20
ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤕᤠ᤺ᤗᤡᤰᤜᤠ᤹ᤖᤧᤴ ᤂᤧᤍᤠ᤹
1 “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤀᤰᤋᤱᤒᤠ ᤆᤥ᤺ᤰ–ᤗᤳᤇᤠ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤍᤠᤱᤒᤠᤴ ᤌᤡᤰ ᤋᤠᤏᤠᤶᤛᤠ ᤁᤢᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤕᤠ᤺ᤗᤡᤰ ᤛᤠᤱᤛᤧ᤹ ᤐᤣᤖᤥ॥
2 ᤂᤧᤸᤗᤧ ᤔᤏᤠᤜᤠ᤹ ᤌᤡᤰᤕᤧᤴᤒᤠ ᤏᤠᤶᤕᤠᤰᤁᤡᤱᤃ ᤕᤢᤵᤐᤠᤕᤠᤱᤎᤡᤰ ᤐᤡᤔᤠ ᤐᤠ᤺ᤴ ᤋᤱᤄᤢᤀᤠᤱ ᤁᤢᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤆᤥ᤺ᤰ ᤐᤠᤱᤄᤢᤛᤡᤖᤥ॥
3 ᤋᤠᤏᤠᤶᤒᤠ ᤁᤢᤔᤢᤰ ᤑᤠᤱᤛᤡ (᥏) ᤔᤢᤰᤋᤧᤖ ᤐᤳᤇᤧᤸᤗᤧ ᤂᤢᤏᤧ᤹ ᤐᤠᤱᤈᤢᤶᤔᤥ ᤐᤣ᤺ᤸᤗᤧ ᤁᤢᤓᤠ ᤔᤏᤠᤜᤠ᤹ ᤐᤠᤱᤈᤢᤶᤜᤠ᤺ᤳᤋᤡ ᤌᤣᤀᤠᤱ ᤔᤧᤴᤈᤥ᤺ᤰᤁᤣ ᤔᤧᤘᤕᤧᤒᤠ ᤏᤡ᤺ᤛᤢᤛᤡᤀᤠᤱ
4 ᤔᤧᤳᤋᤢᤛᤡ. ‘ᤂᤡᤏᤡ᤹ᤀᤠᤱ ᤐᤣᤃᤧᤶᤔᤧ᤹ᤀᤠᤱ ᤀᤠᤈᤧᤸᤗᤧᤰᤛᤣ᤹ ᤀᤡᤰᤁᤥ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ᤀᤥ॥ ᤂᤡᤏᤡ᤹ ᤂᤥ᤺ᤔᤠ ᤁᤧᤕᤠ᤹ᤖᤡᤒᤠ ᤕᤠᤱᤅᤡᤴ ᤐᤡᤏᤡᤱᤗᤥ॥’
5 ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤕᤠ᤺ᤶᤒᤰ ᤆᤥ᤺ᤰᤛᤧ ᤔᤧᤒᤣ॥ ᤂᤢᤏᤧ᤹ ᤗᤧᤴᤍᤡᤰ ᤁᤢᤔᤢᤰ ᤌᤡᤰ-ᤏᤧᤳ (᥇᥈) ᤜᤧᤰᤁᤩᤠᤱ ᤕᤠᤶᤔᤥ ᤁᤢᤔᤢᤰ ᤛᤢᤶᤛᤡ (᥉) ᤔᤢᤰᤋᤧᤖ ᤐᤳᤇᤧᤸᤗᤧ ᤗᤠ᤺ᤰᤁᤠᤳ ᤐᤣ᤺ᤸᤗᤧ ᤔᤏᤠᤜᤠ᤹ ᤋᤢᤔᤢᤛᤡᤀᤠᤱ ᤒᤠ ᤜᤧᤰᤁᤣᤀᤣ ᤔᤧᤳᤋᤢᤛᤡ॥
