2
ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤠᤛᤧᤴ
ᤘᤣ᤹ᤜᤠ᤹ ᤀᤠᤵᤋᤡᤰ ᤁᤢ᤺ᤵᤔᤠᤛᤡ ᤗᤠ᤹ᤖᤡᤃᤧ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶ. ᤁᤖ ᤂᤡᤏᤡ᤹ ᤑᤥᤋᤩᤠ ᤔᤧ᤺ᤴᤏᤣᤒᤠ ᤗᤠᤶᤛᤡᤱᤔᤠ ᤐᤠ᤺ᤴ ᤌᤣᤀᤠᤱ ᤁᤧᤱᤃᤳᤋᤢᤶᤔᤡᤴᤗᤥ. ᤌᤣᤀᤠᤱᤓᤧᤸᤗᤧ ᤌᤣ ᤐᤠ᤺ᤴᤏᤥ ᤘᤣ᤹ᤜᤠ᤹ ᤀᤠᤵᤋᤡᤰ ᤁᤧᤃᤢ᤺ᤳᤋᤢᤶᤛᤡᤶ ᤜᤠᤒᤠ ᤂᤧᤴ ᤐᤠ᤺ᤴᤏᤡᤴᤏᤣ ᤂᤡᤏᤡ᤹ᤀᤠᤱ ᤁᤧᤈᤥᤃᤢᤶᤗ ᤁᤧᤘᤕᤡ᤹ᤖᤥ॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ᤀᤠᤱ ᤀᤠᤒᤠᤅᤣ ᤀᤠᤵᤋᤡᤰ ᤁᤧᤃᤢ᤺ᤳᤋᤠᤛᤡ᤹ᤖᤥ॥ ᤀᤠᤸᤗ ᤀᤰᤋᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤖᤢᤛᤡᤸᤗᤧ ᤂᤢᤏᤧ᤹ ᤛᤧᤰᤂᤠᤗᤠᤶ ᤂᤠᤛᤧᤴ ᤗᤥ᤺ᤴᤍᤢᤛᤡ᤹ ᤑᤠ᤹ᤀᤠᤱ ᤀᤠᤏᤡ᤹ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤜᤧᤰᤋᤱᤒᤠ ᤐᤠ᤺ᤴᤏᤥ ᤂᤡᤏᤡ᤹ ᤘᤣ᤹ ᤔᤏᤠᤜᤠ᤹ ᤀᤠᤵᤋᤡᤰ ᤁᤧᤃᤢ᤺ᤳᤋᤢᤶᤛᤡᤶ. ᤁᤖ ᤀᤠᤒᤠᤅᤣᤃ ᤒᤠ ᤜᤧᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤔᤧᤒᤡᤖᤡᤃᤧᤴ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹ᤒᤡ᥅ ᤔᤧ᤺ᤱᤃᤪ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠᤴ. ᤏᤠᤛᤡ ᤁᤧᤎ᤺ᤳᤋᤡᤒᤠᤴ ᤜᤧᤰᤁᤩᤠᤱ ᤁᤢᤛᤡᤰ ᤏ᤺ᤶᤏ᤺ᤶ ᤗ᤹ᤒᤠᤴ ᤜᤏᤧ ᤁᤧᤗᤣ᤺ᤳᤋᤢᤶᤒᤡ᥅ ᤂᤡᤏᤡ᤹ ᤗᤠᤕᤥᤗᤠᤶ ᤁᤧᤜᤡᤴᤍᤡᤖ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠ ᤑᤠ᤹ᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤡ᥅ ᤁᤖ ᤂᤡᤏᤡ᤹ ᤜᤠᤍᤡᤱ ᤁᤧᤎᤰᤐᤠ ᤏᤢ ᤗᤠᤕᤥᤗᤠᤶ ᤔᤧᤴᤏᤢ᤺ᤱᤔᤏᤠᤒᤠ ᤏᤡᤱᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ. ᤁᤢᤍᤥ᤺ᤵᤔᤠ ᤂᤠᤛᤧᤴᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤔᤠ ᤕᤧᤴ ᤌᤠᤖᤡᤰ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤁᤡᤵᤔᤠ ᤁᤧᤄᤢ᤺ᤒᤠ ᤁᤢᤛᤠᤰᤁᤧᤴᤏᤡᤴ ᤁᤧᤓᤥ᤺ᤰᤂᤢᤶᤗ ᤁᤧᤘᤕᤡ᤹ᤖᤥ॥ ᤌᤣᤀᤠᤱᤓᤧᤸᤗᤧ “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤃ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤢᤀᤡᤛᤡ᤺ᤰᤁᤣ ᤏᤢ᤺ᤰᤋᤢ ᤐᤡᤖᤢᤛᤡ᤹ᤖᤥ॥”* ᤁᤢᤓᤠ ᤔᤏᤠᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤏᤢ᤺ᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤖ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤡᤔᤡᤍᤡᤱ. ᤔᤡᤱᤛᤥ ᤀᤡᤱᤎᤠ᤺ᤱ ᤏᤢ ᤀᤠᤈᤢᤏᤡ ᤜᤡᤱᤔᤴ ᤔᤧᤃᤥ᤺ᤳᤋᤢᤖ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤐᤡᤖᤢᤛᤡ᤹ᤖᤥ॥ ᤁᤖ ᤛᤧᤰᤂᤠ᤺ᤴ ᤁᤧᤏᤠ᤹ᤒᤠ. ᤀᤡᤱᤃᤠ᤹ᤖᤰ ᤆᤥᤃᤢᤱ ᤆᤠᤱ ᤁᤧᤗ᤹ᤒᤠ ᤜᤧᤰᤁᤩᤠᤱ ᤑᤧᤴ ᤐᤠ᤺ᤴᤏᤥ ᤁᤧᤒᤵᤐᤠ ᤔᤏᤠᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤡᤵᤔᤠ ᤁᤧᤄᤢ᤺ᤒᤠ ᤂᤢᤶᤍᤡᤱ ᤐᤡᤖᤢᤛᤡ᤹॥ ᤜᤧᤰᤁᤩᤠᤱ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤖᤧᤰ. ᤋᤃᤡ ᤕᤜᤢᤍᤡᤜᤠ᤹ ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤠᤱ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤠᤰᤐᤠ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤌᤠ᤺ᤛᤢᤛᤡ᤹ᤖᤥ॥ 10 ᤁᤖ ᤏᤢ᤺ᤒᤠ ᤐᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤔᤡᤔᤡᤍᤡᤱ. ᤔᤡᤱᤛᤥ ᤀᤡᤱᤎᤠ᤺ᤱ ᤏᤢ ᤛᤏᤠᤖᤢᤱᤅᤡᤴ ᤔᤧᤄᤥ᤺ᤛᤢ᤹–ᤋᤃᤡ ᤕᤜᤢᤍᤡᤜᤠ᤹ᤖᤧ ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧᤀᤠᤱ ᤔᤧᤄᤥ᤺ᤛᤢ᤹ᤖᤥ॥ 11 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ ᤀᤣ᤺ᤰᤐᤀᤣ᤺ᤰ ᤔᤧᤈᤥᤃᤢᤴᤇᤡᤴᤗᤥ॥
12 ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤛᤠᤶᤕᤥᤌᤡᤶ ᤔᤧᤱᤃᤳᤋᤢᤴᤇᤠᤱ ᤗᤠᤕᤥ ᤔᤧᤈᤥᤃᤢᤸᤗᤧ ᤂᤢᤶᤍᤡᤱ ᤔᤧᤄᤥ᤺ᤛᤢ᤹. ᤜᤧᤰᤁᤣᤗ᤹ᤖᤡᤰᤁᤣ ᤕᤜᤢᤍᤡᤜᤠ᤹ᤖᤧ ᤛᤠᤶᤕᤥᤌᤡᤶᤔᤡᤴ ᤔᤧᤃᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢᤸᤗᤧ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰᤁᤣ ᤂᤢᤶᤍᤡᤱ ᤔᤧᤄᤥ᤺ᤛᤢ᤹ᤖᤥ॥ 