7
ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤛᤠᤰᤌᤡᤶᤔᤡᤴ
ᤔᤳᤋᤡ ᥇᥋.᥇-᥏
1 ᤌᤡᤰᤕᤧᤴ ᤕᤖᤢᤛᤗᤧᤔ ᤕᤧᤰᤕᤰᤗᤠᤶ ᤁᤢᤓᤠ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤕᤧᤛᤢᤖᤥ ᤔᤧᤍᤩᤧ॥
2 ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤓᤠ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤘᤠᤜᤵᤛᤡᤱᤔᤠ ᤆᤥ᤺ᤰᤌᤡᤶ ᤁᤢᤀᤡᤛᤡ᤺ᤰ ᤜᤢᤰ ᤘᤠᤔᤧᤴᤜᤵᤐᤣ ᤆᤠ ᤔᤧᤈᤒᤠ ᤔᤧᤏᤡ᤺ᤛᤢᤛᤡ॥
3 (ᤑᤖᤡᤛᤡᤜᤠ᤹ ᤏᤢ ᤁᤠᤰ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤛᤠᤰᤌᤡᤶ ᤁᤢᤀᤡᤛᤡ᤺ᤰ ᤘᤠᤔᤧᤴᤜᤵᤛᤡᤱᤅᤣ ᤆᤠ ᤔᤧᤴᤈᤏᤧᤴᤗᤥ॥
4 ᤂᤧᤱᤜᤠ᤹ᤖᤧ ᤐᤠᤱᤈᤢᤶᤗᤠᤶ ᤜᤡᤶᤔᤥ ᤔᤧᤍᤠ᤺ᤸᤗᤧ ᤘᤠᤜᤵᤛᤡᤱᤔᤠ ᤏᤢ ᤛᤣᤛᤣᤛᤠᤱᤛᤠᤱ ᤆᤥ᤺ᤰᤔᤠ ᤌᤡᤶ ᤔᤧᤴᤈᤥ᤺ᤰᤁᤣ ᤔᤧᤴᤈᤏᤧᤴ॥ ᤂᤧᤱᤜᤠ᤹ᤖᤧ ᤑᤱᤏᤠᤜᤠ᤹. ᤆᤧᤳᤌᤩᤠᤜᤠ᤹. ᤂᤵᤐᤩᤠᤜᤠ᤹ ᤘᤠᤜᤵᤔᤠ ᤛᤢᤳᤌᤥ ᤆᤥ᤺ᤰᤔᤠ ᤘᤣ᤹ ᤌᤡᤶᤜᤠ᤹ᤀᤠᤱ ᤔᤧᤃᤳᤋᤢᤖᤥ॥)
5 ᤜᤧᤰᤁᤣ᤺ᤸᤗᤧ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤕᤧᤛᤢ᤺ᤴ ᤛᤣ᤺ᤴᤔᤧᤗᤠᤵᤋᤢ. “ᤁᤧᤜᤢ᤹ᤛᤠᤶᤒᤠᤜᤠ᤹ᤖᤧᤃ ᤛᤢᤳᤌᤥ ᤆᤥ᤺ᤰᤔᤠ ᤌᤡᤶ ᤔᤧᤴᤈᤥ᤺ᤰᤁᤣ ᤆᤠ ᤔᤧᤈᤒᤠ ᤀᤠᤏᤡᤃᤧ ᤏᤡ᤺ᤔᤏᤠ॥ ᤌᤣᤀᤠᤱ ᤁᤧᤜᤢ᤹ᤛᤠᤶᤒᤠᤜᤠ᤹ᤖᤧ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤥᤃᤢ ᤔᤧᤕᤢᤖᤢᤒᤠ ᤌᤡᤶᤔᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴᤒᤠᤒᤣ᥅”
6 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ᤖᤧ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤛᤠᤵᤋᤢᤒᤠᤱᤃ ᤛᤧᤰᤂᤠᤀᤣ ᤗᤠ᤹ᤖᤢᤖᤥ.
