16
ᤕᤧᤛᤢ᤺ᤴ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤡᤰᤛᤣ᤺ᤴ ᤔᤧᤏᤠ᤺ᤰᤋᤢ᤹
ᤔᤷᤁᤢᤛ ᥎.᥇᥇-᥇᥉. ᤗᤢᤁᤠ ᥇᥈.᥋᥊-᥋᥌
1 ᤁᤢᤓᤠ ᤑᤖᤡᤛᤡᤜᤠ᤹ ᤏᤢ ᤛᤍᤢᤁᤡᤜᤠ᤹ ᤔᤧᤍᤩᤧᤀᤠᤱ “ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤧᤒᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤎᤡᤰ ᤕᤠᤵᤔᤡ ᤀᤥᤛᤣ᤺ᤴᤀᤠᤎᤠᤰᤋᤧ᤹” ᤔᤧᤔᤧᤳᤋᤢᤖ ᤕᤧᤛᤢᤖᤧ ᤁᤢᤏᤡᤱᤘᤠ᤹ ᤔᤧᤛᤠ᤹ᤖᤢ॥
2 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤕᤢ᤺ᤴᤇᤡᤰ ᤋᤠᤱᤛᤠᤰᤐᤧᤴ ᤜᤧ᤺ᤳ ᤗ᤹ᤀᤡᤸᤗᤧ ᤋᤠ᤺ᤴᤍᤡᤰ ᤏᤠᤶᤛᤧ᤺ᤰ ᤗ᤹ᤖᤡᤰ ᤁᤧᤒᤠ᤺ᤳᤋᤢᤶ॥
3 ᤜᤧᤰᤁᤩᤠᤱ ᤋᤠᤏᤠᤶ ᤋᤠᤱᤛᤠᤰᤐᤧᤴ ᤔᤢᤍ᤺ᤵᤐᤡᤸᤗᤧ ᤀᤠᤀᤡᤴ ᤘᤠᤜᤡᤳ ᤌᤠ᤺ᤛᤢ᤹. ᤛᤢᤖᤡᤳ ᤁᤣᤈᤱᤅᤡᤴ ᤜᤢ᤹᤺ ᤗ᤹ᤖᤡᤰ ᤁᤧᤒᤠ᤺ᤳᤋᤢᤶ॥ ᤀᤰᤂᤣᤗ᤹ᤖᤡᤰ ᤋᤠᤱᤛᤠᤰᤐᤧᤴ ᤀᤥᤃᤧᤔᤧᤳᤋᤢᤶᤔᤠᤱ ᤘᤠᤕᤧᤶᤔᤡᤴ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠ ᤆᤥ᤺ᤰ ᤑᤠ᤹ᤀᤠᤱ ᤁᤧᤛᤧᤴᤍᤢᤶᤔᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤴ ᤕᤧᤶᤔᤥ ᤁᤧᤍᤠ᤺ᤒᤠ ᤔᤡᤰᤛᤣ᤺ᤴᤜᤠ᤹ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤠᤒᤣ᥅
4 ᤁᤴ ᤕᤧᤶᤔᤥᤒᤠ ᤁᤢᤀᤡᤃᤧᤓᤧ᤹ᤒᤠ ᤏᤢ ᤗᤠᤕᤥᤒᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤀᤥᤔᤧᤵᤔᤠ ᤔᤧᤃᤥ᤺ᤳᤋᤢ᤹. ᤁᤖ ᤂᤧᤱᤜᤠ᤹ᤖᤧᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤥᤏᤠᤖᤧ ᤁᤢᤔᤡᤰᤛᤣ᤺ᤴᤏᤠᤱᤎᤥ ᤘᤣ᤹ ᤔᤡᤰᤛᤣ᤺ᤴ ᤌᤣᤀᤠᤱ ᤔᤧᤱᤄᤥ᤺ᤛᤢᤴᤗᤥ॥” ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤐᤰᤌᤛᤡᤀᤠᤱ ᤂᤧᤵᤔᤥᤗᤠᤶ ᤌᤠᤛᤡᤱᤗᤥ॥
ᤑᤖᤡᤛᤡ ᤏᤢ ᤛᤍᤢᤁᤡᤜᤠ᤹ᤖᤧ ᤂᤢᤏᤡ᤹ ᤂᤣ᤹ᤛᤢᤱ
ᤔᤷᤁᤢᤛ ᥎.᥇᥊-᥈᥇
5 ᤕᤠᤱᤛᤡ ᤜᤢ᤹ᤛᤠᤶᤒᤠᤜᤠ᤹ ᤘᤖᤰᤁᤡᤸᤗᤧ ᤏᤠᤎᤠ᤺ᤶᤒᤡ ᤔᤧᤃᤧᤖᤧᤸᤗᤧ ᤂᤧᤱᤜᤠ᤹ᤖᤧ ᤂᤖᤧ᤺ᤱ ᤕᤠᤱᤛᤡᤱᤔᤠ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤒᤠᤴ ᤏᤡᤱᤘᤠ᤹ ᤔᤧᤄᤥ᤺ᤛᤢᤖᤥ॥
