16
ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤜᤡᤱ
ᤔᤳᤋᤡ ᥈᥎.᥇-᥎. ᤗᤢᤁᤠ ᥈᥊.᥇-᥇᥈. ᤕᤢᤜᤢᤴᤏᤠ ᥈᥆.᥇-᥇᥆
1 ᤀᤠᤸᤗ ᤏᤠ᤺ᤶᤛᤡᤱᤔᤠ ᤕᤧᤴ ᤁᤠ᤺ᤰᤋᤢᤀᤠᤱ ᤔᤖᤡᤕᤔ ᤔᤃ᤻ᤍᤗᤡᤏᤡ. ᤕᤠᤁᤢᤒᤖᤧ ᤁᤢᤶᤔᤠ ᤔᤖᤡᤕᤔ ᤏᤢ ᤛᤠᤗᤥᤔᤡᤛᤡᤖᤧ ᤔᤢᤷᤖ᤺ᤴ ᤕᤧᤛᤢᤖᤧ ᤁᤢᤎᤰᤁᤥ ᤜᤢ᤺ᤵᤔᤠ ᤑᤠ᤹ᤀᤠᤱ ᤔᤧᤀᤡᤅᤢ॥
2 ᤜᤧᤰᤁᤩᤠᤱ ᤋᤧᤏᤧᤒᤠ ᤕᤧᤴᤏᤥ ᤂᤠᤀᤥ᤺ᤳᤋᤧᤖ ᤐᤳᤇᤧᤸᤗᤧ ᤂᤧᤱᤜᤠ᤹ ᤕᤧᤛᤢ᤺ᤴ ᤔᤧᤏᤧᤛ᤻ᤛᤢᤒᤠ ᤀᤡᤵᤐᤢᤱᤅᤥ ᤔᤧᤎᤠ᤺ᤛᤡᤱ॥
3 ᤜᤧᤰᤁᤩᤠᤱ ᤗᤠᤶᤔᤥ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤏᤡ᤹ ᤗᤠᤃᤡ ᤂᤧᤴ ᤀᤡᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥ ᤔᤧᤕᤧᤵᤛᤢᤒᤠ ᤕᤶᤒᤠ ᤗᤢᤱᤅᤡᤴ ᤜᤠ᤺ᤳᤗᤧ ᤀᤠᤀᤡᤴᤀᤠᤒᤡᤒᤠᤒᤣ᥅”
4 ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤔᤧᤃᤧᤖᤧᤀᤠᤱ ᤀᤥᤔᤧᤔᤧᤳᤋᤢᤸᤗᤧ ᤀᤡᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥ ᤁᤧᤕᤧᤵᤐᤠ ᤗᤢᤱᤅᤡᤴ ᤌᤡᤰᤗᤧᤵᤔᤠᤱ ᤔᤧᤀᤡᤛᤢᤀᤠᤱ ᤏᤧᤛ᤻ᤛᤧᤒᤠ ᤔᤧᤏᤡ᤺ᤛᤢ॥ ᤂᤧᤴ ᤗᤢᤱᤅᤡᤴ ᤛᤠ᤹ᤖᤡᤰ ᤕᤶᤒᤠ ᤆᤥᤃᤧ॥
5 ᤂᤧᤱᤜᤠ᤹ ᤛᤡᤃᤠᤱ ᤔᤧᤗᤠ᤺ᤛ᤻ᤛᤧᤸᤗᤧ ᤂᤧᤵᤔᤥ ᤑ᤺ᤍᤠᤱᤒᤠ ᤋᤣ᤺ᤳ ᤁᤧᤈᤠᤱᤒᤠ ᤏᤠᤗᤡᤱᤃᤧᤴ ᤌᤠᤱᤒᤧᤴᤎᤡᤰ ᤆᤢᤵᤛᤠᤱ ᤗᤧᤵᤔᤠᤱ ᤕᤧᤒᤧᤒᤠ ᤔᤧᤏᤡ᤺ᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥
6 ᤂᤧᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹ᤀᤥ᥄ ᤂᤡᤏᤡ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤒᤠ ᤏᤠᤛᤖᤋᤒᤠ ᤕᤧᤛᤢ᤺ᤴ ᤁᤧᤃᤥ᤺ᤳᤋᤢᤶᤒᤠ ᤔᤧ᤺ᤶᤒᤡ᥅ ᤂᤢᤏᤧ᤹ᤃ ᤁᤵᤔᤥ ᤜᤥ᤺ᤵᤗᤥ᥄ ᤂᤢᤏᤧ᤹ᤃ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧ. ᤔᤧ᤺ᤴᤏᤧ ᤑᤠ᤹ᤃᤪ ᤂᤢᤏᤧ᤹ ᤔᤧᤏᤧᤛ᤻ᤛᤢᤒᤠᤍᤧᤴᤏᤡᤴ ᤀᤥᤔᤧᤳᤋᤧᤶᤔᤧ᤹ᤀᤥ॥