‘ᤁᤴ ᤔᤏᤠᤜᤠ᤹ᤖᤧᤃ ᤂᤢᤏᤡ᤹ ᤔᤢᤖᤠ᤺ᤸᤗᤧᤖᤰ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤀᤠᤖᤥ.
ᤁᤖ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤀᤡᤱᤃᤠ᤹ ᤗᤧᤵᤔᤠᤱ ᤜᤥ᤺ᤵᤗᤥ॥
7 ᤁᤱᤜᤠ᤹ᤖᤧ ᤜᤏᤧ ᤛᤣᤘᤠ ᤔᤧᤈᤥ᤺ᤰᤁᤠ.
ᤁᤖ ᤔᤧᤜᤢ᤹ᤖᤢᤛᤡᤒᤠ ᤏᤡᤛᤠᤶᤔᤡᤱᤃ ᤔᤧᤴᤇᤠᤶ ᤕᤠᤵᤔᤡᤖᤧ ᤀᤠᤵᤑᤣ᤺ᤰ ᤔᤧᤈᤥᤃᤢᤒᤠ ᤌᤡᤶᤖᤰᤗᤥ॥’
8 ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤁᤧᤏᤠ᤹ᤖᤢᤶᤔᤠᤱ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤆᤥ᤺ᤰᤌᤡᤶᤔᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤗᤥ॥
9 ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤥᤃᤢ ᤔᤧᤕᤢᤖᤢᤒᤠ ᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤛᤠ᤹ᤖᤡᤰ ᤆᤠ᤺ᤵᤐᤠ ᤁᤧᤈᤥᤃᤡ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤁᤧᤏᤠ᤹ᤖᤢᤶᤗᤥ॥
10 ᤁᤢᤒᤡᤀᤥ ᤔᤥᤛᤠ᤺ᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹. ‘ᤁᤧᤶᤒᤠ ᤁᤧᤶᤔᤠᤛᤡ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤧᤛᤧ᤹’ ᤜᤧᤰᤁᤩᤠᤱ ‘ᤀᤠᤳᤋᤡᤸᤗᤧ ᤁᤢᤶᤒᤠ ᤁᤢᤶᤔᤠᤛᤡ ᤛᤠᤱᤃᤪᤠ ᤔᤧᤳᤋᤢᤛᤡ. ᤂᤧᤱᤃ ᤛᤧᤵᤔᤠᤀᤣ ᤐᤥ᤺ᤱᤗᤥ॥’
