8
ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤜᤡᤱᤔᤠ
ᤂᤧᤸᤗᤧ ᤆᤥᤃᤢᤸᤗᤧ ᤀᤠᤸᤗ ᤂᤪᤡᤛ᤻ᤋ ᤕᤧᤛᤢ᤺ᤴᤏᤢ ᤌᤡᤰᤜᤢᤵ ᤁᤧᤘᤠ᤹ᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤴᤇᤡᤴ. ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋ ᤕᤧᤛᤢᤗᤠᤶ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤗᤠᤕᤥ ᤏᤢ ᤛᤡ᤺ᤔᤧᤸᤗᤧ ᤁᤢᤔᤢᤰᤛᤠᤶᤗᤠᤶ ᤆᤥ᤺ᤰᤕᤢᤶᤓᤥ ᤐᤡᤖᤠᤱᤅᤠᤱ ᤘᤠ᤹ᤖᤥ॥ ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤆᤥᤃᤢᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ ᤆᤥ᤺ᤰᤔᤠ ᤔᤧᤛᤢᤰᤋᤢᤶᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤖᤥ॥ ᤂᤢᤏᤧ᤹ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤈᤥᤃᤢᤒᤠ ᤗᤠᤕᤥ᤺ᤸᤗᤧ ᤗᤠᤃᤡ ᤛᤡᤍᤢᤱᤈᤓᤠ ᤐᤥ᤺ᤱᤛᤧ ᤗᤠᤕᤥᤒᤠ ᤔᤏᤠ ᤁᤢᤀᤡᤛᤡ᤺ᤰᤐᤠ ᤏᤠᤛᤡᤱᤃᤧᤴ ᤌᤰᤁᤥ ᤐᤠᤱᤄᤢ ᤕᤢ᤺ᤛᤢᤀᤠᤱ ᤏᤠᤛᤡᤱᤃᤧᤴ ᤁᤢᤎᤰᤁᤡᤸᤗᤧ ᤀᤠᤏᤡ᤹ ᤗᤠᤕᤥ᤺ᤴ ᤔᤧᤰᤂᤢᤖᤥ॥ ᤀᤰᤂᤣᤗ᤹ᤖᤡᤰ ᤗᤠᤕᤥᤒᤠ ᤛᤢᤳᤏᤠ ᤁᤢᤀᤡᤛᤡ᤺ᤰ ᤔᤧ᤺ᤴ. ᤁᤖ ᤛᤣᤛᤣᤔᤠᤱ ᤁᤢᤀᤡᤛᤡ᤺ᤰ ᤀᤠᤜᤡᤱᤅᤡᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ ᤏᤠ᤺ᤰᤋᤢᤒᤠ ᤛᤠᤶᤕᤥᤏᤡᤒᤠ ᤐᤠ᤺ᤴᤜᤠ᤹ ᤁᤠᤰ ᤀᤠᤏᤡ᤹ ᤆᤥ᤺ᤰᤔᤠ ᤀᤠᤛᤢᤰᤋᤢᤶᤗ ᤑᤠ᤹ᤀᤠᤱ ᤂᤢᤏᤧ᤹ ᤜᤧᤰᤁᤣ ᤆᤥᤃᤢᤒᤠᤖᤥ॥
ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤏᤡᤱᤘᤠ᤹ ᤆᤥᤃᤢᤒᤠ ᤁᤢᤀᤡᤛᤡ᤺ᤰ ᤁᤧᤜᤡᤱᤒᤠᤜᤠ᤹ᤖᤧᤃ ᤂᤧᤴ ᤛᤢᤳᤏᤠ᤺ᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤔᤠᤀᤥᤀᤣ ᤏᤡᤱᤘᤠ᤹ ᤔᤧᤒᤡᤖᤢ᤹. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤁᤧᤜᤡᤱᤒᤠᤜᤠ᤹ᤖᤧᤃ ᤛᤣᤛᤣᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤔᤠᤀᤥᤀᤣ ᤏᤡᤱᤘᤠ᤹ ᤔᤧᤒᤡᤖᤢ᤹ᤖᤥ॥ ᤀᤠᤏᤡ᤹ ᤏᤡᤱᤘᤠ᤹ᤀᤡᤴ ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤕᤢᤰᤔᤠ ᤀᤠᤒᤠᤱᤄᤢᤶᤔᤡᤸᤗᤧᤃ ᤀᤠᤛᤡ᤺ᤖᤥ. ᤁᤖ ᤀᤠᤏᤡ᤹ ᤏᤡᤱᤘᤠ᤹ᤀᤡᤴ ᤛᤣᤛᤣᤔᤠᤱᤅᤡᤴ ᤕᤢᤰᤔᤠ ᤀᤠᤒᤠᤱᤄᤢᤶᤏᤧ ᤑᤠ᤹ᤃᤪ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤏᤢ ᤛᤏᤠᤖᤢᤱ ᤀᤠᤄᤥ᤺ᤛᤢᤶᤗᤥ॥ ᤌᤣᤀᤠᤱᤓᤧᤸᤗᤧ ᤗᤠᤕᤥᤒᤠ ᤛᤢᤳᤏᤠ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ॥ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶᤔᤡᤴ ᤔᤧᤀᤡ᤺ᤳᤋᤢᤴ ᤔᤧᤏᤠ᤺ᤳᤋᤢᤴ ᤜᤧᤰᤁᤩᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠᤀᤠᤱ ᤔᤧᤛᤢᤰᤋᤢᤴᤗᤥ॥ ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤕᤢᤰᤋᤢᤛᤡᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤔᤠ ᤔᤧᤴᤇᤢᤰᤋᤢᤴᤗᤥ॥
ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤅᤡᤴ ᤂᤡᤏᤡ᤹ᤀᤥ ᤛᤧᤰᤂᤠᤀᤣ ᤘᤠ᤹ᤏᤧ ᤑᤠ᤹ᤃᤪ ᤂᤡᤏᤡ᤹ᤃ ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤁᤢᤔᤏᤠ ᤔᤧ᤺ᤴᤏᤡᤱ. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤏᤠᤏᤡᤱᤗᤥ॥ ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠ᤺ᤴᤏᤢ ᤂᤪᤡᤛ᤻ᤋᤖᤧ ᤁᤢᤛᤣᤛᤣᤔᤠᤱᤅᤡᤴ ᤜᤥ᤺ᤵ ᤂᤧᤴ ᤂᤪᤡᤛ᤻ᤋᤖᤧ ᤁᤢᤔᤏᤠ ᤔᤧ᤺ᤴᤗᤥ॥ 