13
ᤜᤠᤱ ᤁᤧᤈᤥ᤺ᤰᤐᤠ ᤏᤢ ᤕᤢᤰᤛᤠᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤘᤠ᤹ᤔᤠ
ᤁᤧᤖᤧᤰ ᤔᤏᤠᤜᤠ᤹ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤔᤧᤘᤠ᤹ᤖ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤍᤠ᤺ᤒᤠ ᤕᤢᤰᤁᤡᤴᤏᤢ᤺ᤸᤗᤧ ᤘᤣ᤹ ᤕᤢᤰ ᤜᤥ᤺ᤵᤗᤥ॥ ᤛᤢᤜᤠᤱᤕᤢᤰᤐᤠᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤕᤢᤰᤋᤡᤱ ᤆᤥᤃᤢᤛᤡᤒᤠᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠᤜᤠ᤹ᤖᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤔᤧᤀᤳᤋᤢᤖᤥ॥ ᤜᤧᤰᤁᤣ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤶᤍᤡᤱ ᤔᤧᤄᤥ᤺ᤛᤢ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤏᤢ᤺ᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤕᤢᤰ ᤁᤧᤈᤥ᤺ᤰᤐᤠᤜᤠ᤹ᤏᤢ ᤁᤡ᤺ᤔᤠ ᤔᤧᤒᤥ᤺ᤱᤏᤧᤴ. ᤁᤖ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤁᤡ᤺ᤔᤠ ᤐᤥ᤺ᤱ॥ ᤕᤢᤰ ᤁᤧᤃᤵᤐᤠᤜᤠ᤹ᤏᤢ ᤔᤧᤱᤃᤡ᤺ᤔᤠ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤏᤢ᤺ᤒᤠ ᤕᤠ᤺ᤶᤒᤰ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤗᤠᤶ ᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤄᤥ᤺ᤛᤢ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤂᤧᤴ ᤕᤢᤰ ᤁᤧᤈᤥ᤺ᤰᤐᤠᤱᤃ ᤁᤧᤗᤠᤃᤡ ᤏᤢ᤺ᤒᤠ ᤐᤠ᤺ᤴ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤖᤥ॥ ᤁᤖ ᤂᤧᤏᤧ᤹ ᤑᤧᤴ ᤕᤠ᤺ᤶᤒᤰ ᤁᤧᤈᤥᤃᤢᤏᤧ ᤑᤠ᤹ᤃᤪ ᤁᤡ᤺ᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧᤃ ᤜᤏᤧ ᤋᤠᤓᤣ᤺ᤴ ᤔᤧᤜᤣ᤺ᤛᤢᤴᤗᤥ॥ ᤂᤧᤱᤃ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤸᤗᤥ ᤂᤢᤶᤍᤡᤱ ᤁᤧᤍᤠ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤢᤶᤍᤡᤱ ᤔᤧᤱᤄᤥ᤺ᤔᤠ ᤑᤠ᤹ᤀᤠᤱᤗᤰ ᤔᤧ᤺ᤴ. ᤁᤖ ᤀᤠᤒᤠᤅᤣ ᤂᤠᤛᤡᤱᤅᤡᤸᤗᤧ ᤀᤰᤂᤣ ᤆᤥ᤺ᤰᤔᤠ ᤏᤢ᤺ᤒᤠ ᤐᤥ᤺ᤱ ᤁᤧᤔᤧᤳᤋᤡᤒᤠᤸᤗᤧ ᤆᤥᤃᤢᤸᤗᤧ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤘᤕᤧᤶᤔᤧ᤹ᤀᤥ॥
ᤂᤧᤸᤗᤧ ᤆᤥᤃᤢᤸᤗᤧᤀᤣ ᤂᤡᤏᤡ᤹ ᤀᤣ᤺ᤱᤕᤠᤱ ᤁᤧᤜᤢᤅᤢᤶᤗᤥ॥ ᤌᤣᤀᤠᤱᤓᤧᤸᤗᤧ ᤛᤢᤜᤠᤱᤕᤢᤰᤐᤠᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤒᤠ ᤁᤴ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤂᤡᤏᤡ᤹ ᤁᤧᤜᤢᤅᤢᤶᤒᤠ ᤀᤧ᤺ᤱᤕᤠᤱᤗᤠᤶ ᤑᤠ᤹ᤕᤠᤱ ᤔᤧᤄᤥ᤺ᤛᤢ᤹ᤖᤥ॥ ᤁᤠᤰ ᤜᤢᤱᤔᤠ ᤁᤧᤒᤥ᤺ᤱᤒᤠᤴ ᤜᤢᤅᤧᤶᤔᤧ᤹–ᤁᤧᤖᤧᤰ ᤜᤢᤱᤔᤠ ᤁᤧᤒᤥ᤺ᤱᤒᤠ ᤀᤣ᤺ᤱᤕᤠᤱᤜᤠ᤹ ᤜᤢᤅᤧᤶᤔᤧ᤹. ᤁᤧᤖᤧᤰ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤔᤠ ᤁᤧᤒᤥ᤺ᤱᤒᤠᤜᤠ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤧᤶᤛᤡᤶᤔᤧ᤹ᤀᤥ॥
ᤗᤢᤱᤔᤠ᤹ ᤋᤢᤰᤛᤡᤱᤔᤠᤸᤗᤧ ᤛᤠᤶᤕᤥᤌᤡᤶᤔᤡᤴ ᤁᤧᤳᤋᤢ᤹
ᤜᤠᤖᤠ᤹ ᤂᤡᤏᤡ᤹ ᤗᤢᤶᤔᤥ ᤗᤢᤱᤔᤠ᤹ ᤋᤢᤰᤛᤡᤱᤔᤠᤀᤠᤱᤎᤥ ᤘᤣ᤹ ᤐᤠ᤺ᤴᤏᤡᤸᤗᤧᤴ ᤛᤡᤱᤏᤠ᤺ᤳᤋᤥ ᤔᤧᤒᤳᤇᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤘᤣ᤹ ᤔᤏᤠᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤏᤧ ᤑᤠ᤹ᤃᤪ ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤃᤧᤳᤋᤢᤶᤗᤥ॥ ᤛᤠᤶᤕᤥᤌᤡᤶᤔᤥ. ᤆᤠᤖᤠᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹. ᤔᤏᤠ ᤔᤧᤛᤧᤖᤧᤴᤏᤧ᤹. ᤔᤧᤄᤢ᤺ᤴᤍᤧᤴᤏᤧ᤹. ᤔᤧᤄᤡ᤺ᤵᤛᤧᤴᤏᤧ᤹ ᤗ᤹ᤖᤡᤰ ᤛᤠᤵᤋᤧᤒᤠ ᤀᤡᤱᤈᤠ᤺ᤱᤜᤠ᤹ ᤏᤢ ᤘᤣ᤹ ᤁᤧᤖᤧᤰ ᤀᤡᤱᤈᤠ᤺ᤱᤜᤠ᤹ ᤀᤠᤒᤠᤅᤣ ᤗᤢᤱᤔᤠ᤹ ᤁᤧᤍᤢᤰᤛᤡᤱᤒᤠ ᤁᤢᤀᤡᤛᤡ᤺ᤰ ᤁᤧᤒᤠᤱᤓᤣ᤹ᤛᤠᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤛᤧ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤧᤳᤗᤥ॥ 10 ᤗᤢᤱᤔᤠ᤹ ᤁᤧᤍᤢᤰᤐᤠᤸᤗᤧ ᤜᤠ᤺ᤳᤋᤠᤱ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤴᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤗᤢᤱᤔᤠ᤹ ᤋᤢᤰᤛᤡᤱᤔᤠᤴᤏᤣ ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤵᤔᤏᤠᤒᤠ ᤐᤥ᤺ᤱᤗᤥ॥