11 ᤁᤖ ᤂᤡᤏᤡ᤹ ᤑᤖᤡᤛᤡᤜᤠ᤹ᤖᤧ ᤕᤠᤵᤔᤡᤜᤠ᤹. ‘ᤆᤩᤠ ᤀᤡᤱᤃᤠ᤹ᤗᤠᤶ ᤁᤢᤓᤠ᤹ ᤁᤧᤄᤥ᤺ᤛᤢᤶ. ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤷᤒᤠᤴ ᤐᤡᤔᤏᤠᤒᤠᤖᤥ’ ᤗ᤹ᤖᤡᤰ ᤂᤢᤏᤡ᤹ ᤐᤠ-ᤔᤠᤜᤠ᤹ ᤜᤧᤰᤁᤣ ᤔᤧᤵᤔᤠᤛᤡ ᤏᤢ᤺ᤒᤠᤖᤥ ᤑᤠ᤹ᤀᤠᤱ ᤁᤧᤔᤧᤳᤋᤢᤶᤛᤡᤶᤗᤥ (ᤁᤢᤷᤒᤠᤴ ᤑᤠ᤹ᤀᤡᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤏᤠᤒᤠ ᤜᤢᤰᤛᤥᤕᤠᤱᤗᤥ)॥
12 ᤜᤧᤰᤁᤣᤗ᤹ᤖᤡᤰ ᤂᤧᤴ ᤁᤢᤶᤒᤠ ᤁᤢᤶᤔᤠᤛᤡ ᤁᤢᤓᤠ᤹ ᤐᤡᤔᤠ ᤂᤡᤏᤡ᤹ ᤁᤧᤶᤒᤠᤱᤄᤢᤶᤔᤡᤴᤗᤥ॥
13 ᤀᤰᤂᤣᤗ᤹ᤖᤡᤰ ᤂᤡᤏᤡ᤹ ᤁᤧᤒᤥ᤺ᤱᤒᤠ ᤁᤧᤕᤢ᤺ᤒᤠ ᤆᤥ᤺ᤰᤌᤡᤶᤜᤠ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤔᤠᤱ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤁᤧᤗᤧᤖᤢᤶ ᤁᤧᤍᤣ᤺ᤛᤢᤶᤗᤥ॥ ᤒᤠ ᤜᤧᤰᤋᤱᤒᤠ ᤕᤠ᤺ᤶᤒᤰᤜᤠ᤹ᤖᤰ ᤂᤡᤏᤡ᤹ ᤁᤧᤈᤥᤃᤢᤶ॥”
ᤕᤧᤛᤢᤖᤧ ᤀᤠᤛᤢᤳᤌᤥ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤜᤢ᤹ᤖᤢᤛᤡ᤹
ᤔᤳᤋᤡ ᥇᥋.᥇᥆-᥈᥆
14 ᤕᤧᤛᤢᤖᤧ ᤔᤏᤠᤜᤠ᤹ ᤕᤠᤶᤔᤥ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤧᤖᤧᤰᤗᤧ ᤀᤡᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥
15 ᤗᤠ᤺ᤰᤁᤠᤳᤗᤠᤶ ᤔᤏᤠ ᤛᤡᤃᤠᤱ ᤁᤧᤗᤠ᤺ᤵᤐᤠ ᤐᤠ᤺ᤴᤏᤡᤸᤗᤧ ᤔᤏᤠ᤺ᤴ ᤀᤠᤛᤢᤳᤌᤥ ᤔᤧᤈᤥᤃᤢᤴᤗᤥ. ᤁᤖ ᤏᤡᤱᤘᤠ᤹ᤀᤥᤗᤠᤶ ᤗᤠ᤺ᤰᤁᤠᤳ ᤁᤧᤗ᤺ᤶᤒᤠ ᤐᤠ᤺ᤴᤏᤡᤸᤗᤧᤀᤣ ᤔᤏᤠ᤺ᤴ ᤀᤠᤛᤢᤳᤌᤥ ᤆᤥᤃᤢ᤹ᤖᤥ॥