6 ᤕᤠᤱᤛᤡ ᤁᤢᤔᤢᤰ ᤅᤠᤛᤡ (᥋) ᤔᤢᤰᤋᤧᤖ ᤐᤳᤇᤧᤸᤗᤧ ᤂᤢᤏᤧ᤹ ᤐᤠᤱᤈᤢᤶᤔᤥ ᤐᤣ᤺ᤸᤗᤧ ᤔᤏᤠᤜᤠ᤹ ᤌᤣᤀᤠᤱ ᤔᤧᤴᤈᤥ᤺ᤰᤁᤣ ᤔᤧᤘᤕᤧ ᤔᤧᤃᤳᤋᤧᤒᤠ ᤕᤠᤶᤔᤥ ᤏᤡ᤺ᤛᤢᤛᤡᤀᤠᤱ ᤛᤣ᤺ᤴᤍᤥᤛᤢᤛᤡ. ‘ᤀᤠᤀᤡᤴ ᤌᤣᤀᤠᤱ ᤂᤡᤏᤡ᤹ ᤏᤠᤶᤎᤠᤎᤠ ᤕᤠ᤺ᤶᤒᤰ ᤁᤧᤴᤈᤥᤃᤡᤴᤒᤠᤒᤣ᥅’
7 ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. ‘ᤌᤣ᤺ᤴ ᤆᤥ᤺ᤰᤔᤠᤒᤣ. ᤀᤠᤏᤡᤃᤧ ᤀᤠᤳᤋᤡᤸᤗᤧᤀᤠᤱ ᤕᤠ᤺ᤗᤡᤰ ᤕᤠᤵᤔᤡ ᤔᤧᤛᤠᤅᤡᤃᤧᤴᤗᤥ॥’
ᤂᤧᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. ‘ᤜᤧᤰᤁᤣᤏᤧ ᤑᤠ᤹ᤃᤪ ᤂᤡᤏᤡ᤹ᤀᤠᤱ ᤐᤣᤃᤧᤶᤔᤧ᤹ᤀᤠᤱ ᤀᤠᤈᤧᤸᤗᤧᤰᤛᤣ᤹ ᤀᤡᤰᤁᤥ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ᤀᤥ॥’
8 ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤐᤥ᤺ᤰᤂᤧᤸᤗᤧ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤍᤠᤱᤒᤠᤸᤗᤧ ᤂᤧᤴ ᤕᤠ᤺ᤗᤡᤰ ᤁᤧᤓᤶᤒᤠᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. ‘ᤁᤧᤖᤧᤰ ᤕᤠ᤺ᤗᤡᤰᤜᤠ᤹ ᤀᤢ᤺ᤳᤋᤧᤛᤧ᤹ᤀᤠᤱ ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤕᤠ᤺ᤶᤒᤰᤁᤥ ᤁᤧᤓᤴᤇᤡᤱᤒᤠᤜᤠ᤹ᤀᤥᤗᤠᤶ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤕᤠ᤺ᤶᤒᤰᤁᤥ ᤁᤧᤓᤴᤇᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤏᤠᤶᤕᤠᤰᤁᤡᤴ ᤜᤠ᤺ᤳᤋᤧᤛᤧ᤹ᤀᤥ॥’
9 ᤜᤧᤰᤁᤩᤠᤱ ᤂᤧᤴ ᤕᤠ᤺ᤗᤡᤰ ᤁᤧᤓᤶᤒᤠᤸᤗᤧ ᤁᤢᤔᤢᤰ ᤅᤠᤛᤡ ᤔᤢᤰᤋᤧᤸᤗᤧ ᤕᤠ᤺ᤶᤒᤰᤁᤥ ᤁᤧᤓᤴᤇᤡᤱᤒᤠ ᤕᤠ᤺ᤗᤡᤰᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤕᤢᤵᤐᤠᤕᤠᤱ ᤌᤡᤰ ᤌᤡᤰ ᤁᤧᤖᤧᤰ ᤏᤠᤶᤕᤠᤰ ᤐᤡᤖᤢᤛᤡᤖᤥ॥