10 ᤁᤖ ᤂᤪᤡᤛ᤻ᤋᤧᤴ ᤂᤡᤏᤡ᤹ᤀᤥ ᤘᤠ᤹ᤏᤧ ᤑᤠ᤹ᤃᤪ ᤂᤡᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴ ᤗᤠᤕᤥ᤺ᤸᤗᤧ ᤆᤥᤃᤢᤸᤗᤧ ᤛᤡ᤺ᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤁᤧᤒᤥ᤺ᤰᤂᤡᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤕᤠᤶᤛᤠᤶᤔᤡᤴ ᤜᤡᤱᤗᤥ॥ 11 ᤜᤧᤰᤁᤩᤠᤱ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠᤸᤗᤧ ᤁᤢᤛᤣᤛᤣᤔᤠᤱᤅᤡᤴ ᤂᤡᤏᤡ᤹ᤀᤥ ᤘᤠ᤹ᤏᤧ ᤑᤠ᤹ᤃᤪ ᤒᤠ ᤂᤧᤴ ᤂᤡᤏᤡ᤹ᤀᤥ ᤁᤧᤘᤠ᤹ᤒᤠ ᤛᤣᤛᤣᤔᤠᤱᤗᤠᤶ ᤂᤪᤡᤛ᤻ᤋ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠᤸᤗᤧ ᤂᤡᤏᤡ᤹ᤀᤠᤱ ᤁᤢᤜᤡᤱᤘᤧᤳ ᤁᤧᤈᤥᤃᤡ᤹ᤖᤥ॥
12 ᤂᤧᤸᤗᤧ ᤆᤥᤃᤢᤸᤗᤧ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ ᤀᤠᤏᤡ᤹ ᤔᤧᤴᤈᤥ᤺ᤰᤁᤣ ᤔᤧᤶᤒᤥ᤺ᤱᤔᤏᤠᤒᤠ ᤐᤠ᤺ᤴᤜᤠ᤹ ᤘᤠ᤹. ᤁᤖ ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤏᤡᤱᤘᤠ᤹ ᤆᤥᤃᤢᤒᤠ ᤜᤧᤰᤁᤣᤀᤣ ᤆᤥ᤺ᤰᤔᤠ ᤔᤧᤒᤥ᤺ᤱᤏᤧᤸᤗᤥ॥ 13 ᤂᤡᤏᤡ᤹ ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤏᤡᤱᤘᤠ᤹ ᤆᤥᤃᤢᤒᤠ ᤁᤢᤀᤡᤛᤡ᤺ᤰ ᤁᤧᤘᤕᤡ᤹ᤏᤧ ᤑᤠ᤹ᤃᤪ ᤂᤡᤏᤡ᤹ ᤁᤧᤛᤩᤧ᤹ᤀᤡᤖᤥ. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤗᤠᤕᤥᤒᤠ ᤕᤠ᤺ᤶᤒᤰᤜᤠ᤹ ᤁᤧᤗᤧᤖᤢᤶᤏᤧ ᤑᤠ᤹ᤃᤪ ᤁᤧᤜᤡᤅᤡ᤹ᤖᤥ॥ 14 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤅᤡᤸᤗᤧ ᤗᤠᤶᤗᤥᤛᤢᤛᤡᤒᤠᤜᤠ᤹ᤀᤣ ᤏᤡᤱᤘᤠ᤹ᤑᤢᤛᤠ᤺ᤛᤡᤖᤥ॥
15 ᤂᤡᤏᤡ᤹ ᤁᤧᤄᤥ᤺ᤛᤢᤶᤒᤠ ᤛᤣᤛᤣᤔᤠᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤧᤃᤡᤒᤠ ᤕᤥ᤺ᤰ ᤁᤧᤴᤈᤥᤃᤡᤴ. ᤁᤖ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤛᤡ᤺ᤱᤛᤠ᤺ ᤁᤧᤈᤥᤃᤡᤀᤠᤱ ᤘᤠ᤹॥ ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ “ᤐᤠᤏᤢᤍᤡᤱ ᤀᤠᤶᤒᤦ” ᤔᤧᤵᤔᤠ ᤀᤠᤛᤢᤰᤋᤢᤶᤗᤥ॥ 16 ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤅᤡᤴ ᤀᤠᤏᤡ᤹ ᤕᤠᤶᤛᤠᤶᤔᤡᤴᤏᤢ ᤋᤱᤅᤠᤱ “ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤏᤡᤱᤗᤥ” ᤑᤠ᤹ᤀᤠᤱ ᤀᤠᤔᤧᤳᤗᤥ॥ 17 ᤜᤧᤰᤁᤩᤠᤱ ᤁᤢᤛ᤻ᤛᤠ᤺ ᤀᤠᤒᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤰ ᤁᤧᤄᤥ᤺ᤒᤠᤛᤡᤖᤥ॥ ᤛᤧᤰᤂᤠᤀᤣ ᤂᤢᤏᤧ᤹ᤏᤢ ᤛᤥᤖᤡᤰ ᤀᤡᤱᤎᤠ᤺ᤱ ᤀᤠᤄᤥ᤺ᤛᤢᤶᤗ ᤑᤠ᤹ᤀᤠᤱ ᤂᤢᤏᤧ᤹ᤏᤢ ᤛᤥᤖᤡᤰ ᤀᤡᤏᤥᤃᤧᤴ ᤋᤢᤰᤂᤣᤀᤠᤱ ᤀᤠᤈᤠᤏᤧ ᤑᤠ᤹ᤃᤪ ᤀᤠᤏᤡ᤹ᤃ ᤕᤧᤛᤢ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤗᤰ ᤁᤧᤄᤥ᤺ᤒᤠᤛᤡᤀᤠᤱᤗᤥ॥
ᤁᤧᤍᤠ᤺ᤒᤠ ᤔᤡᤔᤡᤍᤡᤱ
18 ᤂᤢᤏᤧ᤹ ᤕᤠᤱᤛᤡ ᤀᤠᤒᤡᤒᤠ ᤔᤡᤔᤡᤍᤡᤱᤅᤡᤴᤏᤢ ᤋᤱᤔᤠᤸᤗᤧᤃ ᤁᤴ ᤕᤧᤶᤔᤥ ᤀᤠᤏᤡ᤹ ᤀᤠᤍᤢᤔᤢᤶᤒᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤌᤣᤀᤠᤱ ᤔᤧ᤺ᤴᤗᤥ ᤑᤠ᤹ᤀᤠᤱ ᤀᤡ᤺ᤳᤋᤢᤱᤗᤥ॥ 19 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠᤒᤠ ᤁᤢᤛ᤻ᤛᤠ᤺ᤜᤠ᤹ ᤀᤥᤛᤣ᤺ᤴᤍᤠᤱ ᤐᤥ᤺ᤱᤔᤠ ᤕᤧᤶᤔᤡᤴ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤸᤗᤧ ᤛᤠ᤹ᤖᤡᤰ ᤏᤡᤱᤘᤠ᤹ ᤀᤡᤃᤣ᤺ᤰᤁᤠᤱ ᤜᤠᤱᤄᤢᤖ ᤘᤠ᤹ᤖᤥ॥ 20-21 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤴ ᤑᤧᤳᤗᤠᤖᤧ. ᤜᤧᤰᤁᤣᤃ ᤀᤠᤒᤠᤅᤣᤃ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤜᤧᤰᤁᤣ ᤐᤥ᤺ᤰᤂᤧᤒᤠᤖᤥ॥ ᤁᤖ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤸᤗᤧ ᤁᤡ᤺ᤔᤠ ᤐᤣ᤺ᤰᤔᤠᤗᤠᤶᤒᤠ ᤋᤠᤱᤛᤧ᤺ᤵᤐᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤜᤠ᤹ᤖᤧ ᤂᤢᤏᤡ᤹ ᤔᤡᤔᤡᤍᤡᤱᤃᤧᤴ ᤆᤥ᤺ᤰᤕᤢᤶᤓᤥ᤺ᤴ ᤔᤧᤄᤥ᤺ᤛᤢᤖ ᤁᤧᤗ᤹ᤒᤠᤴ ᤛᤠ᤹ᤖᤡᤰ ᤏᤡᤱᤛᤠᤱ ᤆᤥᤃᤢᤖ ᤘᤠ᤹॥ 22 ᤁᤴ ᤁᤧᤖᤧᤰ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤴ ᤛᤠᤘᤠ᤺ᤶᤔᤠ ᤋᤢᤱᤅᤡᤸᤗᤧ ᤋᤖᤢᤔᤠ ᤔᤧᤴᤇᤡᤔᤠ᤹ᤀᤡᤴ ᤁᤢᤀᤡᤛᤡ᤺ᤰ ᤀᤠᤸᤗ ᤌᤠᤖᤡᤰ ᤕᤠ᤺ᤵᤐᤠ ᤏᤢ ᤋᤢᤰᤂᤣ ᤆᤠ᤺ᤒᤠᤴ ᤀᤠᤏᤡ᤹ ᤀᤠᤏᤡ᤺ᤛᤢᤶᤗᤥ॥
23 ᤏᤠᤘᤠᤃᤧᤴ ᤆᤀᤡ᤺ᤳᤋᤡᤸᤗᤰ ᤔᤧ᤺ᤴ. ᤁᤖ ᤁᤠᤰᤏᤢ ᤋᤃᤡᤒᤠ ᤗᤰ ᤁᤢᤀᤡᤛᤡ᤺ᤰ ᤛᤣᤛᤣᤔᤠᤱᤅᤡᤴ ᤁᤧᤄᤥ᤺ᤒᤠ ᤀᤠᤏᤡ᤹ᤀᤠᤱ ᤀᤠᤕᤠ᤺ᤳᤗ ᤀᤠᤘᤠ᤹ᤖᤥ॥ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤛ᤻ᤛᤠ᤺ ᤀᤠᤈᤥ᤺ᤰᤁᤠᤱ ᤀᤠᤏᤡ᤹ ᤀᤠᤒᤠᤅᤣ ᤏᤠᤛᤡᤱᤃᤧᤴ ᤌᤰᤁᤡᤸᤗᤧ ᤗᤠᤕᤥ ᤏᤢ ᤋᤢᤰᤂᤣᤗᤠᤶ ᤆᤥ᤺ᤰᤕᤢᤶᤓᤥ ᤂᤥ᤺ᤛᤢᤖ ᤑᤠ᤹ᤀᤠᤱ ᤀᤠᤕᤠ᤺ᤳᤗ ᤀᤠᤜᤠᤱᤄᤢᤶᤗ ᤀᤠᤘᤠ᤹ᤖᤥ॥ 24 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤛᤧᤴᤗᤵ ᤀᤠᤄᤥ᤺ᤛᤢᤶᤔᤠᤱᤎᤥᤀᤣ ᤁᤴ ᤛᤧᤰᤂᤠᤒᤠ ᤏᤡᤱᤛᤠᤱᤅᤡᤴ ᤀᤠᤃᤳᤋᤢᤶᤔᤠᤱ ᤘᤠ᤹॥ ᤏᤡ᤺ᤔᤏᤠᤒᤠ ᤐᤠ᤺ᤴᤏᤡᤴ ᤏᤡᤱᤛᤠᤱ ᤀᤠᤴᤈᤥᤃᤢᤶᤔᤡᤴᤗᤥ॥ ᤀᤠᤸᤗ ᤋᤃᤡᤛᤠ ᤁᤳᤋᤢᤒᤠ ᤐᤠ᤺ᤴᤏᤡᤴ ᤜᤠ᤺ᤳᤗᤧ ᤏᤡᤱᤛᤠᤱ ᤆᤥᤃᤢ᤹ᤒᤣ᥅ 25 ᤁᤖ ᤀᤠᤏᤡ᤹ ᤀᤠᤸᤗ ᤌᤠᤖᤡᤰ ᤔᤧᤱᤄᤥᤀᤣ ᤀᤠᤘᤠ᤹ᤒᤠ ᤐᤠ᤺ᤴᤏᤡᤴ ᤏᤡᤱᤛᤠᤱ ᤀᤠᤈᤥᤃᤢᤶᤔᤡᤸᤗᤧ ᤂᤧᤴ ᤂᤥ᤺ᤔᤠ ᤑᤠ᤹ᤀᤠᤱ ᤏᤠᤛᤡ ᤀᤠᤎ᤺ᤳᤋᤢᤶᤔᤠᤱ ᤀᤠᤜᤠᤱᤄᤢᤶᤗᤥ॥
26 ᤛᤣᤛᤣᤔᤠᤱᤅᤡᤸᤗᤧᤀᤠᤱ ᤀᤠᤏᤡ᤹ ᤁᤧᤛᤠᤰᤐᤠᤀᤥ ᤀᤠᤎᤠᤀᤠᤱ ᤀᤠᤘᤠ᤹ᤀᤡᤸᤗᤧ ᤁᤢᤓᤠ᤹ ᤀᤠᤒᤡ᤹ᤖᤥ॥ ᤂᤧᤴ ᤕᤧᤶᤔᤥ ᤀᤠᤰᤂᤣᤗ᤹ᤖᤡᤰ ᤋᤢᤘᤠ ᤆᤥ᤺ᤰᤔᤠ ᤀᤠᤏᤡ᤹ ᤀᤠᤸᤗᤧᤛ᤻ᤛᤢᤶᤔᤡᤴ. ᤁᤖ ᤀᤠᤏᤡ᤹ ᤐᤠ᤺ᤵᤔᤠᤀᤣ ᤛᤢᤰᤔᤧᤴᤍᤧᤵᤔᤏᤠᤒᤠ ᤐᤠ᤺ᤴᤛᤢᤳᤗᤠᤜᤠ᤹ᤖᤧᤴ ᤀᤠᤏᤡ᤹ ᤕᤠ᤺ᤵᤔᤠᤴᤏᤢ ᤛᤣᤛᤣᤔᤠᤱᤅᤡᤸᤗᤧ ᤀᤠᤏᤡ᤹ ᤗᤧᤰᤘᤠ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ᤹ᤖᤥ॥ 