16 ((ᤏᤧᤰᤂᤥ᤹ ᤁᤧᤒᤵᤐᤠᤜᤠ᤹ᤖᤧ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ॥”))
17 ᤂᤧᤴ ᤔᤏᤠᤜᤠ᤹ ᤐᤰᤌᤛᤡᤀᤠᤱ ᤕᤧᤛᤢ᤺ᤴ ᤜᤡᤶ ᤛᤡᤃᤠᤱ ᤗᤠ᤺ᤛᤧ ᤜᤧᤰᤁᤩᤠᤱ ᤂᤧᤵᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤁᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣ᤺ᤴ ᤌᤧᤔᤠᤒᤣ ᤑᤠ᤹ᤀᤠᤱ ᤛᤣ᤺ᤴᤔᤧᤍᤥᤛᤢᤖᤥ॥
18 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗᤛᤠᤱ ᤂᤡᤏᤡ᤹ ᤏᤡᤱᤘᤠ᤹ ᤐᤠ᤺ᤰᤗᤥ᥄ ᤔᤏᤠ ᤛᤡᤃᤠᤱ ᤁᤧᤗᤠ᤺ᤵᤐᤠ ᤆᤠ᤺ᤔᤏᤠᤒᤠ ᤁᤢᤈᤠ᤺ᤸᤗᤧ ᤂᤧᤴ ᤀᤠᤛᤢᤳᤌᤥ ᤔᤧᤈᤥᤃᤢᤴ ᤁᤧᤗ᤹ᤒᤠ ᤁᤧᤴᤏᤡ᤺ᤛᤢᤶᤔᤡᤴᤒᤡ᥅
19 ᤁᤱᤃ ᤛᤡᤰᤗᤢᤱᤔᤠᤀᤥ ᤔᤧᤒᤣ᤺ᤰᤏᤧᤴ. ᤁᤖ ᤁᤴ ᤛᤠᤵᤐᤥ᤺ᤰᤁᤥ ᤗᤠ᤺ᤳᤋᤠᤱ ᤗᤠ᤺ᤰᤁᤠᤳ ᤗ᤺ᤶᤒᤣ᤺ᤰᤗᤥ॥” (ᤀᤰᤂᤣᤗ᤹ᤖᤡᤰ ᤕᤧᤛᤢᤖᤧ ᤁᤠᤰ ᤆᤠ᤺ᤔᤏᤠᤒᤠ ᤆᤠᤜᤠ᤹ ᤛᤢᤳᤌᤥ ᤆᤥ᤺ᤰ ᤑᤠ᤹ᤀᤠᤱ ᤐᤠ᤺ᤳᤋᤢᤖᤥ॥)
20 ᤜᤧᤰᤁᤩᤠᤱ ᤕᤠᤶᤔᤥ ᤂᤢᤏᤧ᤹ ᤐᤠ᤺ᤳᤋᤢ. “ᤛᤡᤰᤗᤢᤱᤔᤥᤗᤠᤶ ᤁᤧᤗ᤺ᤶᤒᤠ ᤐᤠ᤺ᤴᤏᤡᤸᤗᤧ ᤂᤢᤏᤧ᤹ ᤀᤠᤛᤢᤳᤌᤥ ᤆᤥᤃᤢ᤹ᤖᤥ॥
21-22 ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶᤃᤧᤴ ᤕᤠᤵᤔᤡ ᤏᤡᤱᤘᤠ᤹ ᤛᤡᤃᤠᤱᤗᤠᤶ ᤑᤧᤴ ᤏᤡᤱᤘᤠ᤹. ᤕᤠᤶᤒᤥ᤺ᤵᤔᤠ. ᤂᤢ᤺ᤶᤔᤠ. ᤔᤏᤠ ᤛᤧᤵᤔᤠ. ᤆᤠᤖᤠᤶᤔᤠ ᤕᤠ᤺ᤶᤒᤰ. ᤂᤡ᤺ᤶᤔᤠ. ᤋᤠᤵᤑᤧ᤺ᤶᤒᤠ ᤏᤡᤱᤘᤠ᤹ ᤆᤥ᤺ᤰᤔᤠ. ᤀᤡᤱᤗᤧᤰ ᤆᤥ᤺ᤰᤔᤠ. ᤆᤧᤸᤗᤧᤰᤗᤧᤰ ᤗ᤹ᤔᤠ. ᤏᤠᤜᤧᤶᤔᤠ. ᤆᤧ᤹ᤕᤠ ᤀᤡᤱᤍᤥ ᤐᤠ᤺ᤵᤔᤠ. ᤀᤠᤱᤍᤡᤱ ᤗ᤹ᤔᤠ. ᤀᤍᤱ ᤐᤠ᤺ᤴ ᤆᤥ᤺ᤰᤔᤠ. ᤜᤧᤰᤋᤱᤒᤠ ᤑᤧᤴ ᤐᤠ᤺ᤴᤜᤠ᤹ ᤗ᤺ᤴᤗᤥ॥