7 ᤂᤡᤏᤡ᤹ ᤐᤣᤃᤧᤶᤔᤧ᤹ᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤢ ᤐᤋᤪᤢᤛᤧᤴ ᤁᤴ ᤀᤡᤱᤄᤱᤅᤡᤴ ᤐᤡᤖᤧᤶᤛᤡᤶᤔᤧ᤹. ‘ᤂᤢᤏᤧ᤹ ᤋᤃᤡ ᤁᤧᤔᤧᤳᤋᤡᤒᤠ ᤜᤧᤰᤁᤣᤀᤣ ᤂᤡᤏᤡ᤹ᤏᤢ᤺ᤸᤗᤧ ᤋᤃᤡ ᤃᤠᤗᤡᤗᤀᤥ ᤐᤣ᤺ᤰᤗᤥ. ᤜᤧᤰᤁᤩᤠᤱ ᤂᤧᤳᤌᤥᤀᤣ ᤂᤢᤏᤧ᤹ ᤁᤧᤍᤢᤔᤢᤶᤗᤥ॥’ ”
8 ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤡᤵᤐᤢᤱᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧᤀᤠᤱ ᤔᤧᤗᤥ᤺ᤰᤋᤧ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤔᤧᤘᤕᤧᤖᤥ॥ ᤂᤧᤱᤜᤠ᤹ᤖᤧ ᤜᤠ᤺ᤳᤋᤠᤱ ᤌᤣᤀᤠᤱ ᤔᤧᤶᤔᤧᤳᤋᤢᤴ॥
ᤕᤧᤛᤢ᤺ᤴ ᤔᤖᤡᤕᤔ ᤔᤃ᤻ᤍᤗᤡᤏᤡᤖᤥ ᤀᤥᤛᤣ᤺ᤴᤎᤠᤰᤛᤡᤱ
ᤔᤳᤋᤡ ᥈᥎.᥏-᥈᥆. ᤗᤢᤁᤠ ᥈᥊.᥇᥉-᥋᥉. ᤕᤢᤜᤢᤴᤏᤠ ᥈᥆.᥇᥇-᥈᥉
9 ((ᤀᤠᤸᤗ ᤋᤧᤏᤧᤒᤠ ᤕᤧᤴᤏᤥ ᤂᤠᤀᤥ᤺ᤳᤋᤧᤖ ᤐᤳᤇᤧᤸᤗᤧ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤀᤠᤱ ᤔᤖᤡᤕᤔ ᤔᤃ᤻ᤍᤗᤡᤏᤡᤖᤥ ᤀᤥᤛᤣ᤺ᤴᤎᤠᤰᤛᤡᤱᤗᤥ॥ ᤂᤧᤸᤗᤥᤗᤠᤶ ᤏᤢᤛᤡ ᤑᤧᤴᤛᤠᤶᤜᤠ᤹ ᤕᤧᤛᤢᤖᤧ ᤏᤠ᤺ᤳᤋᤢ ᤗ᤺ᤳᤋᤢᤛᤡᤀᤠᤱ ᤘᤕᤧ॥
10 ᤔᤖᤡᤕᤔ ᤔᤃ᤻ᤍᤗᤡᤏᤡ᤺ᤴ ᤐᤣᤀᤠᤱ ᤕᤧᤛᤢ᤺ᤴ ᤋᤢᤔᤢᤒᤠ ᤐᤠ᤺ᤴᤏᤡᤴ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ॥ ᤂᤧᤱᤜᤠ᤹ ᤔᤣᤖᤡᤱ ᤌᤰᤏᤢ ᤔᤧᤜᤠᤒᤧᤖ ᤔᤧᤘᤕᤧᤖᤥ॥
11 ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤒᤠ ᤏᤢ ᤂᤧᤸᤗᤧ ᤏᤡ᤺ᤛᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤛᤠᤱ ᤏᤛᤠ᤺ᤴ ᤔᤧᤴᤈᤥᤃᤢᤴᤗᤥ॥