6 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤑᤖᤡᤛᤡᤜᤠ᤹ ᤏᤢ ᤛᤍᤢᤁᤡᤜᤠ᤹ᤖᤧ ᤂᤢᤏᤡ᤹ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤗᤠᤶ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥”
7 ᤂᤧᤱᤜᤠ᤹ᤖᤧ ᤂᤖᤧ᤺ᤱᤅᤡᤴ ᤀᤠᤶᤓᤧᤳᤋᤢᤶᤔᤡᤴᤏᤠᤱ ᤀᤠᤏᤡ᤹ ᤀᤰᤂᤣ ᤀᤠᤔᤧᤳᤋᤧᤒᤠᤖᤥ ᤑᤠ᤹ᤀᤠᤱ ᤂᤢᤏᤡ᤹ ᤗᤢᤶᤔᤥ ᤐᤠ᤺ᤴ ᤔᤧᤎᤰᤋᤧᤖᤥ॥
8 ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ᤏᤡᤱᤘᤠ᤹ᤀᤥᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤔᤧᤳᤋᤢᤛᤡ. “ᤏᤛᤠ᤺ᤴ ᤁᤧᤛᤢ᤺ᤶᤒᤠᤛᤣ. ᤂᤡᤏᤡ᤹ ᤗᤢᤶᤔᤥ ᤂᤖᤧ᤺ᤱ ᤜᤥ᤺ᤵ ᤑᤠ᤹ᤀᤠᤱ ᤌᤣᤀᤠᤱ ᤐᤠ᤺ᤴ ᤁᤧᤎᤰᤋᤡᤒᤠᤒᤣ᥅
9 ᤂᤡᤏᤡ᤹ ᤀᤠᤸᤗᤛᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤡ᥅ ᤜᤧᤴᤇᤡᤱ ᤅᤠᤛᤡ (᥋᥆᥆᥆) ᤔᤏᤠᤜᤠ᤹ᤖᤧ ᤅᤠᤛᤡ ᤂᤖᤧ᤺ᤱ ᤔᤧᤈᤀᤠᤱ ᤁᤢᤈᤡ ᤁᤧᤏᤶᤒᤠᤴ ᤁᤧᤛᤢᤵᤛᤢᤶᤔᤡᤸᤗᤧ ᤀᤠᤰᤂᤧᤴ ᤏᤀᤡᤔᤠ ᤕᤥᤖᤧ. ᤂᤧᤴ ᤏᤡᤱᤘᤠ᤹ ᤁᤧᤓᤣ᤺ᤳᤇᤢᤶᤒᤡ᥅
10 ᤕᤠᤶᤔᤥ ᤜᤧᤴᤇᤡᤱ ᤗᤡᤛᤡ (᥊᥆᥆᥆) ᤔᤏᤠᤜᤠ᤹ᤖᤧ ᤏᤢᤛᤡ ᤂᤖᤧ᤺ᤱ ᤔᤧᤈ ᤜᤧᤰᤁᤩᤠᤱ ᤀᤠᤰᤂᤧᤶᤔᤩᤠᤰ ᤁᤢᤈᤡ ᤁᤧᤏᤶᤒᤠᤜᤠ᤹ ᤂᤡᤏᤡ᤹ ᤁᤧᤛᤢᤵᤛᤢᤶ. ᤂᤧᤴᤏᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤓᤣ᤺ᤳᤇᤢᤶᤒᤡ᥅
11 ᤂᤖᤧ᤺ᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤃᤠ᤹ ᤔᤧᤳᤏᤡᤱᤒᤠ ᤔᤧ᤺ᤴ ᤑᤠ᤹ᤀᤠᤱ ᤀᤠᤸᤗᤛᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤡ᥅ ᤁᤖ ᤑᤖᤡᤛᤡᤜᤠ᤹ ᤏᤢ ᤛᤍᤢᤁᤡᤜᤠ᤹ᤖᤧ ᤂᤢᤏᤡ᤹ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤗᤠᤶ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ ᤑᤠ᤹ᤀᤠᤱᤏᤧ ᤜᤧᤰᤁᤣ ᤔᤧᤳᤏᤡᤱᤒᤠᤖᤥ॥”
12 ᤜᤧᤰᤁᤩᤠᤱᤗᤰ ᤂᤧᤱᤜᤠ᤹ᤖᤧ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤗᤠᤶ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ ᤔᤧᤳᤋᤢᤛᤡᤒᤠ ᤔᤧ᤺ᤴ. ᤁᤖ ᤑᤖᤡᤛᤡᤜᤠ᤹ ᤏᤢ ᤛᤍᤢᤁᤡᤜᤠ᤹ᤖᤧ ᤂᤢᤏᤡ᤹ ᤏᤡᤛᤠᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤳᤋᤢᤒᤠ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ॥
