28
ᤕᤧᤛᤢ᤺ᤴ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥ᤺ᤱ
ᤔᤷᤁᤢᤛ ᥇᥌.᥇-᥎. ᤗᤢᤁᤠ ᥈᥊.᥇-᥇᥈. ᤕᤢᤜᤢᤴᤏᤠ ᥈᥆.᥇-᥇᥆
1 ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧ ᤁᤢᤍᤠ᤺ᤴᤍᤡᤰᤔᤥ. ᤋᤧᤏᤧᤒᤠ ᤕᤧᤴᤏᤥ ᤂᤠᤀᤥ᤺ᤳᤋᤧᤖ ᤐᤳᤇᤧᤸᤗᤧ ᤔᤖᤡᤕᤔ ᤔᤃ᤻ᤍᤗᤡᤏᤡ᤺ᤴ ᤏᤢ ᤘᤣ᤹ᤛ᤻ᤔᤠ ᤔᤖᤡᤕᤶᤔᤡᤴ ᤕᤧᤛᤢ᤺ᤴ ᤔᤧᤏᤧᤛ᤻ᤛᤢᤒᤠ ᤀᤡᤵᤐᤢᤱᤅᤡᤴ ᤀᤥᤔᤧᤳᤇᤧ ᤐᤣᤛᤡᤖᤥ॥
2 ᤜᤰᤆᤄᤳ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢ᤺ᤒᤠ ᤗᤢᤵᤗᤡ ᤌᤠᤅᤧ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤎᤡᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤕᤥ ᤌᤩᤧᤀᤠᤱ ᤀᤡᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥ ᤁᤧᤕᤧᤵᤐᤠ ᤂᤧᤴ ᤕᤶᤒᤠ ᤗᤢᤱᤅᤡᤴ ᤌᤡᤰ ᤗᤧᤵᤔᤠᤱ ᤀᤡᤛᤢᤀᤠᤱ ᤂᤧᤴ ᤛᤶᤍᤠᤱ ᤕᤢᤱᤛᤡᤱᤗᤥ॥
3 ᤂᤧᤸᤗᤧ ᤁᤢᤏᤠᤖᤠ᤺ᤴ ᤛᤠ᤺ᤶᤓᤣ ᤁᤢᤀᤡᤛᤡ᤺ᤰ ᤗᤧᤰᤋᤧ. ᤜᤧᤰᤁᤩᤠᤱ ᤁᤢᤍᤣ᤺ᤳᤜᤠ᤹ ᤏᤠ᤺ᤱ ᤁᤢᤀᤡᤛᤡ᤺ᤰ ᤑ᤺ ᤗ᤹ᤖᤧᤖᤥ॥
4 ᤂᤧᤴ ᤀᤡ᤺ᤵᤐᤢᤱ ᤁᤧᤃᤥ᤺ᤒᤠ ᤌᤰᤛᤢᤒᤠᤜᤠ᤹ ᤁᤡ᤺ᤔᤠᤸᤗᤧ ᤔᤧᤕᤰᤂᤧᤖ ᤜᤷᤃᤢᤵ ᤔᤧᤈᤥ᤺ᤴᤍᤧᤀᤠᤱ ᤁᤢᤛᤡᤘᤧᤳ ᤔᤏᤠ ᤁᤢᤀᤡᤛᤡ᤺ᤰ ᤔᤧᤒᤥ᤺ᤰᤂᤧᤖᤥ॥
5 ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤂᤧᤴ ᤔᤧᤴᤇᤢᤔᤠᤜᤠ᤹ ᤔᤧᤳᤋᤢᤛᤡ. “ᤔᤧᤃᤡᤛᤧᤳᤇᤧᤴᤏᤧ᤹ᤀᤥ. ᤂᤡᤴᤇᤡ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤒᤠ ᤕᤧᤛᤢ᤺ᤴ ᤁᤧᤃᤥ᤺ᤳᤇᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥
6 ᤂᤢᤏᤧ᤹ᤃ ᤁᤵᤔᤥ ᤜᤥ᤺ᤵᤗᤥ. ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤁᤢᤛᤡᤘᤧᤳᤗᤠᤶ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤑᤧᤖᤧᤳᤇᤧ᤹ᤀᤠᤱ ᤁᤢᤎᤰᤁᤡᤴ ᤏᤧᤛ᤻ᤛᤧᤒᤠ ᤋᤧᤴᤏᤡᤴ ᤀᤥᤔᤧᤳᤋᤧᤳᤇᤧᤏᤠ॥