13 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤴ ᤂᤧᤶᤔᤠᤀᤠᤱᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤛᤠᤶᤕᤥᤏᤡᤒᤠ ᤀᤠᤶᤒᤥ᤺ᤱᤏᤧᤴ. ᤁᤖ ᤛᤠᤶᤕᤥᤌᤡᤶᤔᤡᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤏᤡᤒᤠ ᤀᤠᤗᤣ᤺ᤳᤗᤥ॥ 14 (ᤜᤧᤰᤁᤣᤗ᤹ᤖᤡᤰᤁᤣ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤛᤠᤶᤕᤥᤌᤡᤶᤔᤡᤴ ᤔᤧᤱᤃᤳᤋᤢᤴ ᤁᤖ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤔᤧᤈᤥᤃᤢᤸᤗᤧ ᤀᤠᤶᤓᤠᤛᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰᤗᤢᤱᤔᤥᤗᤠᤶᤒᤠᤀᤣ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ ᤁᤧᤗ᤹ᤒᤠᤴ ᤀᤥᤛᤣ᤺ᤴᤍᤠᤱ ᤐᤥ᤺ᤱᤗᤥ॥ 15 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰᤗᤢᤱᤔᤥ ᤛᤠᤶᤕᤥᤌᤡᤶᤔᤡᤴ ᤛᤠᤵᤋᤧᤀᤠᤱ ᤐᤳ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤍᤠᤱ ᤔᤧᤈᤥᤃᤢ᤹ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤂᤠᤛᤡᤱᤅᤡᤸᤗᤧ ᤂᤧᤱᤜᤠ᤹ ᤁᤢᤓᤠ ᤕᤧᤶᤔᤥ ᤀᤠᤵᤋᤡᤰ ᤁᤢ᤺ᤳᤋᤢᤛᤡ᤹ ᤜᤧᤰᤁᤩᤠᤱ ᤁᤢᤓᤠ ᤕᤧᤶᤔᤥ ᤏᤠᤅᤢᤛᤡ᤹ᤖᤥ॥) 16 ᤁᤴ ᤐᤠ᤺ᤴᤜᤠ᤹ᤃ ᤀᤡᤱᤃᤠ᤹ ᤀᤡᤱᤓᤥ᤺ᤛᤢᤱᤒᤠ ᤛᤢᤏᤠᤀᤡᤱ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋ ᤕᤧᤛᤢᤗᤠᤶᤒᤠ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤥᤒᤠ ᤐᤠ᤺ᤴᤜᤠ᤹ ᤂᤠᤛᤧᤴ ᤆᤥᤃᤢᤒᤠ ᤕᤧᤴᤏᤥ ᤐᤥ᤺ᤱᤗᤥ॥
ᤕᤜᤢᤍᤡᤜᤠ᤹ ᤏᤢ ᤛᤠᤶᤕᤥᤌᤡᤶᤔᤡᤴ
17 ᤁᤖ ᤀᤡᤱᤃᤠ᤹ ᤕᤜᤢᤍᤡᤀᤠᤖᤥ ᤁᤧᤒᤠ᤺ᤳᤋᤢᤀᤠᤱ ᤛᤠᤶᤕᤥᤌᤡᤶᤔᤡᤴ ᤏᤡᤱᤘᤠ᤹ ᤀᤡᤖᤧ ᤂᤥ᤺ᤵᤋᤢᤖ ᤁᤧᤈᤥᤃᤢ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤏᤡ᤺ᤳᤋᤢᤱ ᤑᤠ᤹ᤀᤠᤱ ᤀᤠᤱᤍᤡᤱ ᤁᤧᤗ᤹. 