27 ᤜᤧᤰᤁᤩᤠᤱ ᤀᤠᤏᤡ᤹ ᤛᤡᤰᤗᤢᤱᤔᤠᤀᤥᤒᤠ ᤐᤠ᤺ᤴ ᤁᤧᤏᤡ᤺ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤏᤡ᤺ᤛᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤏᤛᤠᤏᤡᤒᤠᤜᤠ᤹ᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ᤹ᤖᤥ॥
ᤏᤡᤱᤘᤠ᤹ᤑᤢ ᤔᤡ᤺ᤶᤈᤡᤗᤠᤶᤒᤠ ᤌᤣ᤺ᤸᤗᤧᤀᤠᤱ ᤛᤧᤶᤔᤠ ᤀᤠᤴᤇᤢᤰᤏᤧᤴ
28 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤁᤧᤔᤧᤵᤐᤠ. ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤀᤢ᤺ᤳᤋᤢᤛᤡᤒᤠᤜᤠ᤹ᤖᤧ ᤗᤠᤃᤡ. ᤂᤢᤏᤧ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤢ᤺ᤒᤠᤀᤣ ᤐᤥ᤺ᤱᤗ ᤆᤥᤃᤢ᤹ ᤁᤧᤗ᤹ᤒᤠᤴᤏᤠᤱ ᤀᤠᤏᤡ᤹ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥ 29 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤀᤢᤴᤇᤣ᤺ᤴᤇᤠ ᤁᤢᤛᤡᤱ ᤏᤡ᤺ᤳᤋᤢᤛᤡᤀᤠᤱ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤁᤢᤀᤡᤛᤡ᤺ᤰᤁᤣ ᤐᤥ᤺ᤱᤛᤧ ᤛᤣᤃᤢᤛᤡᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤕᤖᤡᤰ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ᤀᤥ ᤂᤢᤏᤧ᤹ ᤋᤢᤶᤒᤠ ᤐᤥ᤺ᤰᤂᤧᤖᤥ॥ 30 ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ ᤋᤃᤡᤛᤠ ᤛᤣᤃᤢᤛᤡ. ᤂᤧᤱᤜᤠ᤹ᤃ ᤀᤢ᤺ᤳᤋᤢᤛᤡᤀᤠᤱᤗᤥ॥ ᤀᤠᤳᤋᤡᤴᤜᤠ᤹ ᤀᤢ᤺ᤳᤋᤢᤛᤡ᤹. ᤂᤧᤱᤜᤠ᤹ᤃ ᤀᤠᤵᤋᤡᤰ ᤔᤧ᤺ᤴᤏᤣᤒᤠᤀᤠᤱ ᤆᤥᤃᤢᤛᤡ᤹ᤖᤥ॥ ᤀᤠᤳᤋᤡᤴᤜᤠ᤹ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤆᤥᤃᤢᤛᤡ᤹. ᤂᤧᤱᤜᤠ᤹ᤃ ᤁᤢᤔᤡᤔᤡᤍᤡᤱᤅᤡᤴᤏᤠᤱ ᤐᤡᤖᤢᤛᤡ᤹ᤖᤥ॥