ᤕᤧᤛᤢ᤺ᤴ ᤏᤧᤵᤑᤢ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤥ ᤀᤥᤛᤣ᤺ᤴᤎᤠᤰᤛᤡᤱ
ᤗᤢᤁᤠ ᥈᥊.᥇᥉-᥉᥋
12 ᤂᤧᤱᤜᤠ᤹ᤀᤥ ᤏᤧᤵᤑᤢ ᤜᤢ᤹ᤛᤠᤶᤒᤠᤜᤠ᤹ ᤐᤠᤱᤓᤣ᤹ᤀᤥ ᤐᤣᤃᤧᤳᤇᤡᤖ ᤐᤳᤇᤧᤳᤇᤡᤸᤗᤧ ᤕᤧᤛᤢ᤺ᤴ ᤁᤢᤛᤡᤱ ᤏᤡ᤺ᤵᤔᤧᤴᤍᤧᤵᤔᤏᤠ ᤐᤥ᤺ᤰᤂᤧᤀᤠᤱ ᤂᤧᤱᤜᤠ᤹ᤀᤥ ᤀᤥᤛᤣ᤺ᤴᤎᤠᤰᤛᤡᤱᤗᤥ॥
13 ᤜᤧᤰᤁᤩᤠᤱ ᤂᤧᤱᤜᤠ᤹ ᤏᤧᤵᤔᤠᤱ ᤏᤢ᤺ᤰᤂᤧᤳᤇᤡᤀᤠᤱ ᤂᤢᤴᤇᤡ᤹ ᤏᤡ᤺ᤛᤧᤳᤇᤢᤒᤠ ᤐᤠ᤺ᤴᤏᤡᤴ ᤘᤣ᤹ᤜᤠ᤹ ᤆᤧᤰᤋᤧᤳᤇᤢ. ᤁᤖ ᤂᤧᤱᤜᤠ᤹ᤖᤧ ᤏᤛᤠ᤺ᤴ ᤔᤧᤴᤈᤥᤃᤢᤴᤗᤥ॥
ᤕᤧᤛᤢ᤺ᤴ ᤌᤡᤰ-ᤌᤡᤰ ᤁᤢᤜᤢ᤹ᤛᤠᤶᤒᤠᤖᤥ ᤀᤥᤛᤣ᤺ᤴᤎᤠᤰᤛᤡᤱ
ᤔᤳᤋᤡ ᥈᥎.᥇᥌-᥈᥆. ᤗᤢᤁᤠ ᥈᥊.᥉᥌-᥊᥏. ᤕᤢᤜᤢᤴᤏᤠ ᥈᥆.᥇᥏-᥈᥉. ᤛᤣ᤺ᤰᤕᤢᤰᤔᤡᤒᤠ ᥇.᥌-᥎
14 ᤕᤠᤱᤛᤡ ᤌᤡᤰ-ᤌᤡᤰ (᥇᥇) ᤜᤢ᤹ᤛᤠᤶᤒᤠᤜᤠ᤹ᤖᤧ ᤔᤧᤈᤖ ᤔᤧᤕᤢᤅᤧᤸᤗᤧ ᤕᤧᤛᤢ᤺ᤴ ᤂᤧᤵᤔᤥ ᤀᤥᤛᤣ᤺ᤴᤎᤠᤰᤛᤡᤱ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤑᤧ᤺ᤰᤋᤢᤛᤡ. ᤌᤣᤀᤠᤱᤓᤧᤸᤗᤧ ᤂᤢᤏᤡ᤹ ᤏᤛᤠ᤺ᤴ ᤛᤢ᤺ᤶᤔᤠᤴ ᤏᤢ ᤏᤡᤱᤘᤠ᤹ ᤌᤢᤱᤔᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤒᤠ ᤁᤧᤏᤡ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤏᤛᤠ᤺ᤴ ᤔᤧᤴᤈᤥᤃᤢᤴᤗᤥ॥
15 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗ ᤂᤡᤏᤡ᤹ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤣᤃᤧᤶᤔᤧ᤹ᤀᤠᤱ ᤁᤧᤖᤧᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ ᤁᤴ ᤛᤢᤏᤠᤀᤡᤱᤅᤡᤴ ᤀᤡᤱᤓᤥ᤺ᤛᤧᤶᤛᤡᤶᤔᤧ᤹ᤀᤥ᥄
16 ᤜᤧᤰᤁᤩᤠᤱ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤏᤢ ᤒᤵᤋᤡᤛ᤻ᤔᤠ ᤁᤧᤒᤥ᤺ᤱᤒᤠᤸᤗᤧ ᤛᤧᤴᤗᤵ ᤂᤥ᤺ᤛᤢ᤹. ᤁᤖ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤸᤗᤧ ᤂᤠᤛᤧᤴᤏᤥ ᤌᤠᤀᤠᤱ ᤂᤢᤶᤍᤡᤱ ᤂᤥ᤺ᤛᤢ᤹ᤖᤥ॥