11 ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤥᤃᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤀᤠᤸᤗᤥᤒᤠ ᤕᤧᤶᤔᤡᤴ ᤀᤠᤰᤋᤱᤒᤠ ᤆᤥ᤺ᤰ ᤑᤠ᤹ᤀᤠᤱ ᤁᤧᤏᤡ᤺ᤛᤢᤶᤗᤥ॥ ᤀᤠᤸᤗ ᤀᤠᤏᤡ᤹ ᤔᤡᤰ ᤕᤢ᤺ᤔᤥᤗᤠᤶ ᤛᤥ᤺ᤔᤠᤀᤠᤱ ᤐᤥ᤺ᤰᤔᤠ ᤕᤧᤶ ᤁᤧᤖᤧᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤋᤃᤡ ᤏᤛᤠ᤺ᤴ ᤀᤠᤈᤥᤃᤢᤶᤒᤠ ᤕᤧᤶᤔᤡᤴᤏᤢ᤺ᤸᤗᤧᤀᤠᤱ ᤁᤢᤔᤏᤠᤜᤠ᤹ ᤋᤠᤱᤛᤧ᤺ᤵᤛᤧ ᤍᤠᤱᤒᤠᤸᤗᤧ ᤁᤢᤏᤢ᤺ᤱᤔᤠ ᤕᤢ᤺ᤔᤠ ᤕᤧᤶᤔᤡᤴ ᤀᤠᤸᤗᤥ ᤏᤡ᤺ᤳᤋᤠᤱ ᤘᤠ᤹॥ 12 ᤛᤧᤴᤍᤡᤰᤁᤡᤴ ᤗᤧᤰᤗ ᤐᤳᤗᤥ. ᤜᤧᤰᤁᤩᤠᤱ ᤂᤠᤀᤥ᤺ᤵᤔᤠᤴ ᤏᤡ᤺ᤳᤋᤠᤱ ᤋᤠᤖ ᤐᤳᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤂᤠᤍᤠᤶᤔᤥ ᤔᤧᤈᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤜᤠ᤹ ᤗᤧᤖᤢᤶ ᤜᤧᤰᤁᤩᤠᤱ ᤀᤥ᤺ᤳᤋᤡ᤺ᤸᤗᤧᤴ ᤌᤰᤛᤢᤒᤠᤜᤠ᤹ ᤕᤠᤖᤡᤵ ᤔᤧᤒᤥ᤺ᤱᤒᤠ ᤜᤧᤰᤁᤣ ᤕᤠᤖᤡᤵ ᤐᤥ᤺ᤰᤂᤡᤀᤠᤱ ᤏᤢ᤺ᤒᤠ ᤕᤠ᤺ᤶᤒᤰ ᤆᤥᤃᤢᤶᤗᤥ॥ 13 ᤀᤠᤏᤡ᤹ᤃ ᤗᤧᤴᤍᤡᤰ ᤀᤠᤘᤠ᤹ᤒᤠ ᤁᤢᤀᤡᤛᤡ᤺ᤰᤁᤣ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤘᤠ᤹ᤔᤠ ᤐᤥ᤺ᤱᤗᤥ. ᤕᤠᤶᤍᤠᤍᤠ ᤀᤠᤔᤔᤒᤠᤸᤗᤧ ᤔ᤺ᤛᤡᤱᤔᤠᤀᤠᤱ ᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤆᤥ᤺ᤰᤔᤠ. ᤆᤠᤖᤠᤶᤔᤠ ᤏᤢ ᤐᤥ᤺ᤵᤔᤠ. ᤂᤣᤔᤠ ᤌᤰᤔᤠ ᤏᤢ ᤏᤠᤜᤧᤳᤇᤡᤱᤔᤠ ᤔᤧ᤺ᤴᤗᤥ॥ 14 ᤂᤧᤸᤗᤧ ᤁᤢᤗᤧᤰᤘᤠ ᤏᤢ᤺ᤒᤠ ᤆᤠᤱ ᤆᤠᤱᤔᤏᤠᤒᤠ ᤁᤢᤀᤡᤛᤡ᤺ᤰ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤢᤳᤏᤠ᤺ᤴ ᤆᤠᤰᤂᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤁᤢᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤒᤡᤖᤧᤶᤔᤡᤴᤏᤧ᤹ᤀᤥ॥