10 ᤜᤧᤰᤁᤣᤗ᤹ᤖᤡᤰ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤕᤠ᤺ᤶᤒᤰᤁᤥ ᤁᤧᤓᤴᤇᤡᤱᤒᤠᤜᤠ᤹ᤖᤧᤃ ᤂᤧᤴ ᤔᤧᤏᤡ᤺ᤛᤢᤀᤠᤱ ᤀᤠᤏᤡᤃᤧ ᤕᤖᤡᤰ ᤂᤥ᤺ᤛᤢᤶᤒᤠᤒᤡᤗᤠ ᤗ᤹ᤖᤡᤰ ᤔᤧᤀᤡ᤺ᤳᤋᤢ. ᤁᤖ ᤂᤧᤱᤜᤠ᤹ᤖᤧᤀᤠᤱ ᤕᤢᤵᤐᤠᤕᤠᤱ ᤌᤡᤰᤗᤰ ᤔᤧᤄᤥ᤺ᤛᤢᤖᤥ॥
11 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤠᤶᤕᤠᤰ ᤔᤧᤍᤠ᤺ᤰᤋᤢᤀᤠᤱ ᤆᤧᤸᤗᤧᤰᤛᤣ᤹ ᤍᤠᤱᤒᤠᤴᤏᤢ ᤗᤢᤱᤜᤠ᤺ᤵᤔᤠ ᤔᤧᤜᤣ᤺ᤰᤋᤧᤖᤥ॥
12 ᤂᤧᤴ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. ‘ᤁᤴ ᤀᤣᤃᤠᤱ ᤁᤧᤛᤠᤅᤢᤛᤡᤒᤠᤜᤠ᤹ᤖᤧᤃ ᤁᤢᤔᤢᤰ ᤌᤡᤰᤗᤰ ᤕᤠ᤺ᤶᤒᤰ ᤔᤧᤈᤥᤃᤢ॥ ᤀᤠᤏᤡᤃᤧ ᤗᤧᤴᤍᤡᤰ ᤂᤠᤖᤠᤰ ᤏᤠᤶᤛᤧ᤺ᤰᤔᤠᤀᤥ ᤕᤠ᤺ᤶᤒᤰ ᤆᤥᤃᤢᤶᤒᤧᤛᤠᤱ ᤂᤧᤱᤜᤠ᤹ᤏᤢ ᤁᤢᤍᤱᤒᤠ ᤕᤠᤵᤔᤡ ᤁᤧᤈᤥᤃᤧᤖᤥ॥’
13 ᤁᤖ ᤂᤧᤴ ᤔᤏᤠ᤺ᤸᤗᤧ ᤂᤧᤱᤜᤠ᤹ᤀᤥ ᤌᤡᤰᤁᤡᤴ ᤏᤥᤃᤵ ᤐᤡᤖᤢ. ‘ᤗᤠᤈᤣ. ᤀᤡᤱᤃᤠ᤹ ᤂᤧᤏᤧ᤹ ᤏᤡᤱᤄᤢᤶ ᤔᤧᤶᤔᤧᤳᤋᤣ ᤘᤠ᤹ᤀᤠᤖᤥ॥ ᤂᤧᤏᤧ᤹ ᤕᤢᤵᤐᤠᤕᤠᤱᤎᤡᤰᤁᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤍᤧᤴᤍᤧᤒᤠᤒᤡ ᤔᤧ᤺ᤶᤒᤡ᥅
14 ᤁᤧᤏᤠᤶᤕᤠᤰᤁᤡᤴ ᤋᤠ᤺ᤰᤋᤧ᤹ᤀᤠᤱ ᤐᤣᤃᤧ᤹ᤀᤥ॥ ᤀᤡᤱᤃᤠ᤹ᤃ ᤀᤣᤃᤠᤱ ᤛᤠᤱᤔᤏᤠᤒᤠᤴᤏᤠᤱ ᤂᤧᤏᤧ᤹ ᤐᤡᤏᤧᤒᤠ ᤕᤠᤖᤡᤰᤁᤣ ᤐᤡᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥
15 ᤀᤡᤱᤃᤠ᤹ ᤀᤠᤏᤡᤱᤘᤠ᤹ ᤜᤧᤰᤁᤣ ᤔᤏᤠᤜᤠ᤹ ᤀᤠᤕᤠᤱᤅᤡᤴ ᤐᤡᤔᤠᤛᤡ ᤕᤢᤰ ᤔᤧᤃᤳᤋᤠᤴᤒᤡ᥅ ᤀᤡᤱᤃᤠ᤹ ᤀᤠᤏᤡᤱᤘᤠ᤹ ᤕᤶᤒᤠ ᤆᤥᤃᤢᤱᤅᤡᤸᤗᤧ ᤌᤣᤀᤠᤱ ᤁᤧᤛᤡᤰ ᤐᤥ᤺ᤰᤐᤠᤒᤣ᥅’