18 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ᤀᤡᤴ ᤁᤧᤏᤡ᤺ᤛᤢ᤹ᤀᤠᤱ ᤛᤠᤶᤕᤥᤌᤡᤶᤔᤡᤴ ᤁᤧᤜᤢ᤹ᤛᤡᤱᤒᤠᤸᤗᤧ ᤆᤥᤃᤢᤸᤗᤧ ᤏᤢ᤺ᤒᤠ ᤐᤠ᤺ᤴᤜᤠ᤹ ᤛᤣ᤺ᤰᤔᤠ ᤁᤧᤛᤢᤰᤋᤢ᤹. 19 ᤜᤧᤰᤁᤩᤠᤱ ᤔᤡᤰᤑ᤺ᤶᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥ᤺ᤒᤠ ᤏᤢ ᤂᤠᤍᤠᤶᤔᤠᤗᤢᤶᤔᤥ ᤁᤧᤘᤠ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤀᤥ᤺ᤳᤋᤡᤀᤠ ᤑᤠ᤹ᤀᤠᤱ ᤏᤡᤛ᤻ᤛᤣ ᤁᤧᤈᤥᤃᤢᤀᤠᤱ ᤁᤧᤘᤠ᤹. 20 ᤀᤍᤱᤜᤠ᤹ᤖᤧ ᤂᤢᤏᤡ᤹ ᤛᤢᤈᤠᤍᤠᤱᤒᤠ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤸᤗᤧ᤺ᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ ᤛᤡᤰᤛᤠᤶᤒᤠᤀᤠ ᤗ᤹ᤖᤡᤰ ᤁᤧᤀᤡ᤺ᤳᤋᤢ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤛᤠᤶᤕᤥᤌᤡᤶᤔᤥ ᤁᤠᤰ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤛᤧᤰᤂᤠ ᤐᤠ᤺ᤴᤜᤠ᤹ ᤂᤥ᤺ᤛᤢᤱᤅᤠᤱ ᤘᤠ᤹ᤀᤠ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢ᤹ᤖᤥ॥
21 ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤏᤧ᤹ ᤘᤣ᤹ᤜᤠ᤹ ᤁᤧᤜᤢ᤹ᤖᤢᤛᤡᤀᤠᤱ ᤌᤣᤀᤠᤱ ᤀᤠᤒᤠᤅᤣ ᤁᤧᤴᤜᤢ᤹ᤛᤡᤱᤅᤡᤴᤒᤣ᥅ ᤂᤢ᤺ᤶᤔᤠ ᤔᤧ᤺ᤴ ᤗ᤹ᤖᤡᤰ ᤀᤡᤱᤃᤧᤓᤥ᤺ᤛᤢᤀᤠᤱ ᤁᤧᤄᤢ᤺ᤴᤒᤡ᥅ 22 ᤂᤧᤏᤧ᤹ ᤘᤣ᤹ᤜᤠ᤹ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ ᤗ᤹ᤖᤡᤰ ᤁᤧᤔᤧᤳᤋᤢᤛᤡᤀᤠᤱ ᤀᤠᤒᤠᤅᤣ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤡ᥅ ᤏᤠᤘᤠᤀᤡᤳᤗᤠᤜᤠ᤹ ᤀᤠᤛᤡᤰᤔᤧᤗᤧ᤺ᤱ ᤁᤧᤒᤠ᤺ᤳᤋᤢᤀᤠᤱ ᤏᤠᤘᤠᤀᤡᤳᤗᤠ ᤁᤧᤕᤢᤱᤒᤠ ᤔᤠᤱᤜᤡᤶᤔᤥ ᤔᤧᤍᤥ᤺ᤴᤍᤢᤒᤠ ᤕᤠᤱᤅᤡᤴ ᤁᤧᤄᤢ᤺ᤳᤋᤢ᤹ᤒᤡ᥅ 23 ᤂᤧᤏᤧ᤹ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤴ ᤗᤧᤛ᤻ᤛᤢᤱ ᤗ᤹ᤖᤡᤰ ᤀᤠᤱᤍᤡᤱ ᤁᤧᤗ᤹. ᤁᤖ ᤛᤠᤶᤕᤥᤌᤡᤶᤔᤡᤴ ᤁᤧᤓᤣ᤺ᤴᤍᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤠ᤺ᤳᤌᤡ ᤁᤧᤍᤣ᤺ᤛᤢᤖᤥ॥ 24 ᤛᤠᤶᤕᤥᤛᤠᤵᤗᤠᤀᤥ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤌᤡᤶᤔᤧᤴᤍᤱ ᤛᤢᤘᤠᤱᤗᤢᤶᤔᤥ ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤠ᤺ᤳᤌᤡ ᤐᤣᤀᤠᤱ ᤘᤠ᤹ᤖᤥ॥”*