7 ᤜᤧᤰᤁᤩᤠᤱ ᤜᤠᤖᤠ ᤐᤣᤃᤧᤳᤇᤧ᤹ᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤧᤇᤧ᤹ᤀᤥ. ‘ᤂᤢᤏᤧ᤹ᤃ ᤁᤢᤛᤡᤘᤧᤳᤗᤠᤶ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ᤺ᤸᤗᤧ ᤋᤃᤡ ᤃᤠᤗᤡᤗᤀᤥ ᤐᤣ᤺ᤰᤗ ᤐᤳᤗᤥ॥ ᤂᤢᤏᤧ᤹ ᤂᤧᤵᤔᤥᤀᤣ ᤂᤡᤏᤡ᤹ ᤁᤧᤍᤢᤔᤢᤶᤗᤥ॥’ ᤀᤥᤔᤧᤳᤋᤧᤳᤇᤧ᤹ᤀᤥ. ᤁᤴ ᤐᤠ᤺ᤴᤏᤡᤴ ᤂᤡᤴᤇᤡ᤹ ᤔᤧᤳᤏᤧᤳᤇᤡᤱᤅᤠᤱ ᤘᤠ᤹ᤀᤠᤖᤥ॥”
8 ᤜᤧᤰᤁᤣ᤺ᤸᤗᤧ ᤂᤧᤴ ᤔᤧᤴᤇᤢᤔᤠᤜᤠ᤹ ᤁᤡ᤺ᤛᤧᤳᤇᤡᤛᤠᤱ ᤀᤥᤔᤢᤗ᤹ᤖᤧᤳᤇᤡᤖ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤘᤕᤧᤒᤠ ᤋᤧᤴᤏᤥ ᤂᤧᤴ ᤐᤠ᤺ᤴᤏᤡᤴ ᤔᤧᤳᤇᤧ ᤀᤡᤵᤐᤢᤱᤗᤠᤶ ᤆᤠᤳᤋᤧᤳᤇᤡᤖ ᤐᤣᤛᤡᤖᤥ॥
9 ᤜᤰᤆᤄᤳ ᤕᤧᤛᤢᤖᤧ ᤂᤧᤱᤜᤠ᤹ ᤋᤢᤔᤢᤛᤡᤀᤠᤱ “ᤛᤣᤘᤠᤖᤥ” ᤔᤧᤳᤋᤢᤛᤡ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤕᤧᤛᤢᤖᤥ ᤋᤩᤧᤳᤇᤡᤀᤠᤱ ᤁᤢᤗᤠᤱᤜᤠ᤹ ᤋᤧᤶᤛᤧᤳᤇᤢᤖ ᤛᤣᤘᤠ ᤆᤥᤃᤧᤳᤇᤢ॥
10 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤔᤧᤃᤡᤛᤧᤳᤇᤧᤴᤏᤧ᤹ᤀᤥ. ᤐᤣᤃᤧᤳᤇᤧ᤹ᤀᤠᤱ ᤀᤠᤴᤛᤠ᤹ᤛᤡ ᤃᤠᤗᤡᤗᤀᤥ ᤁᤧᤒᤣᤃᤡᤔᤢ ᤔᤧᤳᤋᤧᤇᤧᤛᤧ᤹ᤀᤥ. ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤂᤧᤳᤌᤥᤀᤣ ᤔᤧᤍᤢᤶᤔᤠ᤹ᤖᤥ॥”
ᤌᤰᤛᤢᤒᤠᤜᤠ᤹ᤖᤧ ᤁᤴ ᤜᤡᤴᤍᤥ᤺ᤰᤁᤡᤴ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤔᤧᤈᤧᤰᤋᤢᤛᤡ᤹
11 ᤂᤧᤴ ᤔᤧᤴᤇᤢᤔᤠᤜᤠ᤹ ᤕᤧᤰᤕᤰᤁᤥ ᤏᤢ᤺ᤰᤂᤧᤳᤇᤡ ᤐᤣᤛᤧᤳᤇᤡᤸᤗᤧ ᤁᤢᤓᤠ ᤌᤰᤛᤢᤒᤠᤜᤠ᤹ ᤔᤧᤒᤣᤀᤠᤱ ᤐᤥ᤺ᤰᤂᤧᤒᤠ ᤁᤧᤖᤧᤰ ᤜᤡᤴᤍᤥ᤺ᤰᤁᤡᤴ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤔᤧᤈᤧᤰᤋᤢᤛᤡᤖᤥ॥
12 ᤜᤧᤰᤁᤣ᤺ᤸᤗᤧ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤔᤧᤈᤢᤵᤛᤧᤀᤠᤱ ᤀᤡᤱᤔᤧᤍᤱᤄᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤌᤰᤛᤢᤒᤠᤜᤠ᤹ ᤕᤖᤡᤰ ᤕᤠᤱ ᤔᤧᤒᤡᤖᤢᤛᤡᤖ
13 ᤀᤰᤂᤣ ᤔᤧᤔᤧᤳᤋᤢᤛᤡ. “ᤀᤠᤏᤡᤃᤧ ᤛᤧᤴᤍᤡᤰ ᤀᤡᤵᤛᤡᤃᤧᤀᤠᤱ ᤏᤧᤛ᤻ᤛᤡᤃᤧᤸᤗᤧ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤁᤢᤎᤰᤁᤡᤴ ᤔᤧᤄᤢ᤺ᤳᤋᤢᤀᤠᤱ ᤔᤧᤍᤣ᤹ᤖᤢᤖᤥ ᤗ᤹ᤖᤡᤰ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤗ ᤐᤥ᤺ᤱᤗᤥ॥