23 ᤀᤰᤋᤱᤒᤠ ᤑᤧᤴ ᤐᤠ᤺ᤴᤜᤠ᤹ ᤛᤡᤃᤠᤱᤗᤠᤶ ᤗᤠ᤺ᤰᤁᤠᤳ ᤗ᤺ᤴᤏᤠᤱ ᤔᤏᤠ᤺ᤴ ᤀᤠᤛᤢᤳᤌᤥ ᤆᤥᤃᤢ᤹ᤖᤥ॥”
ᤌᤡᤶᤔᤧᤴᤍᤱ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤏᤛᤠ᤺ᤴ
ᤔᤳᤋᤡ ᥇᥋.᥈᥇-᥈᥎
24 ᤕᤧᤛᤢ᤺ᤴ ᤂᤧᤴ ᤋᤧᤴᤏᤥᤗᤠᤶ ᤋᤠᤕᤖ ᤏᤢ ᤛᤡᤍᤥᤏ ᤕᤧᤰᤕᤰ ᤂᤡᤖᤡᤒᤠ ᤌᤢᤶᤜᤠ᤹ᤀᤥ ᤐᤣᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤌᤡᤰ ᤜᤡᤶᤔᤥ ᤗᤠ᤺ᤛᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤧᤵᤔᤥ ᤋᤩᤧᤒᤠ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤏᤡᤱᤘᤠ᤹ ᤔᤧᤱᤄᤥ᤺ᤛᤢᤴᤗ ᤁᤧᤗ᤹ᤒᤠ ᤀᤡ᤺ᤳᤋᤢᤀᤠᤱ ᤘᤕᤧ॥ ᤁᤖ ᤂᤢᤏᤧ᤹ ᤆᤡᤱᤛᤡᤱᤔᤠ ᤔᤧᤛᤢᤰᤋᤧᤴᤗᤥ॥
25 ᤁᤖ ᤁᤢᤛ᤻ᤛᤠ᤺ᤴ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤀᤠᤱ ᤁᤧᤘᤠ᤹ᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤂᤢᤏᤧ᤹ ᤋᤩᤧᤒᤠ ᤐᤠ᤺ᤴᤏᤡᤴ ᤂᤧᤵᤛᤢᤏᤠᤔᤧ᤺ᤴᤏᤣ ᤕᤧᤛᤢᤖᤥ ᤋᤩᤧᤀᤠᤱ ᤁᤢᤗᤠᤱᤈᤰᤐᤥ ᤌᤢᤱᤒᤥᤜᤈ᤹ ᤕᤢᤱᤛᤡᤱ॥
26 ᤂᤧᤴ ᤔᤧᤴᤇᤢᤔᤠ᤺ᤴ ᤛᤡᤖᤡᤕᤠ ᤗᤠᤈᤣ᤹ᤛ᤻ᤔᤠ ᤛᤢᤖᤥᤑᤥᤏᤡᤛᤡᤕᤠ ᤌᤢᤶᤔᤥ ᤛᤠᤃᤧᤘᤠ᤺ᤴᤇᤡᤱᤔᤠ ᤌᤡᤶᤔᤧᤴᤍᤱ ᤛᤢᤘᤠᤱᤛ᤻ᤔᤠ ᤘᤕᤧ॥ ᤂᤧᤸᤗᤧ ᤀᤠᤛ᤻ᤛᤠ᤺ ᤆᤢᤰᤔᤧᤸᤗᤥᤗᤠᤶ ᤑᤧᤴᤛᤠᤶᤜᤠ᤹ ᤗ᤺ᤳᤋᤠᤱ ᤐᤡᤖᤠᤱᤅᤧ᤹ᤏᤠ ᤑᤠ᤹ᤀᤠᤱ ᤂᤢᤏᤧ᤹ ᤐᤣᤗᤡ ᤑᤠᤰᤋᤢ॥