25 ᤂᤧᤏᤧ᤹ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤴ ᤁᤧᤀᤡ᤺ᤳᤋᤢ ᤁᤧᤏᤠ᤺ᤳᤋᤢ᤹ᤏᤧ ᤑᤠ᤹ᤃᤪ ᤜᤷᤍᤥ ᤁᤧᤜᤧᤃᤢᤒᤠᤴ ᤏᤢ᤺ᤒᤠᤀᤣ ᤐᤥ᤺ᤱᤗᤥ. ᤁᤖ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤴ ᤁᤧᤓᤣ᤺ᤴᤍᤢᤏᤧ ᤑᤠ᤹ᤃᤪ ᤜᤷᤍᤥ ᤔᤧᤴᤜᤧᤰᤔᤏᤠᤒᤠ ᤁᤢᤀᤡᤛᤡ᤺ᤰ ᤁᤧᤒᤥ᤺ᤱᤗᤥ॥ 26 ᤜᤷᤍᤥ ᤔᤧᤴᤜᤧᤰᤔᤏᤠᤒᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤛᤠᤶᤕᤥᤌᤡᤶᤔᤡᤴ ᤔᤧᤀᤡ᤺ᤳᤋᤢ᤹ ᤔᤧᤏᤠ᤺ᤳᤋᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤜᤷᤍᤥ ᤁᤧᤜᤧᤰᤐᤠ ᤜᤧᤰᤁᤣᤀᤣ ᤀᤡ᤺ᤳᤋᤢᤛᤡ᤹ᤖᤥ॥ 27 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤛᤠᤶᤕᤥᤌᤡᤶ ᤏᤢ ᤜᤷᤍᤥ ᤜᤧᤰᤔᤠ ᤌᤡᤶ ᤁᤧᤃᤵᤐᤠᤀᤠᤱ ᤛᤠᤶᤕᤥᤌᤡᤶᤔᤡᤴ ᤁᤧᤓᤣ᤺ᤶᤒᤠ ᤕᤜᤢᤍᤡᤛᤣ. ᤏᤠᤛᤡᤱᤃᤧᤴ ᤌᤰᤁᤥ ᤜᤷᤍᤥ ᤜᤧᤰᤔᤠ ᤌᤡᤶ ᤔᤧᤱᤃᤵᤔᤏᤠ ᤁᤖ ᤛᤠᤶᤕᤥᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤂᤡᤏᤡ᤹ ᤁᤧᤗᤠ᤹ᤖᤡᤒᤠ ᤀᤠᤵᤋᤡᤰᤁᤡᤴ ᤁᤧᤶᤃᤢ᤺ᤳᤋᤡ᤹ᤖᤥ॥ 28 ᤕᤜᤢᤍᤡ ᤌᤡᤶᤔᤡᤸᤗᤰ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤧᤴ ᤛᤧᤰᤂᤠᤒᤠ ᤕᤜᤢᤍᤡ ᤔᤧ᤺ᤴ. ᤜᤧᤰᤁᤩᤠᤱ ᤜᤷᤍᤥ ᤜᤧᤰᤔᤠᤱᤃ ᤗᤠ᤺ᤰᤁᤠᤳᤐᤠ ᤏᤢ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤐᤠ᤺ᤴᤗᤰᤗᤥ॥ 29 ᤁᤖ ᤛᤧᤰᤂᤠᤒᤠ ᤕᤜᤢᤍᤡᤃ ᤏᤡᤱᤘᤠ᤹ᤀᤥᤏᤢ ᤐᤥ᤺ᤱᤔᤠ ᤐᤥ᤺ᤱ. ᤜᤧᤰᤁᤩᤠᤱ ᤛᤧᤰᤂᤠᤒᤠ ᤜᤷᤍᤥ ᤜᤧᤰᤔᤠᤱᤃ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰᤐᤠ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤐᤠ᤺ᤴ ᤔᤧ᤺ᤴ. ᤁᤖ ᤛᤡᤰᤗᤢᤱᤔᤥ ᤛᤣᤛᤣᤔᤠᤱᤅᤡᤸᤗᤧ ᤆᤥᤃᤢᤒᤠ ᤐᤠ᤺ᤴᤗᤥ॥ ᤜᤧᤰᤋᤱᤒᤠ ᤔᤏᤠ᤺ᤴ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤖᤥ॥
* 2:6 ᤏᤡᤱᤘᤠ᤹ᤑᤢᤛᤠᤶᤗᤥ ᤛᤢᤶ ᥌᥈.᥇᥈ * 2:24 ᤕᤛᤤᤕᤠ ᥋᥈.᥋. ᤀᤡᤈᤡᤁᤡᤀᤣᤗ ᥉᥊.᥈᥆