31 ᤜᤧᤰᤁᤣᤏᤧ ᤑᤠ᤹ᤃᤪ ᤀᤠᤏᤡ᤹ ᤌᤣ ᤀᤠᤒᤠ᤺ᤳᤋᤢᤶᤒᤠᤒᤣ᥅ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ ᤗᤧᤵᤔᤠᤱ ᤘᤠ᤹ᤏᤧ ᤑᤠ᤹ᤃᤪ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤜᤠ᤺ᤳᤋᤠᤱ ᤐᤥ᤺ᤰᤔᤠ ᤔᤧᤛᤢᤰᤏᤧᤴᤗᤥ॥ 32 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴᤏᤣ ᤔᤧᤍᤠᤱᤄᤢᤴ. ᤁᤖ ᤀᤠᤏᤡ᤹ ᤁᤧᤖᤧᤰᤗᤧ ᤗᤠᤃᤡ ᤂᤢᤏᤧ᤹ ᤛᤡ᤺ᤔᤠ ᤐᤠᤱᤄᤢ॥ ᤂᤢᤏᤧ᤹ ᤂᤪᤡᤛ᤻ᤋᤧᤴᤏᤣ ᤀᤠᤒᤡᤖᤧᤸᤗᤧ ᤁᤠᤰ ᤐᤠ᤺ᤴᤜᤠ᤹ᤀᤠᤱ ᤀᤠᤰᤂᤣᤗ᤹ᤖᤡᤰ ᤀᤠᤏᤡ᤹ ᤐᤡᤔᤠ ᤀᤠᤴᤇᤢᤰᤏᤧᤴᤒᤣ᥅ 33 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠᤜᤠ᤹ ᤜᤠ᤺ᤳᤗᤧ ᤀᤠᤵᤋᤡᤰ ᤁᤢ᤺ᤵᤔᤠ ᤛᤢᤰᤋᤢᤛᤡ᤹ᤒᤣ᥅ ᤜᤠ᤺ᤳᤗᤧᤀᤠᤱ ᤔᤧᤛᤢᤰᤋᤢᤴᤇᤡᤴ. ᤌᤣᤀᤠᤱᤓᤧᤸᤗᤧ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤁᤧᤈᤥ᤺ᤰᤐᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣᤖᤥ॥ 34 ᤀᤠᤏᤡ᤹ ᤜᤠ᤺ᤳᤗᤧ ᤐᤠ᤺ᤴ ᤌᤡᤰᤔᤠ ᤀᤠᤛᤢᤰᤐᤣ᥅ ᤜᤠ᤺ᤳᤗᤧᤀᤠᤱ ᤀᤠᤴᤇᤢᤰᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋ ᤕᤧᤛᤢ᤺ᤴ ᤛᤩᤧᤀᤠᤱ ᤀᤠᤸᤗ ᤂᤢᤏᤧ᤹ᤃ ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱᤗᤧᤵᤔᤠᤱ ᤕᤢᤱᤗᤥ. ᤜᤧᤰᤁᤩᤠᤱ ᤀᤠᤏᤡ᤹ ᤗᤠᤃᤡ ᤐᤣᤗᤡᤃᤧᤴ ᤋᤢᤘᤠᤀᤠᤱ ᤆᤥᤃᤢᤖ ᤕᤢᤱᤗᤥ॥ 35 ᤜᤠ᤺ᤳᤗᤧ ᤂᤪᤡᤛ᤻ᤋᤖᤧ ᤁᤢᤔᤡ᤺ᤶᤈᤡᤗᤠᤶ ᤛᤧᤶᤔᤠ ᤀᤠᤛᤢᤰᤐᤣ᥅ ᤕᤧᤳᤋᤢᤰᤂᤣ. ᤀᤡᤏᤥᤃᤧᤴ ᤋᤢᤰᤂᤣ. ᤏᤡᤱᤄᤢᤶ. ᤛᤠᤰ. ᤆᤠᤱᤔᤠ ᤘᤠ᤺ᤵᤔᤠ ᤜᤥ᤺ᤵᤔᤠ. ᤁᤡᤵᤔᤠ ᤁᤧᤄᤢ᤺ᤒᤠ ᤕᤧᤶ ᤀᤡᤃᤪ ᤛᤡ᤺ᤔᤧᤸᤗᤧ ᤛᤧᤶᤔᤠ ᤀᤠᤛᤢᤰᤐᤡ᥅ 36 ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ.