14 ᤁᤴ ᤐᤠ᤺ᤴᤏᤡᤴ ᤛᤢᤜᤠᤱᤃᤧᤶᤒᤠᤸᤗᤧ ᤂᤧᤵᤛᤢᤏᤧ ᤑᤠ᤹ᤃᤪ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤠᤛᤢᤶᤒᤧᤀᤠᤱ ᤂᤡᤏᤡ᤹ ᤏᤠᤱᤅᤠᤛᤡᤃᤧ᤹ᤖᤥ॥”
15 ᤜᤧᤰᤁᤣ᤺ᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤕᤖᤡᤰ ᤕᤠᤱ ᤔᤧᤍᤠ᤺ᤰᤋᤢᤀᤠᤱ ᤂᤧᤱᤜᤠ᤹ ᤔᤧᤔᤧᤳᤋᤢᤛᤡᤒᤠ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤁᤴ ᤐᤠ᤺ᤴᤏᤡᤱᤃ ᤛᤧ᤺ᤖᤧᤀᤠᤱ ᤀᤠᤀᤡᤴ ᤌᤠᤖᤡᤰᤛᤠᤱ ᤕᤜᤢᤍᤡᤜᤠ᤹ᤖᤧ ᤔᤧᤒᤠ᤺ᤳᤋᤢᤖᤥ॥
ᤔᤠᤱᤛᤣᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤕᤶ ᤀᤡᤱᤈᤠ᤺ᤱ
ᤔᤷᤁᤢᤛ ᥇᥌.᥇᥊-᥇᥎. ᤗᤢᤁᤠ ᥈᥊.᥉᥌-᥊᥏. ᤕᤢᤜᤢᤴᤏᤠ ᥈᥆.᥇᥏-᥈᥉. ᤛᤣ᤺ᤰᤕᤢᤰᤔᤡᤒᤠ ᥇.᥌-᥎
16 ᤜᤧᤰᤁᤩᤠᤱ ᤌᤡᤰ-ᤌᤡᤰ (᥇᥇) ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤧᤛᤢᤖᤧ ᤐᤣᤃᤧᤶᤔᤧ᤹ᤀᤥ ᤗ᤹ᤖᤡᤰ ᤔᤧᤳᤋᤢᤛᤡᤒᤠ ᤃᤠᤗᤡᤗᤀᤥᤒᤠ ᤁᤥ᤺ᤰᤔᤠᤀᤥ ᤔᤧᤒᤣᤖᤥ॥
17 ᤂᤧᤱᤜᤠ᤹ᤖᤧ ᤂᤧᤵᤔᤥ ᤕᤧᤛᤢ᤺ᤴ ᤔᤧᤏᤡ᤺ᤛᤢᤀᤠᤱ ᤛᤣᤘᤠ ᤔᤧᤈᤥᤃᤢ. ᤁᤖ ᤁᤢᤓᤠᤖᤧᤃ ᤆᤵᤆᤡ ᤔᤧᤈᤥᤃᤢᤖᤥ॥
18 ᤜᤧᤰᤁᤩᤠᤱ ᤕᤧᤛᤢ᤺ᤴ ᤂᤧᤱᤜᤠ᤹ᤀᤥ ᤋᤩᤧᤀᤠᤱ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤕᤢᤰᤁᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤐᤡᤖᤠᤱᤅᤠᤱ ᤘᤠ᤹ᤖᤥ॥
19 ᤂᤧᤸᤗᤧ ᤆᤥᤃᤢᤸᤗᤧ ᤐᤣᤃᤧᤶᤔᤧ᤹ᤀᤠᤱ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤜᤢ᤹ᤛᤠᤶᤒᤠ ᤆᤥᤃᤧᤶᤛᤡᤶᤔᤧ᤹ᤀᤥ॥ ᤐᤠᤏᤢᤍᤡᤱ ᤐᤠ᤺. ᤀᤠᤒᤢᤍᤡᤱ ᤛᤠ᤺. ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤒᤵᤋᤡᤛ᤻ᤔᤠ ᤐᤡᤖᤧᤶᤛᤡᤶᤔᤧ᤹ᤀᤥ॥
20 ᤀᤡᤱᤃᤠ᤹ ᤀᤡᤱᤈᤠ᤺ᤱ ᤐᤡᤏᤡᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤜᤢ᤹ᤖᤧᤶᤛᤡᤶᤔᤧ᤹ᤀᤥ॥ ᤀᤥᤔᤧᤳᤋᤧᤶᤔᤧ᤹ᤀᤥ. ᤀᤡᤱᤃᤠ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤥ ᤌᤠᤖᤡᤰᤁᤣ ᤂᤡᤏᤡ᤹ᤏᤢ ᤛᤍᤠᤍᤡᤱ ᤘᤠ᤹ᤀᤠᤖᤥ॥”