ᤐᤋᤪᤢᤛᤖᤧ ᤕᤧᤛᤢ᤺ᤴ ᤂᤪᤡᤛ᤻ᤋ ᤗ᤹ᤖᤡᤰ ᤀᤡᤱᤓᤥ᤺ᤛᤢ᤹
ᤔᤷᤁᤢᤛ ᥎.᥈᥍-᥉᥆. ᤗᤢᤁᤠ ᥏.᥇᥎-᥈᥇
13 ᤕᤧᤛᤢ᤺ᤴ ᤛᤡᤈᤖᤡᤕᤠ ᤑᤡᤗᤡᤵᤐᤡ ᤌᤢᤶᤔᤥ ᤋᤩᤧ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤔᤏᤠᤜᤠ᤹ᤖᤧ ᤔᤧᤴᤇᤠᤶᤛᤠ᤺ᤴ ᤜᤠ᤺ᤳ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢ᤹ᤒᤣ᥅”
14 ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤁᤢᤓᤠᤖᤧ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ. ᤘᤣ᤹ᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ. ᤜᤧᤰᤁᤩᤠᤱ ᤀᤠᤸᤗᤛᤠᤱ ᤘᤣ᤹ᤜᤠ᤹ᤖᤧᤃ ᤕᤷᤔᤡᤕᤠ ᤔᤧ᤺ᤴᤇᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤀᤥ ᤗᤳᤇᤠᤏᤧᤖᤥ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢ᤹ᤖᤥ॥”
15 ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤁᤖ ᤂᤡᤏᤡ᤹ᤃ. ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤕᤠᤵᤔᤡ ᤁᤧᤔᤧᤳᤋᤡ᤹ᤒᤣ᥅”
16 ᤛᤡᤔᤥᤏ ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ. ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤏᤧᤖᤥ॥”
17 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤕᤥᤏᤠᤖᤧ ᤁᤢᤛ᤻ᤛᤠ᤺ ᤛᤡᤔᤥᤏᤣ. ᤂᤧᤏᤧ᤹ᤃ ᤔᤢ᤹ᤀᤡᤛᤠᤒᤠᤏᤧᤖᤥ ᤌᤣᤀᤠᤱᤓᤧᤸᤗᤧ ᤁᤱᤃ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤀᤥᤛᤣ᤺ᤴᤍᤠᤱ ᤁᤧᤶᤈᤥᤃᤧᤒᤠ ᤔᤧ᤺ᤴ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤂᤧᤏᤧ᤹ ᤀᤥᤛᤣ᤺ᤴᤍᤠᤱ ᤁᤧᤈᤥᤃᤧᤒᤠᤖᤥ॥