16 ᤀᤰᤂᤣᤗ᤹ᤖᤡᤰ ᤀᤠᤸᤗᤥ ᤋᤃᤡ ᤁᤧᤘᤠ᤹ᤒᤠᤜᤠ᤹ ᤀᤣᤃᤠᤱ ᤔᤧᤒᤥ᤺ᤱᤗᤥ. ᤜᤧᤰᤁᤩᤠᤱ ᤀᤠᤸᤗᤥ ᤀᤣᤃᤠᤱ ᤁᤧᤘᤠ᤹ᤒᤠᤜᤠ᤹ ᤋᤃᤠᤱ ᤔᤧᤒᤥ᤺ᤱᤗᤥ॥”
ᤕᤧᤛᤢᤖᤧ ᤕᤠᤶᤔᤥ ᤁᤢᤛᤡ᤺ᤔᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢ᤹
ᤔᤷᤁᤢᤛ ᥇᥆.᥉᥈-᥉᥊. ᤗᤢᤁᤠ ᥇᥎.᥉᥇-᥉᥊
17 ᤀᤠᤸᤗ ᤕᤧᤛᤢ᤺ᤴ ᤕᤖᤢᤛᤗᤧᤔ ᤌᤥ ᤐᤣᤖ ᤐᤳᤇᤧᤸᤗᤧ ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤌᤡᤰᤗᤧᤵᤔᤠᤱ ᤋᤣ᤹ᤖᤢᤛᤡᤀᤠᤱ ᤀᤰᤂᤣ ᤔᤧᤳᤋᤢᤛᤡ.
18 “ᤀᤥᤔᤧᤳᤋᤧᤶᤔᤧ᤹. ᤀᤠᤏᤡ᤹ ᤕᤖᤢᤛᤗᤧᤔ ᤌᤥ ᤀᤠᤒᤣ᤺ᤰᤗ ᤀᤠᤒᤳᤗᤥ॥ ᤂᤧᤵᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤔᤧᤴᤇᤠᤶᤛᤠ᤺ᤴ ᤀᤡᤱᤔᤧᤗᤧᤰᤋᤢᤀᤠᤱ ᤜᤢᤰᤔᤧᤛᤢᤵᤋᤢ᤹ᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤔᤧᤒᤡᤖᤢᤀᤠᤱ
19 ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤖ. ᤋᤧ᤺ᤶᤓᤢᤰ ᤔᤧᤕᤠᤰᤋᤢᤖ. ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢ ᤔᤧᤛᤧᤖᤢᤖ ᤑᤠ᤹ᤀᤠᤱ ᤜᤢᤰᤔᤧᤛᤢᤵᤋᤢ᤹ᤖᤥ॥ ᤜᤧᤰᤁᤩᤠᤱ ᤛᤢᤶ ᤕᤧᤴ ᤀᤣᤃᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤗᤥ॥”
ᤕᤧᤛᤢᤖᤧ ᤘᤣ᤹ᤜᤠ᤹ ᤛᤣᤘᤠ ᤆᤥ᤺ᤰᤔᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤜᤢ᤹ᤖᤢᤛᤡ᤹
ᤔᤷᤁᤢᤛ ᥇᥆.᥉᥋-᥊᥋