27 ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤂᤖᤧ᤺ᤱᤅᤡᤴ ᤂᤠᤄᤠ ᤔᤧᤈᤖ ᤐᤥ᤺ᤱ॥ ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤂᤢᤏᤡ᤹ ᤂᤖᤧ᤺ᤱᤅᤡᤴ ᤏᤠᤵᤔᤠᤛᤡᤀᤠᤱ ᤁᤥ᤺ᤳᤆᤥᤜᤠ᤹ ᤐᤡᤔᤠᤛᤡ ᤏᤢ᤺ᤒᤠ ᤔᤧ᤺ᤴᤗᤥ॥”
28 ᤜᤧᤰᤁᤣ᤺ᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤏᤥᤃᤵ ᤐᤡᤖᤢ. “ᤛᤧᤰᤂᤠᤀᤣᤖᤥ ᤀᤠᤍᤠᤱᤒᤣ. ᤁᤖ ᤁᤥ᤺ᤳᤆᤥᤜᤠ᤹ᤖᤧᤀᤠᤱ ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤂᤢᤏᤡ᤹ ᤆᤠᤔᤠᤍᤧᤴᤏᤥᤗᤠᤶ ᤔᤰᤁᤧᤎᤠ᤺ᤒᤠ ᤁᤢᤈᤡᤜᤠ᤹ ᤔᤧᤈᤖᤥ॥”
29 ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤂᤧᤏᤧ᤹ ᤏᤢ᤺ᤒᤠ ᤏᤛᤠ᤺ᤴ ᤁᤢᤎᤡᤶᤒᤠ ᤏᤥᤃᤵ ᤁᤧᤒᤡᤖᤠᤱᤒᤠᤸᤗᤧ ᤆᤥᤃᤢᤸᤗᤧ ᤁᤧᤜᤡᤶᤔᤥ ᤐᤣᤃᤧ᤹. ᤁᤧᤛ᤻ᤛᤠ᤺ ᤆᤢᤰᤔᤧᤸᤗᤥᤗᤠᤶ ᤑᤧᤴᤛᤠᤶᤔᤡᤴ ᤗ᤺ᤴᤍᤧ ᤐᤣᤀᤠᤱ ᤘᤠ᤹ᤖᤥ॥”
30 ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤁᤢᤜᤡᤶᤔᤥ ᤏᤢ᤺ᤰᤂᤧ ᤐᤣᤀᤠᤱ ᤁᤢᤛ᤻ᤛᤠ᤺ᤴ ᤏᤢ᤺ᤖᤡᤰᤁᤠᤱ ᤁᤢᤏᤧᤳᤏᤠᤀᤥ ᤀᤡᤵᤛᤧᤀᤠᤱ ᤏᤧᤛ᤻ᤛᤧᤒᤠ ᤋᤢᤔᤢ. ᤌᤣᤀᤠᤱᤓᤧᤸᤗᤧ ᤑᤧᤴᤛᤠᤶᤜᤠ᤹ᤖᤧ ᤂᤧᤴ ᤔᤧᤗᤧᤖᤢ ᤔᤧᤎ᤺ᤀᤠᤱ ᤘᤕᤧ॥
ᤕᤧᤛᤢᤖᤧ ᤏᤠᤎᤠᤰᤐᤠ ᤔᤏᤠ᤺ᤴ ᤘᤣ᤺ᤴᤍᤢ᤹
31 ᤕᤧᤛᤢ᤺ᤴ ᤋᤠᤕᤖᤗᤠᤶ ᤛᤡᤍᤥᤏ ᤐᤥ᤺ᤰᤂᤧᤖ ᤐᤣᤀᤠᤱ ᤂᤢᤏᤧ᤹ ᤃᤠᤗᤡᤗ ᤘᤖᤰ ᤏᤢ ᤌᤡᤒᤥ᤺ᤱ ᤐᤠᤱᤈᤢᤶᤔᤡᤸᤗᤧᤴ ᤌᤢᤶᤔᤥ ᤐᤣᤖᤥ॥