18 ᤛᤧᤰᤂᤠ ᤐᤠ᤺ᤴ ᤂᤧᤏᤧ᤹ ᤔᤧᤳᤏᤧ᤹. ᤂᤧᤏᤧ᤹ ᤐᤋᤪᤢᤛᤏᤧᤖᤥ (ᤐᤋᤪᤢᤛ ᤑᤠ᤹ᤀᤡᤴ ᤗᤢᤱᤗᤥ). ᤜᤧᤰᤁᤩᤠᤱ ᤁᤴ ᤐᤕᤶ ᤕᤶᤒᤠ ᤗᤢᤱᤛᤶᤍᤠᤱ ᤀᤡᤱᤃᤠ᤹ ᤀᤠᤛᤣᤛᤣᤜᤢᤵᤗᤰᤁᤡᤴ ᤆᤥᤃᤢᤱᤗᤥ॥ ᤜᤧᤰᤁᤩᤠᤱ ᤁᤴ ᤀᤠᤛᤣᤛᤣᤜᤢᤵᤗᤰᤁᤡᤴ ᤛᤡ᤺ᤔᤧᤸᤗᤧᤴ ᤔᤢᤰᤛᤠᤶᤔᤡᤸᤗᤧ ᤏᤠ᤺ᤶᤔᤠ ᤔᤧᤛᤢᤰᤋᤢᤴᤗᤥ॥
19 ᤂᤧᤏᤧ᤹ᤃ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤸᤗᤧᤴ ᤋᤡᤔᤡᤰᤜᤠ᤹ ᤐᤡᤏᤧᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤛᤠᤰᤋᤢᤒᤠᤴ ᤛᤠᤱᤃᤪᤠᤶᤐᤣᤍᤠᤱᤅᤥᤀᤠᤱ ᤛᤠᤰᤗᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤜᤴᤍᤢᤒᤠᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤜᤴᤗᤥ॥”
20 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤠᤱᤒᤠ ᤂᤪᤡᤛ᤻ᤋᤀᤠ ᤑᤠ᤹ᤀᤠᤱ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤈᤧᤰᤋᤧᤶᤛᤡᤶᤔᤧᤴᤏᤧ᤹ᤀᤥ ᤗ᤹ᤖᤡᤰ ᤁᤧᤛᤠᤰᤐᤠ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥
ᤕᤧᤛᤢᤖᤧ ᤁᤢᤛᤡ᤺ᤔᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢ᤹
ᤔᤷᤁᤢᤛ ᥎.᥉᥇-᥉᥉. ᤗᤢᤁᤠ ᥏.᥈᥈-᥈᥏
21 ᤂᤧᤴ ᤕᤧᤶᤔᤠᤱᤎᤥ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤢᤏᤧ᤹ ᤕᤖᤢᤛᤗᤧᤶᤔᤥ ᤐᤣ᤺ᤰᤔᤠᤀᤣ ᤐᤥ᤺ᤱ. ᤜᤧᤰᤁᤩᤠᤱ ᤂᤧᤵᤔᤥ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹. ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤀᤥᤗᤠᤶ ᤕᤖᤡᤰ ᤐᤠ᤺ᤴᤏᤥ ᤋᤢᤰᤂᤣ ᤆᤠᤔᤠᤀᤣ ᤐᤥ᤺ᤱ ᤜᤧᤰᤁᤩᤠᤱ ᤂᤢᤏᤧ᤹ ᤛᤡ᤺ᤔᤠᤀᤣ ᤐᤥ᤺ᤱᤅᤠᤱ ᤕᤠᤶᤔᤥ ᤛᤢᤶ ᤕᤧᤴ ᤀᤣᤃᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠ ᤐᤥ᤺ᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤆᤧᤰᤔᤠ ᤜᤣ᤺ᤰᤋᤢᤛᤡᤖᤥ॥
22 ᤁᤖ ᤐᤋᤪᤢᤛᤖᤧ ᤂᤢᤏᤧ᤹ ᤌᤡᤰᤗᤧᤵᤔᤠᤱ ᤋᤣ᤹ᤖᤢᤀᤠᤱ ᤑᤧ᤺ᤰᤋᤢ. “ᤀᤠᤍᤠᤱᤒᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤥ᤺ᤱᤔᤠ ᤔᤧᤒᤠᤱᤄᤢᤴᤗᤥ. ᤀᤰᤋᤱᤒᤠ ᤐᤠ᤺ᤱᤃ ᤂᤧᤏᤧ᤹ᤏᤢ ᤀᤠᤵᤑᤠᤸᤗᤧᤀᤠᤱ ᤔᤧᤒᤥ᤺ᤱᤏᤧᤸᤗᤥ॥”