17 ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤁᤴ ᤔᤡᤰᤛᤣ᤺ᤴᤏᤡᤸᤗᤧ ᤁᤠᤵᤋᤢᤛᤡᤖᤥ–ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤀᤠᤔᤡᤱᤅᤥ ᤑᤧᤴᤛᤠᤶᤜᤠ᤹ ᤔᤧᤏᤠ᤺ᤳᤋᤢᤛᤡ᤹. ᤜᤧᤰᤁᤩᤠᤱ ᤁᤢᤛᤱ ᤐᤠ᤺ᤴᤍᤠᤱᤜᤠ᤹ ᤔᤧᤒᤠ᤺ᤳᤋᤢ᤹ᤖᤥ॥
18 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤛᤣ᤺ᤰᤐᤠᤜᤠ᤹ ᤔᤧᤍᤧᤶᤛᤢᤛᤡ᤹. ᤏᤡᤱ ᤁᤧᤕᤠᤰᤐᤠ ᤆᤩᤠ ᤔᤧᤎᤢᤅᤢᤛᤠᤱ ᤌᤣᤀᤠᤱ ᤜᤶ ᤔᤧᤶᤒᤥ᤺ᤱᤅᤡᤴᤗᤥ॥ ᤜᤧᤰᤁᤩᤠᤱ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤛᤶᤍᤠᤱ ᤜᤢᤰ ᤔᤧᤏᤧᤛ᤻ᤛᤢ ᤔᤧᤒᤡᤖᤢᤛᤡᤸᤗᤧ ᤂᤧᤱᤜᤠ᤹ ᤔᤧᤘᤣ᤺ᤳᤗᤥ॥”
ᤕᤧᤛᤢ᤺ᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤣ᤺ᤰ
ᤗᤢᤁᤠ ᥈᥊.᥋᥆-᥋᥉. ᤛᤣ᤺ᤰᤕᤢᤰᤔᤡᤒᤠ ᥇.᥏-᥇᥇
19 ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢ ᤛᤢᤖᤢᤀᤠᤱ ᤂᤢᤏᤧ᤹ ᤌᤠ᤺ᤱᤎᤠ᤺ᤱ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤌᤥ ᤐᤰᤂᤧᤖ ᤐᤣᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤛᤡᤱᤗᤥ॥
20 ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤠᤰ ᤐᤡᤛᤠᤱ ᤔᤧᤒᤣᤀᤠᤱ ᤛᤢᤏᤠᤀᤡᤱ ᤔᤧᤛᤧ᤺ᤛᤢᤖᤥ॥ ᤍᤠᤱᤒᤠᤸᤗᤧᤀᤠᤱ ᤂᤢᤏᤡ᤹ᤗᤠᤶ ᤕᤠ᤺ᤶᤒᤰ ᤆᤥᤃᤢᤖ ᤕᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤏᤡᤸᤗᤧ ᤛᤢᤏᤠᤀᤡᤱᤅᤡᤴ ᤛᤧᤰᤂᤠᤖᤥ ᤑᤠ᤹ᤀᤠᤱ ᤀᤥᤛᤣ᤺ᤴᤍᤠᤱ ᤆᤥᤃᤢᤖᤥ॥))