20 ᤜᤧᤰᤁᤩᤠᤱ ᤈᤒ᤻ᤍᤡᤕᤠᤖᤧ ᤁᤢᤛ᤻ᤛᤠ᤺ ᤕᤠᤁᤢᤒ ᤏᤢ ᤕᤢᤜᤢᤴᤏᤠᤖᤧ ᤂᤢᤴᤇᤡ᤹ ᤔᤠ᤺ᤴ ᤁᤢᤛ᤻ᤛᤠ᤺ᤜᤠ᤹ᤏᤢ ᤋᤩᤧᤀᤠᤱ ᤌᤢᤱᤒᤥᤜᤈ᤹ ᤕᤢᤱᤛᤡᤱᤗ ᤕᤧᤛᤢ᤺ᤴ ᤐᤣᤗᤡ ᤑᤠᤰᤋᤢᤖᤥ॥
21 ᤕᤧᤛᤢᤖᤧ ᤂᤧᤴ ᤛᤣ᤺ᤴᤍᤥᤛᤢ. “ᤌᤧᤔᤠ ᤆᤥᤃᤢᤱ ᤐᤡᤏᤧᤖ ᤑᤠ᤹ᤀᤠᤱ ᤐᤣᤗᤡ ᤁᤧᤓᤠᤰᤁᤠᤒᤣ᥅”
ᤂᤧᤸᤗᤧ ᤏᤥᤃᤵ ᤐᤡᤖᤢ. “ᤁᤧᤜᤠᤱᤈᤢᤶᤔᤥ ᤁᤴ ᤏᤧᤵᤑᤢ ᤀᤠᤛ᤻ᤛᤠ᤺ᤜᤠ᤹ ᤁᤧᤈᤢᤵᤛᤠᤱ ᤏᤢ ᤁᤧᤓᤧᤴᤇᤠᤱ ᤗᤧᤵᤔᤠᤱ ᤕᤢᤱᤔᤠ ᤐᤠᤱᤄᤧᤛᤧ᤹ᤀᤥ॥”
22 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤌᤣ᤺ᤴ ᤁᤧᤏᤠ᤺ᤰᤛᤢᤖ ᤁᤧᤒᤳᤇᤡ᤹ ᤂᤧᤴ ᤁᤢᤛᤡᤱ ᤁᤧᤴᤏᤡ᤺ᤳᤇᤢᤴ॥ ᤀᤡᤱᤃᤠ᤹ ᤌᤢᤅᤢᤱᤒᤠ ᤋᤢᤰᤂᤣᤘᤠ ᤂᤥᤷᤕᤠᤀᤥ ᤌᤢᤱᤔᤠ ᤁᤧᤛᤢᤰᤛᤢᤒᤡ᥅”
ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤳᤇᤢ. “ᤛᤢᤰᤛᤢᤃᤧ᤹॥”
23 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤛᤧᤰᤂᤠᤀᤣ ᤀᤡᤱᤃᤠ᤹ ᤌᤢᤅᤢᤱᤒᤠ ᤂᤥᤷᤕᤠᤀᤥ ᤁᤧᤎᤢᤱᤛᤢ᤹. ᤁᤖᤛᤠᤱ ᤀᤠᤓᤧᤴᤇᤠᤱ ᤏᤢ ᤀᤠᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤔᤠ ᤁᤧᤛᤢᤰᤛᤡ᤹ ᤐᤠ᤺ᤵᤔᤠ ᤕᤢᤰ ᤔᤧᤃᤳᤋᤠᤴᤗᤥ॥ ᤂᤧᤴ ᤋᤧᤴᤜᤠ᤹ᤃ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤀᤠᤳᤋᤡᤴᤜᤠ᤹ ᤐᤡᤔᤠᤛᤡ ᤑᤠ᤹ᤀᤠᤱ ᤕᤠᤖᤡᤵ ᤆᤥᤃᤢᤀᤠᤱ ᤘᤠ᤹. ᤒᤠ ᤂᤧᤱᤜᤠ᤹ᤖᤰ ᤕᤢᤱᤔᤠ ᤔᤧᤄᤥ᤺ᤖᤥ॥”
24 ᤜᤧᤰᤁᤩᤠᤱ ᤘᤣ᤹ ᤌᤡᤒᤥ᤺ᤱ (᥇᥆) ᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤔᤧᤄᤧᤵᤛᤢᤀᤠᤱ ᤕᤠᤁᤢᤒ ᤜᤧᤰᤁᤩᤠᤱ ᤕᤢᤜᤢᤴᤏᤠ᤺ᤴᤏᤢ ᤂᤢᤴᤇᤡ᤹ ᤛᤡᤰ ᤐᤥᤃᤧᤖᤥ॥