23 ᤕᤧᤛᤢ᤺ᤴ ᤐᤋᤪᤢᤛ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤔᤧᤳᤋᤢ. “ᤔᤠᤑᤧᤴᤛᤠᤶᤔᤣ. ᤂᤧᤏᤧ᤹ ᤀᤡᤱᤃᤠ᤹ᤗᤠᤶ ᤔᤠ᤺ᤱᤄᤠ ᤐᤣᤃᤧ᤹᥄ ᤂᤧᤏᤧ᤹ ᤁᤧᤄ᤺ᤀᤠᤖᤥ॥ ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱ ᤁᤢᤀᤡᤛᤡ᤺ᤰ ᤔᤧ᤺ᤴ. ᤁᤖ ᤔᤧᤴᤇᤠᤶ ᤕᤠᤵᤔᤡ ᤁᤢᤀᤡᤛᤡ᤺ᤰᤗᤰ ᤏᤡᤱᤘᤠ᤹ ᤁᤧᤀᤡ᤺ᤳᤋᤢ᤹ᤖᤥ॥”
24 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤋᤡᤶᤔᤠ ᤏᤡᤱᤘᤠ᤹ ᤆᤥᤃᤢ᤹. ᤜᤠᤖᤠ᤹ ᤂᤧᤸᤗᤧ ᤀᤡᤱᤃᤠ᤹ᤖᤰ ᤆᤠᤱ ᤌᤢᤅᤢᤱ ᤁᤧᤗ᤹ᤒᤠ ᤁᤢᤏᤡᤱᤘᤠ᤹ᤀᤡᤴ ᤛᤧᤖᤢᤀᤠᤱ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤐᤰᤂᤢᤀᤠᤱ ᤀᤡᤱᤃᤠ᤹ ᤋᤡᤶᤔᤠᤖᤖᤥ॥
25 ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤁᤢᤜᤡᤱᤔᤴᤏᤡᤴ ᤋᤠᤱᤛᤧ᤺ᤵᤋᤢᤱ ᤗ᤹ᤖᤡᤰ ᤏᤡᤱᤘᤠ᤹ ᤆᤥᤃᤢ᤹. ᤂᤧᤸᤗᤧ ᤂᤧᤴᤏᤠᤱ ᤔᤠᤛᤢ᤹. ᤁᤖ ᤀᤠᤳᤋᤡᤸᤗᤧ ᤁᤢᤜᤡᤱᤔᤴᤏᤡᤴ ᤀᤠᤗᤠᤃᤡ ᤔᤠᤛᤢ᤹. ᤂᤧᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤛᤢ᤹ᤖᤥ॥
26 ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤢᤏᤧ᤹ᤀᤡᤴ ᤆᤥᤃᤢᤀᤠᤱ ᤔᤧᤴᤏᤢᤵᤔᤏᤠᤒᤠ ᤁᤢᤜᤡᤱᤔᤴᤏᤡᤴ ᤔᤠᤛᤢᤸᤗᤧ ᤏᤢ᤺ᤒᤠ ᤐᤥ᤺ᤱᤒᤡ᥅ ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤔᤧᤴᤏᤢᤵᤔᤏᤠᤒᤠ ᤁᤢᤜᤡᤱᤔᤴᤏᤡᤴ ᤕᤠᤱᤏᤠ ᤂᤥ᤺ᤔᤠᤖᤧ ᤗᤠᤃᤡ ᤌᤣ᤺ᤸᤗᤧᤀᤠᤱ ᤗᤧᤰᤔᤠ ᤔᤧᤛᤢᤰᤋᤢᤴᤗᤥ॥
27 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤔᤡᤔᤡᤍᤡᤱᤅᤥ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤏᤢ ᤕᤢ᤺ᤀᤠᤸᤗᤧ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤡᤸᤗᤧᤴ ᤗᤠ᤹ᤖᤢᤒᤠ ᤌᤢᤶᤄᤥ᤺ᤴ ᤐᤡᤖᤢᤱᤛᤡᤱᤗᤥ॥
28 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤀᤠᤜᤠᤱᤈᤢᤶᤔᤥ ᤜᤠᤱ ᤆᤥ᤺ᤰᤛᤧ ᤕᤢ᤺ᤀᤠᤒᤠ ᤔᤧᤴᤏᤡᤀᤣ ᤌᤠᤖᤡᤰ ᤁᤵᤔᤥ ᤁᤧᤕᤧᤵᤐᤠᤜᤠ᤹ᤀᤥ ᤁᤢᤓᤠᤃ ᤔᤧᤴᤇᤡ᤺ᤏᤧᤴᤗᤥ॥”