“ᤂᤧᤏᤧ᤹ ᤏᤛᤠ᤺ᤴ ᤆᤥ᤺ᤰᤁᤠᤛᤡᤃᤧᤒᤠᤸᤗᤧ ᤌᤡᤰᤕᤠ᤺ᤴᤎᤰ ᤔᤧᤛᤧᤖᤡᤃᤧ᤹ᤖᤥ॥
ᤛᤧᤵᤔᤠ ᤁᤧᤒᤥ᤺ᤱᤒᤠ ᤔᤧᤸᤗᤢᤰ ᤁᤢᤀᤡᤛᤡ᤺ᤰ ᤔᤏᤠᤜᤠ᤹ᤖᤧ ᤔᤧᤔᤧᤳᤋᤡᤃᤧᤖᤥ॥”*
37 ᤁᤴ ᤁᤠᤰ ᤐᤠ᤺ᤴᤜᤠ᤹ᤀᤥ ᤀᤠᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤐᤠ ᤂᤪᤡᤛ᤻ᤋᤗᤠᤶᤒᤠ ᤀᤠᤏᤡ᤹ ᤌᤱ ᤁᤧᤏᤠ᤺ᤶᤒᤠᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤠ᤹ᤖᤥ॥
38 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡ᤺ᤶᤈᤡᤗᤠᤶ ᤀᤠᤏᤡ᤹ ᤌᤣ᤺ᤸᤗᤧᤀᤠᤱ ᤛᤧᤶᤔᤠ ᤀᤠᤴᤇᤢᤰᤏᤧᤴᤗᤥ ᤁᤧᤗ᤹ᤒᤠᤴ ᤏᤡ᤺ᤛᤢᤱ ᤛᤢᤖᤢᤱᤅᤠᤱ ᤘᤠ᤹ᤀᤠᤖᤥ॥ ᤛᤡ᤺ᤔᤧᤴ ᤏᤢ ᤜᤡᤱᤔᤧᤸᤗᤧ. ᤔᤠᤱᤗᤠᤀᤡᤱᤒᤠᤜᤠ᤹ ᤏᤢ ᤑᤧᤴᤛᤠᤶᤜᤠ᤹ᤖᤧ. ᤁᤴ ᤕᤧᤶ ᤏᤢ ᤋᤠᤕᤧᤶᤒᤠ ᤐᤠ᤺ᤴᤜᤠ᤹ᤖᤧ. ᤀᤡᤃᤪ ᤀᤠᤳᤋᤡᤴ ᤔᤢᤰᤛᤠᤶᤜᤠ᤹ᤖᤧᤀᤠᤱ ᤛᤧᤶᤔᤠ ᤀᤠᤴᤇᤢᤰᤏᤧᤴ. 39 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤡᤸᤗᤧ ᤁᤢᤈᤱᤎᤠᤱᤒᤠ ᤏᤢ ᤁᤢᤛᤡᤃᤠᤱᤒᤠ. ᤀᤡᤃᤪ ᤁᤠᤰ ᤏᤠᤘᤠᤃᤧᤴ ᤆᤀᤡ᤺ᤳᤋᤥᤒᤠ ᤔᤢᤰᤛᤠᤶ ᤌᤣ᤺ᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡ᤺ᤶᤈᤡᤗᤠᤶ ᤛᤧᤶᤔᤠ ᤀᤠᤴᤇᤢᤰᤏᤧᤴ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢᤗᤠᤶ ᤗᤢᤱᤔᤠ᤹ ᤀᤠᤍᤢᤰᤋᤧᤀᤠᤱ ᤘᤠ᤹ᤖᤥ॥
* 8:36 ᤏᤡᤱᤘᤠ᤹ᤑᤢᤛᤠᤶᤗᤥ ᤛᤢᤶ ᥊᥊.᥈᥈