25 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤠᤱᤜᤠ᤹ᤖᤧᤃ ᤔᤏᤠᤜᤠ᤹ ᤂᤢᤏᤡ᤹ ᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤔᤧᤔᤧᤳᤋᤢᤛᤡ᤹. ᤜᤧᤰᤁᤩᤠᤱ ᤛᤢᤜᤠᤱᤕᤢᤰᤐᤠᤜᤠ᤹ᤖᤧᤀᤠᤱ ᤂᤢᤏᤡ᤹ ᤑᤥ᤺ᤛᤠᤱᤒᤠᤜᤠ᤹ ᤛᤠᤰᤁᤧᤗᤧᤰᤁᤠᤱ ᤕᤢᤰ ᤔᤧᤈᤥᤃᤢᤛᤡᤒᤠᤃ ᤂᤡᤏᤡ᤹ ᤁᤧᤏᤡ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
26 ᤁᤖ ᤂᤡᤏᤡ᤹ ᤗᤢᤶᤔᤥᤃ ᤜᤧᤰᤁᤣ ᤐᤥ᤺ᤱᤔᤠ ᤔᤧᤏᤢ᤹ᤏᤧᤴᤗᤥ॥ ᤂᤡᤏᤡ᤹ ᤗᤢᤶᤔᤥᤃ ᤀᤠᤳᤋᤡᤸᤗᤧ ᤗᤠᤶᤗᤥ᤺ᤒᤠ ᤐᤥ᤺ᤱᤔᤠ ᤏᤡᤱᤘᤠ᤹ ᤆᤥᤃᤢ᤹ ᤂᤧᤴ ᤜᤠᤖᤠ᤹ ᤂᤡᤏᤡ᤹ ᤛᤣᤘᤠᤖᤥᤒᤠ ᤐᤥ᤺ᤱᤗᤖᤥ॥
27 ᤜᤧᤰᤁᤩᤠᤱ ᤜᤠ᤺ᤳᤗᤧ ᤁᤧᤖᤧᤰᤏᤢ᤺ᤸᤗᤧ ᤋᤃᤠᤱ ᤐᤥ᤺ᤱᤔᤠ ᤏᤡᤱᤘᤠ᤹ ᤆᤥᤃᤢ᤹. ᤜᤠᤖᤠ᤹ ᤂᤧᤴ ᤂᤡᤏᤡ᤹ ᤕᤥ᤺ᤰ ᤐᤥ᤺ᤱᤗᤖᤥ॥
28 ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤛᤣᤘᤠ ᤔᤧᤈᤥ᤺ᤰᤁᤠᤖ ᤑᤠ᤹ᤀᤠᤱ ᤔᤧ᤺ᤴ. ᤁᤖ ᤛᤣᤘᤠ ᤆᤥ᤺ᤰᤛᤧ ᤋᤩᤠᤱᤒᤠᤖᤥ॥ ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤗᤠᤕᤥᤗᤠᤶ ᤌᤧ᤹ᤔᤠᤛᤡᤀᤠᤱ ᤋᤠᤱᤛᤧ᤺ᤵᤔᤠᤛᤡ ᤑᤠ᤹ᤀᤠᤱ ᤀᤡᤱᤃᤠ᤹ ᤀᤠᤜᤡᤱᤔᤴᤏᤡᤴ ᤐᤡᤛᤧ ᤋᤩᤠᤱᤒᤠᤖᤥ॥”
ᤕᤧᤛᤢᤖᤧ ᤏᤧᤵᤑᤢ ᤔᤡᤰᤑ᤺ᤶᤒᤠᤜᤠ᤹ ᤏᤡ᤺ᤔᤠ ᤁᤧᤛᤢᤰᤐᤠ ᤆᤥᤃᤢᤛᤡ᤹
ᤔᤷᤁᤢᤛ ᥇᥆.᥊᥌-᥋᥈. ᤗᤢᤁᤠ ᥇᥎.᥉᥋-᥊᥉
29 ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤧᤖᤡᤜᤥ ᤕᤧᤰᤕᤰᤁᤥᤗᤠᤶ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤕᤖᤡᤰ ᤔᤏᤠᤜᤠ᤹ ᤂᤢᤏᤧ᤹ᤏᤢ ᤔᤧᤎᤠᤛᤡᤱᤗᤥ॥
