᤣ᤹ᤖᤧᤳᤇᤢᤀᤠᤱ ᤘᤕᤧᤳᤇᤡ॥
42 ᤁᤖ ᤂᤧᤴ ᤏᤧᤵᤔᤠᤱᤗᤧ ᤜᤢᤱᤔᤠ ᤔᤧᤴᤇᤢᤰᤁᤣ ᤘᤕᤧᤳᤇᤡ॥ ᤂᤧᤴ ᤛᤡᤱᤏᤠ᤺ᤳ ᤕᤠᤱ ᤁᤧᤃᤧᤒᤠᤸᤗᤧ ᤏᤧᤵᤔᤠᤱᤗᤧ ᤂᤢᤴᤇᤡ᤹ ᤛᤡᤱᤏᤠ᤺ᤳᤋᤡᤴ ᤗᤧᤖᤢ ᤐᤡᤖᤢᤛᤡ॥ ᤜᤧᤰᤁᤣ᤺ᤸᤗᤧ ᤀᤠᤳᤋᤡᤸᤗᤧ ᤂᤧᤴ ᤛᤡᤱᤏᤠ᤺ᤳ ᤕᤠᤱ ᤗᤧᤵᤔᤡ ᤁᤧᤒᤡᤒᤠᤴ ᤕᤖᤡᤰ ᤗᤢᤱᤔᤠ᤹ ᤋᤢᤰᤋᤢᤒᤡᤗᤠ᥅”
43 ᤛᤡᤔᤥᤏᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤂᤧᤴ ᤕᤖᤡᤰ ᤛᤡᤱᤏᤠ᤺ᤳ ᤗᤧᤵᤔᤡ ᤁᤧᤄᤥ᤺ᤒᤠᤴᤏᤣ ᤕᤖᤡᤰ ᤗᤢᤱᤔᤠ᤹ ᤋᤢᤰᤋᤢᤒᤡᤗᤠᤖᤥ॥”
ᤕᤧᤛᤢᤖᤧ ᤔᤧᤳᤋᤢ. “ᤂᤧᤏᤧ᤹ ᤛᤧᤰᤂᤠᤀᤣ ᤁᤧᤒᤠ᤺ᤳᤋᤢᤖᤥ॥”
44 ᤜᤧᤰᤁᤩᤠᤱ ᤕᤧᤛᤢ᤺ᤴ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤛᤡᤔᤥᤴᤏᤡᤴ ᤔᤧᤳᤋᤢ. “ᤛᤡᤔᤥᤏᤣ. ᤀᤡᤱᤃᤠ᤹ ᤂᤧᤏᤧ᤹ ᤁᤧᤜᤡᤶᤔᤥ ᤋᤩᤠᤱᤅᤡᤸᤗᤧ ᤗᤠᤱ ᤘᤠᤜᤵᤔᤠ ᤆᤫᤠ᤺ᤳ ᤁᤧᤶᤒᤡᤖᤠᤱᤅᤡᤴ. ᤁᤖ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤠᤗᤠᤱᤅᤡᤴ ᤁᤢᤔᤡᤰᤘᤠ᤺ᤸᤗᤧ ᤘᤠᤜᤵᤋᤢᤀᤠᤱ ᤁᤢᤎᤧᤃᤣ᤺ᤰᤀᤡ᤺ᤸᤗᤧ ᤋᤢᤃᤢᤀᤠᤱ ᤘᤠ᤹ᤖᤥ॥
45 ᤂᤧᤏᤧ᤹ ᤀᤡᤱᤃᤠ᤹ ᤆᤢᤵ ᤁᤧᤔᤧᤳᤋᤠᤱᤗ ᤛᤣᤘᤠ ᤁᤧᤶᤔᤧᤳᤋᤠᤱᤅᤡᤴ. ᤁᤖ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤡᤱᤃᤠ᤹ ᤋᤩᤠᤱᤅᤠᤱᤎᤥᤀᤣ ᤀᤠᤗᤠᤱᤅᤥ ᤆᤢᤵ ᤔᤧᤳᤋᤢᤖ ᤘᤠ᤹ᤖᤥ॥
46 ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤎᤧᤃᤣ᤺ᤰᤐᤥ ᤏᤡ᤺ᤱᤃᤧ᤹ ᤁᤧᤴᤜᤢ᤺ᤳᤋᤠᤱᤅᤡᤴ ᤁᤧᤶᤒᤡᤖᤠᤱᤅᤡᤴ. ᤁᤖ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤠᤗᤠᤱᤅᤥ ᤑᤢᤱᤏᤠᤶᤔᤡᤴ ᤜᤢ᤺ᤳᤋᤠᤱ ᤐᤡᤖᤠᤱᤅᤠᤱ ᤘᤠ᤹ᤖᤥ॥
47 ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤠᤱᤒᤠᤸᤗᤧ ᤕᤖᤡᤰ ᤗᤠᤕᤥᤗᤠᤶ ᤗᤧᤵᤔᤡ ᤂᤥ᤺ᤛᤢ᤹ ᤁᤧᤗ᤹ᤒᤠ ᤀᤥᤛᤣ᤺ᤴᤀᤠᤎᤠᤰᤗᤥ॥ ᤂᤧᤴ ᤆᤢ᤺ᤳᤇᤡᤰ ᤗᤠᤕᤥᤗᤠᤶ ᤗᤧᤵᤔᤡ ᤁᤧᤄᤥ᤺ᤒᤠᤸᤗᤧ ᤛᤢ᤺ᤸᤗᤡᤰᤗᤰ ᤗᤢᤱᤔᤠ᤹ ᤋᤢᤰᤋᤢᤛᤡ᤹ ᤑᤠ᤹ᤀᤠᤱ ᤔᤧᤳᤏᤧ᤹ᤖᤥ”
48 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤗᤠᤕᤥᤗᤠᤶ ᤗᤧᤵᤔᤡ ᤁᤧᤄᤥ᤺ᤛᤢᤀᤠᤱ ᤁᤧᤘᤠ᤹ᤖᤥ॥”
49 ᤜᤧᤰᤁᤣ᤺ᤸᤗᤧ ᤂᤢᤏᤧ᤹ᤏᤢ ᤆᤠ ᤁᤧᤈᤠᤒᤠᤖ ᤁᤧᤕᤢᤱᤒᤠ ᤘᤣ᤹ ᤔᤏᤠᤜᤠ᤹ ᤗᤠᤕᤥᤗᤠᤶ ᤗᤧᤵᤔᤡ ᤁᤧᤒᤡᤒᤠ ᤁᤴ ᤕᤠᤵᤔᤡ᤺ᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤔᤧᤔᤧᤳᤇᤡᤱᤗᤥ॥
50 ᤁᤖ ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤏᤛᤠ᤺ᤴᤏᤡᤸᤗᤧ ᤋᤠᤱᤃᤧᤛᤧ᤺ᤵᤋᤧᤀᤠᤱ ᤁᤧᤘᤠ᤹ᤖᤥ॥ ᤏᤢ᤺ᤖᤡᤰᤁᤠᤱ ᤐᤣᤃᤧ᤹ᤀᤥ॥”