32 ᤂᤧᤵᤔᤥ ᤔᤏᤠᤜᤠ᤹ᤖᤧ ᤏᤠᤎᤠᤰᤐᤠ ᤏᤢ ᤁᤢᤒᤠ᤺ᤴ ᤔᤧᤴᤗ᤺ᤶᤔᤏᤠᤒᤠ ᤔᤏᤠᤎᤡᤰ ᤔᤧᤍᤠᤖᤢᤀᤠᤱ ᤕᤧᤛᤢᤖᤧ ᤁᤢᤜᤢᤰᤁᤡᤴ ᤁᤢᤛᤶᤍᤠᤱ ᤏᤧᤛ᤻ᤛᤢᤏᤡ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤖᤥ॥
33-34 ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ᤗᤠᤶ ᤔᤠ᤺ᤱᤄᤠ ᤋᤣ᤹ᤖᤢᤀᤠᤱ ᤁᤢᤏᤧᤰᤂᤥ᤹ᤒᤥ ᤜᤢᤰᤆᤥ᤺ᤴ ᤁᤣ᤺ᤳᤋᤢ. ᤜᤧᤰᤁᤩᤠᤱ ᤜᤢᤰᤁᤥ ᤌᤩᤠ᤺ᤳ ᤌᤥ᤺ᤰᤋᤢᤀᤠᤱ ᤁᤢᤗᤧᤛᤥ᤺ᤵᤐᤡᤴ ᤛᤢ᤺ᤛᤢ ᤜᤧᤰᤁᤩᤠᤱ ᤋᤠᤱᤛᤠᤰᤐᤧᤴ ᤗᤧᤵᤔᤠᤱ ᤀᤥᤔᤕᤧᤀᤠᤱ ᤛᤰᤔᤠ ᤛᤥ᤺ᤴᤇᤡᤱᤗ “ᤀᤡᤑ᤻ᤑᤠᤌᤠ” ᤔᤧᤳᤋᤢᤖᤥ॥ ᤂᤧᤴ ᤑᤠ᤹ᤀᤡᤴ “ᤜᤴᤇᤡᤱᤅᤧ᤹” ᤐᤥ᤺ᤱᤗᤥ॥
35 ᤂᤡᤔᤥ ᤂᤧᤴ ᤔᤏᤠ᤺ᤴ ᤏᤧᤰᤂᤥ᤹ ᤂᤧᤶᤔᤠ ᤁᤧᤛᤢᤰᤐᤠ ᤏᤢ ᤐᤠ᤺ᤵᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧᤀᤠᤱ ᤏᤢ᤺ᤖᤡᤰ ᤐᤠ᤺ᤵᤔᤠ ᤜᤣ᤺ᤰᤋᤧᤖᤥ॥
36 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ ᤁᤴ ᤐᤠ᤺ᤴᤏᤡᤴ ᤜᤠ᤺ᤳᤋᤠᤱ ᤔᤧᤵᤔᤠᤛᤡ ᤔᤧ᤺ᤴ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥ ᤁᤖ ᤀᤠᤰᤂᤧᤴ ᤔᤧᤵᤔᤠᤛᤡ ᤔᤧ᤺ᤴᤗᤥ ᤔᤧᤳᤋᤢᤛᤡᤛᤠᤱ ᤁᤴ ᤀᤡᤱᤓᤴᤏᤡᤴ ᤔᤧᤛᤧ᤺ᤛᤢᤖ ᤔᤧᤍᤣ᤹ᤖᤢᤖᤥ॥
37 ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. “ᤂᤢᤏᤧ᤹ᤃ ᤁᤠᤰ ᤐᤠ᤺ᤴᤜᤠ᤹ ᤛᤠ᤹ᤖᤡᤰ ᤏᤢ᤺ᤒᤠ ᤆᤥᤃᤢᤀᤠᤱ ᤘᤠ᤹ᤖᤥ᥄ ᤀᤰᤂᤣᤗ᤹ᤖᤡᤰ ᤏᤠᤎᤠᤰᤐᤠᤜᤠ᤹ ᤏᤢ ᤐᤠ᤺ᤵᤔᤠ ᤔᤧᤴᤇᤢᤰᤔᤏᤠᤒᤠᤜᤠ᤹ᤀᤠᤱ ᤏᤢᤛᤢᤛᤡᤖᤥ॥”