30 ᤂᤧᤵᤔᤥ ᤔᤧᤒᤣᤖ ᤔᤧᤒᤳᤇᤧᤒᤠ ᤗᤠᤶᤔᤥ ᤏᤧᤵᤑᤢ ᤔᤡᤰᤑ᤺ᤶᤒᤠᤜᤠ᤹ ᤕᤢᤅᤧᤳᤇᤡ॥ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤂᤧᤵᤔᤥᤗᤠᤶ ᤐᤣ᤺ᤰᤗ ᤐᤳ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤧᤳᤇᤢᤀᤠᤱ ᤀ᤺ᤰᤋᤧᤳᤇᤡ. “ᤍᤠᤱᤒᤣ. ᤍᤠᤀᤢᤍᤖᤧ ᤁᤢᤛ᤻ᤛᤠ᤺ᤀᤣ. ᤀᤠᤴᤇᤡᤃᤧ ᤗᤢᤱᤔᤠ᤹ ᤀᤠᤍᤢᤰᤋᤧ᤹ᤀᤥ᥄”
31 ᤂᤧᤴ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤓᤧ᤺ᤰᤋᤢᤛᤡᤖ ᤛᤫᤠ᤺ᤳ ᤕᤢᤱᤔᤠ ᤔᤧᤒᤠᤱᤄᤢᤛᤡ. ᤁᤖ ᤂᤧᤱᤜᤠ᤹ ᤀᤠᤸᤗᤛᤠᤱ ᤛᤠ᤹ᤖᤡᤰ ᤀ᤺ᤰᤋᤧᤳᤇᤡᤖᤥ. “ᤍᤠᤱᤒᤣ. ᤍᤠᤀᤢᤍᤖᤧ ᤁᤢᤛ᤻ᤛᤠ᤺ᤀᤣ. ᤀᤠᤴᤇᤡᤃᤧ ᤗᤢᤱᤔᤠ᤹ ᤀᤠᤍᤢᤰᤋᤧ᤹ᤀᤥ᥄”
32 ᤕᤧᤛᤢᤖᤧ ᤕᤧᤶᤛᤡᤱᤅᤠᤱ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤡᤱᤃᤠ᤹ ᤌᤧᤔᤠ ᤆᤥᤃᤢᤱ ᤐᤡᤏᤧᤳᤇᤡᤱᤒᤠ ᤂᤡᤴᤇᤡ᤹ ᤏᤡᤱᤘᤠ᤹ ᤁᤧᤈᤥ᤺ᤰᤛᤢᤒᤣ᥅”
33 ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤳᤇᤢ. “ᤍᤠᤱᤒᤣ. ᤀᤠᤴᤇᤡᤃᤧ ᤏᤡ᤺ᤔᤠ ᤁᤧᤛᤢᤰᤐᤠ ᤀᤠᤈᤥᤃᤧᤳᤇᤧ᤹ᤀᤥ॥”
34 ᤕᤧᤛᤢᤖᤧ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤀᤠᤱ ᤂᤢᤴᤇᤡ᤹ ᤔᤡᤰᤜᤠ᤹ ᤛᤢ᤺ᤛᤢ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤡᤔᤥ ᤂᤧᤱᤜᤠ᤹ ᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧᤳᤇᤡᤀᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤂᤧᤱᤜᤠ᤹ ᤌᤠᤏᤧᤳᤇᤡᤖᤥ॥